اخواتى نصيحة من اخت
اكبر غلط تعطين الطفل او المراهق لابتوب بروحه حقه ... ياخذه داره بروحه و محد يدري شنو يسوي
لاتقولين ايميل
ترى حتى الإيميل في اشتراك يسوونه على مواقع معينه يحطون ايميلهم و يطرشون لهم صور جنسية على ايميلهم + قصص جنسية على الإيميل ..... و هذي وايد صايرة بين المراهقين .... هذا غير المحادثات الجنسية في المواقع الثانية
بتقولين و المدرسة تحتاج كمبيوتر ؟؟
الحل يكون لابتوب واحد للعايلة كلها و ينحط بالصالة مع برامج فلتر حماية من المواقع الوصخة و الصور الوصخة لان باجر الولد راح تلقينه يطبق اللي يشوفه مع خواته او اي بنت يشوفها ....... لا تقولون مبالغة .... احنا بوقت يخرع ديربالك على الولد و البنت
حتى الموبايل ..... 80% استخدامه لصور و فيدوات جنسية بالبلوتوث او مواعد بين البنات و الاولاد و ألحين بعد بلاك بيري اللي فيه انترنت كامل ... يعنى كملت .... نوفر لهم كل وسائل الإنحلال و نسميها ترفيه
وقت العطل ..... دخليهم نوادي يودونهم رحلات يحركون عضلاتهم و يطلعون طاقتهم بشي مفيد بدل مايكون قاعد مجابل الكمبيوتر طول اليوم حتى الدورة الدموية ماتتحرك بجسمه
حتى لو في مراقبة ....
انتى على باللك المراهق لما يمسك الابتوب و يدخل الانترنت بروحه ... راح يدخل على مواقع دينية مثلا !!!!!!!!
خلي عيالك قراب منك مع توجيهات دينية كل فترة بأن هناك حسيب رقيب يراقبنا فوق و يسجل كل اعمالنا ...... على الأقل لما يكملون 18 سنة ة يعرفون الصح من الغلط. انا ماحطولي اهلي موبايل الا لما دخلت الجامعة كنت ابجي و اعاند و كل شي سويت علشان يحطون لي ...... و ألحين أحمد ربي ألف حمد و شكر ان اهلي كانوا حازمين معاي لأنهم خايفين علي و منعونى.
في نوادي دينية كثيرة وقت الدراسة و في وقت العطل تهذب شخصية المراهق و تحرص على الصحبة الصالحة و تساعد الأب و الأم على ترسيخ الأخلاقيات .... لان الأساس اهو التربية مو تخلين كل شي بالبركة ماشي و بعدين تقولين ولدي عاق...نوادي مثل السراج المنير (مجانا) ، نوادي د. محمد الثوينى اللي تخصصه فئة المراهقين .... و غيره ...... هذي افضل بكثير من قعدته مجابل اللاب توب او تعبثه بالتلفون
و بعدين لاتقولين يهال توهم صغار مايعرفون هالسوالف...... ترى اليهال من عمر 8 سنوات كل شي يعرفون بهالزمن و كلامهم بينهم و بين بعض مثل الكبار
و في حادثة من ولد بثانية ابتدائي في مدرسة مختلطة طلب من بنت معاه بالمدرسة انها تبوسه جدام المدرسة قالتله وين ... اشر على شفايفه .... و المدرسة تطالعهم و تضحك (مدرسة اجنبية طبعا عادي عندهم هالسوالف)..... هذولي بثانية ابتدائي
اذا منعتى الكمبيوتر الا بحضورك و منعتى الموبايل ..... ماراح يموتون في اكثر من وسيلة ترفيه بديلة في سونى في بلي ستيشن ... في نوادي مفيدة تنمى هواياتهم بهالعمر ...في وايد شغلات بديلة و مفيدة و تقوي جسمهم بدل القعدة على الكرسي و الخمول
يارب تحفظ عيالنا و تحسن اخلاقهم و تبعد عنهم رفقاء السوء
يعطيج العافية على النصيحة
انا للحين الحمدالله ما عطيت حق عيالي موبايل او لابتوب لانهم صغار رغم ان ولدي عمره ثلاث سنوات يقول ابي لابتوب لان عيال عمه صغار عندهم و كله يطالع معاهم على الابتوب مسرحيات اطفال و صور قطاوة
بس انشالله ناوية اذا كبروا شوي اشتري حق عيالي موبايل بس يستخدمونه لما يطلعون مع اهلي او رحلة مع المدرسة او لما يكونون معاي بالمجمعات انا اتشرى و هم بالالعاب لاني وايد اخاف عليهم و احاتي
انا ما احب الاهل اللي يعطون عيالهم الكمبوتر 24 ساعة لانهم واثقين من عيالهم
مهما الانسان كان واثق من عياله لازم يراقبهم
لان الاطفال في سن المراقبة في زمننا هذا سهل انهم ينحرفون
و بقول قصة رفيجتي
تقول صادت بنتها تكلم فزفتها و قالت حق ابوها
ومرة البنت قالت حق امها ليش تصكون عليي
رفيجتي فلانة تكام و امها تدري !!!
يعني تبي امها تسكت عليها
هالموبايلات مصيبة بايد عيالنا خصوصا البنات
فما انصح ان تعطونهم موبايل دايما
و ماشالله عيال هالايام توه ما فقس من البيضة يبي موبايل و لابتوب نفس اصدقائه
