اليوم يناقشون راتب مرافقة الزوج .. يااارب

[اختكم بالله]

جراح الغرام حبيبتي يفرق اذا عن طريق الجامعه او التطبيقي او الديوان او التعليم العالي

بنات اكدوا القرار ولا كلام لان اخوي راح الديوان قالوا اقروه وراح التربيه قالوا اقروه وراح ندز على المناطق التعليميه لما راح المنطقه التعليميه قالوا ماوصلنا شي والقرار للدبلوماسيين

بنات متأكدين ان القرار لزوجة المبعث عن الديوان ولا لا ؟

 

[De3La^85]

خوخه

ان شاءلله ينزل لنا قريب لان القرار موجود بس باقي يوصل المناطق التعليميه وان شاءلله ما يطول

انا اتوقع يبيله 3 او 4 شهور على ما يوصلهم ويطبقونه ,, الله كريم

 

[مجنونة حبه]

حبيت اقول شغله ماله شغل ريلج من وين مبتعث
ماله شغل
على حسب دوامج انتي
مو انتي امطلعه اجازه المرافق من دوامج انتي خلاص شكو ريلج من وين دازينه
يعني يعتمد على وزارتج وثاني شي انا قلت ترا شغله بطوله اهو صح نزلوا القرار واعتمدوه بس يبيله فتره على مايمعون اوراق الموظفات الي مرافقين ازواجهم
وبعدها للحين ماحددوا من اي شهر يتم صرف يعني من شهر ٣ يحسبونه ولا شهر اربعه
يعني نطروا ٣ اشهر علاقل وبعدها شوفوا

 

[اختكم بالله]

مج مج انا مايهمني متى ينزل اهم شي ينزل الراتب سواء بعد شهر او ٢ او ٥ المهم ينزل مايعشمونا عالفاضي

 

[مجنونة حبه]

ان شاءالله ينزل باذن الله
بس اهم شي فايلكم موجود بقسم الماليه تابعه حق دوامكم هذا اهم شي
واذا مابين الحين ان شاءالله بعد شهر يبين
لان انا بدوامي قالوا واصلنا القرار بس ننطر اجتماع علشان يبين من اي شهر يتم الصرف لان للحين ماحددوا

 

[اختكم بالله]

ان شاءالله

 

[هــلا الكويت]

السلام عليكم و رحمة الله و بركاته

اااااخر الاخبار ..

بنات انا تابعة للتربية .. اليوم خليت وحدة تسأل لي بالتربية بالوزارة قسم المالية قالت لحد الان القرار حق زوجة الدبلوماسي فقط

المهم اختي اسألتلي بالمنطقة التعليمية و انا تبع العاصمة .. اسألتها البعثة من وين ؟؟ و بعدين قالتلها جيبي الورقة

اللي تثبت انهم بعثة و انا اخلص لج معاملتها .. اي اسألتها زوجها موظف؟ قالت اي فقالتلها خلاص يمشيلها راتب بس

جيبي الورقة و اسويها لها .. بدز الورقة لاختي و تشوف الاحد شيصير باذن الله

و بعد اختي الثانية كلمتني و قالتلي ان رفيجتها توها بتطلع مرافقة زوج و اهي تسوي اوراقها

قالولها لج راتب كامل ..

اي و على فكرة بينزل باثر رجعي بشهر 5 .. يعني مابقى شي ..

خلوا اهلكم بالكويت يسوونها لكم و يسألون احسن ،،

 

[بطه فيها نطه]

من جريدة الجريده


أصدر ديوان الخدمة المدنية قرارا بمنح الزوجة الموظفة المرافقة لزوجها او الزوج الموظف المرافق لزوجته اجازة خاصة مع مرتب كامل غير منقوص عند مرافقة احدهما الاخر خلال فترة الايفاد للعمل او الابتعاث الدراسي للخارج ابتداء من الشهر الجاري.
وقالت مصادر قيادية في الديوان لـ'الجريدة' ان الديوان بصدد تقديم كثير من المزايا للمرأة الكويتية الموظفة خاصة في ما يتعلق بالارامل والمطلقات من الكويتيات الموظفات في القطاعين الحكومي والخاص مشيرة الى ان الديوان بصدد صرف راتب كامل لمرحلة الامومة للمرأة الكويتية الموظفة في الحكومة فضلا ان اجازة الوضع مدفوعة الاجر.


جريدة الراي


أصدر مجلس الخدمة المدنية قرارا بشأن منح الموظف والموظفة اجازة خاصة بمرتب لمرافقة الزوج الموظف في الخارج، إذ حدد القرار في مادته الاولى بجواز الوزير أن يمنح الموظف او الموظفة اجازة خاصة بمرتب لمرافقة الزوج الموظف في الخارج اذا نقل أو أوفد في بعثة علمية أو اجازة دراسية أو مهمة رسمية أو اعارة لمدة لاتقل في أي من هذه الحالات عن ستة أشهر متصلة ويقصد بالزوج الموظف الذي تتم مرافقته في هذا المجال من يعمل باحدى الوزارات او الادارات أو الوحدات الادارية التي تكون ميزانيتها ضمن الميزانية العامة للدولة او ملحقة بها أو باحدى الهيئات والمؤسسات العامة فقط ولا يجوز في جميع الاحوال التصريح بهذه الاجازة للموظف او الموظفة الخاضع لفترة التجربة الا بعد قضاء هذه الفترة بنجاح وثبوت الصلاحية للوظيفة.
ونص القرار في مادته الثانية على ان يقصد بالمرتب في مجال تطبيق هذا القرار المرتب الاساسي والعلاوة الاجتماعية وعلاوة الاولاد وعلاوة غلاء المعيشة والدعم المالي لمن يستحقه وتوقف اثناء هذه الاجازة كافة انواع البدلات والمكافاة والتعويضات الاخرى اي كان نوعها او مسماها، كما توقفت المكافاة او الزيادة التي تصرف شهريا بصفة شخصية اثناء هذه الاجازة ويستثي من ذلك بدل السكن لبعض الفئات الوظيفية المستحقة لهذا النوع من البدلات حيث من المقرر استمرار صرفه كاملا اثناء الاجازات المختلفة سواء كانت بمرتب او بنصف مرتب او من دون مرتب.


بنات كل تاخيره فيها خيره .. وهذا القرار يشمل

الموظفه المرافقه ( المبتعث

دراسيا من اي جهه كانت - موظف بالخارج - دبلوماسي - دوره او اعاره لاتقل عن 6 شهور متصله )

عموما التعميم وصل اغلب الوزارات .. بس مثل ماانتوا شايفين مافي حكومه حاليا

واعتقد اهي السبب في هالشي ... لانه محد مخول يوقع على القرار الا الوزير

علشان يمشي ... ووزير ماكوا

اهي مسالة وقت اكيد والله يرزق الجميع .. بس اهم شي تتاكدون من سالفة انك مقدمه اجازه

خاصه واهي مرافق زوج ...

تنبيه / الوزاره اللي تقول لكم ماوصلنا شي مايدرون عن هوى دارهم .. يامه راكضنا من مكان ليه من مكان والسبه مايعرفون
شنو اجراءاتهم ... واخذوها مني كنت موظفه بمكتب وزير

وماره علي هالسوالف اي قرار

فيه فلوس او سفره او اعمال ممتازه حطه الوزير بالدرج لين

تطلع روح الاوادم يالله يطلعه جنه بيدفع

من جيبه ..

 

[هــلا الكويت]

مشكووووره بطه صح نفس الكلام عالشهر الجاي تترتب الامور و تتضح

 

[مجنونة حبه]

هههههههههههه عجبتني جنه فلوس من جيبه
انا راي مع بطوط اهم شي اذا عندج اجازه مرافق لا تحاتون ان شاءالله

 

[اختكم بالله]

اخوي راح الوزارة وكلمهم وقالوا القرار وافقوا عليه وعطاه ورقه قال ودها المنطقه واذا قالوا لك لا ومن هالسوالف خلهم يدقون عليه حاط رقمه والحمدلله اكدوا الخبر بس الله يعينا على المنطقه البنات هناك مايدرون وين الله قاطهم

هلا الكويت يعني بينزل شهر ٥
بطوط كلامج عدل جنه بيعطونا الفلوس من جيبهم

 

[هــلا الكويت]

اي إن شاءالله خوخه على شهر ٥ مابقى شي شهر و باثر رجعي باذن الله

 

[اختكم بالله]

ان شالله بس قالوا لج لازم مراجعه ولا ينزل دايركت

 

[هــلا الكويت]

والله البنت اللي بالمنطقة اطلبت من اختي ورقة اللي تثبت البعثة و بس

قالتلها جيبيها و انا اخلص لج المعاملة

 

[اختكم بالله]

زين والله وان شالله ينزل من غير حوسه لان لاعت جبدنا من كثرة المراجعات بين الديوان والوزاره والمنطقه

 

[بطه فيها نطه]

الله كريم بنات ... تفائلوااا خير ان شاء الله

 

[اختكم بالله]

ان شاءالله

 

[ام يوسف2011]

بنات انا مااشتغل وبشتري رخصه عشان ينزلي معاش من دعم العماله تتوقعون بيعطوني معاش مرافق زوج وله لا ؟؟؟

 

[اختكم بالله]

ام يوسف شلون تشترين رخصه ودعم العماله مافيها مرافق زوج مادري البنات يفيدونج

 

[رضاب 66]

للررفع