الولاده بمستشفى رويال حياة ؟؟عن تجربه!!

[*دانة الخليج*]

السلام عليكم


اود من كل اخت جربة الولاده بمستشفى رويال تعطينها رايها وبكل صراحه علشان نستفيد منها؟؟


وارجو ذكر المميزات والعيوب بهذا المستشفى؟؟

لاني متردده لان في ناس تمدح وناس تذم فيه!!

ولكم منى جزيل الشكر:aha:

 

[احلى@كويتيه]

حبيت ارفع لج الموضوع

 

[مبدعة]

وايد من بنات المنتدى جربوا المستشفى لكن كل وحده لها تجربه غير عن الثانيه و في تجربة زينه و في تجربة شينه

يعتمد عليج انتي ونفسيتج اذا مرتاحه لهم روحي لهم و اذا لا شوفي غيرهم

يمكن احد يمدحه ويطيره السما بس ما يطلع معاج نفس الحظ

 

[سنا الفضه]

تبين الصج بكمل السنه من ولدت فيه

وايد حبيته وارتحت فيه

كمامهم مو قوي سيده عطوني قوي لاا عطوني اياه بالتدريج بعدها طلبت ابره الظهر ويتني دكتوره وعطتني ايااها

كعنايه ممتازييين جدااا

تحسين بالرفاهيه على الاقل توني طالعه من تعب ابي اتدلل يومين بس عقبها لاحقه على الواق والويق

من ناحيه الغرف نظيفه والعنايه مميزه جدا

من ناحيه الاكل ايبون لج منيو وتختارين الي تبينه بس استغربت انه حاطين بالمنيو بيبسي وهالشي مو زين للوالده بالله وحده توها والده وماتدري انه موزين تروح فيها

من ناحيه السسترات عند ويهج اصلا كل شوي يطلون عليج ساعات امللل منهم

من ناحيه العنايه بالبيبي عليه كاميرا 24 ساعه اقدر اطالعه واشووف شيسون فيه لايف وممكن حتى يغسلون له هدومه وهدومج بخدمه اللاندري

العنايه فيني رايتهم بيضه

بعد شنوو
هذا كل الي شفته منهم وااايد حبيت المستشفى وارتحت فيها

بس استغربت انه في بنات يذمونها كل وحده وراحتها بصراحه انا رحت لها وطليت على مستواها واستخرت وسبحان الله باخر لحظه وانا بالسياره قررت ارووح لها وخليتهم يلفون فيني لرويال والا كنت بالي الهادي لاني والده بجري فيها

بس نتيجه الخيره ربي سخر لي اروح لها وولدت والحمد لله وايد زينه

الله يقومج بالسلامه ويهوونها علييج ياااربي وتشوفين ظناج بحظنج اثنينكم ماعليكم الا العاافيه

 

[ZajiL]

ماعندي فكره بس مرت اخوي والده فيها وتمدحها

 

[زوجي نظر عيوني]

انا نفس اختي سنا الفضه وهم انا راده على جم موضوع عن رويال حياة صج صج روعه ومتعجبه من اللي يذمونه
وارد واقول انا ولدت برويال حياة يوم 27 \3و حجزت بالياسمين 3 ايام وطبعا دكتورتي كانت ليلى اشكناني يعني مو من عندهم وهم خذت الدكتوره فلوسها من المستشفى مره وحده وطلع علي ب 3 الاف وشوي طبعا بعد الخصم اذا كنتي تشتغلين بوزارة وعندج كرت حق الدوام يعطونج خصم وطلعت علي الولاده بالفين وشوي .
بس صج خدمه واهتمام وراحه باااااااااااااااااااااااااااااااال عالاخر جنج اميره وهم عروضهم وايد وايد حلوه
على قولت البنات يقولون وايد غالي اهو صج غالي بس يسوى شي متعوب عليه صراحه
اهتمام وراحه وعنايه وهدوء تحسين نفسج ملكه كل شوي يدشون يسالونج تعبانه او في عوار وغير الدوا اهو يذكرونج فيه وطبعا غير الاكل يسالونج شتحبين تاكلين وباي وقت وطبعا لج حلو يدزونه لج وغير هذا كله جلسة مساج لريلج وهم ياخذون عينه دم من ريول البيبي ويدزونها بره الكويت عشان يشوفون اذا في امراض وراثيه لا سمح الله عالاقل تعرفين من الحين وهم تشوفينه بالشاشه مثل قناة عالتلفزيون وانتي مرتاحه حتى لو مايابوه لج عالاقل تشوفينه وهديتهم لج لما تطلعين مثل طريقة شهاده التقدير فيها صورة البيبي واسم دكتورتج والسستر اللي كانت موجوده حزة الولاده كافي بعد الواحد شيبي

 

[al7noona]

انا مرت خالي اولدت فيه ماشالله تمدحه وانا كل ما اروح لها السسترات معتنين فيها وبالياهل واهيا اولدت قيصيريه عند د خالده وايد تمدح هالدكتوره

واهيا والده قيصيريه اقعدت اربع ايام وكانت قاعده باصغر غرفه نسيت اسمها وباليوم الثالث سوت استقبال بالقاعه والشي الحلو ان اذا حجزتي القاعه كل شي عليهم الخدمه ثنين فلبينيات ومنهم طقم كامل تقديم ومزخرف يهبل وحتى السرير معاه الكفر لونه ذهبي بس مرت خالي حطت عليه قطعه بالعرض علشان يصير حركه شوي لان ساده وطلع عليها ب 1600

 

[*دانة الخليج*]

يعطكم العافيه على الردود

 

[أم بنات]

أنا شهر سبعه إلي طاف ولدت فيه ..... ماأنكر راقي حتى بتعامل السسترات والخدمه بالجناح بس فيهم عيب واحد وهو وايد مهم بالنسبه لي وهو مافي خبره وشوفي شلون

وأنا بغرفه الولاده تعسرت ولادتي ودكتورتي من بره المستشفى وإرتفع الأسيتون وهم مايدرون تخيلي الدكتوره لما يت تقولهم ماتشوفون بالجهاز إن الأسيتون مرتفع والدكتوره تداركت الوضع وبعدين إلتف الحبل السري عالبيبي وقررت الدكتوره قيصريه ورحنا غرفه العمليات يدورون دكتور البنج لاحس ولا خبر مايدرون وينه وأنا بموت الياهل بتطلع والحبل يردها وعلى ماشرف الدكتور تقوله الدكتوره وين المساعد مالك؟ يقولها ماأدري إحنا مو متوقعين ولاده قيصريه!!!!!!!!!!!!!!

الظاهر إلي يدش عندهم لازم يولد طبيعي...... بصراحه كانت أسوأ ولاده بحياتي

 

[om shoyokha]

اي هذا الي يخوف فيهم كلمن يقول قلة الخبرة

خصوصن بالسسترات

انا عن نفسي ماجربته

 

[الهما]

حبيبتي يعتمد الموضوع على شيئييين
أولا نفسيتج انت يعني صلي استخارة و روحي المستشفى و تمشي فيه و دخلي غرفة الولادة و الغرف اللي تستقبلين فيها و شوفي نفسج ترتاح له و الا لا لأن الله سبحان الله يلهمج .
ثاني شي المادة لا توهقين عمرج المستشفى غاااالي اذا حاطة في بالج مبلغ 600 خلييهم 1200 الواحد ما يدري شيصير حزة الولادة لا سمح الله قيصرية ... الطفل يحتاج حاضنة ...
انا بالنسبة لتجربتي فهي الحمدلله اكثر من رائعة
انا بجر و واايد ارتحت اول ما دخلت العناية الملكية ما يخلونج محتاجة شي بالمرة.... اذكر اني كنت بردانه (ولادتي كانت بعز موجه البر) و يابولي كنابل حاطينها بسخان .... و اذكر اني طابت ابرة الظهر و كان الدكتور لله الحمد شااطر و دكتورتي خالدة المجيبيل ممتازة اذكر اني اول ما دخلت اتصلوا فيها ما خذت نص ساعه الا اهيا عندي و لا هدتني الا لمن ولدت...
الغرفة انا خذيت ياسميين كانت حلوة ... بس انصحج بالقاردينيا تقريبا نفس السعر و تع نااس واايد خاصة اذا كانو ربعج وواايد
الاكل حلة بس في اشياء مو زينه حق الوالدة مثل اللبنه و البيسي و البرتقال..هذا انت ديري بالج لا تطلبين منه
و اذكر سولوي مساج هذا يكون مع الباطج
والبيبي 24 اشوفه بالكاميرا ....
انا انصح الكل يولد فيه فعلا مستشفى رووووووووووووووووووعه
واايد حبيته

 

[*دانة الخليج*]

يعطيكم العافيه

منو جربت الولاده القيصريه برويال حياه؟؟

وشلون عن ابره الظهر ؟؟؟؟

 

[*دانة الخليج*]

ارجووووووووووووو المساعده؟؟؟؟؟؟؟؟


:yaaaaaarb::yaaaaaarb::yaaaaaarb::yaaaaaarb:

 

[*دانة الخليج*]

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

 

[~La PearLa~]

اب نبي تجارب يديده

 

[سموره 87]

انا والده فيه ومسويه تنظيفات الصراااحه اينن ووايد ارتحتله بس اللي خرب في دكتوره سوريه بطوارئ الولاده كرهتني عمري نفيييييييسه ولسانها طويل عمى بعينها

 

[meme23_80]

للرفع

 

[اسأل ضميركـ]

انا والده فيه عند دكتوره ندا بوخضور وعن تجربه ١٠٠٪



بصراحه عنايه ونظافه وراحه ولا افكر اغيره وباذن الله ولادتي الجايه فيه 

 

[أبله هنوف]

خووووش موضوع

 

[أم عزيـز]

بصراحه انا جربت الولاده فيها قبل 4 سنوات
وتجربتي كانت وايد روعه ومريحه لله الحمد

سواء من فحص السستر اللي كانت طول الوقت موجوده معاي في غرفه الولادة
هم غرفه الولادة كانت وسيعه وشرحه يعني ما تحسين انها غرفه ولادة
غير جذي كانت عندي 2 سسترات على راسي وحده يم جهاز الطلق وتراقب تخطيط قلب الياهل
والثانيه تجيك على حالتي وكل فتره تفحصني علشان تعرف اشكثر انا مفتوحه

زولما ولدت لبسوا البيبي من عندهم ملابس مذركير ويسبحونه كل يوم وايون ياخذون مني ملابس كل يوم
واتصل عليهم يردون بسرعه وكنت ماخذه غرفه ليلي صراحه وايد حلوه وما حسيتها صغيره مقارنه في مستشفى السلام بما ان ولادتي الاولى كانت فيها

وطبعا الاكل شي راقي منيوو عجيب تختارين اللي تبينه تحسين جنج بفندق
انا نفسيتي كانت وايد مرتاحه هناك وحبيت التجربه
بس للاسف الحين دكتورتي طلعت من ريال حياة وما تولد الا بالسلام
والحين انا مضطره اولد بالسلام مع اني حيل حيل ميته على رويال حياة بس شسوي