النسيان بعد الولادة و الحمل شنو سببه ؟

[اخت خالتهم]

السلام عليكم و رحمة الله وبركاته


شلونكم بنات
مريت بظروف و ما قمت ادخل


بس ملاحظة شغله بعد الولادة الي اهي النسيان


اقول السالفه الف مره
و اسأل السؤال الف مره
و احط الشغله و انسى مكانها
اشتري اغراض انسى اني شريتهم !!!!!
و ارد اقول بشتريهم

ماخذه فلوس من خواتي اهم ذكروني ويبون مني

انسى انسى
صايره نسايه
مو مرض بس تقريبا مأزمتني السالفه نسبة 40٪
حتى انسى اذا تسبحت و الا لا
و متى نزلت الدوره
وجم يون صارلي


هل هذا طبيعي بعد الحمل و الولاده ؟

 

[مطلقه جريحه]

انتي حامل الحين باي شهر
وارسلي رقمك اضيفك واتس اب

 

[اخت خالتهم]

انا والده من ٣ اشهر الحمدلله

 

[<<الأميره>>]

صارت معاي
ونصحوني اخذ حبوب اوميغا3

مع الوقت بتتحسن. ذاكرتج بس اقري قرآن دايم ترى ينشط الذاكره

 

[Model Look]

عدلي تغذيتج

حطيلج نوت بالاشياء المهمه

اكلي اوميغا 3

النسيان طبيعي انا وااايد انسى من ولدت بجري وشوي شوي ترد الذاكره

بس النوت يساعد وايد

 

[t.o.o.ot]

أي الحمدلله علئ كل حال بس
شغله لاتطاق حتى ألباسورد مال الأب ستور كل أسبوع أحط لي واااااحد الذاكرة مييييييح الله المستعان

 

[كتكوته حبيبي]

اي عادي صارت معاي اول ماولدت وتوني من شهر تعدل الوضع اعتق
د السبب الكمام لان قريت مره ان يقتل خلايا المخ

 

[.:lady bug :.]

حبيبتي شوفي عبدالله المطوع شقال
لمن يتكون الجنين ببطنج ياخذ الزيوت المخ منن زيوت مخج
والمخ كله دهون

وهذا سبب النسيان

شلون التعويض

حبوب اوميغا ٣ ترد هالزيوت لمخج وتردين تذكرين وتنشط الذاكره

 

[.:lady bug :.]

موجود فيديو عبدالله المطوع باليوتيووب

 

[c a t w o m a n]

صار معاي جذي بالبداية من كثر ما شفطت بالكمام

وبعد الولادة من الإرهاق و قللة النوم

 

[غاليه]

والله يا قلبي اللي اعرفه ان بسبه البنج او الكمام وصارت فيني وايد​

 

[بـ سـ كـ وتـ ة]

طبيعي حبيبتي (سمعت إن المخ ينكمش بالحمل 10%) بس سواء صحيحة المعلومة أو غلط

النسيان حايشج حايشج هههههه

اهتمي بأكلج وكل يوم اكلي نوع مكسرات جوز لوز اللي تحبينه

واستمري على فيتامينات الحمل

واستخدمي وسائل التذكير اللي تناسبج نوتة تلفون منبه اللي يريحج

ومبروك ما ياج الله يحفظ لج مريوم

وعلى فكرة: تحت توقيعج طالع since we said goodbye قلت أنبهج يمكن ما شفتيها

 

[مولاي الفرج]

يقولون عقب سنتين يرد كل شي على حاله

بس مايمدي يصير سنتين الا الوحده تفكر تحمل بالثاني خخخخ

 

[M!SS.LOBY]

عادي تصير عند بعض الناس

 

[الـــغـــلآ]

عجبتني اللي تبي رقمج ههههههههههههههه

خوخا انا اقول دزيلنا كلنا رقمج احسن


و بخصوص النسيان انا قبل يومين باركت حق رفيجتي ثلاث مرات باليوم الصبح و العصر و بليل و اكون ناسيه اني باركتلها ههههههه يلااا زيادة الخير خيرين


لازم تتعدل التغذيه هذه مو حاله خصوصا اننا نداوم


صج بسالج تداومين ولا موقفه قيدج !

انا حاليا الذاكره مو قاعده تساعدني بالدراسه كلللش الله يستر لي عقب الولاده

 

[Aloe Vera]

اعتقد نقص اوميجا ٣ اثناء الحمل
و هم اكلي اشياء اللي تقوي الذاكرة

 

[نوفآ]

نفسي حالتي والله
اشوف نوتي بالسيارة اقولها باخذها اذا نزلت
وانزل وما اخذها وما اتذكر الا اذا سسالني عن النوت

اخوي طالب مني اكتب له موضوع وما اتذكر الا يدز لي واتس اب خلاص لا تكتبين

واشياااااء واااجد

شي متعععب

 

[حـوراء]

هذا طبيعي مع الحمل ، لهذا السبب ينصحون الحامل بأكل السمك مرتين إلى ثلاث في الأسبوع لأن الحمل يؤثر على القدرة العقلية خصوصا النسيان والسمك غني بالاوميغا3 اللي هي تغذي الدماغ وتعمل على تنشيطه
الاوميغا 3 وايد مفيدة لهالوضع ، وأقري قرآن كثر ما تقدرين
واكلي زبيب اللي اهوا الكشمش 21 حبة على الريج ينشط الذاكرة
عموماً الوالدة تحتاج 3 سنوات على ما تستعيد كل قدرتها العقلية والجسدية اللي فقدتها خلال الحمل والولادة

الله يعينج عزيزتي ..

 

[...lo0o0oly...]

اختي سوي تحليل بي 12 اذا ناقص عندج راح يكتبون لج ابر ومن اول ابره بتتحسنين ان شاء الله

 

[&هند&]

يعني مو بس انا الي اعاني والله تعبت انسى متي تجيني الدوره وعافسه الدنيا الله يعنين شكلي بجرب الاوميغا ٣