المغتربين بالاردن وخصوصا أربد

[سويت غاليري]

الجو الحين يجنن والربيع وش حلاته حق الكشتات
بأحط لكم صورة من تصويري الحين

 

[gas-26]

واخيرا في احد رد

ياهلا ويامرحبا

والله فقدت الأمل وألحين ردتلي الروح

هاجر.... الله يوفقج في اختباراتج

بس اي حدايق تروحين خاطري اروح حديقة تغيير عن المجمعات لأن انا اروح المجمعات عشان معاي بناتي ألعبهم في الألعاب

سويت غاليري ... شوقتيني على المكشات عاد زوجي يقولي بس يخلص اختبارات هالشهر بنكشت بس مادري وين





لا تقاطعون حبايبي

 

[سويت غاليري]

هلا gas
الحقي تروحين كشتة هالأيام لأنه ترا أسبوعين وبيحترق العشب لأنه شمسهم يمه حارة حتى لو الجو بارد
روحو وادي شعيب وبدر وجلعد وأم قيس.. بس ترا أم قيس بعيدة شوي بس الآثار مع الطبيعة تستاهل والله

كم أعمار بناتك؟؟
أنا عندي ولدين وبنت 8 و6 وسنة وحدة

وإن شاء الله مبسوطين في عمّان؟؟

 

[gas-26]

هلا فيج سويت غاليري
اعمار بناتي 3 سنوات وسنة واربع شهور
الكشتة قريبة والا بعيدة ترا انا خوافة
وشلون مدارس اعيالج انا ودي اسجل بنتي لروضة للسنة الجاية وابي ثنائية لغة

 

[سويت غاليري]

هلا الغالية المدارس هنا ممتازة لا تفوتينها جد بنتك راح تتأسس عدل
اختاري الأقرب لبيتك وعلى العموم الباصات هنا ممتازة باصات عيالي معاهم مشرفة تنزل معاهم لين الباب والباصات مكيفة وفيها دي في دي

شوفي موقع المدارس هذا

http://www.guide2jordan.com/schools.htm


وعيالي في أكاديمية بناة الغد والروضة عندهم أكثر أكثر أكثر من ممتازة أحسن من المدرسة بكثير
والروضة ثنائية اللغة
مديرة الروضة عراقية مواليد أمريكا بس شنو سيدة محترمة وذوق ما تتخيلين
هي وكل ستاف الروضة روعة

والأاكاديمية كلها ثنائية اللغة وتوجهها اسلامي
هذا موقع الاكاديمية
http://www.baa.edu.jo/


بالنسبة للكشتة فيه القريب والبعيد
تبين قريب السلط وجلعد قراب وعلى العموم ترا الدنيا هنا أمان لا تحاتين

 

[gas-26]

شكلي بروح اسجل بنتي
بنات كل وحدة تقول شنو احسن شي بالاردن اي شي جربته
من مستشفيات عيادات
جمعيات
مخبز
اسواق
اشياء مميزة بالاردن

 

[Om FaJeR]

بنات عفيه اي احد يسال لي في ماجستير انتساب بالادرن ؟؟ يعني اروح حق الامتحانات بس؟

نفس السؤال
؟؟

 

[gas-26]

في
في الجامعة المفتوحة هذ اللي اعرفه وما اظن في جامعة ثانية

 

[Rayooma123]

السلام عليكم كيفكم حبوبات انا جديدة في منتداكم و ماصدقت لقيت خليجيات مغتربات في الأردن:eh_s(11): > دموع الفرح
انا سعودية مغتربة في عمان وبصراحة طفشااانة ماعرف اي احد هنا :eh_s(16):
راح اطق من الملل وحتى لمن اشوف خليجيات استحي اروح واتعرف عليهم :eh_s(22):
أتمنى تقبلوني صديقة جديدة معاكم في التجمع :eh_s(7):

 

[gas-26]

هلا فيج حبوبة

 

[reem1234]

السلام عليكم بنات، انا بروح مع زوجي الاردن ناوي يكمل حقوق بجامعه اليرموك ف راح نسكن باربد، بس سمعت و قريت منكم ان اربد ممله و تضيق الخلق، ف بسألكم في مجال نسكن ب عمان ولا راح تكون مسافه بعيده بين الجامعه و البيت؟ تهقون صعبه ولا عادي، و اذا قعدنا بأربد جم تطلع علينا اجار شقه مفروشه غرفتين و صاله؟ ابي السعر بالدينار الكويتي ولا عليكم امر؟ و اخر اخر اخر سؤال ادري مصختها، شنو الاشياء الي ممكن اسويها الصبح و ريلي بالجامعه عشان ما احس ب ملل،؟ و مشكورين مقدما حبايبي

 

[Hajer~]

سويت غاليري ،
ماشالله الصووره تشوووق مريت على هالامـآكن وآيد ايااام حلوه :$


gas
حبيبتي بالتوفيق ان شالله
بالنسسسبه لـ سؤالج عن الاشيآء المميزه بالاردن ..بقولج عن اللي عجبني وجربت

المستشفيآت : صراحه ماجربت بس اخر سفره لي حملت هناك ومتوهقين بس الحمدلله
كان عندنا كتيـب صغير فيه كل الاماكل والعلاج بالتأميـن .. فـ اخترنا عياده لدكتوره والحمدلله مشا الحال

جمعيات: انا بس أروح كارفور p; .. بس انا كانت لي جم زياره قبل لا اتزوج فـ رحت مركز سلطان مالهم
حلوو ومرتب واحب اصعد فوق صوب المكتبه والادوات المنزليه

أسواق: حــآليـا عاجبني تاج مول اكثر شي اهوا يديد توه فاتح بعد لمن دشيته
حسيت اني داشه الامارات مول p; لا صج حلو وهاادي ومرتب

امممم وفي اماكن حلوه كـ طبيعه اتذكر اخر سفره رحت وآدي فيه سيييل ماشالله وبراااد
وحتى مو بعيد وايد بس يبيله احد يدل لان راح تنزل فيج السياره لي تحت صوب الجبآل
يعني حتا ماصدقت ان هذا بالاردن خخخخخ سبحآن الله

مطآعم : في مطعم حلوو كـ تغيير اسمه تل الرمان مادري اذا تعرفونه
حلو أكله واغلب اكلهم يستخدمون فيه رمان .. والحين قعيكملون فيه مسبح والعاب حق اليهال
صااير فووق الجبل وطلته حلووه ..

مطعم طواحين الهوا : حيييل حلوو من جميييع النواحي وضيافه وكشخه .. أكله عجبني وقعدته حلوه

مطعم ورد : امممم كـ مكان حلوو وراقي بس أكله مايعلى على مطعم طوآحين الهوا

مطعم جامو كشمير ( هندي ) : بس الصراحه ماعجبني كلششش :/ واتذكر يتني لوعه من ديايهم مع اني ماكنت حامل يععني p:
صج صج كرهته .. هذا تقديري لأكلهم

مطعم المحيـط < اذا موناسيه اسمه : أكل بحري بحت كنا نطلب منه ربيآن مشوي وجذي بس ولا مره رحناله وحلوو وكله مال صيد اليوم اييبونه من الامارات

بالنهايه مليت من الاكلات الشعبيه فحـولنآ على فرايديز وابل بيز وهالاكلات الاجنبيه
يمكن في اماكن وايد مارحتها لان ريلي يحب اكل البيـت فكنت أطبخ ومره بالاسبوع نروح مطعم واحيانا مانروح مطعم بس نطلع طلعه عاديه


هذا اللي اتذكره حاليا وان تذكرت بعدين قلت لكم ،
الحين انا بالكويت بعد الولاده ان شالله أروح

وان شالله المره اليايه فيه صور p:
لاني بعد مطوله هناك دراسه وجذي

 

[reem1234]

بنات تكفون احد يجاوبني على اسألتي، انا زوجي الحمدالله انقبل في جامعه اليرموك ف اتفقنا انه يروح اول كورس يظبط اموره و تالي انا الحقه على الكورس الثاني ان شاءالله، بس على كلامكم ان اربد وايد ممله ف سؤالي كان في مجال انه نسكن في عمان و زوجي يروح كل يوم جامعته ب اربد ولا راح يكون مشوار طويل عليه، و هل في مجال انه يحول اي جامعه ثانيه ادا مارتاح باليرموك؟ و ايهو افضل الجامعات الخاصه ولا الحكوميه بالنسبه حق تخصص الحقوق؟ و عفيه اخر سؤال ادري مصختها بس ماعليه تحملوني مالي غيركم و احس اني صج ضايعه، المهم سؤالي: انا الحين موظفه في بنك و بقدم استقالتي قريب و بحاول اتوظف باي وزاره، ف اذا اشتغلت بوزاه في مجال يعطوني اجازه مرافقه زوج ولا صعبه؟ و خصوصا اني راح اكون توني متوظفه بالوزاره، ف تتوقعون يوافقون على اجازه مرافقه زوج؟ و شنو الشروط الي لازم استوفيها عشان يوافقون لي على الاجازه؟ امانه عليم بنات جاوبوني ضروري الله يرضى عليكم

 

[Hajer~]

انا بـ عمان مو اربد فـمادري شنو الفرق بين المناطق ماقدر افيدج من هالناحيه
بالنسبه حق خاصه ولا حكومه .، ترا كله نفس الشي .. انا كنت بجامعة الاسراء خاصه
والحيـن حولت انا وزوجي حق حكومه .. بس ترا ماكو فرق كله بفلوس
والفرق بالالتزام .. الخاصه يصكون صكه والحكومه تقدرين تاخذين راحتج وتتفاهمين مع الدكاتره
( بس طبعا مو كل الخاصه جذي ) .. دكاترتي كانو وايد زينيـن والحمدلله بس ريلي اصر ان نحول يقول احسن
وللحيـن ماداومت بالحكوميه موقفه قيدي حاليـآ وبعد الولاده بروح باذن الله

مرآفقة الزوج .. والله مالي خبره بهالموضوع كلششش
بس كأني سمعت ان لج مدة معينه عشان يعطونج اياها يعني مثلا اداومين جم شهر بعدين يسمحون لج

اسألي اكثرر بعد

 

[gas-26]

هاجر
الله يتمم عليج ويقومج بالسلامة
Reem
اسألج ان شاء الله عن جامعة اليرموك واردلج خبر بس اربد بعيده عن عمان

 

[gas-26]

بالنسبة لي للي جربته بعمان
المستشفيات
جربت الاسراء وما انصح فيه زحمة ومافيه تنظيم ووصخ
وجربت المستشفى التخصصي رعايتهم حلوة وتعاملهم محترم هذا بالنسبة للطوارئ
اما الجمعيات
رحت لكارفور بسيتي مول بس ماحبيته لان دخلته متعبه
واللي عجبني سيتي تاون في مجمع عمان مول اهدى وارتب وارخص
واحسن مافي عمان مول ألعاب الاطفال المكان وسيع والألعاب متنوعه وفيه كافتيريا وطاولات عند الألعاب
وفيه محل بريطاني natural looks نفس ذا بودي شوب واحلا
وسمعت عن مجمع هامتان بعبدون بضاعته بريطانية ودي اجربه واقولكم راي

 

[مهندسه مستقبل]

*
انا مغتربه معاكم بس على وشك التخرج ان شاء الله
و شلونكم مع البرددددددددد؟
مممم اكثر مراجعاتي بمستشفى تخصصي و الهيثم و و ماعجبني مستشفى الاسراء لان زحمه
احلى مجمع طبعا تاج موول و بعدها سيتي مول اذا كنت بدخل سينما لان اكثر طلعاتي تكون سينما لازم كل اسبوع ادش فلم ههه
جمعيه مممنم اغراضي دايم من كارفور و الحلو ان تحت شقتي فيه سوبرماركت و نادي
مطاعم للاسف اشتقت لمطاااعم الكويت والله لان هني اكثر شي اكل من فرايديز و ماكدونلدز زهقت منهم
ابي ربيان نفس مطعم pf حدي ولهت عليه
وعندكم مطعم ورد حلو
الاماكن مميزه ممم للحين مارحت مكان مميز بس افكر اروح جزيره فرعون

 

[gas-26]

السلام عليكم
شلونكم بنات
آسفة reem تأخرت عليج بالرد
بالنسبة للحقوق احسن جامعه تعتبر اليرموك وبالنسبة للمنطقة اسكنو باربد واسكنو بالاحياء اللي فيها خليجيين حتى لو الاجار غالي
وسؤالج عن الاجازة اذا زوجج عنده اجازة دراسية او مبتعث تقدرين تاخذين اجازة مرافقة زوج براتب شامل مو كامل انتبهي
اما اذا ماعنده فاخذي رعاية اسرة تكون بدون راتب بس اعتقد من شروطها ان يكون عندج اعيال

 

[shurooq]

Reem

انا ساكنه باربد

شوفي المنطقه عاديه حيييييل وصغيره فيها جم مجمع ومطعم والباجي نظام قهاوي

اول شي اذا انتي تحبين الطلعات واااااايد راح يضيق خلقج لانه ماكو سينما وكلها مجمعين بالمنطقه وسوووقه وايد


بس ترى يعني عاديي الوضع كا انا وغيري عايشين الحياه تمشييي واللي يبي يطلع يرووح ويكند عماان هناك مجمعات سينمات مطاعم كوفيات وشغل عدل مدل او يروحون العقبه بالويكند يعني شغل رحلات


واذا عندكم سياره احسن واريح لكم بس البانزيين غاليييييييي


والشقق المفرووشه في ب 250 دينار ارديني يعني حول 100 كويتي واذا تبون ادوروون تلقون شقق نظييفه حول الجامعه
وفي جرايد الوسيط يحطون اعلانات شقق مفروشه للاجار او مكاتب تاجيير شقق ياخذون عموله
والمعيشه امممممم فيها غالي وفيها رخيص مادري لي عشتي مني راح تشوفين الفرق ودايما انا اقول الله يعز لكويت ويخلي لنا شيوخنا

واذا تحبيين اختي اعطييج رقم اخويي حق زوجج لانه احنا ندرس قانون باليرموك انا وخوي اذا حابه وبنرد لكويت ان شاءالله 13-1


عموما في نوادي رياضيه تقدرين ادشين فتره الصبح اوو دورات دشي لغه وغيرها

وترى اليوم يعدي بسرعه واي شي تبيينه انا حاضره

 

[shurooq]

ونسيت الجامعات الخاصه انسيي تلقين فيها حقووق كلها فل الا اذا عندج وااااسطه قويييه يعطونج لا مانع من السفاره
والجامعه الاردينيه صعبه الكل يقول هالشيييي حتي الاردنيين
ووجامعه اليرموك سهالات فيها دكاتره زيينين بالقانون وجم دكتور صعبيينن بس مو مستحيلين ويقدر ما ياخذ عندهم مواد عادي وفي دكاتره يزيدون علامات يرفعون الطلاب يتساهلون وكانا الحمدلله هالسنه سنه ثالثه وماشيه امورنا
واذا زوجج مايعرف احد بيزهق اكيييد بس في طلاب كويتين بالجامعه كبار بالعمر مو تحت العشرين
ووو ترى الكورس الياي بررررررررد يعني ييبو شتوي جاكييتات وهالشغلات
انا اخواني مشتيين وهمن لابسين بشت ههههههههه وبردانين
وووعموما السهالات تييج من ربج لا تحاتين وتفكرين واييييد وكيد ماراح ترتاحون ولا تاخذون راحتكم مثل ديرتكم هالشي خليه ابالج
ووين ماتروحين تلقين البيئه غير الناس غير المعيشه تحتلف عنا الطبع والعوايد وغيرها شغلات وايده يعني لازم الواحد يكون قنووع باللي جدامه وما يحن ويتعايش مع هالناس