المدارس الخاصه

[sweet lady]

شلونكم بناااااااااات شخباركم انا ودي ادخل ولدي مدرسه من الابتدائي لي الثانويه اشتنصحوني وين ادخله ماابي اشتته ودي اخليه مكان واااحد ابي المدرسه زينه ودراستها حلوة مو ثقيله
اشرايكم ياامهاااات ناطرتكم

 

[كويتيه ذربه]

انا اقول شوفي كل تجمع حق امهات كل مدرسه خاصه وقارني بينهم

بالنسبه حقي انا بنتي بالتكامل وفيها كل المراحل من الروضه الى الثانويه
وتدريسها وايد حلو
انتي سالي عن كل مدرسه وشوفي اللي يناسبج

 

[باونتى]

يعتمد حبيبتى انت تبين مدرسة ثنائية اللغة ولا نظام بريطانى ولا امريكى .. انت شنو تبين بالضبط ؟؟

 

[حضاره]

اشلونج سويت ليدي00

بالنسبه لي انا انصحج اولا بالمدرسه اللي نظامها امريكي هذي تكون وااايد انسب حق عيالنا ثقافيا وماينزعون الطفل من بيئته ولايشتتونه

من هالناحيه 00وبعدين انصحج بالابداع لانها امريكيه ومستواها عالي اكاديميا00ومن الناحيه الثانيه تلاقينهم حيل يربطون الطفل بدينه وبثقافته

يعني مثلا كل سنه يسوون درس نموذجي عن الحج ويحطون كعبه من صج والعيال يطوفون حولها وبير زمزم وخطبه

وهالسوالف

يعني هذا رايي وانتي طبعا اللي تقررين وانصحج تزورين المدارس وتاخذين فكره حيه عن الوضع والله يوفقج ياااااارب

 

[حلم الطفولة]

شوفي هالموضوع ,, وراح اثبته مع المواضيع المثبته مدة شهرين للفايده.
http://www.q8yat.net/showthread.php?t=314084

وهذا كان أحد ردودي في الموضوع يختصر لج المسافه في طلبج:

الأمهات اللي يبون ابداع التدريس مال الغرب ,, مايلقونه في المدارس اللي تحط أبلات عرب .
ماكو فايده ..المدرسه ( الأبله ) العربيه عربيه حتى لو عاشت بأمريكا عشرين سنه .. وهنيه يكون سوء الاختيار لبعض الامهات ,, لأن معاييرهم مختلفه عن اختيارهم.

المساله مسالة معايير معينه .. الخوات اللي قلت لكم عنهم .. كانو بالبيان .. وحده انتقلت للرؤيا ومستاااانسه .. المناهج عاجبتها وهي تأسست زين بالبيان .. ومضايقها الاختلاط وبعض المسائل الاخرى .. تبي معيار ديني ..
ومستااانسه بنتها تحجبت وصار عندها اهتمام أكثر بقرائة القرآن واللغة العربيه ....
أما اللي ظلت بالبيان وما عجبتها الرؤيا .. معيارها : أكاديمي وبس.

صديقه لي بروض الصالحين . بنت عايله كبيره.. تقول لو شنو مااطلع عيالي من روض الصالحين .. ليش ؟؟ . مرتاحه وعاجبها الوضع وكافيها عيالها معلوماتهم بالعلوم والرياضيات .. ومهم عندها اللغه العربيه قويه والدين قوي والبيئه والطريقه الكويتيه ..
تقول أحسها كويتيه نموذجيه وهذا اللي عاجبها . .. معيارها في الأختيار مختلف عن غيرها ..

ولولا اختلاف الأذواق لكسدت البضائع ..

((( تبووون لغه وأنشطه والمدرسات أمريكيات واهتمام بالدين وماكو اختلاط ولا موسيقى : الإبداع,, الحياة , التكامل..
((( تبون يتكلمون انجليزي أوكي زين وماشي حاله وتكون معلوماتهم بالعلوم والماث جيده ومأخوذه من كتب أمريكيه وتكون اسلاميه وستايل كويتي : الرؤيا ,, و روض الصالحين مثلا.
((( تبون أمريكي بحت وقويه : العالميه الأمريكيه ..والأمريكيه بالكويت و..
((( تبون بريستيج ونوع معين من الناس وأغلبيه كويتيه وقوه أكاديميه بكل شي بس اختلاط وعفسه وموسيقى ؟؟ : البيان !!

(((.... تبون وتبون وتبون .. .. انتو وين اتجاهكم ؟؟؟ .. وشني المدرستين اللي محتارين بينهم ؟؟؟

اللي لغاية الحين ماتدري شنو الاتجاه اللي تبيه ولا تدري شني معاييرها صراحه ماراح ينفعها تسأل ولا تشوف راي الناس .. لازم تحدد اول شي شنو تبي .. ولما تعرف شتبي ساعتها عاد تحصر خياراتها بين مدرستين مثلا وتبتدي تسأل .


مثال : إحدى الخوات اللي معانا ..حددت معيارها اللي تبيه .. ثم حددت مدرستين ..و ظلت تبحث وتسأل فيهم وعنهم .. باقي تتخذ قرار وتسجل وخلاص . .. خطواتها صح الله يبارك لها .

وبالنسبه للمدارس الخاصه :
(( والنعم بكل جهد كويتي وبكل مدرسه خاصه تعبانين عيال الكويت فيها .. ))

.

 

[حلم الطفولة]

وعن نفسي : بناتي بالإبداع ومرتاحه الحمدلله , ماقدر أعطيج صوره واضحه لولدج الله يحفظه لأن ماعندي خبره كبيره بقسم البنين ,, بس بالعموم أشوف الخوات يمدحون .

وعن المدارس اللي أرتاح لها أكثر شي : الابداع والرؤيا والتكامل ,, إن شالله مستبشره خير في مدرسة الرسالة .

 

[سيدة الكويت]

أنا عن نفسى راح ادخل ولدى العالميه الأمريكيه ...يمدحونها وايد

 

[كويتيه ذربه]

حلم الطفوله مشكوره على التحليل وعجبني اسلوبج
ويعطيج العافيه

 

[sweet lady]

مشكووووووووووووورين وااايد ماقصرتوااا
يعطيكم العافيه

 

[sweet lady]

حضاره مشكوووورة حبيبتي
حلم الطفوله ماقصرتي عالجهد الرائع
اكثركم الابداع

 

[حلم الطفولة]

أنا عن نفسى راح ادخل ولدى العالميه الأمريكيه ...يمدحونها وايد

بالتوفيق ان شالله

 

[حلم الطفولة]

حلم الطفوله مشكوره على التحليل وعجبني اسلوبج
ويعطيج العافيه

الله يعافيج حبيبتي كويتيه ذربه ,, وتسلمين.

 

[حلم الطفولة]

حضاره مشكوووورة حبيبتي
حلم الطفوله ماقصرتي عالجهد الرائع
اكثركم الابداع

العفو حبيبتي انتي تامرين ,, وللأمانه آنا اللي عندي هناك مثل ماقلت لج : بس بنات .
عن الأولاد ماعرف إلا الشي القليل من صديقاتي ,, والله المستعان يعين كل أم ويوفقكم للاختيار الصحيح آمين.
ولا تنسين الاستخاره .. والاستشاره .. والبحث والاستفسار .