اللي نفس حالتي تساعدني جزالله الف خير-خشونه الرقبه

[هيه دنيا]

مرحبا بنات بحاول اختصر الموضوع

انا قبل سبع سنوات حاشني وجع برقبتي وكتوفي بس كان عادي قلت يمكن نايمه غلط او لفحة برد.

بعدين قام يزيد الوجع وصار مزمن يعني مااقدر انزل رقبتي حيل احس كتوفي شادة

علي على طول واللة احس ان ظهري من فوق حدب المهم رحت المستشفى وسويت اشعة مقطعية قالو لي ان فيني خشونة للعلم ان عمري 27 سنة يعني بدري علي الخشونة وعطوني حبوب مسكن وجلسات تدليك مافادتني بشى المهم رحت للدكتور مساعد السعيد وقال لي ان اللي فيني شد اعصاب مستحيل تكون خشونة وعطاني كريم وجلسات ارتحت عليهم بس مؤقت والالم مازال معذبني لدرجت ادمنت الوجع
وسويت جلسة رفسولوجي عند ريكفري وقالت لي الصينية ان سبتي نومه غلط وسويت عندهم 3 جلسات كاسات هوا مع مساج لما شفت ماكو فايدة قلت اشحقه اقط فلوسي بعد تعبت ورحت لمعالج شعبي بالاحمدي طلع خرطي قمت اقط فلوسي عالفاضي بدون اي فايدة



ساعدونيييييييييييييييييييييي اللي نفس حالتي او عندها خبرة

 

[دلـــــ ابوها ــــــع]

للاسف ان ما عندي اي معلومه تساعدج

اسالي امج او جداتج دايما يكون عندهم معلومة لو بسيطة ممكن انها تفيدج


الله يشفيج ويريحج ويعينج

ان شاءالله البنات يفيدونج

 

[kanoosh]

الله يعينج حبيبتي

سامحيني ولو اعرف جان قلت لج

الله يشافيييج وان شاالله يفيدونج الخوات كلهم

 

[shadona]

وعليييييه كسرتي خاطريي حبيبتي ما تشوفين شر .. بس ليش ما تستعملين اللزقات الصينية اللي قالوا عنهم ؟
ترى موجودين بالصيدلية .. جربي ادا ما نفعوج ما يظروون !
و سلامات انشاء الللله

 

[Saroona86]

ألف سلالالالالالالالالالامه لج ولجميع المرضي
ميرسي

 

[كويتية خيالية]

ما تشوفين شر

حبيبتي...الله ياجرج وطهور ان شاء الله

عليج بالكمادات الحارة..واذا حصلج حمام سونا في البيت ممكن يأدي

الغرض

ممممممممممممممممم

سمعت عن لبخة او كمادة بالزنجبيل..مو متأكدة ،قريت عنها في احد المنتديات

ان شاء الله ادورها واحطها لج

وعليج بقراية آيات الشفاء الست على مكان الألم والمعوذات واية الكرسي


(اسأله تعالى هو الشافي الكافي المعافي ان يشافيج ويعافيج)

 

[قـلب من ثلـج]

انزين حبوبه جربتى تدهنين المنطقه بفكس؟؟

اذا لا جربي وبعد ماتدهنين تدفى واهم شي هالمنطقه تدفى عدل وتعرق وانشالله خير وماتشوفين شر انشالله

لان صارتلى وللحين فى عوار بس مونفس قبل


تحياتى القلبيه بالشفاء العاجل

 

[هيه دنيا]

الله يجزاكم خير وماقصرتوا
وجربت الفكس وجربت اللبخة وجربت الكمادات والسونا والمساج على طول تجيني صينية بين فترة وفترة ارتاح على المساج

ومشكوريين

اختي كويتيه خيالية شنو الايات الست للشفاء؟

الحمد الله اني دائما اقرا القران وارتاح علية لاني دايما احس بثقل على كتوفي واتصدق لوجه الله والاستمرار دايما بالدعاء وانشاءالله مافي ياس من رحمة رب العالمين
واحتسب الاجر انشاءالله من هالالم
والحمدالله

 

[كويتية خيالية]

هلا حبيبتي (هيه دنيا )

آيات الشفاء الست هى ::

1- (ويشف صدور قوم مؤمنين )

2-( وشفاء لما في الصدور)

3 - ( فيه شفاء للناس )

4- (وننزل من القرآن ماهو شفاء ورحمة للمؤمنين)

5-( واذا مرضت فهو يشفين )

6 -( قل هو للذين آمنوا هدى وشفاء )

جربي من الوسائل اللي يرتاح لها قلبج...وكلها أسباب والشافي هو الله

وسلامتج من كل ألم حبيبتي

 

[هيه دنيا]

جزاج الله الف خير

 

[masaa]

عليج بالدعاء اختي ويارب يشافيج ويعافيج ويعافينا كلنا يارب

 

[شجووون]

ماتشوفين شر حبيبتي

انا فعلا كان فيني شد اعصاب وكنت اعالج عند مساعد السعيد كنت اعالج الجهه اليسرى اهيا اللي كانت تشد لان كانت طريقه قعدتي وانا ادرس غلط بس بعدين مع العلاج خفت وحتى لو رجع الالم الحمدالله مايرجع قوي يرجع خفيف مجرد ما اسوي التمرين يخف ويروح وبعدين سبحان الله الشد انتقل حق الجهه اليمنى ورجعت اراجع عند السعيد بس الله يهداه قام يخوووره وبعدين مع الايام راح العوار وصار كل شئ عادي بس من سنه ونص تقريبا قام يصير معاي دوخه من مجرد ما اجندس ( انزل راسي ) مثلا بطريقه غير صحيه وصار في الم مو برقبتي لاء بالمنطقه المحيطه فيها ورحت للسعيد علي امل ان اهوا احسن دكتور بس صراحه مابرد جبدي جان اروح حق مريم الرقم وعطتني علاج وجذي جان ارد للسعيد واقوله السالفه كيت وكيت جان يقول لاء ماعليج منها وخذيت علاجه اهوا لان شككني فيها وانا قلت اهوا ثقه بس هم ماكو فايده كان علاجه مؤقت وسافرت للخارج ولا سبحان الله رحت هناك عندهم مستشفى ولا يطلع كلامهم مطابق حق كلام مريم الرقم ونفس تقريبا العلاج عطوني اياه اللي اهيا كانت قايلتلي عنه وكاني الحين الحمدالله والشكر لله احسن وايد من اول وتمنياتي بالشفاء لكل مريض واتمنى من الله ان يديم علينا الصحه والعافيه

 

[هيه دنيا]

شجون ممكن عنوان او رقم مريم الرقم

 

[*سكون*]

ما تشوفين شر أختي

 

[غير كل الناس]

استخدمي مخده طبيه ولا تشيلين شي ثقيل
والله يشافيج

 

[هيه دنيا]

اختي غير كل الناس لو سمحتي مخدة طبية اهي اللي تنباع بالصيدلية

 

[الفجر]

اختي (هيه الدنيا) جنج تتكلمين عن حالتي
والسعيد قالي نفس الكلام واخذت عنده كورسات
علاج طبيعي وما كو فايده........ما اطول عليج
لما سويت اشعة رنين اتضح ان عندي دسكين بالرقبة.
واعراض دسك الرقبة عوار مزمن بالرقبة صعوبة الالتفات للخلف وتنميل صوب الحنج وساعات ثقل خفيف بالسان واذا شلتي شي ثقيل العوار ينزل الى بين الكتوف ........علشان تسوين الرنين لازم تاخذين موعد عند دكنور العظام وهو يطلبلج الرنين
وما تشوفين شر يا عمري وان شاء الله ما يطلع معاج دسك

 

[هيه دنيا]

تسلموووون وماقصرتوا المفروض اني اسوي اشعة رنين مغناطيسي يبين كل شي بالتفصيل بس للاسف انا مركبة تقويم مايصير اسوي اشعة الرنين

 

[هيه دنيا]

يعطيكم العافيه

 

[jolie_q8]

ما تشوفين شر حبيبتي

والله يشافيج ويشافي مرضانا ومرضى المسلمين