اللي عندها أي استفسار عن القطاوه تتفضل

[مدمنة ككاو]

السلام عليكم

اختكم مدمنة خبيرة بتربية القطاوه حتى بعلاجهم قبل لا تودونهم البيطري عندي اسعافات اوليه حقهم واذا ما نفعت معاكم ذيك الساع ودوهم البيطري

اللي تبي استفسار بالاختيار او من وين تشتري واحسن نوع او بالمستلزمات او بالمعالمه او اي شي تسألني وان شاء الله ما ابخل عليها بحكم خبرتي بتربيتهم من 12 سنه ))


بس ادعو لي ان عمي يلين راسه ويخليني اييب قطوه بالبيت لأني ساكنه ابيت حمولتي وعمي مو مخليني اييب قطوه :"""(

 

[وردة-الكويت]

مشكووووووووووورة اختي مدمنه

عندي بنت اختي تبي تيييب قطو ذكر شيرازي

شنو تنصحينها بتربيه بنظافه والعنايه فيه

 

[عسوله تحب بطسايه]

ايه انا بعد عندي نثيه وذكر توهم صغار بس يكبرون بيبهم .. شيرازين شنو تنصحيني اخذ الذكر ولا النثيه

 

[miss colors]

انا توني شاريه قطوه عنونه عمرها شهر ونص صح لازم اطعمها بعد 3 شهور
وين اقرب مكان بيطريه لي انا بشبيله
ونفس الاخت ورده كويتيه سؤالي عن النظافه

 

[مدمنة ككاو]

مشكووووووووووورة اختي مدمنه

عندي بنت اختي تبي تيييب قطو ذكر شيرازي

شنو تنصحينها بتربيه بنظافه والعنايه فيه

العفو بعد عمري


اول شي النظافه

السباحه بالاسبوع مره كافي ولا تستخدمون له اي شامبو في بمركز سلطان او ايس اللي بالشويخ او بسوق السالميه بالمحلات اللي بره بسطرة محلات التلفونات في محل يبيع مستلزمات القطاوه والسمج في عنده شامبو زين بعد
بس لا تحط على جسمه بشكل مباشر تحطه بايدها وتخلطه بشوية ماي وتفرك فروته فيه وتخليه شوي وبعدين تغسله عدل

وفي شامبو بصراحه انصح فيه اهو شامبو الخاص مال الفطريات موجود بالبيطري اللي بالري هذا لو بالشهر مره تسبحه فيه هذا يمنع الفطريات من تكونها بفروته

ثاني شي ضروري جدا تقرض الأظافر عشان اول شي لا يصير فيه تراكم بالوساخ ولا يشمخ اليهال ولا يشقق الأثاث وهذا تقريبا كل 10 أيام أو كل اسبوعين

لازم تنظيف العين بقطنه فيها ماي دافي وتنمسح والإذن بعد

الرمل لازم يكون نظيف يعني بالنسبة حق قطو صغير يوم وترك يتنظف اما اذا كبر لازم يوميا يا بالقفشه المشخله او تبديله اذا كانت كمية الرمل قليله بس افضل رمل اللي يبيعونه الجمعيات الجيس الأصفر اللي عليه رسم قطوه اسود بأبيض بصراحه احسن نوعيه هذي

الأكل ابتعدو عن ويسكاس ثقيل وتكوينته ترى مو صحيه صج يحبونه القطاوه لكن مو زين وبسرعه يخيس ويدود
احسن شي ماركة بورينا اختاري منها النوع اللي يعجبج واكثر شي تحصلينه بمركز سلطان او محلات القطاوه او ايس

ان شاء الله اكون افدتكم

 

[مدمنة ككاو]

ايه انا بعد عندي نثيه وذكر توهم صغار بس يكبرون بيبهم .. شيرازين شنو تنصحيني اخذ الذكر ولا النثيه

والله على حسب بالنسبه لي انا افضل الذكر لأن النثيه بسرعه تبلغ وتبي تزاوج وتأذيج او ييبيهم اثنينهم مع بعض عشان لا يأذونج ولي كبرو يتزاوجون

وهم يعتمد على اطباعهم اذا تحبين الهاديه او الشيطانه اللي تلعب شوفي منو فيهم اللي يعجبج طبعه واخذيه وترى اكو نوع من القطاوه ما يحبون يكونون بروحهم يعني لازم قطو ثاني معاهم تشوفيه بس يصير بروحه بالبيت يناوي وايد وما يسكت
انتي شوفيهم وقعدي معاهم واختاري اللي انتي ترتاحين لها

 

[مدمنة ككاو]

انا توني شاريه قطوه عنونه عمرها شهر ونص صح لازم اطعمها بعد 3 شهور
وين اقرب مكان بيطريه لي انا بشبيله
ونفس الاخت ورده كويتيه سؤالي عن النظافه

والله شوفي انا دايما البيطري اللي اروح له الدهماء اللي بالري عند الدكتور آندرو ممتاز وشاطر وما يأذي القطو ويعرفني اني اعرف حق القطاوه عدل من جذي ما يسوي شي بقطاوتي الا بشوري

بالنسبه لكم مادري ييمكن فيه بيطري صوب الجهرا والله ما عندي فكره عن ذاك الصوب انا

اما عن سؤال ورده انا رديت عليه واذا فيه اي استفسار انا حاضره

 

[xXBountyXx]

يعطيج العافيه

وبالتوفيق



تقبلي مروري

xXBountyXx

 

[ღ كحلاء العين ღ]

السلام عليكم ورحمة الله و بركاته

مشكوووووووووووووورة على الموضوع الحلو .

و يارب عمج يرضى تجيبين قطوة .

و أنا أحب القطاوة بس ماعندي للأسف :0bee2e8d89:

كان عندي بس أهلي باعوه .

و أنا معاج بأن الدكتور أندرو زين و ممتاز و ما يأذي القطاوة ما شاءالله حتى أخلاقه حلوة .
و يعرف للقطاوة و شلون يتعامل معاهم .

و مع السلامة .​

 

[وردة-الكويت]

مشكووووووووووورة اختي مدمنه

وماقصرتي

 

[مدمنة ككاو]

العفو وحياكم الله

 

[Chevy]

يعطييييييج العافيه اختي موضوعج يه بوقته :friends:
بسألج أشلون اتعودين الصغار على الحمام؟
انا ليلحين ما عندي بس هالمشكله اهيا مخليتني اتردد اخاف يوصخونلي المكاان :flower:
و شكرا

 

[مدمنة ككاو]

هالشي سهل وبسيط حبيبتي لأن النظافه فطره بالقطاوه

حددي المكان اللي بتحطين فيه حوض الرمل بس أهم شي يكون فيه تهويه يعني مروحه او دريشه

ولبسي الحوض بجيس زباله شوي كبير عشان حق التنظيف يكون اسهل وحطي الرمل مال الجمعيه وفرشي تحت الحوض سماط

واول ما تييبين القطوه حطيها فوق الرمل وخليها تشمه
وخليها يوم كامل داخل هالغرفه والباب مصكر حتى لو تناوي خليها عشان تعرف ان هذا مكانها

وطبعا باليوم الثاني خليها تطلع بس كل شوي شيليها حطيها عالرمل وبس بعدين عادي دايما يكون الباب مبطل حتى لو تحوس بالبيت راح ترد تروح حق مكانها ولازم يوميا يتنظف الرمل في قفشة مشخله او تغيير الرمل

بس ديري بالج لا تنحكر بمكان عشان لا توصخ فيه وان وصخت عاد تصير مشكله راح تتعود توصخ فيه مره ثانيه كثر ما تقدرين خلي حوض الرمل قريب منها

وان شاء الله ما توصخ

 

[Chevy]

مشكوره حبيبتي يعطيج العافيه

 

[Tiamo]

الحمدالله من بعد نصيحتج ما سوتلي فيلم ترجيع و تنظيف اليوم اشكرج جزيل الشكر و اطمنج عليه باجر

 

[مدمنة ككاو]

العفو حبيبتي ما سويت شي

بس شوفيها بعد جم يوم اذا ما رجعت امشي معاها مثل ما قلت لج