اللي ساكنين بشقة ، ارجو المساعدة شنو الحل

[كويتية صغيرة]

السلام عليكم
اخواتى حابة تفيدونى جزاكم الله خير
انا شقتى من 3 غرف وصالة
1. غرفة ماستر
2. غرفة للأولاد (عندي ولد وبنت)
3. غرفة مخزن (حاطة فيها الأوتى + علاق لملابس الأوتى + الملابس الشتوية + جناط السفر الكبيرة + الكفرات و الشراشف + 3 ستاند علاق ملابس للملابس الغالية اللي ما ابي احطها بشنطة السفر + كل شنط السفر + + الكوتات و الفروات و الجاكيتات الشتوية لها ستاند + قسم للجيل و اغراض المطبخ اللي تاخذ مكان (خيشة العيش و الشكر و اغراض المطبخ لان المطبخ حيل صغير)) + بعض المواعين الغالية) .... يعنى هذا كله بغرفة المخزن

ألحين ولدي كبر و غلط احط غرفته مع البنت ..... البنت كبرت بالمتوسط و موعارفة شنو اسوي و الوضع المادي صعب انى اغير شقتى لان الأجارات نار بصراحة

لازم غرفة للولد و غرفة للبنت خاصة فيها تكون اغراضها الخاصة معزوله عن الولد ، و المخزن مو قادرة استغنى عنه لانه شايل وايد اغراض.
فكرت اقسم الغرفة بالنص بس شكلها راح يصير موحلو بالمرة
فكرت اخذ جزء من الصالة .... بس الصالة بعد صغيرة و مافي مجال

شنو رايكم ؟
انتو شلون نظام الشقة مسوينه
في شي غلط عندي والا لا ؟؟

 

[كويتية صغيرة]

نسيت بعد
غرفة المخزن احط فيها منشر الغسيل بعد
كل ما غسلنا الملابس افتح الدرايش وانشر الهدوم في غرفة المخزن على منشرين

 

[aengineera]

حبيبتي انا من رايي قسمي الغرقة بجبسن بورد

بحيث يسويهم غرفتين كل غرفه لها باب اكورديون خشب
وصبغيهم بالوان حلوة وشرحه

الغرفة منهم راح تكون وايد صغره بس بعد شتسوين على الاقل فيها خصوصية
يمكن يدوب تكفي سرير وكومدينه وستاند للملابس
وحطي كبت بغرفة المخزن اللي عندج

والله يعينج ويوسع عليج

 

[أحلى^حياه]

حبيبتي انا من رايي قسمي الغرقة بجبسن بورد

بحيث يسويهم غرفتين كل غرفه لها باب اكورديون خشب
وصبغيهم بالوان حلوة وشرحه

الغرفة منهم راح تكون وايد صغره بس بعد شتسوين على الاقل فيها خصوصية
يمكن يدوب تكفي سرير وكومدينه وستاند للملابس
وحطي كبت بغرفة المخزن اللي عندج

والله يعينج ويوسع عليج

نفس فكرتي

 

[كويتية صغيرة]

انا اللي خلانى افكر مليون مرة
ان مرة كبيت بنتى مبطل بالصدفة
جان الولد يشوف كيس أولويز .... راح سألها شنو هذا ؟
يعنى صار ينتبه على هالسوالف
و غرفتهم 4 في 4 يدوب مكفية سريرين و كبت

 

[روحي زوجي]

خلي غرفة للبنت وغرفه للولد وفصلي كبتات بكل غرفه وتكون الكبتات كبيره حق التخزين ومشر الملابس استغني عنه اشتري نشافه تغنيج عن نشر الغسيل اهم شي المخزن توزعين اللي فيه بالكبتات انا جذي غرفه للبنات وغرفه للاولاد واغراضي بكبتاتهم مخليه لي قسم تخزين فيه كل شي اهم شي الواحد يتوسع ويرتاح الله يوسع عليج

 

[رضاهم جنه]

نفس ما قالت الاخت روحي زوجي كل واحد حطيه بغرفه وبكل غرفه حطي لج كبت كبير حق التخزين

 

[عهود الحب]

غرفتج انتي الي تصلح تقسمينها دام اهي اكبر غرفة حسب ماقلتي ماستر
اما غرفتهم خليها لج انتي

ترى بالشرع لازم تفصلين البنت عن الولد من سن عشر سنوات
والله يوسع علي وعليج يارب

 

[بنت العمدة]

أنا أشوف انك تخلين كل واحد بغرفة وتشترين الكبتات الكبار اللي فوق فيها مخازن تشيل الكفرات والملابس الشتوية والجاكيتات
وبالنسبة للاوتي حطيه بكبت البنت ووقت ماتحتاجينه تطلعينه وأما أكياس العيش والسكر أشتري درامات الزبالة تكرمين الحجم الوسط وخليها في المطبخ واذا عندك بلكونة حاولي تسكرينها وتستفيدين منها.

 

[باربي22]

الله يوسع عليج وعلينا

 

[أوكسجين]

الله يوسع علينا يااارب

 

[ازعجهم هدوئي]

نصيحة دوريلك شقة اوسع لان اغراضك كثيرة مافي مجال دوري بسعر معقول ولو شوي مرتفع شتسوين دوري انشاءاللة تحصلين واذامافي مجال استغني عن المخزن والاغراض الزايدة ونظمي بيتك بس اهم شي ولدك يطلع بغرفة بروحة لازم خلاص بنتك كبيرة لازم خصوصية

 

[الكويت حياتي]

انه نفس سالفتج بس اعيالي صغار لما الحين كنت افكر اذا اكبروا شلون شريت كبت كبير تخزين ملابس واخر للكفرات والبلاوي ونشافه صاجين البنات وحطي كبت اليهال بدار التخزين وقسمي الغرفه لاي طريقه خطأ بنفس الغرفه باي منطقه تبين شقه وجم حدودج

 

[كويتية صغيرة]

مشكورين أخواتى

انا لازم اشوفلي حل
لان الوضع موطبيعي و بنتى كل مرة تنسى الكبت مبطل ولا شي مقطوط منى مناك مع انى وراها وراها و احرص عليها انها تحافظ على اغراضها بس للحين احس لازم مراقبة مستمرة

الولد صار ينتبه على شغلات ماتوقعتها

الملابس الشتوية او الصيفية ..... ممكن اتصرف فيها اوديها بيت اهلي .... اوسع شوي
لكن الطامة الكبرى

1. منشر الغسيل ..... وين احطه وين اشر الهدوم

2.الأوتى و ستاند الأوتى و علاق ملابس الأوتى..... وين تكوي الخدامة اذا مافي غرفة مخزن

3.الماجلة وين احطها ..... مثل العيش و الشكر و العدس و المواعين الغالية.... المطبخ مافيه مجال بالمرة وايد صغير

هذي الثلاث شغلات مأزمتنى ..... والا الملابس ممكن ادعسها منى مناك و اتصرف فيها اوديها بيت اهلي

و من جهة ثانية ولدي يخاف ينام بروحه جربت مرة كانت بنتى زايرة عند جدتها قعدت الصبح لقيته نايم عند باب غرفتنا مسكين نايم على السيراميك و خاف يقعد بروحه بالدار ....
و هذا خله ابوه يمنع ان كل واحد لازم له غرفه.. و مو مأيدنى بالمرة ان البنت كبرت

انتو اللي ساكنين بشقة شلون نظامكم ؟

فيدونى يمكن انتبه على شغلة مو عالبال

 

[كويتية صغيرة]

الغسالة ما نقدر ألحين

لان تونا شارين غسالة جديدة تنشيف 70%

 

[مشغوله و محتاسه]

فصل الابناء عن بعض لازم من 7 سنوات ... حرام يضلون بغرفة وحده


قسمي الغرفة ..

او تنازلي عن جزء من الصالة و سويه غرفة


ما فكرتو تؤجرون دور ببيت ؟؟ البيوت ارخص من العمارات ..



الله يوسع عليكم

 

[كويتية صغيرة]

غرفة النوم مو كبيرة
و انا أصلا أغراضي وايد و الله موعارفة شنو أسوي
يعنى مرتب و كل شي داخل الكبت و الجرارات بس كله أغراضي
مافي مجال أحط شي ثاني يدوب ... فغرفة النوم ماتصلح بالمرة

انا افكر احط خزاين بالصالة و اخليه حق الأكل و المواعين ؟
انتو شلون نظامكم بنات
وين تحطون الأوتى و
وين تنشرون الهدوم .... بالصالة ؟

 

[كويتية صغيرة]

فصل الابناء عن بعض لازم من 7 سنوات ... حرام يضلون بغرفة وحده


قسمي الغرفة ..

او تنازلي عن جزء من الصالة و سويه غرفة


ما فكرتو تؤجرون دور ببيت ؟؟ البيوت ارخص من العمارات ..



الله يوسع عليكم

حبيبتى ألحين الشقق نار اقل شي 450 او 500 اذا 4 غرف
امى مسكينى يعنى تبي تساعدنى فضت لي غرفة ببيت اهلي و قالتلي حطى فيها اللي تبين
قمت حطيت كل كتبي و اغراض المكتب و ألعاب اليهال + الملابس الشتوية و الصيفية لليهال

 

[HaPpY_SpiRiT]

السلام عليكم أختي
اللي اشوفه ان أفضل حل لوضعكم طبعا تفصلين كل واحد بدار بروحه و تفصلين كبتات على طول الطوفة تخشين فيها أغراضكم و دار البنت حطي فيها الاوتي و مسلتلزماته داخل الكبت و الجناط بدار الولد و الصحون و سوالف الجيل حطيلج بوفيه صغير عند طاولة الاكل و خشي الخياش فيه و الصحون ،، و الهدوم عادي تقدرين تنشرينها بغرفة البنية ما يضرها و قبل النوم تكون مكوية و خالصة

 

[Dancing^Queen]

الولد لازم لازم يطلع من دار البنت ! مايصير يا اختي والله مايصيير البنت لازم لها خصوصيتها واهو لازم له خصوصيته
وغلط تعودينهم ينامون بنفس الدار

بخصوص الماجله اشتري البلاستيك البوكسات الكبار جان عرفتيهم وسويلها مكان بالمطبخ وحطيها لو عندج طاوله بالمطبخ حق التحضير حطيهم تحتها
كلش كلش اعيدي ترتيب الادرج بالمطبخ اشتري خزانه مطبخ يديده وحطي فيها عرفتيها الحديد ام بابين؟
والله لو تلبقينها باي مكان
المشر بعد شتسوين مالج غير ان تحطينهم بالمطبخ بالليل وتبطلين الدريشه اذا تنشف 70% يعني ممتاز مايحتاجون وايد وينشفون وعندج من الكتروزون اللي تصير جنهابالون عوود سعرها جنه 15 تنشف الملابس بسسسسسسسسرعه يعني غسلينهم تحطينهم في اللي جنها بالون بعدين تخلينهم يرحيون طول الليل علي المشر بالطبخ
مافي ساعتها ريحه ولاشي
الاوتي قولي حق الخدامه تكوي بدارها
او طلبو من صاحب البيت تطقون غرفه كيربي بالسطح حق الخدامه يكون فيها الاوتي وكل شي والدثره