اللي حاجزين مو بوكينغ .. قبل لا توهقون

[macintosh]

بنات انا لاحظت شي ياريت تفهموني اذا انا غلطانه
خصوصا اللي متعوده تحجز لأوربا عن طريق موقع بوكينغ

يا طويلات العمر انا من كثر ماني متحمسة حق هالسفرة مرتبتلها من شهر 1
على اساس نحجز مبجر قبل لا ترتفع الاسعار .. لكن انتبهت على شغلة مهمة
وهي فرق العملات يعني مثلا اليوم ( الدينار = 3 فرنك سويسري ) دشوا بعد يوم او حتى ساعة
تلقونه متغير يعني صااااعد .. فهمتوا قصدي

ركزو معاي:eh_s(4):لانه كل ما احاول افهم احد قصدي ما يفهمني

اغلب الحجز عن طريق بوكينغ يكون مجرد حجز يعني ما يقصون من الcredit card
والدفع يكون للفندق حزة الطلعة يعني الشيك اوت ... هني الساااالفة

انا حاجزة الفنادق من شهر 1 ومثل ما قلت لكم العملة ترتفع

يعني عندي فندق بانترلاكن حجزتله اسبوع انا وزوجي حجزناه ب450 دينار
ألحين مع سعر العملة صار 460دينار .. (ادري فرق 10 دنانير مو مشكلة )
بس هذا فندق واحد وانا حاجزة 5 فنادق مع سيارة وكلهم نفس الطريقة
الدفع وقت الوصول ... ؟!!

عشان انا طبعي دقيقة وأحاتي وايد قبل اسبوعين حسبت المبلغ اللي بالبطاقه
(مخصصينها حق الفنادق بس )

اول ما حجزنا كان كاامل بالضبط (شهر 1)
الفنادق كلها طلعت علينا 1068 دينار وهذا وانا زايده عليها يمكن 20 دينار جذي احتياط
بمعنى انه موفين مبلغ الفنادق كامل ما يطالبونه شي .. حلو ؟؟

انزين قبل اسبوعين تقريبا عدت الحسبة مرة ثانية (جمعت وحسبت وطرحت وحولت عملات)
طلع ناقصنا من حساب الفنادق 8 دنانير (هم مو مشكلة ) ..

اليوم ما عندي شغل مرة ثانية (جمعت وحسبت وطرحت وحولت عملات) طلع ناقصنا من حساب الفندق 37 دينار ؟!!!

السؤال ألحين وسامحوني ادري دوختكم وحستكم معاي ..

هذا واحنا ما خلصنا 4 بعد عيل لي شهر 7 راح يظل يرتفع (عيل شفايدة احجز مبجر )؟؟
ولا ماخذينه على قد عقلنا ؟

اذا بسوي شيك اوت وادفع فرق العملة هناك وما ادري جم بالضبط بتصير لي ذاك الوقت (شهر 7) اكيد بترتفع وايد !

شسالفة احد يفهمني .. ما احب جذي انا دقيقة

انشالله تكونون فهمتوني .. عشان تفهموني
​

​

 

[أم الحلوة جمان]

جبيبتي المشكلة تكون بوقت صرف العملة ..
الحين انتي حجزتي و هذا شي زيين عشان لايزيدون الاسعار عليج .. بس المفروض تصرفين فلوسج وقت لما يكون اليورو نازل عشان تستفيدين منه ....
اهمه راح ياخذون المبلغ اللي حاطينه بالموقع و ما عليهم اذا انتي صرفتيه بوقت لما كن اليورو نازل ولا صاعد ..
بس عقب مده اسعار الفنادق بتزيد يعني اللي حصلتيه ب 500 يورو مثلا عقب شهر و لا اثنين بتحصلينه حول ال 600 يورو فراح تصير الخسارة عليج خسارتين ... زيادة السعر مع ارتفاع اليورو ..
ان شالله فهمتيني ..
يعني القصد من كلامي صرفي فلوس الفندق يورو وقت لما يكون اليورو نازل ..

و توني مجيكة على الصرف :
Mid-market rates: 2011-04-17 16:17 UTC 1.00 KWD =2.50797 EUR Kuwaiti Dinar Euro1 KWD = 2.50797 EUR 1 EUR = 0.398729 KWD

يعني اليورو = 398 فلس
و الدينار : 2 يورو و نص

 

[شمس الشموسة]

السلام عليكم

اختي اللي اعرفه ان الدفع يكون على العملة اللي يستخدمها الفندق

والعملات اللي يحطها بوكنق يكون سعر تقريبي

وسعر غرفة الفندق مايتغير بيكون ثابت

مثلا ليلة الفندق = 500 فرنك

يعني بالفيزا بيسحبون بالفرنك (أو الدولار اذا الفندق يستخدم هالعملة)
وتسعيرة تحويل العملات بيكون حسب البنك مالج

وفي نقطة احب انبهج عليها

ان من موقع بوكنق يصير تدفعين المبلغ كامل مقدما (بتطلع سعر الغرفة ارخص بس مايرجعون الفلوس لج اذا كنسلتي)

 

[الأميرة كيرارا]

ماكينتوش إذا كلامج عدل رحنا فيها

 

[مزيونة الهيلا]

الحجز مبجر ع اساس تحصلين توافر الغرف وتختارين المكان الي حابتها, بس هم ارخص من انج تحجزين بنفس الوقت او قبلها باسبوع او اسبوعين وانا مجربه ونفس ما قالت ام الحلوة جمان صرفي لمن يكون اليورو نازل

 

[الأميرة كيرارا]

ريلي يقول الحل إنج تفتحين حساب باليورو و تدفعين منه
بهالطريقة مهما ارتفع أو نزل نفس الشي
سألي عن الموضوع

 

[FeShinGoOo]

مالج الا تدفعين من الحين طالما ان الاسعار قاعده ترتفع ..

 

[macintosh]

أم الحلوة جمان

بعد عمري والله ما قصرتي .. حليتي لي ياها . صج كانت محيرتني هالسالفه

تصدقين ماطرا على بالي هالشي ، الخطة كلها على اساس ندفع بالبطاقة للفندق هناك حسب شروط الفندق لما حجزنا الغرف مو كاش
هذا اللي يوهق انه مو ثابت وبتظل العملة ترتفع الخطة الحين نصرف مبالغ المخصصة للفنادق بعملتهم كاش من الحين والدفع هناك كاش ( وثبتناها) :ggdw:

مشكوورة :eh_s(17):

شمس الشموسة

اي حبيبتي انا فاهمه هالسالفه بس كنت محتارة على سالفة فرق العملة اللي بندفعها هناك
لانه كنت حاطة فبالي بندفع عن طريق البطاقة مو كاش .. بس حلتها أم الحلوة جمان ما قصرت

وبالنسبة للحجز من موقع بوكينغ تدفعين المبلغ كامل حسب شروطهم ( اذا في عرض مثلا) يكتبون غير مسترد هني اوكي صح كلامج .
اما اذا كان الحجز مسترد يعني تقدرين تلغينه بدون رسوم ما يقصون منج الا هناك وقت الشيك اوت .

الأميرة كيرارا

انشالله محد يتوهق طلع الحل بسيط
وهم بسأل بموضوع حساب اليورو اللي قلتي عنه . مشكورة


مزيونة الهيلا

ألحيين وضحت الساالفه .. مشكورة ما قصرتي

ام-ابيها

اي بصرف من الحين .. عشان تثبت العملة واما احاتي . مشكورة
​

 

[الشاعرية]

عزيزتي حبيت انوه على شغله الى اهي انج لما تحجزين راح تسحبين نسخة من الحجز مبين فيها عدد الغرف والسعر الاجمالي الى اهو اتفاقيتج مع الموقع الى على اساسها الفندق وقت الدفع راح يلتزم فيها كعقد اتفاقيه بالسعر المحدد وقتها وماله شغل بتغيير الاسعار الى صارت بعد حجزج .
انشالله اكون افدتج :yaaaaaarb: