بنات أنصحكم لوجه الله لا تقربون صوب هالحبوب
انا بلحظة ضعف مني قبل سنه ونص تقريبا جربتهم قلت بغير جسمي مليت من كثر ما يقولولي عصله
وصج زادوني 7كيلو وكل جسمي انتفخ وأولهم الخدود والبطن اللي كاااان لازق بظهري
اللبس طلع علي أحلى استانست جم يوم بس كنت أحس بعوار بجنبي صوب الكلية وكله أقص على نفسي أقول لا مو منهم
لين خلصت علبة كاملة وشفت شكلي بعد الزيادة وما عجبني جنه أحد معبيني ماي وصج المتن أحلى علي بس الطبيعي مو تفخة الحبوب
وقلت الحمدلله على العافية انا شلون تهورت واستخدمتهم لأنه اشكثر قريت بالنت وسمعت بالصج عن بنات مرضوا منهم
فقررت أقطعهم وشوي شوي قلت شهيتي للأكل ورد وزني نفس ما كان بس جسمي ترهل وأكثر شي واضح ناحية البطن لأنه كان متفوخ من الحبوب وانفش
المهم قبل 5شهور تقريبا راجعت اخصائية تغذية بالحكومة ومعاي تحاليلي وكنت أشك إنه فيني فقر دم
بس قالتلي كل نتايجج طبيعية بس في شغلة غريبة الأملاح عندج زايدة اكلي كوسه اكلي زهرة انا طبعا حزتها سمعت كلامها عادي
وما تذكرت الحبوب لأني كنت قاطعتهم من سنه يعني ناسيتهم كلش بس رديت البيت جان أتذكرهم قلت معقولة أثرهم للحين بجسمي !!
والحين هالموضوع ذكرني فيهم و ربطتهم بمعاناتي هالسنة من بطني يا كثر ما أتشكى منه
مره أعراض قولون مره عوار مادري من وين مره لوعة جبد بدون سبب وطبعا أغلب الأيام الشهية زيرو وأيام قليلة اللي أكون مرتاحة
يعني باختصار انا خربت صحتي بنفسي ويبيلي أراجع الطبيب عشان أعرف اشفيني بالضبط
بس مشكلتي كله أقول بعدين والصراحة خايفة من نتيجة الفحوصات الله يستر
وانا والله ما سجلت دخول إلا عشان أرد على هالموضوع وأحذر كل بنت من هالحبوب
مابي ولا بنت تتهور وتجربهم وخل تفكر مليون مرة وتسأل نفسها اشفايدة الجسم الحلو بدون صحة ؟!
الله يشفي مرضانا ومرضى المسلمين ويحقق كل أمانيكم
