الله يسامحك يا زوجي :(

[بعيدة الدار]

هلا حبيباااتي شخباااركم

انا عندي استشارة وابي شوركم الله يخليكم لان مخي وقف ولا عدت افكر ابد:eh_s(16):
الله يسلمكم انا ام ريلي من زمان معاديتني وتغار مني ولا ادري ايش هو السبب
المهم
قبل شهر كنا مقررين نروح مكه والمدنيه وقلت لام ريلي وتعالي معانا وجذي عن طيبة خاطر لالا رحو استناسو انتي وريلج انا لاحقه
طيب عقب ماردينا دايم تدق على ريلي يوديها السوق امه ومن حقه يوديها
اقوله شعندها امك كل شويتين بالسوق بتتجهز للسفر بالصيف يقولي لالا ماهم مسافرين تشتري للعيد
والله يسلمكم من اسبوع تقريبا شفت وحده في حفله خطوبه قالت لي شخبارج وجذي بعدين طلعت رفيجه اخت ريلي وقالت لي منتو مسافرين معاهم هالصيفيه انا بلعت ريجي وسويت نفسي ادري عن كل شي قلت لا
قالت اي فلانه قالت لي الاسبوع هذا مسافرين النمسا
انا صكتني البوهه :rgewrg:

وعقب الحفله رحت قلت لريلي بالسيارة اهلك ماراح يسافرون هالصيفيه حر كلهم يسافرون قال لالا قلت لج يا بنت الحلال مب مسافرين
قلت وتجذب بعد اهلك بيروحون النمسا

سكت وقال ايه بيوحون الصراحه امي محلفتني ما اعلمج تقول عيونج حارة وتعلمين كل الخلق !!:eh_s(16):
قلت انا بنت العز واللي كل صيف اسافر مع اهلي احسدها
صج اللي عمره ماتبخر تبخر واحترق
وسكت وكتمت حرتي بقلبي
وامس الجمعه لازم نروح نتعشى سوى كلنا انا اخوان ريلي وحريمهم وحريم اخوان ريلي يدرون قايله لهم عمتي من شهر
ومع السوالف مع عمتي واقولها فلانه راحت وفلانه سافرت ابيها تنطق تقول بنروح شي ابد عمك اصمخ ولا كانها بتسافر
وتقول الله يعينا على هالحر الكل بيسافر الا احناااا:rerrerek:


واهي مطوعه وملتزمة وتجذب


طيب


الله يسلمكم بغيتكم بشي


اهم بيسافرون بكره وريلي بيروح يودعهم بالمطار وبالعاده لاسافروا انا دايم مع ريلي انا قلت هالمره مب رايحه بس بخلي ريلي بروحه عشان يعرفون قيمتي ويحسبون لي الف حساب
ولا انتو شرايكم؟
لان رفيجتي قالت طنشي وروحي ودعيهم وحري قلوبهم وقولي لهم بتروحون النمسا الله ونااسه لاتنسون صوغتي !!
بس قلبي مايطاوعني
عطوني الحل لو كنتو مكاني وبليز رجاء لا اشوف وحده تقول شدخلج وو ووو ترى ذولا بحسبة اهلي المفروض محبتهم لي وتقدريهم مثلي محبتهم لولدهم

واللي باط جبدي ريلي اللي ما دافع عن زوجته حبيبته الله يسامحك

 

[بعيدة الدار]

وينكم بنااات

 

[Australia girl]

تبين الصج الكل يعمل باصله ..ماقالولج كيفهم انتي عامليهم معامله سطحيه راحوا ردوا لاتهتمين ..

وسوي نفس ماقالتلج رفيجتج ....


عشان زوجج لاتكبرين المواضيع اهم بيرحون ويستانسون وانتي بتعاقبين زوجج وتنفسين عليه واهو ماله ذنب ...

 

[غُمـۈض بَنيـۃَ]

لو انا مكانك اروح ولا اعطيهم مجال يستفردون بزوجي
وبقلعتهم عساهم لااقالوا لك يولون لاتحرين نفسك
وحاول تعديها لزوجك عارفه انه يقهر انه ماقالك
ولا دافع عنك بس تضل ذي امه ومجبور يحترمها
وانا اختك
مع ان الموضوع امس ومدري بتشوفين ردي او لا
واليوم هم بيسافروا بس بجد اتمنى تكوني رجتي

 

[كـ غلا ــلي]

روحي وديعهم وجنه العيد لانه بروحتج بتغثينها ليدامها مصغره عقلها وحاطتج لها ند

عامليها بالزينه وشوفي اشلون بتنغث بتقول بداخلها رابي هالبنيه اشكثر ادقر فيها واهيا ماكو عمك اصمخ

 

[ثريا الكون]

طنشي احسن علشان ريلج ليقول كلام امي صح مرتي دعله طنشي وخليج مسالمه وفي اية بالقران تقول

خذ العفو وامر بالمعروف واعرض عن الجاهلين​

 

[قانون كـيفي]

عآآآآآآآآآآآآآآآآآآآآآآآآدي طآآآآآآآآآآآآآآآآآآآآآف

بس إذا صدق تبغين تعاقبينهم

فلا تبلغينهم بسفراتك

وحتى لو زوجك بلغهم انتي لا تبلغين

وحتى لو قال لهم زوجك انتي انكري السالفه​

 

[عبير العنزي]

حاليا طنشي السالفه .. ولاتروحين مع ريلج للمطار

وبعدين خففي علاقتج معاهم حيــــــــل اذا رجعـو لا تروحين لهم ولاتسلمين عليهم

واذا عاتبوج او اسئلوج عن السبب..قولي لهم أنا عيني حاره على قولتكم ويمكن دوم مسببه لكم مشاكل ويمكن تخافون مني عشان جذي خشيتو سالفة سفركم

فـ أنا قلت ابعد احسن دام لهدرجه مخوفتكم ومضايقتكم ومسببهه لكم خوف..

 

[جوري 2007]

حركتها تحر مو لانها سافرت وماقالت لج لا بالطقاق سافروا والا اقعدو ا

بس سالفة عينج حارة هذي قويه وشكله ريلج مصدق بعد !

طاااف بالطقاق بس ماافضل انج تروحين تودعينهم اصلا شكو كلما سافروا تروحون تودعونهم ليش رايحين حرب

دق تلفون كلميها : تروحون وتردون بالسلامة ياخالتي وبس لا تبينيلها انج محترة والا متضايقه

 

[FeShinGoOo]

شكو تروحين توديعنهم خلاص ناس مايبون يقولونلج لاتقطين روحج عليهم واذا ردوا لاتبطلين حلجج مو غصب حياتي يعلمونج بس ام ريلج ماتستحي اتقول عنج عينج حاره وحق منو حق زوجج ؟؟ ماتدري ان هاذي غيبه ؟؟

الصراحه اقهرتني بكلمتها والشرهه على زوجج الي سكتلها واساسا المفروض مايقولج ان امه قالت عنج جذي حفاظا على مشاعرج

بس انا اقول لاتقطين روحج عليهم وخل يسون الي يبونه اهم مو ملزومين فيج ولانتي ملزومه فيهم طنشي ولاتعليمنهم شي من اليوم ورايح ولاتنشبين وراهم وغصب بعرف اخباركم خلاص طاف وخلج سطحيه

 

[خوخه_21]

لو انا منج ارووح وجنه لعييد ولا هامني شي عشان يفهمون انه محد احسن من احد ولا مهتمه
لانه اذا مارحتي راح يفهموون انجة محترا منهم ومعطه الامر اهميه وااايد بالععكس قهرييهم رووحي

 

[جديده 1]

بصراحه مالج حق .. راحوا ردوا انتحروا بكيفهم مالج شغل فيهم .. وانتي بعد اتعضي رحتي رديتي لاتعلمينهم مالهم شغل فيج .. روحه للمطار لاتروحين ولا تدقين دام اهم ماخذين عنج هالفكره .. خلي علاقتج سطحيه معاهم ووجبيهم بالاشياء اللي يبلغونج فيهم اما اللي يخشون عنج فيها طاااااااااااااااااااااااااف .. و لاتتكلمين جدام ريلج عن امه عيب .. انتي لج حياتج و اهم لهم حياتهم .. كل واحد ينام عالجنب اللي يريحه .. موفقه

 

[haya20]

تبين الصج الكل يعمل باصله ..ماقالولج كيفهم انتي عامليهم معامله سطحيه راحوا ردوا لاتهتمين ..

وسوي نفس ماقالتلج رفيجتج ....


عشان زوجج لاتكبرين المواضيع اهم بيرحون ويستانسون وانتي بتعاقبين زوجج وتنفسين عليه واهو ماله ذنب ...

:eh_s(15): سيم سيم

 

[بعيدة الدار]

اهم الليله بيسافرون الصراحة احترت فيكم اروح ولا ما ارووووح افترررررررررررر راسي
توها من نص ساعه داقه علي امه تبي تسألني عن نوع الكحل اللي عندي عشان تشتري زيه وقلت لها وسكرت وخخخ وهي عمرها مادقت علي الصراحة استغربت

 

[انا لحبيبي .]

انا مستغربه زوجك كيف بحكيلك انه امه قالت عنك هيك ؟؟ بدال ما يهدي النفوس بزيدها وبخليكي تدايقي وما بهدي النفوس؟

لا حول ولا قوة الا بالله ، والله شي بقهر ، الله يعينك والله حبيبتي

بس في حلقه ضايعه همي ليش هيك بعاملوكي ؟ وليش هيك ما بحبو يخبروكي لدرجه انهم خبرو الناس وانتي لأ؟ يمكن زمان كان صاير بينكم موقف أثر على خالتك؟

الله يهدي البال ويصلح الحال حبيبتي ، انا لو مكانك ما بروح القصه مو قصه اصل وفصل القصه اني مستحيل اروح وانا عارفه انه هالشخص بستعبطني وبحكيلي ما رح نسافر وهي رح تسافر ، انتي كمان الك مشاعر وقدرك لاتضعطي على نفسك عشان حد ، لانه ماحد بهمو أمرك ، كل واحد اللهم نفسي

 

[اميرة زوجي]

حبيبتي روحي ولا كانو صار شي مشان ما يحسو انك مقهورة وغيرانة وكمان مشان ما يستفردو بزوجك دايما خلك معه ولا تخليه لامه واهله يلعبو براسه
واستغلي فرصة غيابهم بالتقرب لزوجك وحببي فيكي اكتر واكتر وهو رح يصير ما يرضى لا امك ولا غيرها يحكو عنك نص كلمة ولا تجادليه وتنكدي عليه
متل ما حكت وحدة من الاخوات هم مسافرين يستانسو وانتي بتنكدي على زوجك ؟
والله يوفقك ويخلص حقك منها ومن كل حماة ظالمة لاني مجربة معاناتك مع حماتي

 

[أسيرة_أحزاني]

شلون يعني عينج حاره بطيح عليهم الطياره ولا شنوو صج الي عمره ماتبخر تبخر واحترق
وعندنا وعندج خير من هالناس المرضى جنه محد سافر غيرهم
يخلون الناس بدال لاتقولهم تروحون وتردون بالسلامه تقوول عساهم ماردو لوووول

 

[noo7a]

شلون تروحين تودعينهم و اهم اصلا موقايلين لج
دامهم ماقدروج عطيهم اكبر طاف
سافرو ولا ماسفرو كيفهم
و بالنسبه حق ريلج حرام لا تظلمينه اكيد دافع عنج جدام اهله
ترى الرياييل دايما يدافعون عن حريمهم جدام اهلهم مايقولون لهم عشان يخلون هيبه اهلهم موجوده

 

[غـرامـي أنـت]

الشرهه على زوجك

 

[A7la-SmiLe]

الله يهديهاا ان شاءالله
بس غلط اللي سواه ريلج والكلام اللي قاله لج !! صح المفروض يهدي النفوس
نصيحه لاتروحين لهم ولاتودعينهم .. دام ماانطقوا كيفهم
اللي تسوينه انج تتصلين عليها وتودعينها لااتيبين طاري صوغه ولاشي كلمتين وسكري

الله يهدي النفوس ان شاءالله​