الكسل ؟؟؟

[Melodyk81]

بصراحة صارلي شهرين وأنا أحاول أغير من نظام حياتي ...

بس بصراحة أحس ماكو فايدة ...

رح أشرحلكم باختصار شنو آكل أو أشرب أو أسوي عشان تساعدوني واللي نفسي يمكن يستفيدون ...

أول ماأقول وأغسل وأخلص أفطر وأشرب ماي

دوامي من 8 لي 1:45 بعدين أرد البيت يوعانة حدي بطلت آكل وسط الدوام عشان ماأمتن وأقدر أتغدى عدل

بعدين أروح أنام على طول ماأقدر أقعد مافي مقاومة ... والمشكلة مافي شي يسلي ... يعني تلفزيون ممل وماكو شغل؟!!!

بعدين أصحى أبدأ أشوف برامج وأمل وماكو شي أسوي أقول بسوي رياضة وبسوي برنامج بشرة وشعر وأمل ملل مو طبيعي وأبطل ونفس الحالة على طول ...


ماأحب آكل فواكه ولا خضار حاولت ماأقدر أحس برجع الأكل كله ... فواكه أحب التفاح .... والبرتقال الحلو ... ومانجا وموز

أحب الحليب أشربه وايد

ماأشرب شاي أو قهوة بالمرة

سويت فحص على مدى سنة وماكو فقر دم الحمد لله

بس مو قادرة أتخلص من الكسل أبي أقوم أتحرك وأكون نشيطة وأسوي ...

أحس جسمي أدمن الكسل وماكو مناعة

ياريت إذا عندكم نصايح ومشكوريين عزيزاتي ...

 

[شـــــــــمس]

سوى تحليل الغده الدرقيه 00 ترى الغده لها تاثير على النشاط
تخلى الانسان دائما ملول ويبى بس ينام وكسلان ( خمول الغده الدرقيه)

 

[coffee]

سلامتج حبيبتي

لازم تتاكدين ماعندج مشاكل على الصعيد العائلي او الدوام لان كله ياثر.. لا تظلين بروحج خليج بين اهلج او صديقاتج.. وهم سوي تحليل غده وسوي فحص فيتامين D.. وفكري بالزواج اذ كنتي مو متزوجه

ترى غلط انج ما تاكلين وتيمعينه حق وجبة وحده هالشي يمتن زوود.. اكلي كاكاو لو قطعه صغيره يعدل الموود

ونصيحتي لج المشي صج يرد الروح ويفضل يكون على البحر يا سلااام هواه عجيب

 

[مزعلة النسا]

هلا

 

[رومية]

مشكلتج نفسيه مو جسديه يا حلوة
انتي تعانين من الفراااااااغ....فاقده الاحساس بالحياة وبلذتها ( ياسلاااااام)
اول شي قولي الحمدالله على كل حال....والملل اللي انتي فيه نعمه صدقيني...راح تمر عليج ايام ماتقدرين تحكين راسج....والله راح تتمنين ايام الكسل والتمغط ترجع...استمتعي بهالوقت....استرخي مو لازم تكونين شغاله طول الوقت....لما تكونين سعيده ( ركزي على هالنقطه ) لما تكونين صج سعيده ...تصير عندج طااااقه رهيبه...تسوين كل شي...والكسل هذا يختفي....لاتدورين بالاكل ولا بالادويه....مافيج شي....انتي بس يبيلج احد يونسج ويحببج بالحياة وترجعين نشيطه مثل الحصان. قرقتج وااايد

 

[Melodyk81]

مشكوريين يا بنات على ردودكم الطيبة

تصدقون عاد يازين هالمنتدى ريحتوا أعصابي وانتوا تردون علي

تصدقون معاكم حق .... بخصوص الدرقية سويت تحليل وهم قال الدكتور ذلفي مافيج شي بالمرة ... :eh_s(6):

الظاهر لازم أبدأ بالمشي عشان أتنشط .... بصراحة كلامكم يبرد القلب

قرقتج ولا قرقتي عزيزتي رومية :eh_s(13): ... سواء قرقتي ولا قرقتج ترى حلوين .....


مشكوريين بنات يعطيكم العافية ورح أمشي على نصايحكم والله كريم والحمد لله رب العالمين على كل شي ...

 

[قمر ضاوي33]

نصيحة لك حاول يتمشين ... اي وقت من اليوم متى ما تحسين بأنك مستعدة والأفضل بعد قعدتك من النوم ...

اول انا مثلك كله كسلانه ومالي خلق اقوم من نومة العصر تعبانة وجسمي متكسر بس اتمغط واقلب بالقنوات ... شديت على نفسي شوي وتعوذت من ابليس وقمت اروح امشي بالبداية بص ساعة والحين ساعة الحمد لله..

اليوم الي ما امشي فيه احس شي ناقص فيني ... والله العظيم عن تجربة