الـي عندها قطـوه وولدت عندها بالبيت تدخل ضروري ...

[miss_classy]

هااااي حبوبااات

انا قطوتي حامل واول مره لها وانا خايفه عليها واااااااااايد وبنفس الوقت هم ماعرف شسوي لانه ولا مره شفت قطوه تولد

وماااادري شسوي لها اوديها المستشفى قبل ولادتها بأسبوع ولا شسوي بالضبط


عفيه بنااااااات الي عندها قطوه وولدت جدامها وعندها خبره تقولي شسوت عشان تساعدني

انا اشوف قطوتي صايره تحووس وااايد بالبيت جنها ادور احد ولما قلت لامي قالت اكيد ادور مكان تولد فيه

وانااا ماعرف شي بهالسوالف

وهمن خايفه عليها لانه صغيره واول مره تولد

وسمعت واااااايد ناس قالولي يمكن الياهال يموتون او اهيا يصير فيها شي



ساعدوني عفيه قولولي شسوي اوديها المستشفى واخليها ولا شسوي بالضبط

 

[AmOoNa-]

لاتخافين انشالله ماكو الا الخير وسهالات
انتي حطيلها مكان تولد فيه
مثلا كرتون
رفيجتي كانت تحطلهم مثل بيت تشتريه من سوق الحمام اهو مال حمام او طيور خشب شكله مكعب كبير وفي فتحه
ماله داعي تودينها البيطري ولا شي بس اهم شي لمه تولد يكون المكان دافي لانه العيال ماراح يتحملون

 

[.. Dior ..]

اي صح كلام امونه حطيلها كرتون والمكان دافي وراقبيها من بعيد ولاتغصبينها على الكرتون اذا ماراحت له خلها براحتها ولمن تولد حطي لها اكل وماي وغذيها عدل

رفيجتي مادري عنها تقول انها تشيل المشيمه علشان ماتاكلها و وفري لها هدوء ودفى ترا اذا خافت وماحست بالامان تاكل عيالها << كلام رفيجتي انا مااعرف انا اللي عندي ذكر ماعمري ربيت نثيه

وان شاء الله تشوفين عيالها وتولد بالسلامه

طمنينا عليها لاتنسين

 

[Forever & Ever]

مثل ماقالو البنات زهبيلها مكان تولد فيه

وحطيلها اكل وماي وحطي فوط بالمكان اللي تبينها تولد فيه

انا قطوتي كلت المشيمه تروالي عادي

والحين عيالها على شهرين

وهي زي الفل

 

[سكارف.فوشي]

مادري والله انا اقول خليها على راحتها تدور مكان وتولد فيه وانشالله البنات يفيدونج اكثر

 

[sweet cake]

مع اني ما ربيت ولا مره بس قريت وقريت وقريت عن هالشغله
انتي حطي مكان لها ويكون بعيد عن الازعاج يعني اذا ولدت مايجي احد يدخل الغرفه ويزعجها
والمكان لازم يكون دافي ومو حار وحاولي تعودينها عليه
ولازم تكونين مجهزه فوط نظيفه او قماش (قطن) عشان بعد ما تولد بفتره تغيرين فراشها ..

وشنو بعد؟؟؟

اي لازم يكون عندج مقص بس اللي يكون راسه مو حاد عشان اذا ولدت وما قطعت الحبل السري عن الكيتينز تقصينه انتي بس اذا قصيتيه تبعدين عن السر مسافة انش (بوصه) تقريبا..
والمقص هذا ينفعج بعد اذا انولد الكيتين بدون لا ينفتح عنه الكيس او الغشاء اللي يكون مغلفه واذا الام ما شالته عنه فتكونين انتي موجوده عشان تشيلينه..

شوفي انا قريت ان اذا كانت القطوه صغيره وهذي اول ولاده لها ممكن ماتهتم بعيالها يعني لازم تكونين موجوده عشان اذا اهملتهم لا سمح الله..

ادري كلامي مو مرتب بس لأني اشوف فلم وارد عليج بنفس الوقت..

بس عادي خليها تاكل المشيمه والحبل السري لأنهم يعطونها طاقه ويصير بجسمها حليب للكيتينز..

شوفي انتي احسنلج تقرين هاليويمن عن هالموضوع عدل وعندنا بالقسم موضوع عن هالشغله اقريه عدل..

واذا احتجتي اي شي لا يردج الا كيبوردج

 

[sweet cake]

http://q8yat.net/showthread.php?t=378025

اقري هذا بعد

 

[ياعشيري جعلك السلال]

انا قطوتي ولدت قبل تقريبا 25 يوم وانا كنت حاطة لها كرتون ومي واكل ومزهبه كل شي لان كان بادي يطلع منها دم

عاد هي عارفه المكان بس ولدت في كرتون ارامكس على طاوله الكمبيوتر وشلتها وديتها مكانها هي وعيالها


ديري بالج تلمسين عيالها ترا احتمال تاكلهم او ما ترضعهم ويموتون

 

[بــدويه]

أخذي ناصايح ياعشيري قطوتها توها ولدت وجابت كتاكيت يفتخون فديتهم وكل البنات كلامهم صح .. ويارب الله يسهل عليها

 

[catloverq8]

مس كلاسي سمعي اللي بقوله و حطيه حلقة بودنك على رأي إخواننا المصريين
مدة حمل القطوة 63 يوم يعني مفروض تعرفين آخر مرة كانت مع الذكر و تحسبين 63 يوم موعد ولادتها
كراتين الكلينكس وايد روعة - الكراتين العودة ،، جيبي كرتونين سكري من تحت الكرتون بالكامل باللزاق و حطي بقاع الكرتون بطانية صغيرة مصفطة عدل ،، سويها كأنها سجادة و انتبهي للزوائد منها جفسيهم عدل علشان العيال ما يندعسون هنك و يموتون
سكري الصندوق من فوق
جيبي مقص عود أو سكينة و على ارتفاع 20سم قصي مستطيل بس من 3 أضلاع يمين و يسار و تحت أو فوق و تحت و يمين ،،، يصير مثل شكل الباب
قصي من ها الثلاث أضلاع شوية بعد علشان تتحرك بسهولة
الحين صار عندك بيت للقطوة تعيش فيه مع عيالها و ممكن تولد فيه ،،
أفضل إذا القطوة متعلقة فيك و عندك غرفة خاصةو بالذات في الحمام إذا في مكان حطي الكرتون بمكان هادي و معزول و بها الطريقة تولد بعيد عن الإزعاج و قريب منك أو حطي الكرتون بمكان مثل ما قالوا البنات بعيد عن المكيف المباشر بس مو حار المهم يكون بعيد عن اللي رايح و جاي و ما فيه قطاوة ثانيين و دخليها بالصندوق و لما تطلع ردي دخليها و النتيجة وقت الولادة يا هي تروح سيدة هناك يا تدخلينها إنتي و تركيها براحتها بس لا تتركين لها كبت أو صندوق أو درج مفتوح حتى لا تروح و توسخ الدنيا و تولد فيهم
أنا أفضل أحط القطوة بغرفتي و بحمامي علشان ترتاح نفسيا بس ما أسكر الكرتون علشان أتابع الولادة و أتدخل وقت الحاجة
العادة القطوة - حتى بأول مرة بالفطرة تدبر نفسها ،، يعني تقص الحبل السري و تنظف البيبي و تاكل المشيمة و هو مفيد جدا لها !!
بس أحيانا ما تفتح الغشاء عن البيبي لأسباب مجهولة و وقتها لازم تتدخلين قبل ما يموت البيبي
خلي عندك كفوف ( دسوس ) بلاستك طبي على مقاس إيدك علشان لو اضطريتي تتدخلين تكونين جاهزة
إذا الأم ما فتحت الغشاء بكل بساطة و بأصابعك شقي الغشاء عند منطقة الوجه علشان البيبي يتنفس و اتركيه بحضن أمه و هي تكمل
إذا ما كلت المشيمة بعد نص ساعة و لا قصت الحبل السري بقطعة قطن مبللة بالكحول نظفي مقص صغير و على بعد 2.5سم أو 1 إنش قصي الحبل السري و نظفي مكان القص بالقطنة و عطي القطوة الأم المشيمة حتى تاكلها فإذا ما كلتها بعد نص ساعة ثانية قطيها بالزبالة و أعتقد هذا يكفي للدرس الأول و الأساسي
بس يا قلبي أحيانا الولد ينزل غلط من ريوله و يتعلق
أمامك خيارين 1- تتركين القطوة لين يطلع منها مع ولادة البيبي التالي و طبعا يكون هذا معناه موت الأولاني مليون بالمية
2- أو شخص يرفع الأم من تحت إيدينها و شخص ثاني بنعومة يمسك جسم البيبي الظاهر - بكل نعومة و بدون ضغط حتى لا نكسر ضلوعها و يحاول يشدها شوي شوي و تالي يفتح الكيس حتى يتنفس
لا تقولين أذية ،، ها السوالف مو دايما تصير و ممكن القطوة تدبر أمورها 100% و ما تحتاج المساعدة
حرصي يكون قريب من بيت القطوة ماعون أكل و ماي فرش
بعد يوم من ولادة القطوة نقليها للكرتونة الثانية مع وضع أرضية ( بطانية قديمة أو فوطة ) و حطي غطا على الكرتونة ( بطانية أو فوطة أو شرشف ) و خليها بمكانها اللي بتتم فيه مع عيالها
طبعا تقدرين تشيلين العيال بهدوء و تحطينهم بالصندوق الثاني ماكو مشكلة
انتبهي لديود القطوة الأم
نظفي الحلمات إذا حواليهم سواد بقطعة قطن مبللة بماي دافي و نقطة من صابون غسيل المواعين و تالي امسحيهم بقطنة و ماي و نشفيهم بفوطة ،، و يستحسن تسوين ها العملية قبل ولادة القطوة بيوم أو يومين
بعد الولادة نظفي ديودها مرة ثانية و ضغطي شوي على الحلمة علشان تطلع حليب و تركيها تقوم بالباقي
و مبروك مقدما

 

[BaTTy]

انا ولدت قطوتي و ما شالله البنات ما قصورا قالوا كل شي ممكن يتسوى
بس انا في شي ما كنت اعرفه انه لازم تاكل المشيمه انا علطول يبت لها اكل و كلته لانه حدها تيووع عقب الولاده و انا شلت المشيمه فا خفت تاكل احد من عيالها
و ثاني واحد ما طلع عدل و تعسرت ولادتها و ساعدناها سحبناه شوي شوي و بدون ضغط على جسمه
و كات لوفر قالت شي حده مهم لا تخلين لها ادراج و كبتات مبطله و يستحسن انتي تهيئين مكان و تعودينها عليه ديري بالج قبل ابوي قطوتهم ولدت بكبت عمتي لول
و الله يسهل عليها

 

[bint_looda]

اهم شي لاتجيسين العيال اذا اهي مو متعلقه فيج وايد عشان لا تتخلى عنهم وجهزي لها مكان اهي تدله مثل تكرمين بحمام حطيلها كرتونه
والمشيمه اهي راح تاكلها عادي وتعرف تنظف نفسها بروحها باذن الله .. بس خليج حولها عشان لو لاسمح الله شفتيها توهقت

 

[AmOoNa-]

البنات ماقصروووووو بس ديريييييي باااااالج لالالالالاتقطين المشييييييمه ولا تقطين شي اخليها تاكلها لاندها تساعد جسمها وتدر الحلييب

 

[ملاك زوجي]

بصرااحه ماعندي اي خبره بس البنات فادوج وطمنينا عليها

 

[سعودية وافتخر%]

شوفي حبيبتي إنا قطوتنا ولدت امس وكنت حاطتلها كرتون ومجهزته لها بس من قبل الولاده بيوم وهي صاده عنا وحتى الفجر تقول امي انها تجي تون عندها ياعمري وتروح الظاهر إنه الطلق وبعدها اختفت معد شفنها والصبح لما دورتها لقيتها ياعمري تولد بدالوب اخوي المسكين ههههه وتوها والده اثنين فما عرفت وش اسوي لها وخليتها على راحتها وماشاء الله ربي رحمها وساعدها يعني هي قامت بالمهمه بنفسها حتى لما خلصت وشفنا الدالوب والملابس بعدها نظيفه ومافيها الادم بسيط وحتى عيالها طالعين بعد نظيفين كأنها مروشتهم هههه والوانهم واضحه يعني حبيبتي خليها على ربك وهو ارحم بها منا.. انا قبل كنت نفسك ادور بين المنتديات وش اسوي لها وشايله همها والله.. والحين الحمدلله ولدت بالسلامه وجابت لنا خمسه بس اللي مشغلني متى اروشها وانظفها بعد الولاده ياليت اللي عندها خبره تفيدني ..