قوه يابنات شلونكم وشخباركم .. وشلون رمضان معاكم ؟؟ عسى تارسين عيون وبطون ريايلكم ؟؟ والله مافتكر سويتوا شي .. الله يخلي بيوت اهلكم .. اليوم يابنات بنسوي العصيده .. والعصيده هذي اكله كويتيه عتيجه انقرضت الحين ومايسونها الا القليل وخصوصا وقت النفاس .. والعصيده اكله دسمه شوي وتحلى ايام الشتى اذكر ابوكم العود دندرمه كان يموت فيها ومن ياكلها مسيكين يقولي محد يخليني اصير اثول الا طباخج .. ويالله خلوهم يصيرون ثولان وحولان بعد .. والحين نبدي
بسم الله بدينا وعلى النبي صلينا .. يابنات اكلتنا اليوم بسيطه وسهله مايبيلها شي بس ركزوا معاي شوي وفتحوا مخوخكم المصديه .. نحتاج حق طبختنا اليوم .. قلاص دبس ونص قلاص طحين وربع قلاص تقريبا دهن وقلاصين ماي .. الدبس راح نستخدم مكانه الشكر لانه مايتواجد وايد الحين .. اول شي نخلط الطحين مع الماي عشان نسوي عييينه ولازم تصير رخوه شوي .. بعدين نحط الجدر على النار ونكت فوقه الشكر ونحمسه على نار هاديه ونرش عليه ماي لما يقلب لونه ويصير مدوعم بعدين نحط العييينه ونحرك بالملاس على طول لما تخلط العيييينه بالشكر وبعدين نحط الدهن عليهم ونحرك عدل لما تصير العصيده بالنص يعني ماتلزق بالجدر وبعدها نشيلها من النار ونخليها على كترولا تنسون ترى العصيده نصير رخوه شوي لاتصك معاكم وتصير سميت؟؟ اوكي ولما تقلبونها من تحسون انها صكت رشوا عليها ماي ... الحين نسوي الحشو .. والحشو عباره عن بيض مخلوط ومايبيله قول بعد كلكم تعرفونه تحطون نتيفة دهن وتحمسون البصله لما تبدي تصير مشووقره وبعدين تكتون فوقها البيض والفلفل الاسود والملح وعقبها نحط العصيده في ماعون ونكت البيض فوقها وعليكم بالعافيه
هذي العصيده وسويناها وترى سهله وسريعه مايبيلها شي
لاتنسون تاخذون شوي من العصيده وتدهنون فيها شعوركم تراها زينه حق اللي شعرها يعد
واللي تبي تتعلم اي طبخه ادزلي
ويابنات لاتنسون شعارنا
كونوا معانا في حملتنا ضد الرجال ومحاربتهم من خلال كروشهم ... والهواية حمايه
امكم العوده دندره
