الشاعره عابرة سبيل

[بـنـت النور]

من هي الشاعره عابرة سبيل ؟؟؟

هي شاعره كويتيه لها ديوان شعري اسمه عابره سبيل

واشعارها رائعه جــــــــدا ولكن القدر شاء ان نفقد هذه الشاعره

بسبب مرض السرطان ابعدنا الله عنه

وللشاعره 6 ابناء اكبرهم عمره 12 سنه

واثناء ما كانت على فراش الموت كتبت هذه القصيده

التي تبين مدى ايمانها بالله وان الموت سيكون مصيرها لان

هذه ليست اول مره تدخل بها المستشفى بل كانت تدخل وتتعالج

ويقوم زوجها بذبح وليمه لشفاءها ولكن المرض دام معها

حتى ماتت وكانت هذه اخر قصائد عابره سبيل لزوجها...


الشاعره / عابرة سبيل رحمة الله عليها

كتبتها قبل وفاتها وسلمتها لاختها الكبيرة

وامنتها ان لاتخبر بها احدا الابعد وفاتها

ـ ـ ـ ـ ـ ـ ـ ـ ـ
تـرى الـذبايح واهـلها مـاتسليني
انـا ادري ان المرض لايمكن علاجه

ادري تـبي راحـتي يـابعد عـيني
حـرام مـاقصرت ايديك في حاجه

اخـذ وصـاتي وامـانه لاتـبكيني
لـوكان لـك خاطرن ماودي ازعاجه

ابـيك فـي ايـدينك تـشهدني وتـسقيني
وداعتك لايجي جسمي بثلاجة

لف الكفن في ايديك وصف رجليني
ماغيرك احدن كشف حسناه وحراجه

ابـيك بـالخير تـذكرني وتـطريني
يـجيرني خـالقي مـن نـار وهاجه

سـامح عـلى الـلي جـرى مـابينك وبيني
ايام امشي عدل وايام منعاجه

اعـيالي هـمي وانـا الـلي فـي يكفيني
علمهم الدين تفسيره ومنهاجه


،،،،،،،،،،،،،،،،،،،،


عندما علم زوجها بالقصيده بعد وفاتها رد عليها بالرد هذا:

حاولت أنام وحاربت عيني النوم
وجريت صوت مثل صوت الذيابه

والجفن كنه صاير وسطه هزوم
ودموع عيني مثل رش السحابه

على وليفِِ قالوا اليوم مرحوم
راح وتوفى ما تهنى في شبابه

زرت القبور اللي على بعضها رسوم
حطيت رسمِِ فوق ذيك النصابه

قلبي من الدنيا عليل ومرسوم
الوسم توه عقب خط الكتابه

أحبها مير القدر صار مقسوم
ويحبها كل الأهل والقرابه

الموت أخذها وأودع القلب مسلوم
جرح عميقِِ ما يداوي صوابه

الموت أخذ شجعان ورخوم وأقروم
وأخذ رسول الله وباقي الصحابه


واخيرا
رحم الله الشاعره
وموتى المسلمين اجمعين​

 

[بـنـت النور]

ومن قصائدها :



العيد باكر

العيد باكر أسعـد الله ممسـاك
والله مدري ويـن خـدٍ جلستـه
وين انت ياللي عيدنا في محياك
كف القدر من ضيقة الخلق بسته
من يوم ما لوحت لي كف يمناك
لليوم دمعي بالخفا مـا حبستـه
ومن يوم ماذوقتني حر فرقـاك
والياس زرعه في حياتي غرسته
شريت لي ثوبٍ علي شان لقياك
والثوب راحت موضته مالبسته
وشريت عطرٍ ما زهاني بليـاك
أربع سنيـن بعلبتـه مالمستـه
ودفتر قصيدٍ كل يـوم يترجـاك
مافيه يومٍ ماسهـرت ودرستـه



يسألوني

يسألوني عابـره ويـن الجديـد
والاجابـه ضايقـه فينـي ملـل
راحت ايام السعـاده والقصيـد
عشتهـا بيـن التكانـه والجهـل
كنت اروض شارد الحرف العنيد
ماعسرني لو بغيته فـي عجـل
فيه اصور لوعة الحـب الاكيـد
ومنّه(اشكل) ماحوى قلبي غـزل
ومعه (اسافر) عن معاناتي بعيـد
ولأجل حبه ماشحنّي من زعـل
احضنه (فرحة) طفل في يوم عيد
واسكنه (روض) الخزاما والنفل
واحتويته ليت لي (قلـب ٍ) بليـد
ماعرف (فرق) الجزاله والهزل
والنهايه مابقـى عنـدي جديـد
واعذروني صارت ايامـي ملـل



البطاقه الشخصيه

أنا عجـوز مطلقـة وام ورعـان
وأيضاً مدام وبنت وآنس وعانـس
أنا بدوية وعايشه عنـد حضـران
وبنت البحر وابوي زارع وغارس
أمية ماتعـرف حـروف وألـوان
وتلميذة دشـت جميـع المـدارس
ضفره وخبله ، عاقله،في نقصـان
شرود وأنطح لي ثمانيـن فـارس
خلونِ أعيش العبره دون عنـوان
طيف يمر بـلا رقابـه وحـارس



الناس

الناس سدّادة سلف يوم الرخا باكـر يضيـع
ما بي اسوي حاجـة أصبـح عليهـا نادمـه
أبحث بقلب التجربه وآخذ من أحداث الجميع
عبره تساعدني على صدمات وقـت قادمـه
بعطي واسامح للبشر وأحسن مع الكل الصنيع
حتى إذا جار الزمن القـى صديـق انادمـه
ودي على طول الزمن أكون منديـل الفجيـع
أحب أعمّر ما أرتضي أكون ـلحظةـنادمـه
وما دمت أنا متعافيه وما زلت في سن الربيع
مهما يكن حجم العمل أرفض وجود الخادمه



لله أبشكي

لله ابــشــكــي (حــيــرتــي ) لله رب الـعـالـمــيــن
وامــد لــه كـفـي (دعـــا) يـــالله عـفــوك ياجـلـيـل
يامنتـهـى (الشـكـوى) إلـــه العـابـديـن الصـابـريـن
يـالله (عونك0فزعتـك) همـي عـلـى قلـبـي ثقـيـل
جتـنـي (رسـالـه) نصّـهـا ياعـابـره (حــزن وانـيــن)
مع(تجربه)مضمـونـهـا فـيــه الـنـتـايـج والـحـصـيـل
في شكلها الظاهر (غطا) وفالباطن المعنى الدفين
وفـي (حبرهـا) تلميـح لايمكـن يصـيـر المستحـيـل
وانــا حقيـقـه مـاعـرفـت شـلــون بـبــدى ياحـنـيـن
مــدري ابــديّ كلمـتـي أو الــزم الصـمـت الفضـيـل
لا جـيـت ابتكـلـم لقـيـت الـوضـع قـاسـي مايـلـيـن
وان جيـت ابسكـت مالقـيـت عــلاج للقـلـب العلـيـل
لاكـنّ (عزايـه) مامعـي سلطـه ولاعـنـدي ضمـيـن
ولااقــدر امـيّـل مـاعـدل ولاقـــدر اعـــدّل مايـمـيـل
مـاعـنـدي الاّ (كـلـمـة ٍ) فـيـهـا الـعــوارف خـابـريـن
الـقــاع لاصــــارت دهــــر (يـابـدو)يـازيـن الـرحـيــل
وخـلافـهـا (سـلامـتـج) والله عـلــى الـدنـيـا يـعـيـن
والـصـبـر عنـوانـه(فـرج) والـغـيـث لابـــده يـسـيــل
ويامنـتـهـى الـشـكـوى إلـــه الصـابـريـن العـابـديـن
لاحـارت افكـاري تـرى مالـي ســواك انــت الدلـيـل




أفكار

ياكثر أفكار توارد فـي مخيلتـي
ياكثـر ماصدهـا وكنـي أدللها
لا واعذابي بليلي وعـز قايلتـي
الكل منهن تبـي منـي أسجلهـا
هذي شطبنا عليها تحـز عايلتـي
وهذي مابيها سبقني شخص قايلها
وهذي مابيها صغيرة بحق منزلتي
وهذيك لقيتها وازريـت أكملهـا
وهذي اذا قلتهـا قالـوا تعيلتـي
وهذه أهييء لها جـوٍ وأنزلهـا
ياكثر اوراق ودفاتر فوق طاولتي
من غير أجناطٍ امليهـا واقفلهـ



نون

هو يعرف أن القصايد خيالات وفنـون
واقعي مافيه غيـره شريـك بدنيتـي
مالعبوا اهل المغازل عليه ويخسـون
ماشيه في حشمةاللي مشى في حشمتي
من تربي مثلي ف بيت عزٍ مايخـون
غاليه بالحيل بالحيل عنـدي سمعتـي
ماسهرنـا بالليالـي ندقـدق تليفـون
امحشوم اللي نواه الجليـل بقسمتـي
غالي لو هو يبي قصة العاتـق يمـون
حجته تبقـى وتسقـط لعينـه حجتـي
هو نون وحطه المعتلي في وسط نون
في يدينه دمعتي وفي يدينـه بسمتـي



ورعه وأنقل إلعبي

يوم حسيت بالضيقه تهد العزيمه
قلت أبا اروح أدوج وأشتكيها لربي
قلت أبا اروح أدوج بالبيوت القديمه
وأتذكر زماني وأول أيام حبي
ويوم جيت المكان اللي شهد بالهزيمه
أول اللي وصل للقاع ضربة ركبي
صحت وين الغلام اللي غيابه ظليمه
راح لكن غرامه بالضلوع متخبي
وين ذاك الغلام اللي وصوفه عظيمه
شاقني يوم أنا ورعه انقل لعبي
كيف يمحي غلاه وله حب وحشيمه
وأول الحب ما يمحي ولا فيه طبي
مجرم ما لقينا له أدلة جريمه
إن ركد ضامري نادى على النار شبي


وسلامتكم ,,​

 

[حامله القنديل]

:eh_s(6):

يعطييييييييييييييييييييييج الف عااااااااااااااااااااااافيه

 

[معكرونه أسبكتى يم يم]

الله يرحم ام فهد ويغفر لها ................تسلمين ياقلبي

 

[أم الغالى]

الله يرحمهاا ويغفر لها ولأموات المسلمين

يسلمووو ع الطرح الراقي

 

[sheelaq8]

موضوع حلو ..يعطيج العافية

 

[& الذاهبه &]

الله يرحمهاااا قصيدتهاااا مره تحزن

 

[السهل الممتنع]

الله يرحمها .. ويذكرها بالخير .. ونعم السيره
الله يرحمها ويسكنها واسع جناته

 

[$الـــحـــلاوه$]

الله يرحمها


قصايدها تجنن
وتسلمين عالموضوع

 

[q8ya-barby19]

الله يرحمها ويغفر لها
تسلمين يا قلبي على القصه

 

[Dalo3a in Texas]

الله يرحمها

 

[المقصد]

الله يرحمهاا ويغفر الله

 

[بـنـت النور]

الله يعافيكم ..
وشاكره مروركم الروعه ..

 

[$ صمت الشفايف $]

الله يرحمها بنت عمي

والله انه قصيدها يعجبني

 

[بـنـت النور]

قصيدها يجنن ..
الله يرحمها ويرحم اموات المسلمين ..
حبيبتي شاكره مرورج ..

 

[{ عبره وهلت }]

الله يرحمها ..

لاهنتي يالغلا ع المعلومات

 

[JODA]

الله يرحمهااا حبيتها حييل هالانسااانه ايام الدراااسه كنت احب ودايم اقرى قصااايدهااا ... الله يغفرلهااا ويرحمهااا ويسكنهاااا فسيح جنااااته ويرحم موتنا اجمعين ..

 

[فيضه وشوق]

الله يرحمها
صج كانت شاعره

 

[Q8stylle]

الله يرحمهاا ويغفر الله

 

[أم الغاااالية]

الله يرحمها ويغفر لها وشكرا موضوعج روووووووووووووعه