السفر مع اليهال ؟ كل وحده تفيد و تستفيد

[in style]

السلام عليكم


حبيت تكون هذي الصفحه تفيد اي ام تسافر ويا عيالها بما ان الصيف قرب

شنو تيبين لهم

شنو توكلين

شنو اشياء مفيده لازم تاخذينها وياج


راح ابدي بنفسي

اول شي لازم مناديل ديتول و جونسون و بالنسبه للاكل عادي ويانا شوربات فرايز روب


الاشياء المفيده دارلينغز الشراشف عجييبه واايد تنفع

تفضلوا

 

[جوري الزبير]

صراحه انا بسافر اخر شهر اربع ان شاء الله واول مره بسافر مع عيالي ومادري شلون بجهزهم تكفون الي مسافره مع عيالها بعمر ثلاث واربع سنين تفيدنه جزاها الله خير 00ومشكوره in style موضوع مفيد 00السفر لشرم الشيخ

 

[أم@الحلوين]

اول شي مشكوره عالموضوع ..

أنا العام اول مره اسافر واخذ عيالي 2 معاي كانت مغامره وكنت وايد أحاتي بس حمد الله سهالات وعدت على خير واستانسنا

كافي انهم تحت عيني وما أحاتيهم .. وأهم شي انج تنظمين وقتج عدل بكل شي

اول شي بالطياره لا تنسون الشنطه للبيبي فيها :
بدله وبيجامتين وبامبرز اذا كان يلبس كميه تكفي يومين ورضاعتين وان حصل 3 مو مشكله لان احيانا الوقت طويل وصعبه بتروحين دورة المياه علشان تغسلين .. حليب في العلب المخصصه لها اسهل لك .. شيبس وسيريلاك او موزه او اي اكله خفيفه تقدرين تاكلينه اياها من غير ما يتوصخ .. فازلين .. مسحات طبيه .. مشط .. فوطه صغيره للغيار يعني كل ما تحسينه يلزمج طول هالفتره



اما الاغراض اللي تحتاجينهم أهم :


عربانه اذا كان ولدج عمره من5 وتحت ضروووووووووووي

وهذي تاخذينها من مذر كير خفيفه وعمليه وماتاخذ مكان سعرها 21 او 25 اذا حصلت صورتها انزلها انشاءالله

ديفيدي واشتري سيديات من كومار + يو اس بي = تسسسسليه لليهال



اللحين نيي حق الاكل

طبعا عادي ياكلون معانا .. عيالي العام كان عمرهم 4 ، بس كنت ماخذه معاي حليب كاكاو وعصاير وجم قوطي معلبات وجبن قلاص

شوربات وجدر صغير كهربائي وروب داناو

اما لاغراض شامبو-كريمات-كلينكس مرطب-فازلين- وغيره......

واهم شي الادويه مو تنسوونهم

 

[in style]

جوري الزبير لاتحاتين انا من سنه عادي اخذه صج حوسه بس شتسوين سهالات ان شاء الله

ام الحلويين مشكوره الاشياء اللي ذكرتيها حدها ضروريه و بالذات العربانه الخفيفه و ذكرتيني حق المطار انا مايبت الا حليب و حددي توهقت

 

[MyLittleBerry]

الله يعينج خصوصا اذا ولدج عمره من سنه لي سنتين

هالعمر اللي يبتدون يمشون مايبون الحكره ويقعدون مكانهم

المهم


اكيد مهم تاخذين معاج جنطه صغيره حق الالعاب

انا اخذ لابتوب ورسوم حقهم

اللي فوق السنتين game boy يشغلهم طول الرحله وتلوين شي مهم

بالنسبه للأكل ماراح يخلونج تدخلينه الطياره خصوصا السوائل واكل اليهال المهروس

انا كنت شاريه شوية فواكه وقطعتهم وحطيتهم في الحافظة مالت الاكل

واكل ترى الطياره يعطونج

معقم وكلينكس رطب شي ظروري ماراح تلحقين

واهم شي تشترين درزن مصاصات


بسس

 

[in style]

kuwaitbutterfly
مشكووره حبيبتي وصح ذكرتيني العاب و تلوين عشان يلهون شوي

 

[pink Engineerah]

اهم شي دوا خافض للحراره
ودوا للترجيع
العاب مثل البي اس بي

 

[om MaRyooM]

انا الشهر الياي بسافر مع بنتي عمرها سنة .. شايلة هم

بس باخذ الشغالة لأن مااقدر بروحي صراحة وريلي مايعرفلها .. عاد ماقدر افيدكم بشي لأن اول تجربة وانشالله تكون اوكي

 

[جوري الزبير]

instyle مشكوره حبيبتي ومشكوره ام الحلوين غاليتي 00
عاد انا اول مره بسافر فيهم اهم اعمارهم 3 ونص و4 ونص 00 قلت باخذ لهم تلوين ومكعب الالوان الي يلفونه عشان يشكلون اللون 00
بس عندي سؤال اليهال ان طلعو بالطياره في اشياء بتصير لهم مثلا ترجيع وله شي وله اعراض ثانيه 00 انا بروحي خوافه من الطياره واحاتيهم عشان اول سافرنه بري الحين اول مره اخذهم بالطياره

 

[أم@الحلوين]

جوري الزبير .. العفو ياقلبي
لالا تحاتين ماراح يرجعون ولا شي من الطياره انتي بس حاولي بيوم السفره لا تنومينهم وايد عشان ينامون بالطياره وانتي ترتاحين
وانشاءالله سهالات..

 

[in style]

جوري الزبير لا ان شاء الله مايرجعون ولا شي بي انتي احتياط ييبيلهم ادويه ترجيع و بندول مثل ما قالت pink engineerah


om maryoom لا تحاتين انا من هل عمر خذيته ليه رحتو مطعم اخذيلها شوربه و دايمن من السوبر ماركت ضروري بسكوت دانينو روب هالسوالف اذا ياعت فجاه
بس ليش بتاخذين خدامه خوفج تصك عليج انتي وريلج
اهوا صج تعب بدونها بس الواحد يبيله يريح شوي بدونهم

 

[استمد الشوق]

اممم

انا بنتي عمرها سنه و8 شهور
سافرنا وطبعا معروووف طلعين من الفندق الصبح وتردين الليل لازم
يكون عندك شنطه حطي فيها حفاظات بامبرز انا اخذ 5
واكياس صغار حقت الحفاضات واكياس لملابسهم الوصخه
وثلاث بدلات ... ( مره كنت ماخذه ثلاث بالغلط وسبحان الله توسخ بنتي نفسها فرتحت بذي الحركه)
وايبس ( مناديل جونسن او ديتول اللي يجي )
انا كنت ماخذه مناديل للعبايه رهيييبه حتى الغبار تشيله وتنظف زيين
وبس

 

[جوري الزبير]

مشكوره ام الحلوين حياتي وin style حياتي ما باخذ خدامه عشان انا ماعندي خدامه اصلا ااكرررررررررررهم ماحبهم ههههههههههه اروح بروحي وابتلش انا وريلي ولا عوار راسي بالخدم

 

[3rosa]

حياتي .. خوش موضوع ..

انا خذيت ولدي السنه الي طافه شهر 10 وعمره 5 شهور خذيت اولي وتالي لانه كنت احاتي

بالجنطه .. اول شيء حطيته الكمام لانه كان صدرة تعبان من بلغم بس الحمد الله ما استخدمته وحليب حطيت 5 علب ونقصني لمد2 اسبوعين شريت من اهناك بس السعر اختلف علي لانه مستورد وملابس كامله افرول او بلبطوز 8 و تبانات خذيت 10 و اكياس حفاظات واحد حجم كبير وثاني صغير و ادوية ادووووول ادويه الخشم مميات 8 حبيات وجم بدله حق الطلعه و فوطتين ادوات التنظيف بيبي جونسون


شريت عربانه من سنتر بويت وايد وايد وايد نفعتني لاني حتى تبديل البامبز كنت ابدله اذا ما في مكان العاب حق العربانه

خذيت سرير السفر معاي وايد نفعني

جنطه الطيارة

حطيت افرول 2 تبانه 2 مميات 3 حفاضات عدد 6 كلينكس مرطب بيبي جونسن مشط و كريم عطر عضاضه مميه ماي صغيرة

مميه الماي اهم شيء لانه اول قبل لا تطير الطيارة تشربينه ماي ولا مميه ولا اي شيء علشان يخفف الضغط في الطيارة

بعد اذا تذكرت شيء ازيده بعدين

 

[in style]

استمد الشوق مشكوره

3rosa مشكوره حبيبتي تصدقين عندي عمر اشهر حده اسهل حق سفر و الاشياء اللي قلتيها حدها ضروريه

 

[3rosa]

وايد اسهل بس صج نسيت وانتو عند الكانتر قولو تبون في الصف الاول حق السرير لانه واحنا رايجين وايد في يهال ما حصلنا سرير وايد تعبع بس برده اول كلمه قلت له ابي صفه اول حق السرير وايد ارتحت

 

[دلوعة*ريلي]

instyle مشكوره حبيبتي ومشكوره ام الحلوين غاليتي 00
عاد انا اول مره بسافر فيهم اهم اعمارهم 3 ونص و4 ونص 00 قلت باخذ لهم تلوين ومكعب الالوان الي يلفونه عشان يشكلون اللون 00
بس عندي سؤال اليهال ان طلعو بالطياره في اشياء بتصير لهم مثلا ترجيع وله شي وله اعراض ثانيه 00 انا بروحي خوافه من الطياره واحاتيهم عشان اول سافرنه بري الحين اول مره اخذهم بالطياره

شوفي حبيبتي انتي بالطياره لهييهم يعني قوليلهم الله وناسه الحين بطير الطياره وبنشوف السما حلوه اوجيي من هالحجي اصلا راح يستانسون انه عيالي اسمالله عليهم صغار من سن 5 سنين وتحت بس الحمدالله جم مره اسافر معاهم طياره وسياره والحمدالله والله مافي اونس من السفر مع عيالج يكونون تحت عينج وتستانسين لمن تشوفينهم مستنانسين :d

 

[PinkY Dreams]

انا برد لكويت انشالله بالصيف بشهر 8
واكون توني خالصه من النفاس ويكون عمر البيبي تقريبا شهر

وقاعده احاتي من الحين اخاف يبجي بالطياره ويزعج الناس وخاصتن يومين بنكون بالطياره وبالمطار شايلته احس بيكون لويه ومادري شنو اخذ معاي حقه يصير ارضعه بالطياره ؟ والله مادري شبسوي :eh_s(2):

في وحده قالت لي الجاهل بهالعمر مايبجي وايد بالطياره صج ؟

 

[دلوعة*ريلي]

السلام عليكم


حبيت تكون هذي الصفحه تفيد اي ام تسافر ويا عيالها بما ان الصيف قرب

شنو تيبين لهم

شنو توكلين

شنو اشياء مفيده لازم تاخذينها وياج


راح ابدي بنفسي

اول شي لازم مناديل ديتول و جونسون و بالنسبه للاكل عادي ويانا شوربات فرايز روب


الاشياء المفيده دارلينغز الشراشف عجييبه واايد تنفع

تفضلوا

:dddds: والله عاد تبين الصراحه انه ما احلي شي ماييبه حق عيالي حتى السيريلاك اييبه اذا كان عمره 9شهور جذي اييب له ليمن اوصل البلده اللي ابيها واشتريله من اهناك شوفي حبيبتي اخذي معاج اذا بطياره جنطه صغيره حق الطياره والمطار يعني حق التبديل 1 او 2 تبانه 5 حفاظات بدلتين كلينكس جونسون للبيبي وكلينكس ديتول ومميه وحليب شرشف التبديل للبيبي وشرشف خفيف عشان تغطينه اذا نام او شي والجنطه الكبيره حطي فيها كيس حفاظات الكبير وحطي علب الحليب اللي تكفيج للمده ىاللي تبين تقعدين فيها وحطي ملابس داخليه وعاديه وملابس طلعه لليهال بس كثري من الملابس عن المده اللي بتقعدين فيها لاسمح الله يتوصخون او شي احتياط وتكرمين حطي نعال للفندق و2 جواتي رياضه حلوه للطلعه وحطي عاد الشوامبو والفوط والعطور والمشوط بس لاتكثرين وايد وهم السفر اللي بالسياره نفس الشي بس الليي بالسياره زيدي عدد الملابس اللي بالجنطه الصغيره احنا انسمي هالجنطه ( تبرازه ) لانه تدرين الطريج طويل والياهل يبي كل ساعتين تبديل وحليب وغيره بس شوفي السفرتين لالالالالالالالالازم تحطين لهم عربانه والسرير النقال عرفتيه اللي بمذركير اللي جنه جنطه والله هذا وايد نفعني لانه موكل الفنادق عندهم اسره اليهال والاكل ياكلون من اكلنا اذا كبار اشوي واذا صغير يعني يحتاج انج تطحنين له اخذي معاج خلاطه صغيره كلش حق السفر فيه يبيعون صغار عشان تطحنين الاكل حق البيبي امممممممم واذا بعد ذكرت شي لي عوده مره ثانيه وسامحيني عالطواله :tek:

 

[دلوعة*ريلي]

انا برد لكويت انشالله بالصيف بشهر 8
واكون توني خالصه من النفاس ويكون عمر البيبي تقريبا شهر

وقاعده احاتي من الحين اخاف يبجي بالطياره ويزعج الناس وخاصتن يومين بنكون بالطياره وبالمطار شايلته احس بيكون لويه ومادري شنو اخذ معاي حقه يصير ارضعه بالطياره ؟ والله مادري شبسوي :eh_s(2):

في وحده قالت لي الجاهل بهالعمر مايبجي وايد بالطياره صج ؟

ايه حبيبتي عادي يصير ترضعينه بالطياره شنو المشكله احسن لج عشان ماتعوره اذونه وبعدين اللي توه مولود اصلا راح تلقينه كله دايخ بالطياره واذا تستحين ترضعينه مثلا حطيله مميه ماي وسكر نبات او اعشاب حق البيبي واخذيله معاج غيارات كثري منهم اشوي لانه صغير ويحتاج