الحياة كانت احلى واحنا صغار

[البنفسج]

آآآآآآآآآآآآخ !..

 

[حناينq8]

موضوعج حلو لانه يذكرنا بأحلى فتره مرت علينا بحياتنا

تذكرت اللبيده وحي الميد وعنبر والمقصي

وافتح يا سمسم
سندباد
مسريحات عبدالرحمن العقل كلهم رحت لهم ( الزرزور والبشه و جسوم ومشيري وطرزان)
واتذكر العيد في بيت عمتي العوده وهدوم العيد اللي كنت اعلقهم يمي قبل ما انام
وحديقه الشعب القديمه
واول ما افتحوا مجمع الخليجيه رحنا له يعني مجمع كشخه
كنت اذا احد سافر اوصيه اييب لي كلنكسات الطياره
وذكرتيني بايام العز بالمدرسه وشوربه العدس اللي كانوا يعطونا اياها بالمطعم

لي عوده للموضوع اذا تذكرت

 

[قطوه ورديه]

يسلمو عالمرور

 

[كويتيه موووت]

الله ياحلات ايام الطفوله
والله حياة تجنن اتذكر انه كنا نروح مع بنات الجيران للحديقه
ونلعب كوره مع الصبيان
وهم مرات نلعب بشارعنا كوره فريق بنات وفريق صبيان
واذكر انه كنا نروح معاهم المدرسه مشي والله كانت ايام حلوه
كل وقتنا لعب ووناسه مافي هم ولا تفكير
دايم مع بنات جيرانه نلعب ونضحك حتى مانشوف التلفزيون
نروح نلحق راعي البرد نشتري منه برد
نروح الجميعه تخيلو جمعة بنات يمكن 6 او اكثر
نلعب حجله وصراحه اول مانتفشل من شي اللحين ادنات الدون تفشلنا
يعني كانت امي تحط لنا الحنه ونطلع فيها عادي نروح نلعب برا ونستانس ولا نقول فشله على شعرنا حنه
هالاشياء الي اتذكرها
اللحين والله نفس الجيران حتى سلام مافي النفوس تغيرت
الله يكون بالعون بس ومشكوره حياتي على الموضوع الحلو

 

[shai5at al3arab]

ااااخ لما قريت عنوانج تنهدت تنهييييدة قوية :0bee2e8d89:

وازينا واحنا يهال .. وازين البراءة والقلب البارد

نروح المدرس ونرد ماكو شي اسمه فلونزا خنازير ولا شي ..

ماكو شي نحاتيه

كله مستانسين ..

يالله الحمد لله :eh_s(6):

 

[بطاط مهروس]

يا حلاة موضوعج ..... ذكرتينا باللى مضا
صج الحياة احلا ....... كنت واايد شيطانة وكنت رئيسة عصابة على اربع صبيان ..... كنت اركب الطوفة
وبعد عندى اختى تحب تركب فوق السيارة وترقص ههههههههههههههههههههههه تموت على الرقص ...... والشغلة اللى تموت من الضحك اختى الجعدة اذا ابوى زفها وامى ..... تركض تاخذ سجينة وتقول بنتحر ههههههههههههههههههههههههههه
مشكورة على الموضوع ........ وتقبلى مرورى

 

[كريستال ليدي]

اي ولله صاجة يا حلات ايام الطفولة

 

[إمارتية عسل]

ذكرتوني ع قولت المغني ماعرف منو

ألا ليت الزمن يرجع :ada: ولا اليالي تدور وننعم في بسطتنا :0bee2e8d89:
يوم كنا صغار وقلوبنا بيضا :eh_s(6):

ونوقف في الطابور وماعرف الباجي

المهم يوم صغار وايد اشيا حلوة اهم شي ان كنا ننعم برااحة البال مب احين ترقدين ومخج مب راقد :gr4uu::0bee2e8d89:

 

[A7la-SmiLe]

موضوعــــــــــــــــــج اينن

اذكر كنا انا واخواني نقعد من الصبح ونحط على قناة السعوديه كنا نشوف بباي سريع وبعدها يحطون عالاولى مسرحيات
اذكر من كانت اميمتي تودينا ارنب الجائع وكان زززحمه وكنا نلعب بالنطاطيات ونتعرف على يهال من طقتنا ونتعشى ونرد البيت
ابوي كان يودينا نحن والاطفال وكنت انا اشتري الباربي وريلها اذا تذكرون كانت ملابسهم فضيه كانت الهبه بعالم الباربي
اذكر من ابوي الله يحفظه ودانا نشتري لبس السلاحف وكل واحد تقمص شخصية السلحفاة اللي يحبها وبعدها رحنا السوق والناس كلها كانت تطالعنا lOoOoOoOoOoOl
من كنا ننخش بسارة ابوي ومن يوصل نصل الطريج انصرخ ويسوي نفسه منصدم بعد عمري علشان لايخرب خطتنا
كان ولد عمتي يودينا الجمعيه كلنا مع عيال عمتي وتصير لويه ويردنا البيت ويقعد يزفناا
كل اليوم العصر نجابل التلفزيون وامي توزع علينا بفك فيكو وككاو لولو وعصير القصدير ----- احلى اياااام
وبعد واااايد واااايد سوالف​

 

[مجنونة بس عاقلة]

لما كنت صغيرة
كنت عقيد الحارة على البنات والصبيان
كان لي مركزي<<<<<<<<<ركزوا على مركزي
ههههههههههههههههههههههههههههههههههههههههههههه
ههههههههههههههههههههههههههههههههههههههههههههه
المشكلة الحين مايتذكرون فيني الا الجانب المتوحش
اخس من جانب
هههههههههههههههههههههههههههههههههههههههههههههه
هههههههههههههههههههههههههههههههههههههههههههههه

 

[ror44]

موووووووووضوووووووووووعج اينن
ذكرتيني فيما مضى

 

[nandeny]

عورتي قلبي شقول وشحجي ذكريااااااااااااااااااااااااااات كثيره بس باختصار ولهت على العلج اللي بعلبة الزقاير والبسكوت اللي على شكل فرشاة والكيكه الورديه وغيره وغيره وغيره

 

[*أبلة*]

يحليلكم

قريت كل ردودكم

*************

انا اذكر الملاهي اللي ما كنا نروح لها الا من عيد لي عيد

كانت حوطة وحواليها جينكو وفيها دوارف

واذكر المصور اللي لازم نصور عنده كل سنه

الاستيديو ماله عباره عن ستارة للخلفية والصورة فورية

كان مكانه بالملاهي

اذكر سهرنا برمضان انا واخواني وعيال عمي ومن ياذن الفير نروح دبجه على البرادة نشرب الماي

ما ادري ليش كله علبالنا ان اللي بيصوم لازم يشرب ماي عند الامساك وان ما شرب ماي يعني مو صايم :eh_s(6):

اذكر حديقة الشعب لما كانت بس زرع وكراسي مطشرة وكل خميس اييبون فرقة تغني

اذكر لعبنا انا واخواني حزة الظهر وامي وابوي نايمين ومن نطلع صوت يقوم ابوي يزفنا

واذا كان مغضوب علي ذاك اليوم ياخذني ابوي يخليني انام بينه وبين الطوفه "" يعني حابسني عن مهايل الظهر :dddds:

كان بيتنا عربي

مره كنت العب مع اخوي بالحوش واذكر انه حذف الكرة وكسر جامة الباب ويقوم ابوي ويلحقة بالحوش علشان يطقه وهو يركض وابوي وراه

والله المنظر كان يموت من الضحك

عسى ربي يطول بعمرك يا يبا ويخليك فوق روسنا العمر كله يا رب

اذكر جيس الورق البني اللي يدخل علينا ابوي فيه وداخله بطول البيبسي على عددنا

كان يوم عيد لما ابوي يدخل علينا بالبيبسي

اذكر لما كنا نروح البقاله ونشتري كتكات وسانكيست وبفك .... كل هذا ب 100 فلس :eh_s(6):

الله يعز ذيج الايام

اذكر صبحية العيد لما ابي اغسل ايدي من الحنة واذوق الويل من العوار ولاااااااازم الفازلين ينحط على الايد عقب غسول

الحنة والسبه التقبب :dddds:

اذكر مره عمي عسى ربي يطول بعمره يبي يعايدني انا واخوي وما عنده خمستين وعطاني عشرة قالي بينج وبين اخوج ..

واخوي كانت عنده خمستين وقالي عطيني العشرة واعطيج خمسة

وانا راسي وخمسين جزمة أديمة ابببببببببببببببببببد ما اعطيك

شلووووووووووووون يصير عندك عشرررررررررررررررررة وانا بس خمسه :eh_s(14):

ويحاول يفهمني وانا عمك اصمخ .. وعمي يضحك علي ويحاول اهو الثاني انه يقنعني وانا لا حياة لمن تنادي

ليما دخل ولد عمتي وكان عنده خمستين واخذ العشرة وعطانا كل واحد بايده خمسة

انا هني تنفست الصعداء :ggdw: LoOoOoOoOoOoL الحمد لله والشكر :dddds:

اذكر لما شفت البيتزا اول مره عند عيال عمي وفتحت حلجي مبتهرة اقول حق روحي هذيل شياكلون :tomato2:

بنات منو فيكم تعرف مسلسل شبروح :eh_s(6):

كنا نتصورع منه

مسلسل بدر الزمان .. كان فارس احلامنا حزتها ابراهيم الحربي LoOoOoOoL

فلونه .. سندباد وياسمينه .. غريندايزر .. سنان

اذكر كان التلفزيون يفتح الصبح ويسكر الظهر ويرد يفتح العصر

اذكر لما كنا ننطر بس متى يفتح العصر .. ومن تطلع الرسوم المتحركة سحبنا المخده وتسدحنا حدر التلفزيون

ومعلقين ريولنا على طرف الشاشة :dddds:

اول كان في مذيعين ربط .. اللي يطلعون ويقولون : والان موعد احبائنا الصغار مع الرسوم المتحركة
اخيييييييييييييييييييييييييه كانت احلى جملة تطرب لها اذوني وتدغدغ مشاعري :dddds: :dddds:

اي نسيت اقولكم ان التلفزيون لما يخلص اول شي يطلع شعار الالوان تالي تطلع الـ ششششششششششششششششش

ولما نبي نملق نطوِّل على التلفزيون ونقلد الـ ششششششششششششششششششششششششششششش

:dddds:

اذكر كان رقم تليفونا يتكون بس من خمس ارقام

والله يا بنات ليما الحين حافظة الرقم

%&%&%&%&%&%&%&

ترا الذكريات وايد

مشكورة أخيتي على هالموضوع اللي فعلا يهيج المشاعر

بنات ترا اغلب ذكرياتي مرت على مواليد السبعينات

​

 

[العيون الشقيه]

ياااااااااااااااحلو ذيك الايام

اذكر اخر الثمانينات احلى فتره واحلى طفوله

من الروضه انا واخوي نروح مع بعض

يطقونه الصبيان وانا اتهاوش معاهم عشانه هههههههههههههه

اذكر بوم الغزو اهلي كلهم يبجون وانا واخوي وعمامي الصغار مستانسين استغفر الله

ماخذينها لعب وماندري شالطبخه ههههههههههههههههههه

ويوم سافرنا للسعوديه راكبين بالسوبر ورا كلنا ميع اطفال العايله

وعندنا صندوق طماط ناكل منه ونشرب ماي هههههههههههههههههه مصخره هههههههههههه

<< جنه مجاعه

اذكر اوبريتات الاعياد الوطنيه

كنت حييييييييييييل احبها ولازلت لا سمعتها دمعت عيني

بنقولكم سالفه للسامعين كافه

<< هذي اكثر وحده كنت احبها خخخخخخخخ

والكرتون اكثر شي كنت احبه سالي طبعا كانت تعجبني فساتينها واقول حق امي يمى اشتري لي بدله مثلها

خخخخخ من يوم يومي انيقه فديتني خخخخخخخخخخخ

وبيل وسابيستيان وجده اللي مدري شسمه خخخخ

كنا نقعد الساعه 7 الصبح

وابوي ياحياتي هو

شاريلنا سيارات ع شكل بومبو ونطلع نلعب فيهم بالحوش

من س7 ليما تبدا قناة الكويت خخخخخخخخ كانت تسكر قبل

<< بس عورني قلبي ع ذيك الايام تهئ


موضوع روووووووووووووعه يسلمو حبيبتي

 

[الفجر الجديد]

ياالله من ذكريات حلوه وعفويه بكل شئ راحت وراح كل شئ معاها بحلوها وبمرهااااااا؟؟
مواليد السبعيناااااات

من تذكر بسكووووووووت سعاده والله يابنات انى مانسيت طعمه ليما الحين

 

[ror44]

بعد بعد نبي ذكرياتكم

 

[z8rtia]

الله يا حلو ذيج الأيام =) !!!
أذكر كنا نقوم الصبح وانروح الفرع مشي
ولا بغينا انروح الظهر قالولنا تطلعلكم حمارة القايلة

 

[ضحكتي هيبة بكاي]

بكــل شجاعه بقول إني لما كنت ياهل رحت الجمعية مع ابوي وضعت ويوم لقاني كنت فاتحة علبة اسكريم وآكلها بيدي :eh_s(1):

 

[** باربي **]

اي والله صدقتي
لا هم ولا تفكير

 

[قطوه ورديه]

لووووووووووول ههههههههههه
ونستوني والله
فديتكم