الحمدلله لي 11 يوم من سويت عملية خشمي واللي تبي تعرف حياها

[انوار]

السلام عليكم ورحمة الله و بركاته

صباحكم \\ مساكم خيير

ومبارك عليكم باقي الشهر

وتقبل الله طاعتكم وصيامكم يارب و بلغكم الله ليلة القدر



انا سويت عملية تجميل ل خشمي

لي 11 يوم الحين من سويتها

سويتها ب رويال حياه


اللي تبي تعرف اكثر عن تجربتي حياها الله
وانا حاضره اعيووني لها وعشان تستفيدون

بس ارد عليكم ان شاالله باجر عقب الساعه 10 نطرووني




والله يحفظكم*​

 

[أم رنا]

الحمدلله علي السلامه

ياليت تكتبين التفاصيل
عند اي دكتور وجم كلف
وشنو كان الخشم قبل العمليه وبعدها
وياليت تدعمين الموضوع بالصور
ونعيش معاج بكل التفاصيل ومراحل العمليه من إلي

بالتوفيق

 

[Roooo7i_T3sh8a]

الحمدلله ع السلامه

نبي تفاصيل حبيبتي وان شاء الله يطلع مثل ماتبين

 

[انوار]

مشكورين ع الدعاوي الطيبه

ربي يسسعدكم و يوفقكم

ان شاالله مانزلت تجربتي الا عشان تستفيدون

بعد التراويح ان شاالله احط لكم التفاصييييل




والله يحفظكم

 

[mareea]

ننتظر التفاصيل

و الحمد لله على سلامتج

 

[$نرجس$]

الحمدالله على سلامتج منو دكتورج

 

[هدوء البنفسج]

الحمدالله على سلامتج
لكن نبي الدعم بالصور
وتوقعون اذا مرت على العملية شهر ماتبين
ونقدر نخفي اثار العملية بالمكياج

نبي نعيش معاج الجو اللي انتِ تعيشينه الحين
وربي يوفقج يالغالية

 

[الاماراتية طر]

حمدلله علي سلاامتج غناااتي

 

[انوار]

الله يسلمكم يالغاليات

ويسعدكم

بسم الله الرحمن الرحيم

بتوكل ع الله و ببدي ب قصتي مع خشمي اول

شي انا ب قولكم عن خشمي } انا خشمي

من جدام الارنبه كبيره و عندي غضروف زايد

كأن خشم الارجوز اشبهه جذي لوووول

وعندي عظمة فيها كسر خفيف وبارز شوي

بس مو مضايقني كثر شكل الارنبه المهم

رحت قبل بداية الصيف لما عطلت ل دكتور كروز ب عيادة

المزايا و شاف خشمي وجذي وقالي ببردلج العظمه

وبشيل الغضروف وجذي و يصغر الارنبه شوي قلت

ابي طبيعي و قلت بستخير بس ما ارتحت قلت انطر

واروح ل رويال حياه و دكتور منذر واشوف ليش

استعجل حجزت عند رويال من بداية شهر ٧

وانا كل ما احجز يأجلون يقول عنده عمليه ليما

صار موعدي تاريخ ٧/٣١ عند الدكتور ريزا امريكي

اصله ايراني هو الوحيد يسوي الخشم بعد كروز

ما طلع من عندهم




يتبع

 

[انوار]

وقالي مثل كلام كروز شنو يحتاج خشمي وكانت وحده اهناك مترجمه و

وحقت العمليات اتابع اللي بيسوي عمليات تجميليه اسمها حسنا لبنانيه معاه

فهمتني بعد الدكتور و جذي شراح شيصير وشنو يحتاج وقالت لي بيسافر الدكتور

بعد ثلاث ايام ب ٨/١

يعني عمليتج اذا تبين بهالتاريخ مايمدي حتى افكر قالت تعالي باجر وسوي التحاليل

واذا اوك انا ادق عليج

قلت اوك بستخير واذا بسويها بجي بحلل باجر


بس ماقدرت جتني المسعده !!,,

المهم توكلت ع الله وحللت و دقت علي العصر قالتلي عمليتج ٨/١

الساعه ٢ قبل ساعتين تكونين موجوده احس ما خذيت وقتي ب التفكير

كان كل شي ب سرعه تجهزت للعمليه وجاني الدكتور قبل لا ادخل العمليات

وقالي ب سوي جذي و جذي و طمني قال نايس نايس ان شاالله ^^!!




صحيت الساعه ٧ وانا ب غرفة الافاقه علي شاش وجبس و علي جهاز النبض

وكنت خايفه من الدم اللي ع الشاش والسستر عندي قالت لي شلونج احسن

قلت خلصت العمليه قالت اي وضحكت

للامانه ماحسيت ب عوار كلش بس كنت داايخه حيييل وقالتلي طلعتي من العمليه الساعه ٤ ونص

يعني كنت فيها ساعتين ونص

و رحت للجناح اي صح قالولي لازم تقعدين يوم تريحين لان عمليتج مابين

البسيطه و الصعوبه متوسطه

وكلفتني ٢٨٠٠



تعبت وانا اكتب واتذكر



يتبع فدييتكم*

 

[انوار]

وجهي لحد يشوفه اعيووني سود و صوب الخد بنفسجي ع اخضر

واعيووني مورمه والخد بعد اووف وجهي رررعب


بس كنت احاتي العوار بس الحمدلله مافي ابد ابد

التنفس طبعا من حلجي

واحس خشمي ثقيل وجذي انا نسيت انه فيه شي


المهم ثاني يوم الظهر

جاني مساعد الدكتور و موجود معاه ب العمليه

مصري اسمه اسلام و شال الشاش اللي داخل صج

يعور بس مو مثل وصف عوار البنات اللي قالرلي لما ينشال


عوار بسيط الحمدلله


وقال بتطلعين قلت لا بقعد بعد يوم امي صراحه قالت ريحي دام السسترات كله ساعتين يغيرون الشاش لان الدم

واجد كان حتى الدكتور قال لو تريحين احسن ماكنت احس ب عوار يالله اتحرك و تعبانه

وكانت السستر كل ماغيرت الشاش تحطلي من السبراي كتبله لي الدكتور

ومضاد ومسكنات

طلعت ثالث يوم من العمليه الظهر الحمدلله و رديت البيت

وانا معاي شاش خشمي ينزف دم ليما شلت الغرز بعد سبع ايام جذي تقريبا بس كل يوم يقل


وعدني الدكتور الخميس ثاني يوم من رديت البيت نظف خشمي جذي و شاف الجرح و قالي تعالي

الاثنين اشيل الغرز و الجبس

ورحت الاثنين و شال الغرز الحمدلله ما حسيت ب عوار


بس الجبس لما يشيله مووووت يعوووووووور حددددده والله يالله تحمممملت قعدت ابجي حييييييل يابسسس كان


والعظم فووق اخضر و مورم

والارنبه مورمه قالي التورم بيخف تدريجي لي ثلاث شهور وجذي


وحط لزقات حيييل وشدهم ووعدني يوم الخميس يشيل لللزقات


ورحت الموعد و شالهم

وقالي ريحي لي شهر صلي وانتي قاعده لا تبذلين مجهود لا تشيلين ثقيل نامي ع ظهرج لا تحوشين خشمج ب شده لا تنطقين فيه


والحين خدي مورم و مصوفر وصوب اعيوني صفار بعد وورم خفيف


وخشمي مورم حييل واخضر قالي عادي وبيخف



ياوييييييلي تعبت وانا اكتب >> بروح اشرب عصير برتقال


فديتكممم اي سؤال انا حاضره



والله يحفظكم

 

[انوار]

اي صح ما قلتلكم عن النتيجه


الخشم كله ما اقدر احكم عليه حتى الدكتور قال جذي الا بعد شهر ٣ اسابيع

بس الكسر ب العظمه تعدل ولله الحمد

صار سيده و عدل


والغضروف الزايد رااح بس العظم وارم و الارنبه


متورمه حييييل ما اقدر احكم ع شكله اذا حلوو او لأ



بس الحمدلله وهومتورم حلوو ومغير وجهي احلا من قبل





تكفوووون بنات ادعووووولي يصير مثل ما ابي يا رب يا رب يا رب







والله يحفظكم

 

[ام ذعار]

لا حول ولا قوة الا بالله
بنات تكفوون لا تسوون عمليات تجميل

يعني تسوون عمليات تغيير لخلق الله وتغضبون الله عشان الكم يوم اللي بتعيشونها فالدنيا ترو الدنيا قصيرة
وبعدها تموتون وتتحاسبون على اللي سويتوه
لو صابرين على خلقة الله هالكم يوم وبعدين يعوضكم الله بأحلى صورة فالجنه وبلاه هالتعب والعوار والعمليات وصرف الفلوس على شي حرام يغضب الله

وللي تبي تضحك على نفسها و تقول مو حرام
((ولآمرنهم فليغيرن خلق الله )) << هذي آية من القرآن مذكور فيها تحدي ابليس لله عز وجل بأنه راح يضل ابناء آدم ويخليهم يغيرون خلق الله

 

[انوار]

جزاج الله خير ام ذعار

و ف ميزان حسناتج النصيحه ان شاالله

و اللي مو محتاجه صج لا تسوي


بس انا والله يشهد عندي غضروف زايد و شكله بشع

يعني غضروفين


والله يحفظج

 

[انوار]

وان شاالله محد يسويها الا يكون مضطر و صج

ب خشمه عيب

والله يرحمنا ب رحمته و يغفر لنااا

و يكسبنا رضااه اللهم آميين

 

[saza]

الحمدلله على سلاامتج
و مبرووك الخشم الجدييد

و بخصوص ام ذعار
هالعمليات ما نسويها من هدف المتعه و اللعب بالخلقه
الناس حايشهم اكتئاب تدشين عليهم حرام و حرام !
ترى شي حلو انج تحسين بمعاناة غيرج
و اذا عن حلال و حرام
دشي بيوتيوب و شوفي حكم العمليات .. متى حلال ؟؟ و متى حرام !

 

[انوار]

الله يسلمج و يحفظج والله يبارك ب عمرج حبيبتي


الله يوووفقج ويسسسسعدج يا رب


شوفت مثلج و شرواج تخفف الاكتئاب والمعاناه صاجه والله

 

[هدوء البنفسج]

ان شاء الله تلاقين النتيجة اللي ترضيج

تصدقون ماكنت اظن انه فيه عوار فيه العملية خخخخخخخ

وعقبالي اسوي

خبرينا بالتطورات

 

[انوار]

يابعد قلبي ي البنفسج ربي يحفظج و يوفقج

تسلمين ع الدعوه الطيبه امييين يا رب

مافي عوار والله بالخشم بس دووخه وتعب بس ترا

في بنات يطلعون بعد العمليه عادي للبيت

العوار بس لما شال الشاش ثاني يوم من العمليه

و لما شال الجبس


بس تصدقين ذبحتني الحكه خشمي حييل يحكني

بس قال لا تحوشينه ابد ابد


ان شاالله بعلمكم اول ب اول شيصير معاي



ربي يسعدج

 

[$نرجس$]

انوارالحمدالله علىسلامتج بس ودي اعرف دكتورج الايراني عنده موقع عشان اشوف شغله وجم تكلفته بالكويتي