[الجامعه العربيّه المفتوحه]،،عندج أي معلومه ،، فيدينــا ،، انا الواصليّة و عبرة موادع

[!! الواصليّـــــة !!]

السلآم عليكمـ ،،

..

أبي أعرف كل شي عنهآ ..

من ناحية .،،


*طبيعة الدرآسه ؟ ( سهله / صعبه / وسط ! )

*عدد ايام الدراسه بالأسبوع ؟

* اللي شهآدتهأ دبلوم ، تكمل سنتين والا حالها حال اللي شهآدته ثانوية عآمه ؟

* تخصص التربيه الأسلاميه ؟ ياليت عطوني ادق التفاصيل عنه هذآ ان وجد لأني ماسمعت انه موجود

* الموظفه ؟ تقدر تاخذ اجازه دراسيه ؟ والا مايصير لأنها جامعه خاصه ؟

*اذا تخرجت تتغير شهادتي الى بكالريوس والا دوامي خلاص يعتمد ع اول شهادة تعينت فيهآ ؟...



الى هنآآآ انا وقّف تفكيري !!

واتمنى من أي وحدة فيكم تاخذ بيدّي انا وبنت خالي عبرة موادع


منّا لكم ..

أعذبْ تحيّه .،،

 

[الشامريه]

الي اعرفه انه مافيه تخصص اسلاميه ..............نصيييحه ابعدي عن هالتخصص لانه مكتفين انا للحين انطر الوظيفه

بعد اذنج طبعا عندي سؤااااال لبنات الجامعه العربيه


فيه دبلوم تربيه ............انا ما اقصد بكالوريس؟؟؟؟؟؟؟؟؟؟؟؟؟

 

[Lemon Juice]

سبحان الله أمس قاعده أسولف حق امي عن الجامعه المفتوحه

ودي أكمل دراستي فيها

انا متخرجه من التجاري .. تخصص محاسبه

وأبي أكمل بالجامعه المفتوحه

انا الحين موظفه بوزاره وأبي أعرف اشلون الدراسه بهالجامعه وجم يوم بالاسبوع

وشلون بالنسبه للموظفات ؟

بهالفتره ماقدر آخذ إجازه دراسيه لانه ما صارلي سنتين من اشتغلت

فأبي وظيفه + دراسه بنفس الوقت

يا ليت تفيدونا يا بنات واللي يعافيكم

ومشكوره اختي على طرحج لهالموضوع

 

[تمنيتك]

عندي معلومه بسيطه .. اذا موظفه عادي تاخذين جدولج علي الوقت اللي انتي تبينه .. في الظهر العصر والمغرب

والدبلوم يعادلون بعض المواد اللي عندهم .. وماتوقع في اسلاميه

واتوقع اذا موظفه تيبين ورقه ..من الدوام .. !


وسامحوني .. حيبت افيدك ولو بشوي

 

[spanish-girl]

بغيت اعرف شنو التخصصات المتاحة بالجامعه العربيه المفتوحه وجم رسوم الماده الوحدة؟

 

[مس*فلحه*]

حبيباتي اخوي كان يدرس فيها و توه طلع ما كمل يقول يبيلها مجااااااااااابل لان اغلب المحاضرات تنزل بالنت يعني انتي ومجهودج تدرسين نفسج وتشرحين حق نفسج..

يعني شوي صعبه وما يبيلها مسؤلية بيت وعيال.. هذا اللي أعرفه.

واي سؤال عندكم انا حاضره أسئله لكم واقولكم.

وبالنسبه حق الرسوم على حسب الماده بس ارخص من جامعة الخليج بوايد جن قال بحدود ال250 جذي وهم بتأكد لكم

 

[spanish-girl]

مشكوره مس فلحة على الرد

 

[خليج***]

الجامعة العربية المفتوحة,,او البريطانية المفتوحة

التخصصات المتوفرة حاليا\بكالاريوس في
-ادارة اعمال نظم ادارية
-ادارة اعمال اقتصاد
-اداب انجليزي
-تقنية معلومات حاسوب

واحتمال الكورسات الياية يرجعون يبطلون
تخصص تربية
واحتمال بعد تخصص محاسبة
(احتمال)
واحتمال بعد يفتحون ماجستير.


مدة الدراسة للبكالاريوس اربع سنوات.
التكلفة الاجمالية للتخرج اربع الاف دينار كويتي,,
وتعتبر من ارخص الجامعات الخاصة في الكويت,,

تدفعين كل كورس.
الكورس الواحد يطلع عليج تقريبا مو اكثر من 400 د.ك

الدوام مو كل يوم,,
وانتم تختارون اوقات المحاظراات الصبح او بالليل.

شهادتهم معترف فيها.


اذا عندكم دبلوم من التطبيقي مثلا,,
يعادولون لكم اقل من سنة.

ولما يقبلونج بالجامعة راح تمتحنون امتحان تحديد مستوى انجليزي وعربي
بس اذا سقتوا فيهم عادي ماراح يطلعونكم من الجامعة بس كل مافي الموضوع راح تاخذون مواد تقويكم بالانجليزي.


وبالنسبة لتخصص تقنية معلومات اعتقد والله اعلم انهم ياخذون علمي اما الادبي لازم تكون معاهم شهاد ال icdl رخصة قيادة الحاسوب وتقدرون تاخذونها من المعاهد الخاصة الدورات مثلا.


لغة الدراسة لجميع التخصصات اغلبها باللغة الانجليزية,,
واعتقد والله اعلم ان تخصص تربية تدرس باللغة العربية.


شروط القبول\
الاتقل النسبة عن 60% او نقطتين بالنسبة للشهادات الحديثة.
يجوز قبول الطلبة من خريجي الثنيوية دون النسبة المذكورة اعلاه اذا مر على تخرجه اربع سنوات وتوافرت لديه خبرة عملية مناسبة(ماقبل عام 2004).


القبول\
الاولوية للنسب العالية والكويتين
50%للكويتين
35%للوافدين
15%للبدون




مستوى الدراسة سهلة او صعبة يعتمد عليج بالدرجة الاولى
ومافي شي صعب وتعجيزي عند الطالب اللي يدرس اول باول
انا اعرف وحدة متزوجة+عندها6عيال صغار+تشتغل+تدرس بالجامعة العربية=متفوقة ولله الحمد.


عالعموم,,
وقت التسجيل للكلية,,
حاليا الى الان لم يتم الاقرار النهائي
اذا في تسجيل للكورس الياي ولا لاء,,
عالعموم تابعوا اعلاناتهم على موقعهم الخاص
http://www.aou.edu.kw/arabic.htm
وبالجرايد,يوميا.


واذا مافي تسجيل حق الكورس الياي,
اعتقد والله اعلم راح يكون في تسجيل شهر 7
والدراسة شهر 9

يعني ((اذا)) مافي تسجيل للكورس الياي,,
انصحكم انكم تستغلون وقتكم بشي مفيد,,علما يبتدي التسجيل شهر7
مثلا دخلوا معهد خاص لتقوية لغتكم
مثلا معهد الاثري كل شهر تقريبا 20 او 30 د.ك
تقريبا 3 ايام بالسبوع فروعهم
حولي\سالمية\فروانية
تلفونهم
رقمهم 25742401


وبالتوفيق يا حلوات:tek:

 

[!! الواصليّـــــة !!]

الف الف شكر بنات يشهد الله ماقصرتم ..
..

عصير ليمون

ترا تقدرين تدرسين لأن اغلب دراستهم تبدي العصر وساعة ساعتين ع ماض يعني شي مايتعبج

..

بس تدرون كنت ميته ابي تخصص شريعه ماهمني الشهاده لأني مابي اغير وظيفتي اللي انا فيها حاليا .. لكني ابي انتفع بعلم الشريعه خاااااااااااااااااااااااااطري ادرسه

..

دمتوا لي

 

[.:. عبرة مُوادع .:.]

ما قصرتوا يا بنااات ع الافاده ..

وجزاكم الله خير ..

ها الواصليه شقررتي .؟ نتوكل على الله ..

 

[!! الواصليّـــــة !!]

عبرة موادع ،،

والله مآدي ،، بما ان تخصص الشريعه مش موجود ،، ف رغبتي بالدرآسة تلآشت !! الى حدٍّ ما !!

،،

 

[الشامريه]

عبرة موادع ،،

والله مآدي ،، بما ان تخصص الشريعه مش موجود ،، ف رغبتي بالدرآسة تلآشت !! الى حدٍّ ما !!

،،

مادام انتي ماتبينها كشهاده يعني تبينها بس علم ليش ماتدرسين بدار القرأن؟؟؟؟؟؟؟؟

فيه دراسه وامتحانات؟؟؟؟

وراح تتعلمين العلم الشرعي......


وبكلية الشريعه شكثر كنت اشوف بنات مو من الجامعه يحضرون استماع بس للفايده

 

[أم أنور]

بنات حبايبي ماتدرون اذا في ماستر ولا لأ؟؟؟؟؟؟؟؟؟؟؟؟؟؟؟؟

 

[!! الواصليّـــــة !!]

الشامريه

بعد قلبي انتي اشكرج ع النصيحه الغاليه
بس انا دخلت دار القرآن وماقدرت اكمل ،،، الدراسه 3 ايام بالأسبوع وعدد الساعات 4 كل يوم ،، وكان العصر وانا موظفة مو قادره اركز ابد مع اني حبيته ،، وفوق هذا مايعترفون فيه يعني مايعطوني اجازه دراسيه له مستحيل
والله تركته مجبوره والا كنت اسعد انسانه فيه ,, وفصحبتي فيه ,,

ام انور

والله مادري ان شاء الله البنات يفيدونج

 

[Lemon Juice]

الواصليه

إي انا ان شاء الله ناويه أكمل وبنفس الوقت أكون ماسكه وظيفتي

بس كانت عندي هالاستفسارات

ان شاء الله خيـر



ورده بمشاعر

يزاج الله خير ما قصرتي

وايد فدتينا .. قواج الله

 

[القصار]

انا اقوووووووووووولج كل شي عن الجامعه الموقره .....


بالنسبه للدراسه .. الدراسه 25% حضور بالنسبه للتخصصات البريطانيه الي اهيه

iT حاسوب

و اداره اعمال : 1- نظم اداريه 2- اقتصاد

انجلش


و تخصص التربيه الحين مسكرينه و تقريبا صارله سنه وشي مصكرين التخصص للأسف و ماكان فيه اسلاميه في بس تخصص عربي + رياضيات + اجتماعيات



و بالنسبه انه عندج دبلوم في معادله بس عاااادي حده اذا عادلولج بس ماده ولا مادتين للأسف يعني


و اي سؤال انا حاضره اختي​

 

[القصار]

و على الطاري الماستر ان شالله على السنه اليايه السنه اليديده بيكون فيها ماستر تربيه بإذن الله بس ما يندرا تخصصات الماجستير

 

[مطيريه كيوت^_^]

اممممم

بنات ان سعوديه اقدر اكمل ماسترقسم لغه عربي في هالجامعه بليز اللي يعرف يجاوبني

 

[!! الواصليّـــــة !!]

شكرن بنات

مطيرية اكيد ان شاءالله

القبول الاولوية للخليجيين ومن ثم الوافدين ومن ثم البدون <<< ومن ثم اعجبتني !

 

[خليج***]

بنات حبايبي ماتدرون اذا في ماستر ولا لأ؟؟؟؟؟؟؟؟؟؟؟؟؟؟؟؟

بالعربية المفتوحة حاليا مافيها ماستر,,

عندج كلية ماسترخت بس تعطي ماستر ولازم تكون عندج خبرة عمل عشان يقبلونج
تفضلي بهالرابط معلومات عن ماسترخت
http://q8yat.net/showthread.php?t=265365