التسجيل في الروضه

[عيالي ذيابه]

السلام عليكم
بس حبيت أسألكم متي اسجل ولدي في الروضه
اليوم حماتي تقول بدا التسجيل
انزين شنو الاوراق المطلوبه وطريقه التسجيل
هذا بكري وماعرف شي ابد

 

[ام كوثر2007]

حبيبتي التسجيل كل سنه يكون شهر 2 تقدرين الحين اول شي تروحين حق الروضه


وتاخذين ملف صحي وتروحين فيه المستوصف اللى يتبع منطقتكم

وتطعمين الطفل التطعيمات اللازمه


وعقب تصورينه تقريبا 12 صوره

وتزهبون الاوراق الازمه اللى اهي جنسيه الاب الاصليه والبطاقه المدنيه

وصور عنها

وبطاقه الطفل الاصليه وصور عنها مع شهاده الميلاد وصور عنها

ونفس الشي بطاقه الام وجنسيتها

واللى لازم يقوم بالتسجيل اهو ريلج حبيبتي لانه ما راح يخلونج انتي تسجلينه


موفقه ان شاءالله وعقباال تسجيل الجامعه

 

[ام رينـاد]

نفس رد ام كووثر

 

[عيالي ذيابه]

مشكوره حبيبتي علي الرد
بس ليش زوجي مؤ انا
وانا بكون مسافره شهر ٢؟
يصير اسوي أوراقه كلها وابوه شهر ٢ يوديها

 

[ام كوثر2007]

اي حبيبتي انتي اللى تودينه الطبيب وتسوين كل الاجرائات عادي

لكن لمن تخلصون من الاوراق وتزهبونهم الابو اهو اللى لازم يروح عشان يسجله بالروضه ...

 

[عيالي ذيابه]

مشكوووره ام كوثر كفيتي ووفيتي

 

[@ام يوسف@]

حبيبتي بدا التسجيل من تاريخ 2/1 وينتهي 30/5 واللحين عادي الام اتسجل مو لازم الاب انا موظفه بروضه اطفال

 

[أم شيــ@وخة]

حبيبتي بدا التسجيل من تاريخ 2/1 وينتهي 30/5 واللحين عادي الام اتسجل مو لازم الاب انا موظفه بروضه اطفال

من متى هالكلام ان الام اهيا الي تسجل انا بعد موظفة بروضه مايتنا نشره فيها ان الام تسجل .
والتسجيل من 1/2 الي 5/31
الطلبات :
-البطاقة المدنية للطفل الاصلية و2 صوره عنها
- شهادة الميلاد الاصلية للطفل و3 صور عنها
- البطاقة المدنية للاب الاصليه و2 صوره عنها
- جنسية الاب الاصلية و2 صوره عنها
- الكرت الصحي
- 10 صور شخصية


في بعض الرياض تطلب صور شخصية اكثر
الاعمار الي تتسجل تكون محصوره بين تاريخ 2008/3/16 الي تاريخ 2009/3/15 للمستوى الاول

 

[سفيرة العشق]

انزين انا ريلي مسافر دراسه مايصير انا اسجل ولدي ؟؟؟

 

[om_3azoz]

انا حسافه ولدي مواليد شهر 4 مايصير ادخله واسطه مني مناك ؟؟

بينه وبين ولد خالته شهر وشي 15_3 مولود حده حده كاسر خاطري ولدي هههههههههه

 

[ام_ركون و دندون]

حبيبي ولدي باجر اقول حق ابوه يشوف موضوع التسجيل ياسعد عيني بشوفت ولدي بلبس المدرسه عقبال ما نشوفهم متخرجين من الجامعه

 

[nazek_q8]

من وين ايب الكرت الصحي

وبعدين ولدي الثاني 4/4/ مايصير ادخله مع اخوه واسطه شي شياااي ))

 

[M&Ms]

انا في شغله مو فاهماتها عندي ولدي مولود ١٠-٣ واخو السنة الي وراها ٦-٥ راخ يسير بينهم سنة ولا سنتين ؟
وعلى سالفة الي مولودين بعد ١٥-٣ سمعت ان بالخاص يسير بس لازم ماتنقلينه حكومة كلش

 

[om MaRyooM]

ومنكم نستفيد

 

[أم شيــ@وخة]

خواتي السالفه مافيها واسطه لانه السستم عندنا اذا دخلت عمر غير المحصور بين هالتاريخين راح يرفضه الكمبيوتر وايد صارت معانا
حتى مافي شي اسمه استماع مثل قبل
والكرت الصحي تاخذونه من الصحة المدرسيه التابعه لمنطقتكم
ومايصير الام تسجل حق الياهل الا بتوكيل من الزوج ( ادري انها كبيره في حق الام بس ماتلومون الي طلع هالقرار لانه وااايد صارت مشاكل )

واي استفسار انا حاضره

 

[om.googi]

انا لما خلصت كل شي من تسجيل ولوية بالمنطقة التعليمية قالولي لازم حضور الأب عشان يوقع
أو عندج توكيل عنه ,,
وقبل لا الابو يحضر تسجيل الولد رحت أجيك عالوضع التأهيلي للطفل

رحت الروضة وشفت المستوى البديع في الأكل والسوالف ,,,
قصدي في التدريس شغل حي الله ( طبعا ما أجمع )

والله وقمت وسجلته بروضة بيبي أكاديمي الخاصة ولا أحسن منها
ولا مدارسنا الله خير انا رايحة رادة كل يوم أوديه عشان يلعب والا عشان يدرس ويتقوى!

نصيحة اذا تقدرين وخري عن الحكومة ..
وفي روضات خاصة وحيل تأسيسية يعني بالابتدائي ما تتعبين نفسيا ,,

والله يعين ..​

 

[frketa1]

بنات بسأل بالنسبة حق الروضة اذكر مرة مريت روضة منطتنا وسألتهم قالولي يخلصون اليهال الساعة 12 وايد امبجر شلون انا بكون بالدوام ما تدرون مناوبتهم لي الساعة جم؟؟؟ ووقت المناوبة شسوون اليهال قاعدين جذي ولا يلعبونهم علما ناخذهم؟؟؟؟؟؟؟؟؟؟؟ ما في أحد غيري اييب ولدي

 

[umaqeel]

والله وقمت وسجلته بروضة بيبي أكاديمي الخاصة ولا أحسن منها​

أختي لو سمحتي

شلون هذي الروضة و وين مكانها و كم سعرها؟ يا ليت تعطيني تفاصيل عنها لأن آنا بنتي ودي أدخلها مدرسة خاصة بس قالولي إذا دخلها روضة حكومية ما أقدر بعدين أدخلها مدرسة خاصة.

شكراً مع التحية.​

.

 

[أو عبوش]

ام شيخووووه



شلونج


طرشت لج خاص وطلع صندوق الرسايل عندج فل مايستقبل للاسف



بغيت اسألج ياحياتي


ولدي الحين اولى روضه

الكورس اللي طاف كان بالباكستانيه يعني خاص وطلعته بسبب معاملتهم



ابي الكورس ال 2 هذا يصير انقله حكومه



لان سمعت مايصير لازم انطر للسنه الجايه ومابي يروح عليه كورس




واذا يصير ...... هل انقله نقل عادي ولا لازم اسجل مع التسجيل اللي فاتحينه الحين؟

 

[أم شيــ@وخة]

ام شيخووووه



شلونج


طرشت لج خاص وطلع صندوق الرسايل عندج فل مايستقبل للاسف



بغيت اسألج ياحياتي


ولدي الحين اولى روضه

الكورس اللي طاف كان بالباكستانيه يعني خاص وطلعته بسبب معاملتهم



ابي الكورس ال 2 هذا يصير انقله حكومه



لان سمعت مايصير لازم انطر للسنه الجايه ومابي يروح عليه كورس




واذا يصير ...... هل انقله نقل عادي ولا لازم اسجل مع التسجيل اللي فاتحينه الحين؟

هلا اختي

النقل من خاص الي حكومة او العكس مافي الحين الا على السنه اليديده يعني شهر 9 يبدي لي 11

يصير تنقلينه من الباكستانيه وهذي اجراءاتها طويله بس تخلص في يوم واحد
وتنحسبله السنه الي قعدها بالباكستانية

ويصير تسجلينه انه طالب مستجد سنه ثانيه بس بدون ماتقولين لهم ان كان بخاص ولا الكرت الصحي تاخذينه من المدرسه

وفي الحالتين الاجراءات تتم عن طريق الاب