الاسباب ياخواااات اللي تهدم بيوتنا واحنا نعلم هالشي

[Freakya]

احس هالموضوع ينطبق عالريال اكثر من المرا ، الا اذا هي كانت يرعة

 

[tooooma]

احس هالموضوع ينطبق عالريال اكثر من المرا ، الا اذا هي كانت يرعة

ممكن كلامج صح ولكن ايضا في البعض من الخوات للأسف مايتكلمون الحق والعذر اخاف يزفني

او اخاف يقولي لاتروحين

وياترى وين تقع المشكله اذا الزوج قال هالشي مثلا هل يستاهل الموضوع اني اعاند زوجي واخرب

بيتي

 

[mrs.abk]

أنا أشزف وايد أسباب ثانية ..

الزوجة الحين تعامل زوجها بندية .. تبا تتساوى معاه بكل شيء وناسية إن الله سبحانه وتعالى يقول ( وللرجال عليهن درجة) ..
تلاقينها تحاكمه .. تصارخ عليه ... تتأمر عليه .. تطالبه باللي فوق طاقته


فيه بعد اهمال الزوج لمشاعر زوجته .. لو هو حاكرها عن ربيعاتها .. موب غلط هو يطلعها ويمشيها .. أو يسمح لها تستقبلهم بالبيت عنده مرة كل شهر .. أو حتى يسمح له تروح معاهم لمة في بيت وحدة منهم ( عادة الرياييل ما يحبون الحرمة تفر بالسوق مع بنات أو بروحها لأن هالشيء شبهه عندهم وتكون معرضة لتحرشات )

وفيه الريياييل اللي متأثرين بالصورة السلبية عن الزوجة .. يخاف ياخذ بشورها بيقولون ( سكانه مرته) .. ويخاف يعطيها مجال في حياته يقولون أهمل الدنيا علشانها .. ويخاف يوقف بصفها لا غلطوا عليها أهله يقولون خلته يعق والدينه ..
وفيه اللي يشكون ليل ونهار بسبب سوالف ربعهم عن البنات .. وفيه اللي يستغلون الحرمة ماديا لأنهم بعد يعتقدون أن الحرمة ممكن تبديلها بسهولة بالتالي لازم يربح من وراها أكثر وأكثر .. وفيه اللي يخونون بس لأن ربعه عزابية ويكلمون بنات ويعرفونه على أخت أو عمة أو خالة أو ربيعة ربيعتهم!!

فيه من الحريم اللي تعتقد بيت زوجها نفسه بيت أبوها تبا تعيش بنفس الاسلوب ونفس الطريقة نفس كمية النوم ونفس طريقة بعثرة الملابس ونفس الكشة الصباحية ونفس التدلل والدلع .. وفي نظرها الزواج بس قميص نوم وتسبيل عيون .. وهالشيء يعصف بسالفة الاستقرار الزوجي


فيه حريم يوم يقعدون مع غيرهم يشجعون على الحش بالرياييل وتلاقين كلامهم ذم بذم في صنف الرجال وهالشيء يشحن الحرمة غصب عنها ويعبي راسها أفكار سلبية .. ويزرع فيها نزعة التحدي وبالغالب تصطدم مع زوجها خلال يومين أو 3 من بعد هاللمة النسائية الغبية !

غيرة الحريم من بعضهم .. تغار من لبس أختها وساعة حماتها وتنشغل بتفاهات عن واجب المودة والرحمة اللي لازم تقدمه لزوجها تلاقين قلبها يستعر نار من إن اللي حولها عندهم وهي ناقص عليها بدون مراعاة إن هالاشياء كماليات ويقدمها الزوج لزوجته برعبته وإرادته ومدى كرم ايده وأخلاقه .. مع الوقت النظرة السطحية المادية للحرمة المتطلبة تييب مصايب


عدم حسن تربية العيال .. وايد حريم يرددون أنا قايمة بعياله ومسوواليتهم علي .. وبس تيين للصدق تلاقينها تطالع لبسهم وأكلهم فقط لا غير وغالبا الشغالة هي اللي تسوي هالشيء والام بس تاكل وياهم وتصارخ عليهم .. بس العيال لا لهم مواعيد نوم ولا عندهم حسن ألفاظ ولا مركزة على نظافتهم ولا على تعليمهم احترام أبوهم أعمامهم وأجدادهم ..
وغالبا هالحريم كل ويك اند بيت أهلها ومبعدة العيال عن بيت أهل أبوهم .. وهالشيء له تأثير سلبي في ما بين الزوجين


تدخل الاهل .. أختها وأخته وأمها وأمه تحديدا.. كل وحدة تبا رايها يحرك الحياة الزوجية للزوجين .. كل وحدة تشوف إنها هي صح وإن الزوجين لاااازم يطبقون كلامها .. الأخت تشيش أختها .. وأخت الزوج تحن على راس أخوها .. أم البنت طول الوقت تتصل ببنتها تشحن مخها .. وأم الولد برطمها للأرض وتنافخ جنها تنين ومن تشوف الولد أو زوجته تبدا تعق الرمسة السم ..
أكيد هالشيء بيخرب بيت أحسن عايلة موب زوجين عاديين



ومن الاسباب اللي أحسها محد يتكلم عنها .. إن معظم الزوجات ما تشوف الزواج إنه مشروع أبدي لحياة أبدية ما يفرقها إلا الموت .. الغالبية تشوف إن لو فشلت بتجرب مرة ثانية .. والرياييل نفس الشيء .. لو فكرتي بإنج تعيشين هالشيء للأبد .. وإن هذي حياتج اللي بعد 40 سنة بتحتاجين ذكرياتها يوم تقعدين إنتي والشيبة تتسندون على بعض والبيت خالي عليكم مالكم إلا بعض .. جان رحمتي نفسج ورحمتي الشيبة من الحين .. وعشتي بتسامح أكثر وحنية أكثر وتغاضي أكثر


فيه شيء ثاني مهم بنات ..
الانسان ينولد بطبعه رؤوف .. رحيم .. فيه حنان وبراءة ..
مع الوقت يقل هالشيء .. لها السبب لازم في كل وقت تدعون إن الله ما ينزع الرحمة والطف والحنان من قلوبكم .. تشحنون هالشيء بالتفاعل مع قصص الناس الحزينة .. وبمساعدة المحتاجين ,. وبالصدقة واللعب مع الاطفال .. وزيارة كبار السن والمرضى .. كلها أشياء تشحن الرحمة في القلوب .. وبالتالي المشاعر .. الحب .. العطف .. المودة .. وهي أساس الحياة الزوجية المستقرة بإذن الله

وايد أشياء في بالي بس هاللي عرفت أعبر عنه الحين .. ومن الاسباب اللي أشوفها واضحة ..

 

[tooooma]

مشكوره اختي mrs.abk شاكر ردج وتفاعلج لموضوعي وبصراحه انا ما اعترض على الكلام اللي قلتيله وفعلا هذا واقع

المجتمع الكويتي بالاخص وليس الخليجي وشكرا

 

[Kocheko]

صح الكلام الي قلتية بس هم هالحجي يتوجهه حق الريال بعد لاز م يحاسب نفسة مو كل شي على المراااا لازم يكون صادق بعد مو يقول بروح دوانية واهوو يقز بمجمع ولا مخلي مرتة ويطالع افلام

:rerrerek:

 

[مدّهره !]

يعطيك العااافيه ^^


والكذب مشكله كبيره عاد شلون بين زوجين !!

 

[mrs.abk]

مشكوره اختي mrs.abk شاكر ردج وتفاعلج لموضوعي وبصراحه انا ما اعترض على الكلام اللي قلتيله وفعلا هذا واقع

المجتمع الكويتي بالاخص وليس الخليجي وشكرا

والله يا أختي كلنا يدور علينا نفس الشيئ..

انا أتكلم من اللي أشوفه في المنتديات .. من اللي أشوفه في الحياة من القصص اللي تمر علي وأسمعها

صدقيني قلبي معورني على هالتفكك اللي يعصف بالخليج .. كلنا كنا مجتمعات متماسكة بمحبة وترابط وين كنا ووين صرنا ؟؟!

 

[*مطبخ الذواقة*]

حياج الله حبيبتي توما مشكورة على الموضوع المهم بصراحه ..


شخصيأ أعتقد ان أول خطوة في طريق المشاكل الزوجيه هو الكذب ..

وللأسف في بعض الخوات يشوفونه هييين وبسيط ...لكن اذا في يوم اكتشف الزوج انها تكذب عليه والله انه ما ينسى حتى لو سامحها ..

وراح يبدأ الشك يلعب فيه ...باي تصرف تسويه ..يعني مثلا يقولها وينج تقول أنا في المجمع الفلاني وهي في مكان ثاني !!

وبعد ما يكتشف انها تكذب ..اكيد يسأل ليش جذبت علي !!



اما موضوع البلاك بيري والانستجرام وغيره

فهذي حدث وﻻ حرج ...



اسأل الله ان يهدي بناتنا ويهدينا ويهدي المسلمات ...







وشكرا لج مرة ثانيه

 

[tooooma]

اشكركم خواتي على تفاعلكم مع موضوعي البســــــــــيط واتمنى من الكل يفيد ويستفيد

والله يشهد انه هالشي يؤلم القلب مجتمعنا كانو يضربون فيه الامثال من ناحيه المحبة والتمسك لكن للاسف هذا الشي اصبح من الزمان

فليت هذا الزمان يعود ويرجع معاه ماهو جميل

 

[اميره1980]

الكذب سواء مع الزوج او غيره ما احبه
لان الكذب يؤدي الى اشياء ثانية اكبر
بس بتكلم الحين لو مكذبه على زوجي و طاح علي خصوصا اذا كنت طالع و ما عنده خبر و اكيد بطيح من عينه و ما راح يثق فيني نهائيا باي شي بحياتنا و راح يؤدي للطلاق
بالنسبه للقطات الوصخة او صورة مو زينة بالموبايل انا اخاف من ربي قبل زوجي او اهلي و الحمدلله

 

[نـعـومـه]

صح كلامج

بلاك بيري ايفون وايد وراها مشاكل

وسالفه الجذب بعد حرام شرعا بعد

وايد شغلات تهدم البيوت

 

[tooooma]

يعطيج العافيه اختي اميره وتسلمين على مشاركتج

وفعلا الثقه راح تسقط بين الزوجين اذا لم تكن الصراحه موجوده

ترى يابنات جد والله واايد في متزوجات يطلعون من غير شور ازواجهم بس للاسف ماعندهم الجرأة على المشاركة في نفس

هالمواضيع لانها اتحب اتكون بأحسن صوره