الإضراب قادم

[عواشه بنت بو حسين]

بسم الله الرحمن الرحيم

والصلاة والسلام على سيدنا محمد وعلى آله وصحبه أجمعين

عزيزاتي المعلمات

بصراحة وبدون مقدمات طفح الكيل من وزارتنا التعبانة ، وتعبنا وزهقنا وإحنا نعطي فوق طاقتنا وبالأخير مو عاجب .


زميلاتي خلاص حان وقت أخذ حقوقنا لو بالقوة ، لي متى وإحنا تحت سيطرة الناظرات بكل شي ونحاول نرضيهم بشتى الطرق وبالنهاية يتمنون عليج بالإمتياز هذا إذا خذيته ، والمشكلة إننا يا معشر المعلمات عايشين هالظلم بروحنا لأن مدارس البنين مرتاحين بفضل إداراتهم المتفهمة .


حبيباتي وزيرنا زاد الطين بلة وبعد وعوووده الخيالية أهدانا البونص إللي راح يصير سلسلة حول أرقابنا من قبل الناظرات ، والله لو شنو تسوين مستحيل تاخذينه لو شنو درجة تميزج ـ وكلكم اطلعتوا عليه وأكيد صابكم إنهيار عصبي منه والتفكير بالإستقالة .


بس لا مستحيل نعطيهم فرصة ولازم ناخذ حقوقنا مثل غيرنا إللي خذوا كوادرهم بالإضراب


يا معلمات إحنا نشكل 70% من عدد المعلمين الكويتيين ، والمعلمين على قلب واحد وشانين حملة كبيرة بتويتر بس هالإضراب ما راح ينجح إلا بالمعلمات .


لا تصيرين سلبية شاركي ، وترى الإضراب عبارة عن غياب يوم بس ما راح تخسرين شي



وتحياتي



إللي تأيدني فيكم تعلن الإضراب



وآنا أولكم



إضــــــــــــــــــــــــــــــــــــــــــــــــــــــــــــــــــــــــــــــــــراب :eh_s(14):

 

[بنات حواء2]

انا وياكم لانه اشوف الكل اضرب و خذا حقوقه
و احنه مكروفين ماشوف احد عطانه حقوقه
شايفينه خيخه ساكتين و مانقول شي
اهمه زادوا ساعات العمل و لا تحجينه و لا قلنه شي
هذا الغلط الصمت عن الحق
انسان قاعد يسكت عن حقه بينتهزونه
هذا مافيها روح تعال و لاتنسون
ترى
الساكت عن الحق شيطان اخرس
فمابالك لو كان هذا الشي حقج انتي
انا برايي الحريم مايسوونها انا اعرفهم

 

[يا كويت]

الله يضرب عنق كل من يحتقر مهنة التدريس وحاسدنا على معاشاتنا

حسبي الله ونعم الوكيل


والله ما يهمني الكادر بس ما أدري حاسة ان الكل حاقد على المدرسين ومو حاسين بتعبنا

 

[عواشه بنت بو حسين]

المسألة مو مسألة فلوس ، المسألة كرااامة ، تخيلوا المعلم أقل أجر في الكويت ، خريجي المعاهد معاشهم أكثر منا


صدقوني يا بنات لا توقف عزيمتكم ، حتى لو ما أقر الكادر كافي نرفض البونص إللي بيحقر من مهنتنا أكثر وأكثر


لا تقولين مالي شغل


اشتغلي بصمت ما عليج إلا غياب يوم الإضراب

 

[يا كويت]

أنا راح أضرب ( إن شاء الله ) بطريقتي الخاصة


لا للأنشطة على مستوى المدرسة


لا للانشطة على مستوى المنطقة


لا للأنشطة على مستوى الكويت


لا لأشغال التوجيه اللي ما تنتهي

لا لتصحيح الثانوية العامة اللي يمتد لانصاف الليالي <<<<< خفر السواحل مثلا


نعم لحصتي وبس ....

 

[رتبه دبلوماسيه]

...

 

[قاهرتهم 2011]

ما نبي فلوس تروح على حساب صحتنا وعافيتنا

1- تفريغ المعلم لمهنة التدريس فقط يعني حصتج وبس لااا للمناوبات لااااا للاشراف لاااااا لمربيات الفصول لا للاحتياطات والاذاعه والمهرجانات الزايده اللي ترهق المعلم والطالب في نفس الوقت
2- الاطلاع على التقرير من حقنا نشوف تقاريرنا حالنا حال باقي الوزارات والدول الثانيه
3- ممنوع يصرف المعلم من جيبه على المدرسه احنا مو ملزومين نصرف ولا فلس على المدرسه لانه بالواقع الاداره ورئيسة القسم تسجل عليج انج غير متعاونه في بند التعاون وهالشي حرااااااااااااااااام
4- تخفيف المناهج عن الطلبه لانها بكل بساطه فوق مستواهم العقلي خاصه طلبة المرحله الابتدائيه وما تناسب المده الزمنيه كل سنه ناخذ حصص اضافيه فوق الحصص الاساسيه ونعطي باليوم اكثر من درس بس عشان ما نتحاسب من التوجيه لانه المنهج ما خلص واللي ماكلينها الطلبه المساكين
5- محاسبة التوجيه على أخطاء الاختبارات مو يكرفونا طول السنه بطلباتهم اللي ما نستفيد منها شي واخر السنه يدزولنا اختبار كله اخطاء
6- يصير التوجيه كويتي 100% لانهم ادرى بمصلحة البلد من الوافد اللي همه بس الفلوس وترقية المعلمات الوافدات على حساب المعلمه الكويتيه !!
7- تمييز المواد الاساسيه عن المواد غير الاساسيه
8- عمل دورات عن فن التعامل مع الاخرين وهالدورات لازم تصير تذكير كل كورس في المدارس للاداره المدرسيه ورئيسات الاقسام والمعلمات بالذات بعض الوافدات من جنسيه معينه اللي يهينون عيالنا وتعاملهم وألفاظهم غير محترمه وتدريس بدون ضمير حتى يلجا لهم الطلبه في الدروس الخصوصيه وتسريب الاختبارات.

واذا تذكرت شي برد اكمل

 

[منال القلب]

أنا وياكم اذا فعلا شفنا تحرك.. مو بس كلام وحزة الحزة نسكت

 

[مشغوله و محتاسه]

ما ابي احبطكم ... بس لا تحرون عمركم

من الآخر اقولكم .. الاضراب ماراح يصير .... من متى نسمع عنه و حاولت الجمعيه تسويه ولا صار شي

اشتغلو باللي يرضي ضميركم و ضغطو على هالجمعيه اللي وجودها مرات مثل عدمه و خل اهم يتحركون

عيل شنو مهنتهم ... يطبعون سجل تحضير يلوع الجبد محد يستخدمه و بس ؟؟

و تركو عنكم الخبة الزايدة بالمدارس و المظاهر اللي مالها داعي .. درس ولا ورشة تطلبون لهم من ارقى مطعم و اغلى خدمة على شنووو ؟؟


و ترا الكادر و غيره .. ان حطوهم .. بيحطون الف شغله مقابلها ... اولها بيطولون الدوام و يصير طول السنه الى الساعه 2 اذا مو اكثر

 

[^^ريهام^^]

الحريم ما منهم فايدة صدقوني

شفتو لما طولوا العام الدراسي حق الانشطة , كنت شاطة عمري ومحترة واتفقت مع المدرسات اللي معاي ان ما راح نداوم يوم الثلاث , تصوري انا الوحيدة اللي غبت

الحريم ما منهم فايدة خوافات

 

[مشغوله و محتاسه]

تصوري انا الوحيدة اللي غبت

شي متوقع
ما لهم كلمة

و تلقينها تشط عمرها بالحجي و تصدعج واهي تتحلطم و وقت الجد تقوم تخلص شغلها اول وحده و اتداوم من الصبح !

 

[^^ريهام^^]

شي متوقع
ما لهم كلمة

و تلقينها تشط عمرها بالحجي و تصدعج واهي تتحلطم و وقت الجد تقوم تخلص شغلها اول وحده و اتداوم من الصبح !

اي والله صاجة

ما عليج كلنا راح نغيب ونوريهم ويتحلطمون , وانا الوحيدة اللي طلعت بالشينة قدام الادارة

لووووووووووول لما اتذكر اللي صار اضحك على روحي بويهج حجي ومن وراج حجي

عاد بعدين غسلت ايدي منهم صرت ما تحلطم ولا اتشكي اخلص شغلي ومالي شغل باحد

 

[معلمة_منكوبة]

ماراح يصير شي وراح نداوم ونسوي كل شي واذا ماداومنا الوافدين العله راح يداومون

والوزاره يدرون انه الكل خايف تزيد مرضياته بالاضراب على الفاضي فضامنين انه ماراح

يصير شي .... المفروض يصير اضراب مدروس والمفروض احد ينضمه (جمعية المعلمين)

بس بما انها فااااااااااااااااااااااااااااااااااااااااااااشله وشلليه وتابعين اجنده ومانشوف منها اللا

الكلام اللي يقصون علينا فيه بس مايقصون على نفسهم ... وغير المعاش انا اقول لو

يدافعون عن كرامة المعلم اللي مو موجوده الحين أحسن .. مابغيت أقطع فيج الأمل

حبوبه بس هذا اللي صاير لازم تصير هزه قويه من الكل واولها من المعلمين علشان

الكل يعرف حدوده حتى عضوات بمجلس الامه يتمصخرون على المعلم ..


أول تغيير بنظري تغيير الجمعية اللي تدافع عن حقوقنا ؟؟ منو ينتخبهم ؟؟ وعلى اي اساس

ووين الانتخابات شنو الشروط ومتى تصير؟؟؟؟ مادري شكله كل هذا مدروس

 

[TIC TOK]

بنات شالسالفه شهالاعذار



احنا مشكلتنا حاسدينا عالكادر وبس



انا اضراب من دون كلام



نعم لاحترام المعلم



لا لاحتقار المعلم

 

[جلكسيه اس 3]

أنا معاكم قلبا و قألبا
بش المشكله مو ابله

 

[جيتك تعال]

بالفعل يبيلهم اضراب ومو مشكلة يوم قلعته خل يعرفون قيمتنااا

مو هم قاعدين عالمكاتب وكل واحد يتنفتج على كيفه

خل ييون يدرسوون يوم اضرابناااا

 

[@ نجمة العطااا @]

الحريم كلااااااااام علي الفااااااضي ومافي اي فعل
نصيحة كل وحده تشتغل بضميرها بدون اي اضافات حصة وبس
والرازق الله
عموما أنا وحده ما اعرف اذا ما قمت بالشغل قومة صح والا فلا اقعد بالبيت واستقبل
هذي أمانة ولازم تؤدي بكل ذمة وضمير واذا علي الكادر فالرازق هو ربي سبحانه واذا أراد أمرا انما يقول له كن فيكون والله لا وزارة ولا العالم كله بيوقفه اذا ربي كتبه لنا واذا ماكتبه ربي لنا والله لو العالم كله يتبرع ما راح يحشونا فلس
انما افوض امري لله سبحانه وحده كفيل بي وبكم

 

[خيشة شكر@]

اللهم لا سهل الا ما جعلته سهلا @ @ @ @
يالله تعدي السنه الجاايه على خيير@@@
ياليت يرجعون الدواام مثل قبل ليـــ الساعه 12 ونص

 

[لحظه من فضلك]

صدقونى حريم ما من وراهم فايدة عمرى ماراح انسي النشاط​

 

[بنت شرق]

الحريم ما منهم فايدة صدقوني

شفتو لما طولوا العام الدراسي حق الانشطة , كنت شاطة عمري ومحترة واتفقت مع المدرسات اللي معاي ان ما راح نداوم يوم الثلاث , تصوري انا الوحيدة اللي غبت

الحريم ما منهم فايدة خوافات


صاجه اختى انا معاج بس حجى اهنى بالمنتدى وماكو فعل ويوم قالت الوزيره تبى اطول اليوم الدراسى الكل اعترض اهنى وقالوا بيسون اضراب ولما رحت انا مع مدرساتى ما لقيت ولا مدرسه بس كانوا المعلمين موجودين