اكمل ولا ما اكمل ابي رايكم خصوصا اللي زوجها اصغر منها

[3thbya]

مشكورين بنات على ارائكم وادري انها حياتي ولازم انا اللي اقرر
بس يمكن اكون غافله عن امور انتو تنبهوني عليها
وهذا قرار مصيري اكيد استخير ربي فيه واسمع وجهات النظر وبالاخير اسوي اللي ارتحت عليه

 

[عطاء أنثى]

اقطعي هالعلاقه ولو يبيج يدل بيتكم

 

[3thbya]

اقطعي هالعلاقه ولو يبيج يدل بيتكم

لا اختي ما يدل بيتنا

 

[HUSH~]

المشكله مو بالعمر
المشكله انج تعتبرينه صديق
هالصديق بتتقبلينه يوم من الايام زوج يلمسج وياخذ حقوقه ؟

وديري بالج تاخذين بتجارب احد ؟ اصاابع يدج مو سوا وكل واحد له شخصية تختلف عن الثاني اذا واحد يعاير الثاني عقله اكبر من تفاهات المعاييير ؟
شوفي شاللي يريحج وسويه :**

 

[انسام الكويت]

سوري بس اهو حاليا ً يمر يمرحلة طيش يعني ياهل عاش معاج تجربه واستمتع فيها ومو مصدق من هالعلاقه لكن لو بيطوف عليه جم سنه راح يغير

رايه بفكرة زواج منج لكن نصيحه زواج هذا ماعتقد بيتم لانه طريقة التعارف مش ولا بد وفوق هذا انتي عادته كصديق يعني سوري مقزره وقتج معااه

أنا أقول. اتركيه والتزمي والله يعوضج بالريال اللي أحسن منه ... أنا ماتفرق معاي العمر كثر مايفرق معاي طريقة التعارف استغفر الله هاذي علاقة محرمه

اتركيه وخلي عنح سوالف الجات وتويتر وتعارف مابني على باطل فهو باطل...

 

[ايام وردية]

صدقيني العمر مهم بالنسبه للرجال يوم من الايام بيعيرك

 

[قآنون كيفكـ!!]

انا ماحب طريقة الزواج هذي احسها تسحب معاها شك
واستخيري الله يوفقج

 

[memo_ikarus]

حبيبتي يمكن يكون عمره 19 عقله كبير وفاهم ويقدر
ويمكن يكون عمره 30 وعقله وتصرفاته (( طفل ))
العمر مو كل شي اعرف وحده عمرها 31 وهو 26
وهي صغيره بالشكل ويحبون بعض ومرتاحين ومايعايرها
ومهتمه بنفسها ولبسها العمر مو كل شي والنقاب مو مشكله
دامج تحبينه وراضيه وعلى سالفه الطلعات مع رفيجاتج تقدرين
تسالينه واذا رضى الحمدالله واذا لا تجمعو في بيت وحده فيكم
والله الي يبي يسهلها يسهلها والي يبيها صعبه هم بلاقيها صعبه
ومن ناحية السوق ولا دفع فواتير يمكن اهو يحب ايي معاج و يوديج
وانا اقولج لا تحاتين وخل يخطبج واستخيري واهلج يشوفونه والله
يتمم عليكم

​

:eh_s(17):​

 

[والله أحبها]

السلام عليكم ورحمة الله وبركاته .. للامانه موضوعج له عدة تفرعاات واليشفته من ردود الخوات ان كل وحده علقت على الكلام من زاويتها الخاصه وحسب وجهةنظرها دون التطرق لجميع الجوانب سوائ السلبيه منها او الايجابيه ...

راح افند معااج نقطه نقطه بموضوعج :-

1- انه اصغر منج :

العمر مو عائق كثر الشخصيه شكثر رياجيلومتزوجين وابو عيال وراعي خرابيط ومغازلجي والعكس صحيح ,,, وفي امثله ان عاديالعمر يكون صغير وان ماله علاقه بالشخصيه , فمثلا العباس رضي الله عنه كان قائدلجيش المسلمين وهو في سن 17 عام وكان خلفه الصحابه بس لان شخصيته كانت قويه وشجاعقاد المسلمين لنصر عظيم .





وكـــممــــن فــتــى ســاقــط عـقـلــه ... وقد يعجب الناس من شخصه

وآخــــرتــحــســبــه أنــوكــــا...ويـأتــيــك بــالأمـــر مـــــن فــصـــه



هالبيتين للخوات الي قالوا انه مندفع وجااهل . وما اظن انه لما قالجيبي يتزوجج ما كان عارف فرق العمر .. وانتي الشخص الوحيد الي يقدر يحدد اذا كانعقله كبير وقادر ع تحمل المسؤوليه او لا .



*- طريقة الزواج :

قال رسول الله صلى الله وعلية وسلم (ما رأيت للمتحابين خيرا منالنكاح)
شرحالحديث :
(( فالحديث رواه ابن ماجهوصححه الألباني بلفظ "لم ير للمتحابين مثل النكاح" ورواه البيهقي بلفظ: "ما رأيتللمتحابين مثل النكاح" ومعنى الحديث أن الرجل إذا نظر إلى المرأة وأحبها، فعلاج ذلك الزواج بها،قال المناوي في "فيض القدير" بعد ذكره لهذا الحديث: إذا نظر رجل لأجنبية وأخذتبمجامع قلبه فنكاحها يورثه مزيد المحبة، كذا ذكر الطيبي، وأفصح منه قول بعض الأكابرالمراد أن أعظم الأدوية التي يعالج بها العشق النكاح، فهو علاجه الذي لا يعدل عنهلغيره ما وجد إليه سبيلا. اهـ.))

لو تفكرين بالمنطق ربج الي كاتب طريقة التقابل بينكم يمكن مستحيلترتبطون الا بهالطريقه وبصراحه الزمن هذا يخرع والشباب يخافون انهم يطيحون ببنتزانيه او رايحه فيها وأكيد ما قالج ان بيتزوجج الا انه واثق تمام الثقه من اخلاقجالعاليه , كل الي عليج تحسنين الظن بالله وانج تعتقدين بداخلج ان ربي بيكتبلجالخير اينما وجد .



3- بيئاتكم المختلفه :
ما في بنت تظمن بيئة زوجها قبل الزواج على الاقل انتي رحمه من الله انج قعدتي معاهسنتين عشان تعرفين بيئته , وقضية الغيره حلو ان الرجل يغار ع مرته واما ان انتيتخلصين شغلج ما في بنت تحب ان شوجها يكون بارد اما الطلعاات فاغلب البنات بعدالزواج تقل طلعاتهم حيل مثل ما الشباب تقل سفراتهم وقعداتهم بالدواوين لان الزواجمسؤوليه , وانتي ايظا الوحيده القادره ع تحديد اذا كان حجر حيل على غباء وعناادونظام انا الرجال وانا اللي كلمتي اهي الي تمشي او ممكن يكون سلس يسهل التفاهممعاه .





4- الايجابيات حلوه اليفيكم ودام سنتين علاقتكم احترام فهذا شي ايجابي .



نصيحه مني لج عطي نسفج انتي وياه وقت للانتقال من مرحلة الصداقه الىمرحلة حب واهو على كلامج يحبج جربي هل هو الحبيب الي تنطرينه عمرج كله هل فيهمواصفات الرجل الي ودج ترتبطسن فيه عمرج كله , يمكن لو وقفتيوا تندمون عمركم كله لان الفرصه وحده .



استخيري وكثري من الدعاء وباذن الله ربي بيكتبلج اللي فيه الخير



وفي الختام إن اصبت فهو من عند الله وإن اخطأت فهو مني ((

 

[والله أحبها]

سوري على البدلياات ):

 

[زوجة عزيز]

اهو خل ايي بالاول ترا وايد شباب يوعودون البنات بالزواج ومايوفون بوعدهم اذا كان صاج استخيري اول واسئلو عنه اذا مافيه عيب توكلي على الله ووافقي ترا باسورداته وحساباته ماتهم هالاشياء يمكن عنده حسابات ثانيه بتويتر والفيس بوك وغيره وغيره الاهم انه اهلج يسئلون عنه

 

[ماريا ابنة الحي]

شدراج انه جاد بالموضوع؟؟

 

[3thbya]

شدراج انه جاد بالموضوع؟؟

لما شخص يكلمج سنتين وراضي بتشفير كل شي يخصج حتى اسم السايق بدون لا يطلب اي تفاصيل شخصية عنج واغلب اللي اعرفه عنج بالصدفه
وبالمقابل اهو يأتمنج على كل تفاصيل واسرار حياته .. هذا ما يكون شخص يلعب

انا اعرفه عدل واعرف معدنه وواثقه فيه حتى اكثر من نفسي ودايما يكون معاي صريح حتى لو كانت هالصراحه ضده

ادري كل هالشغلات يمكن ما تصدقونها لانكم يمكن ما تعرفونه كثري بس بقولكم الشغلات اللي ممكن تبينلكم ان جاد

اهو جاد لانه حتى عقب ما بطل معاي موضوع الزواج ما طلب رقمي ولا يبي يكلمني بالتلفون واهو الحين بس ناطر
موافقتي عشان يكلم اهله وانا اللي قلتله ينطر وقلتله لو تكلمهم الحين راح اتضايق لاني ليلحين ما قررت

واهو جاد لانه بطل حساب توفير قاعد يجمع فيه المهر وعطاني رقمه والرقم السري ماله عشان اجيك عليه واقدر اسحبه لو ابي والمبلغ اللي فيه موو شويه

ومشكلتي عمرها ما كانت بجديته من عدمها لانها حيل واضحه بالنسبه لي واهو لو مو جاد مو مجبور يبطل معاي موضوع الزواج بكبره

 

[miss.unique]

لا تقهرني

اذا الصبي زين و شاريج وانتي واهوة تحبون بعض خل يتقدملج

اذا مخه كبير ... اما اذا مخه صغير هني يختلف الكلام

و لا تاخذين راينا حبيبتي .. لان منو اي بعيش وياه ؟ منو الي بيتزوج ؟؟ و في بنت ترضى وفي لاء فعلى حسب .. شوفي انتي شنو تبين و سوي الي يريحج

 

[نونه المنكوشه]

حبيبتي العمر مايعيق ابدددد خاصه اذا الريال شاريج وانتي كنتي اختياره انا اخوي مرته اكبر منه بسنتين او ثلاث عمره مابطل هالموضوع ولابيوم جرحها ولاشي بالعكس اهوه اكثر واحد بخواني يحترم مرته ويقدرها واصلا اهوه دايم مشاءالله يمدحها ولاعمره قال كلمه شينه عنها لانها كانت اختياره واهوه اللي قال ابيها ومقتنع فيها ف لاتحاتين والله يوفقج

 

[<miss botamba>]

(مابني ع باطل فهو باطل )

انا ما اتفق معاج على هالكلام

الحب موجود في كل العصور وكل الديانات

وحتى الرسول عليه الصلاه والسلام يقول:

(لم ير للمتحابين مثل النكاح)

ودام اهما قادرين يتزوجون يتزوجون

ولا انا و ولا انتي نقدر نحكم على علاقتهم اذا كانت صحيحه او خاطئه

....


ولصاحبه الموضوع

اذا الريال هذا فيه خير لج وكان كل شي متوافق معاج

من ناحيه الاصل و الفصل و الحاله الاجتماعيه و الماديه ليش لا

والعمر عمره ماكان فارق

وانا عن نفسي وايد من اهلنا حريمهم اكبر منهم وعلاقتهم ممتازه ولله الحمد


وبالمبارك مقدما ;**

 

[3thbya]

مشكورين بنات عالدعوات ما قصرتوا والله يووفق الجمييع ❤

 

[دنيا الصدمات]

اذا على العمر كلش عادي ما صارت ثلاث سنين

بس المشكله بالحريه تخيلي تكونين متعوده على شي ومره وحده تنحرمين منه
خصوصا الطلعات احس هذي من اسباب المشاكل
لان بعدين بتقولين انج كنتي حره وانج واثقه من نفسج ليش يحرمج من شي انتي خلاص تعودتي عليه وتعتبرينه من حقوقج

 

[modern]

الله يقرب الي فيه الخير

 

[فيلجاويه كيوت]

من صجج كل هالمميزات وتفكرين بالعمر

توكلي على الله وخل ايي يخطبج