اكره خواتي شنو الحل

[mathic.planet]

يا حبيباتي انا مريت بظروف عائلية وطول الفترة 20 سنه تقريبا ما شفت وحدة من خواتي تقعد وتسولف معاي او تتحدث او تتناقش باي مشكلة حصلت ليي مع اي شخص
الكل مشغوول

المهم انا الحين معلمه ولله الحمد شايله نفسي مو ناقص الا الزواج وهذا رزق ومخليته على رب العالمين

المشكلة اني ما عمري تكلمت في شيئ لخواتي ولقيت ردة فعل حلوة او رئي
الكل الهم نفسي

جايز الشغل او عندهم خصوصيات خاصة فيهم ..,,, وبديت اشعر بالوحده الشديدة ساكنه ببيت الاهل كاني عايشه بملحق ماحد يطل ولا يسال واكتشفت ان القلق والتوتر نتج لعدم الشعور بالامان لسبب الوحده الي كونوها فيني خواتي ومع الجلسات الطبية اكتشفت انهم هم السبب الرئيسي

وللحين ماشوف منهم ردة فعل حسنه بعد ما شرحت لهم سبب القلق

ومافي احساس وعدم الشعور بالمسؤولية ...... وكرهتهم صرت ما اشتاق لاحد فيهم واحب اكون بروحي ماحب الجلوس معاهم لان مافي اي connect بيني وبينهم لكن الكره ليس بمعنه اتمنه لهم الشر لالا بس مجرد نفر من شخصية كل وحده فيهم

الله المستعان ..................... ابي حل وقلبي يعورني من هالوضع كلشش موعاجبني
ادري ان الحل مو بيدكم بس انا ابي افضفض

تخيلووا عمري 28 سنه والله ماعندي صديقه مع اني اجتماعيه جدا .......... بس خواتي عودوني على هالكلمه صديقاتج هم خواتج وما لقيت ولا وحده فيهم صديقه ليي

الله كريم

 

[فراشة كويتيات]

والله مادري بس مهما كان هذيل خواتج عادي حاولي تقربي منهم اوسويلج صداقات وسوي الخير وبادري فيه راح تشوفين اللي يسعدج

 

[منو انت]

طبعا ماذكرتي اعمار خواتج او وضعهم الاجتماعي هل اهم بنات او متزوجات

طبعا مثل مايقولون الدنيا تلاهي يعني بعد خواتج لهم حياه خاصه ولهم اطباع وظروف ماتدرين عنها يعني ترى الواحد يمشي على مزاجه في ناسس حييل مزاجهمم يتحكم فيهم بشكل مو طبيعي انا مااقول انهم صح انهم مايتقربون منج بس يمكن طريقتكم جذي يمكن ماكنتي عايشه معاهم وقريبه منهم حييل يمكن كل وحده لها حياه وجو وعالم خاص فيها ترى هالشي يخلق بعد وحواجز بينج وبين خواتج بس مااشوف ان انشغالهم عنج سبب يخليج تكرهينهم يعني لو كان مالج خوات وانتي البنت الوحيده فالبيت شنو راح تسوين تكرهين امج ليش ماعندج خوات ترى بعد مو سالفه

هالشي يرد علييج رتبي امورج التمسي لهم عذر ترا بعد كل واحد له ظروف ومشاغل وحياه وبيت وعيال فرق بينج وبينهم لو كانو متزوجيين ولو كانو بنات بعد يمكن يحبون العزله مايحبون كثرت الكلام ؟؟؟ حاولي تقربين منهم واذا شفتي مافي مجال اشغلي حالج بشغلات تقدرين عليها وتحبينها



بس غلط تقولين اكره خواتي موزين تكبرين الفكره براسج مااحد ينفعج الا خواتج

 

[(كويتيه عسل)]

والله نفسي نفس الحاله اخواني كلهم متزوجين وعايشين حياتهم ولاهيين بعمرهم

حاسه بوحده كلا قاعده بروحي

وانا بعد مدرسه مثلج وعمري قريب من عمرج

 

[7elwa&3soola]

ماعليييه ياقلبي ترى عندي صديييقه نفسج بضبط عنده 7 خوات كلهم يكرهونها ويسببون لها مشااكل

لكن الله عوضها بالصحبه الطيبه اللي حسستها ان صديقتها اعز من كل خواااتها وتحبها اكثر منهم

الله يرزقج بالصحبه الطيبه ويهديهم لج يارب

موفقه​

 

[sara 88]

ترا الوحده لمن تكبر تكثر التزاماتها ومتطلباتها يمكن خواتج عندهم مشكله بهالشي


انتي لاتمدين ايدج لهم وتبين مقابل لمدت ايدج


هذول اهلج واخواتج لو يقطعون من لحمج وياكلونه قوليلهم بالعاااااافيه وقوليلهم لو تبون القلب والجبد من عيونيييي


وعطيهم واكرميهم كثر ماتقدرين وماتستطيعين ولاتبخلين عليهم بشي


واهم شي انج اطلبي الاجر من الله في برج فيهم


ووصليلهم سلامي وقوليلهم سارونه تحبكم حييييييل حييييييل حييييييييل

 

[Green tea 93]

الله يهديهم عليج

عادي بكل البيوت في مشاكل بين الخوات بس مو توصل لي توتر و قلق انتي ما حددتي عمر خواتج يمكن مراهقات ولا متزوجات و كل وحده لاهيه بعمرها

 

[عطر المدينه]

الله يهديهم الدعاء هو العلاج كل يوم اخر الليل بالوتر ادعي ربي يسخر خواتك ويسخر لك خلقه
اعرف بنت ماعندها خوات ودائم تقول لي ياليت عندي خوات لو مافيهم خير لي اهم شي عندي خوات يحنون عليه لان الاخت اقرب شي لحمك ودمك تفقدك تسال عنك لو فيه مشاكل بس تتذكر ان عندها اخت

 

[~ بنت الهدى ~]

مايحس ب قيمة الخوات الا اللي فاقدهم ...

انا طول عمري اتمنى الخواااااات بس هذا اللي الله كاتبه شبيدي اسويه ...

بس لما كبرت تغير تفكيري و اعتبرت امي اختي و صديقتي و كل شي ,عسى عمرها طويل يارب

و بنات عمي و بنات خالتي حبيباتي فيهم الخير ولله مثل الخواااااات الله يخليهم ان شاء الله

و كونت صداقاات لأني اذا قعدت بروحي احس بووووووحده و قلق يمكن انتي كله تقعدين بروحج و ماتسولفين و ماتطلعين و تكونين صداقات

تقربي لأمج لبنات عمج لبنات خاااالتج و قبل كل هذا حسني علاقتج مع خواتج ترى مردكم لبعض

و شكرا

 

[دلع العتبان]

المشكله مو منج ولا منهم المشكله من الاب والام الاساس امج منفرتهكم من بعض ولاعودتكم على الحب والتفاهم وانه الاخت تسال على اختها امج هيه الاساس صلاح اي عائله بدنيا بصلاح الام عشان جذي الله حثنا على اختيار شريكه حياه الرجل وانه ينقيها خلق ودين ووو صفات حسنه

منبع كل بيت وتربيته من الوالدين ان كانوا متحابين متصافين او متفقين على الاقل كان الابناء جذي والعيال طلعوا يحبون بعض

بعض مرات تلقين مطلقين وعيالهم متفقين مع بعض ليش هذا المنبع من الوالدين اهم غرسوا فيهم هالطباع الحسنه

حب اخوك اسال عن اختك راضي اختك حرام تنام زعلانه عليك وحب راس اختك وابوس اخوك واحضن امك وووو من هالامور الي تقرب القلوب

فلا تلومين حبيببتي خواتج لالا لومي والدينج حياتي وانتي بعد من كلامج كارهتهم ونافره منهم مومنج من اهلج الاساس الحين انتي ادري سنين طويله مرت من الجفا والتباعد الكبير حييييل

بس حاولي لو تخلين العلاقه اعمق مابين خواتج على الاقل تقوليلهم سالفه عاديه تمر عليج لو بدوام او بمكان عام عشان تتقرب النفوس شوي وتحسين فيه اوادم تسولفين معاهم

وه انا اموت ان ماسولفت مع اختي او تكلمت مع اخوي وترشت فيه " الاهل ابوي جذي ربانا وامي ربتنا على انه اختج واخوج وابوي دايما يقول لاخواني خواتكم خواتكم والله يطول اعمارهم

ادري قرقت عليج واجد واسفه على الاطاله والله يمسح على قلوبكم كلكم يارب موفقه حياتي ،،،​

 

[نونو العصله]

التمسي لهم العذر
وكلام دلع صح
الغلط كله من الام والاب
انا شفت هلشي

من الاول ماعودو الاخوان على بعض

بس احنا الحين نقدر نصلح الوضع
مثلا الحين قرب العيد
انتي بادري بلسلام والسوال

ترا مالكم غير بعض
لا تخلين ابليس يدخل بينكم

 

[ṦάЯỢηά ĚŁђĻώạ]

عندنا وعندج خير ,,, الله كريم

 

[رتبه دبلوماسيه]

حاولي تتقربين منهم

 

[فوز السعودية]

الله يكون في عونك حبيبتي يمكن هم غلطانين ويمكن انتي عشان دايما بروحك ف جلستك لوحدك هي خلتك كذا يقولون الوحدة من الشيطان الشيطان موسوس لك حاولي بقدر ما تستطيعين انك تكونين صداقات واخواتك خليك عادي معاهم زوريهم واعطيهم هدايا(قال الرسول صلى الله عليه وسلم الهديه تذهب وحر القلب )اي الحقد والكره وفاجئيهم فيها اوا اعزميهم في مطعم واذا امك عايشة قولي لها تتدخل في الموضوع كذا مو حلو تكونون بعيدين عن بعض يا زينهم الاخوات مهما يسوون فيك فهم يحبونك ومستحيل في خوات يكرهون بعض

فكري زين وشيلي من راسك كلمه اكره مب حلوة انا مقدرة وعارفة وضعك بس اصبري

 

[ShoO8ShoO8]

شوفي حبيبتي اذا تبين ترتاحين تقربي منج ربج
لا تقولين انا اصلي ترى الصلاه بروحها ما تكفي سوي الاشياء اللي الله يحبها عشان يعطيج اللي انتي تحبينه
والله لما تتقربين من الله سبحانه وتعالى تحسين كل شي بحياتج يتغير نفسيج بروحها تتغير
وخواتج انتي ابدي تقربي منهم ولا تعزلين نفسج ترى كل ما بعدتي عن خواتج بتكرهينهم اكثر حاولي تقربين منهم
ترى انا نفسج خواتي وامي دايم يقولون حنا صديقاتج بس بنفس الوقت عندي صديقات من برى العايله
بس هم قصدهم انا اسرارج ما تتطلع لصديقاتج ....

 

[ShoO8ShoO8]

بحط لج فيديو واسمعيه راح يفيدج حييييييل صدقيني
http://www.youtube.com/watch?v=usqyi0nqixy

 

[catwi]

تصدقين جنج تتكلمين عني
انا نفسج بالضبط وصار عندي قلق وتوتر واكتئاب من الوحده وعدم الأمان

 

[اسيرة الأحزان50]

عندنا وعندج خير ,,, الله كريم

وأنا بعد اعاني من نفس الحاله .​