اقروا قصتي للعبره

[ماسة الاسلام]

السلام عليكم شلونكم بنات

الله يرزق يا رب كل محرومه حبيت اقولكم قصتي من طأطا لسلام عليكم عشان تستيفيدون وتكون لكم دافع


حبيباتي آنا تزوجت قبل 4 سنين ونص


طبعا اول الاشهر كنت عادي ما احاتي شي اسمه حمل بس لما عديت السبع شهور خفت وقمت اوسوس


وصرت احن متى احمل وكل ما تعدي الشهور احاتي واخاف


واذكر مره قعدت مع حماتي قاعده تحلطم قالت لي عادي آنا قعدت 7 شهور بعدين حملت


المهم ظليت سنه كامله وكل ما تتأخر الدوره اروح احلل وطبعا احباط كبير يصير فيج لما يقولون لج نيكاتيف

حتى اذكر مره من المرات مسويه تحليل دم وقبلي وحده قالوا لها مبرووك حامل وآنا بعدها قالوا لي نيكاتيف صج ضاق صدري

بس قلت الحمد الله

وبعد السنه قررت آنا وزوجي نشوف شفينا

اول مشاوري رحت عند ما جده اليتامى طبعا سويت التحاليل وما تحاليل والمهم طلع فيني ضعف في المبايض عطتني سيروفين نفس الكلوميد وسوت سونار وقالت لي رحمج ممتاز والبويضه عندج اوكي

والله يابنات اذكر كلمتها يا ويلج اذا ما جيتيني الشهر الجاي حامل وطلعت من عندها وبشرت زوجي حتى حسيت وقتها ان صج خلاص حامل وصار ايام الجماع الي وصتني اهي عليها وعطتني ابره تفجيريه

وللاسف جاه وقت الدوره وانزلت اذكر وقتها بجيت بجي الله العالم فيه

ورحنا لها قالت احنا ما فحصنا زوجج خل نفحصه وفيه عندهم دكتور ما ني قايله اسمه الله يستر عليه عفسنا

راح زوجي عنده وقاله سو تحليل حيوانات منويه تكرمون

سوى التحليل قال انت عندك بس حيوان منوي عددهم2 لا وميتين انت اصلا ما تقدر تجيب عيال

لازم انت وزوجتك تسوون طفل انابيب بس قبلها لازم نسويلك عمليه لك نقوم نفتح الخصيه ونطلع الحيوانات المنويه الحيه هذا
إذا كان فيه حيوانات حيه

شصار فينا ذاك اليوم بعد عمري جاني واحس الدنيا في عينه سوده وقالي انتي شرايج طبعا آنا قعدت ابجي ودقيت على الدكتور قال زوجج ما منه فايده

وكان وقتها زوجي طالع دق علي قالي آنا رحت الصيدليه جبت لي دوا قال الصيدلاني حالتك لها علاج منو قال ما لها علاج

عطاه صيدلاني غذاء ملكات النحل ومقوي فيتامينات

وقام ياخذه وسألت وحده الله يجزاها خير قالت لنا عن الدكتور خالد الطيب معروف حق اعشاب خوش دكتور راح له زوجي وعطاه دوا اعشاب حقه وحقي

وقاله بعد ما تخلص كورس الاعشاب سو تحليل وتعال


يتبع

 

[ماسة الاسلام]

أكملكم

خذا زوجي الكورس وسوى التحليل وراح للدكتور خالد الله يجزاه خير طبعا وهو رايح وآنا حاطه ايدي على قلبي المهم راح له ودق علي زوجي


قالي ابشرج الدكتور قال انت مو ممتاز انت فوق الممتاز

تحمدت وطبعا آنا آخذ علاجه بعد بس ما سويت حق نفسي شي

ونطرنا تقريبا ثلاث شهو بس ما صار حمل

بعدها قررت ارد اعالج وعالج بمستشفى العدان

طبعا مستشفى العدان لحاله قصه طويله خذيت اول علاجي كلوميد وما نفع بعدها خذيت ابر منشطه وكان يصير تبويض بس ما في حمل


بعدين قالت الدكتوره خلينا نسوي لج اشعه زيتيه عشان نشوف إذا القنوات فالوب مسكره او لا


سويت الاشعه واشتبهوا ان القنوات عندي مسكره قالت لازم عمليه منظار عشان نشوف


المهم ترددت في بداية الامر بعدها توكلت على الله وسويتها


بعد العمليه بيوم جت دكتورتي قالت الحمد الله كل شي سلييم

ورديت آخذ ابر منشطه وكل شوي تطلب تحليل من زوجي وزوجي ما فيه شي

بس بالايام الاخيره صارت الحيوانات المنويه تقل عنده

وقالت ما فيه غير التلقيح الصناعي

قلت لزوجي والله وكيلكم قوم الدنيا وقعدها قال ما نبي ابي طبيعي وشنو الي يضمني العيال الي بيحطونهم عيالي :0bee2e8d89:

يتبع

 

[mosta7eel]

متاااااابعه
كملي

 

[ماسة الاسلام]

اكمل


وسالفة الصناعي مادخلت مزاج زوجي وراح اهو حق دكتور معروف وخوش دكتور اسمه احمد الكندري

المهم شافه وقال عندك دوالي خفيفه بالخصيه وكل مسكين يسوي تحليل

المهم قاله خل نسويلك عمليه والعمليه عباره إنه يشد عرج بالخصيه عشان الدوالي تروح

استخار بس الموضوع مادخل مزاجه وقال ماني مسوي قلت له خلاص خنسوي تلقيح قال لا المهم بعد حنه ورنه قال اوكي ورحنا

حق دكتوره عاليه الفضلي خذيت ابر منشطه كالعاده وكان يطلع معاي بويضتين سويتها مره بس وقالت الدكتوره لازم نسوي مره ثانيه

طبعا زوجي رفض رفض تام ونفسيتي تعبت حييل


وتعرفون نفسيه وفي بعد الناس ما ترحم

مرت الايام كرهت لعلاج وكرهت كل شي


يابنات مافي اطبه ما رحت لهم مافي علاج ما خذيته تعبت نفسيتي


بعدها السنه الي طافت كنت توني متوظفه بالصيف وكنت مقرره اول ما توظف احج


بتبع

 

[مجنونة بس عاقلة]

الله يرزقك العيال اللي يملون عليكم البيت
آآآآآآآآآآآآآآآآآآآآمين

 

[q8ya-barby19]

كملي حبيبتي

 

[واصله]

كملييييييييييييييييييي

 

[ماسة الاسلام]

وقلت حق زوجي ابي احج آنا وياك اهو اساسا قبلي حاج بس آنا ولا مره حجيت قال اوكي


تخيلوا كان مقرر انه يحج معاي بس صارت بيني وبينه مشكله والاخ عند وهو طبعه العناد قال مافي حج ما ني حاج معاج شوفي اي احد يحج معاج

شنو صكت فيني الدنيا لان كنت حاطه في بالي اول شي اقضي فرضي لان الحمد الله الله من على بالوظيفه لاني من زما انطرها وقلت لازم اول شي احج ومنها ادعي ربي اهناك في بيته انه يرزقني الولد الصالح


المهم اخوي ما شاء الله كل سنه يحج بس للاسف رصيف بدون حمله وآنا كنت حاطه في بالي حمله وتعرفون رصيف تعب في تعب عاد قلت له ودني بروح معاك

ورحت معاه الحج وكان روعه ما كنت متوقعه اني بستانس جذي صج تعبت تعب كبير بس طبعا شويه لرب العالمين طبعا كله مشي في مشي


هههههههههههههههههههههههه

جني طلعت من الموضوع

اكملكم في بيت الله وآنا ضيفه من ضيوفه

وطبعا تعرفون إذا احنا البشر لما يجينا ضيف نكرمه ونسوي لي يآمر عليه

شلون رب البشر


بجيت عن بيته وطلبته تذللت له رب البشر والاطبه كلهم ما في مثله احد

بجيت وخضعت ودموعي اربع اربع

ونسيت لا أقولكم قبل لا أسافر الحج اذكر كنت قاعده مع اختي قلت له شرط برد من الحج ومايمر سنه إلا وآنا حامل قلتها وظني

بالله كبير

رديت من الحج وبعدها بشهر قررت ابلش مره ثانيه علاج

بس هالمره رحت حق دكتوره فوزيه القطان شافت تحاليلي وتحاليل زوجي قالت ما يصير انتوا لازم تلقيح صناعي قلت لها زوحي ما منه فايده مو راضي

والله يا بنات عطتني نفس الابر وسوت نفس السونار ومن غير تلقيح صناعي ولا يحزنون

وشافت قلت عندج بويضتين


وعطتني ابره تفجيريه وحددت ايام الجماع

كان شهر 2 بالشتا وقرب موعد الدوره وآنا أعرف نفسي أذا خذيت الابر ما يمر28 يوم الانازله علي


بوقتها كانوا اهلي مخيمين وفي اليوم الي بتنزل فيه خذيت كوتكس معاي احتياط والله اني حاطته بالجنطه

تخيلوا ناقزت ولعبت طائره وركبت بانشي

وكل شوي اجيك يا ربي ما نزلت واقول لنفسي معقوله والله اكلم نفسي اقول ما اظن

وثاني يوم بليل ما نزلت

أذكر دزيت حق زوجي مسج قلت ما نزلت معقوله اكون حامل


وجاه ثالث يوم قال زوجي بجيب لج تحليل تكرمون بول والصبح سويه اذكر كان تاريخ


15/2 سويت التحليل اول شي طلع خط واحد غسلت وكل شي وارد اشوف ولا خط خفيف ثاني


امبيه بنات وقتها ما كانت الارض شايلتني رحت حق زوجي كان قاعد على النت وآنا ارجف قلت له انت شايف ألي آنا شايفته

قال إيه خط ثاني يا بنات ما صدقني وكل شوي نشوف تحليل لين رحنا سوينا تحليل


دم وكان اول مره يقولون لي مبروووك حامل


والحمد الله





هذي قصتي وسامحوني اذا طولت عليكم بس حبيت انكم تستفيدون منها


والله يابنات الرزق على الله ولا الاطبه مجرد سبب

ولا آنا كنت آخذ نفس الابر ونفس العلاج بس سبحان الله ما رزقني ربي الا عقب ما لجأت له

كريم رب العالمين

تهقون يا بنات إذا بجيتوا وخضعتوا له ماراح يرزقكم وبعزته وجلاله يرزكم

وهو لي قال :" وإذا سألك عبادي عني فإني قريب اجيب دعوت الداعي إذا دعان"

ومو بس الدعاء عليكم بعد بالصدقات


والله يرزقكم يارب بالذريه الصالحه وادعولي الله يهون علي

واشوف احلى هديه ربي اهداني اياها


تذكروا....


(ضاقت ولما استحكمت حلقاتها فرجت وكنت اظنها لا تفرجوا)

دايما كنت اتذكر هالبيت إذا ضاق صدري وفرجت الحمد الله

:tek:

 

[ماسة الاسلام]

إيه ونسيت أقولكم بيجي الحج هذا

وآنا والده ان شاء الله

مثل ما قلت لاختي

(أنا عند ظن عبدي في)

 

[mosta7eel]

وااااي ونااااااسه ماشاءالله تبارك الرحمن الله عوض صبرج خير
الف الف مبروك وعسى ربي يسهل عليج ولادتج ويرزقج احلى توأم

 

[واصله]

ياااااااااااااا بعد قلبي الف مبروووووووووووووووووووووووووووووك
والله يتمم عليج ياااااااااااااااارب
والله سالفتج بجتني وعورت قلبي
الحمد لله يارب
والفال يارب لباقي البنات امييييييييييييييييين

 

[ام سعود ديكسون]

الله يرزقج الذرية الصالحة اللي تعينج علي طاعة الرحمن

الله يسهل عليج الولادة حبيبتي

 

[أم الهواشم]

الله يتمم عليج ويفرح قلبج امين

 

[om_jsoom]

ماشااااااااء الله والله كش شعر جسمي
سبحاان الله اذا اراد شيئا فيقول كن فيكوون

 

[مجنونة بس عاقلة]

والله فرحتيييييييييييييييييني حيل بعد ماقطعتي قلبي

 

[كيكه^_^]

ماشاء الله الف مبروك والله يتمم عليج يارب

ومشكوره على كتابتج لقصتج و صاجه: (ضاقت ولما استحكمت حلقاتها فرجت وكنت اظنها لا تفرجوا)

سبحان الله اذا اراد شي ان يقول له كن فيكون.

والله يرزق الجميع.

 

[اكسبلانكا]

بعد عمري والله الف الف الف مبرووووووووووووووووووووووووووووووووووووك
عسى ربي يتمم عليج حملج يارب ويرزقج من الذريه الصالحه الباره فوق ماتتصورين
حبيبتي والله وانا اقرى قصتج عيوني تغوووورق لو مو الفشيله لان ابوي وريلي واخوي قاعدين صوبي جات بجيت من الفرحه

حبيبتي الف مبرووووووك وان شاء الله يرزقني ويرزق كل محرومه يارب العالميين بالذريه الصاله

اللهم اميييييين

 

[هالة الصباح]

ما شاء الله عليج الله يتمم عليج ايمانج عاد تبقيين على العهد مع الله ؟؟؟؟؟
ستكونيين أمة شكووورة؟؟؟؟
تطعيين كل مايأمر الله به وتنتهيين عن نواهييه أم ساعة وساعة ؟؟

بس إن شاء الله الله يوفقج ويتمم عليج حملج وتولديين بالسلامة يارب وأكيد هذه القصة تقوي ايماني بالله أكثر وكل وحدة تحب الله وطاعته

 

[هالة الصباح]

الموفروض عنوانج يقول لا شافي إلا الله ولا معطي إلا الله

 

[قهوووه]

ماشاء الله تبارك الرحمن مبروووووووووووك وعسي الله يرزقج بالولد الصالح