اعتقال يوسف الحربي وعبدالله العنزي!!

[sadan111]

اعتقال الناشطين البدون/ يوسف الحربي وعبدالله العنزي وعيسى العنزي إثر اعتصام سلمي


تستنكر حركة الكويتيين البدون إعتقال وزارة الداخلية للناشطين عبدالله عطا الله العنزي ويوسف محسن الحربي و عيسى العنزي على إثر اعتصام سلمي قاموا به مع بضع عشرات مساء الثلاثاء 26 يونيو 2012 في منطقة تيماء.

​

هذا وكانت مجموعة من الناشطين البدون قد دعت عبر تويتر إلى إعتصام الثلاثاء في نفس الوقت الذي دعى فيه أعضاء مجلس الأمة في الكتلة النيابية في ساحة الإرادة للإحتجاج على إجراءات المحكمة بإلغاء مجلس 2012 نتيجة خطأ إجرائي.

​

وقد ارتأى مجموعه من الناشطين المستقلين أن الوقت مناسب للإعتصام في هذا اليوم للمطالبة بحق البدون في المواطنة وحقهم في رفع الظلم الواقع عليهم منذ 60 عاما



كما وطالبوا التنديد بسياسة ما يسمى بالجهاز المركزي ضد البدون، ولإيصال ضيقهم من نواب مجلس الأمة الذين وعدوهم بالنصرة لكنهم لم يبدوا قضية البدون أهمية ولم يضمنوها ضمن 28 أولوية وضعوها كبرنامج عمل، وقد انقضت 4 أشهر من مجلس 2012 ولم يحصل أي شيء إيجابي لصالح البدون.​

عبدالله عطا الله أحد المعتقلين الثلاثة هو معتقل سابق في اعتصامات الكويتيين البدون وقد تعرض للتعذيب من السلطات سابقا والحجز الإنفرادي والتعسف في إطالة سجنه، هذا ويصادف يوم إعتقال الناشطين الكويتيين البدون أمس اليوم العالمي لمناهضة التعذيب الجسدي والنفسي.

​

وحركة الكويتيين البدون تستنكر هذا الإعتقال للناشطين وتعتبره إعتداء عليهم بمصادرة حقهم في التعبير وتحمل المسئولية لوزير الداخلية فيما حصل من إعتقالات وتطالب بإطلاق سراحهم فورا خصوصا وأنهم مسالمون كانوا يحملون علم الكويت.

​

هذا وكانت الداخلية اعتقلت المئات من الكويتيين البدون خلال العامين السابقين وقدمتهم للمحاكم بتهم كثيرة قامت المحكمة بتبرئتهم منها في المرحلة الأولى والإستئناف.

المصدر
حركة الكويتيين البدون تستنكر اعتقال الداخلية لـ3 ناشطين
​

 

[فطوم 84]

الله يعينهم. ويفرج كربتهم ويطلعون والله حرام. وحده من معارفنا اخوها الصغير بالعمر انسجن شاب ببداية حياته يقول لهم حاطيني بغرفه صغيره مااقدر امد. ريولي. من صغرها. وتكرمون. اهو حمام تخيلوا. اذا. يبي.يبول او ......وانتوا بكرامه يسوي واهيا الغرفه اللي يقعد فيها ومايتحرك ويضربونه يتسلون بضربه
اقسم بالله قمة الظلم ل متي تعذيب البدون بالسجون وليش التكتيم علي تعذيبهم. محد يتكلم. والكل ساكت ويتفرج علي تعذيبهم وشنو جريمتهم تظاهروا

انا مو مع التظاهر

بس اكبر حرررااام التعذيب والظلم ماتخافون من الله

ترا الدنيا فانيه والله وبتحاسبون حساب عسير والله العظيم حساب عسير عند الله سبحانه

اذا تظنون يالداخليه انه هالفقاري تعذبونهم. ومافي لجان حقوق انسان تحاسبكم. وتقولون الهوامير ورووس الفساد بهالديره معاكم.

ترا الله سبحانه يشوفكم ويشوف تعذيبكم وظلمكم لهالفقاري

استغفر الله واتوب اليه *

 

[العفاسيه وبس]

ياااارب تفرج هم إخواننا البدون وياخذون حقوقهم المسلوبة يااااااارب اللهم اااامين

 

[العفاسيه وبس]

يايمه كان جا موتي وأنا صغير بليا أعيال
طلبتك لاتجمعتوا أنتي وجملة إخواني


يايمه بس لاتبكين يمه ساعة الترحال
أبي السيفين والنخله يايمه داخل أكفاني



الله يعينهم ويصبرهم

وان شاء الله تنحل مشكلتهم في اقرب وقت

تسلم يمناج على النقل المميز

لا هنتي

تحياتي لج حبوبه

 

[__amool]

الله ينصرهم وياخذ حق كل واحد انظلم

 

[sadan111]

حسبي الله ونعم الوكيل ..

 

[عادت ذكرياتي]

لا حول ولا قوة إلا بالله

 

[أم هنونه]

الله يفرج كربتهم

 

[noorq8]

الله يعينهم. ويفرج كربتهم ويطلعون والله حرام. وحده من معارفنا اخوها الصغير بالعمر انسجن شاب ببداية حياته يقول لهم حاطيني بغرفه صغيره مااقدر امد. ريولي. من صغرها. وتكرمون. اهو حمام تخيلوا. اذا. يبي.يبول او ......وانتوا بكرامه يسوي واهيا الغرفه اللي يقعد فيها ومايتحرك ويضربونه يتسلون بضربه
اقسم بالله قمة الظلم ل متي تعذيب البدون بالسجون وليش التكتيم علي تعذيبهم. محد يتكلم. والكل ساكت ويتفرج علي تعذيبهم وشنو جريمتهم تظاهروا

انا مو مع التظاهر

بس اكبر حرررااام التعذيب والظلم ماتخافون من الله

ترا الدنيا فانيه والله وبتحاسبون حساب عسير والله العظيم حساب عسير عند الله سبحانه

اذا تظنون يالداخليه انه هالفقاري تعذبونهم. ومافي لجان حقوق انسان تحاسبكم. وتقولون الهوامير ورووس الفساد بهالديره معاكم.

ترا الله سبحانه يشوفكم ويشوف تعذيبكم وظلمكم لهالفقاري

استغفر الله واتوب اليه *

أنا عضوه مليت من مشاركاتج ومواضيعج بس ناقص تقولين البدون كانوا هم حكام الكويت والصباح اغتصبوا الحكم منهم ياحلوه مو معناته انج بديرة الخير والحريه كل يوم مطيره صاروخ الحين الفقير المسكين الصغير ولد رفيجتج مسكوه يلعب تيل بالسكه والا مقصي واحجزوه بغرفه هي حمام هي نوم مايقدر يمد رجوله فيها والا لايكون صايدينه يشرب كولا عند الفرع بسج بسج بسسسسج افترى عالكويت اللي مو عاجبته الديره حافظه الله كل المنافذ مكتوب عليها رحله سعيده ماتشوف شر اقنعيني ان كل البدون كويتيين اقنعيني واقنعي الاثباتات الرسميه اللي دشوا فيها انهم كلهم مظلومين ماأقول الا الله يعينج ياديرة الخير على ناكرين الجميل ، لعلمج انا شخصيا كنت عضوه بلجنه خاصه بالبدون واقدر اسطر لج سوالفهم البطاليه تترس كتب بس أمانة الوظيفه تحتم علي حماية ديرتي وحفظ اسرارها حسبي الله على ناكرين الجميل

 

[جنون العاطفه]

مع احترامي الشديد لج اختي الغاليه فطوم
احنا الكويتين اولى بالكويت
البدون المستحقين للجنسيه ميخالف صح في فئه
لكن الباقي لاا نصهم عندهم جناسي ويبون الجنسيه الكويتيه


انا اعرف عوايل كثيره مستحقه للجنسيه لكن ارزاق
ويظل للحكومه نظره ..




لا تصورين الكويت انها ظالمه بالعكس كافي عايشين
تحت جناح الكويت .. واهل الكويت ما يقصرون فيهم
كوني حياديه فطوم وهذا انتقاد من اختج لا تعتبرينه شيء ثاني

​

 

[فطوم 84]

Noorq اول شي طولي بالج وصلي علي النبي.

النقاش لازم يكون بلا عصبيه وانتي داشه تتبلين علي !!!

اقسم بالله اللي تكلمت فيه صج والولد بالجهرا وانا اعرف اهله وليش حجزوه بالتظاهرات اللي بتيما وليش تقولين كان يلعب لا كان متظاهر ولما طقووووه دزهم ودافع عن نفسه علشان. جذي مسكوووه. ويشهد الله ماجذبت انا قلت كل كلمه اهوو قالها ولو انتي صج بلجنة حقوق الانسان. قولي كلمة حق

مو علشاني علشان الله بتوقفين جدام الله اقسم بالله ماراح ينفعج. تجذبين دنيا فانيه. تخيلي لو بتموتين وانتي تقولين البدون سوالفهم بطاليه كانه البدون كلهم مجرمين

ليش منو اللي يوقف بالشمس لين يحترق وجهه يبيع خضره بالصلبيبه عمره ١٧علشان يعيش خواته

منو الشايب اللي يطلع بالوانيت يجمع الفلس علي الفلس علشان يعيش بناته المعاقه

هذيلا هم البدون اللي اقسم بالله ناس بسيطين وعايشين معاناه جايه تقولين بطاليه ومجرمين. ماتخافين الله

ترا كلنا بنموت اخرتنا قبر صغير بس الواحد بالحياه يقول كلمة حق

انا ما قلت البدون. مفروض ياخذون من الدوله ملايين ولاقلت هم ال صباح مثل ماتقولين

انا قلت ارحم ترحم

لا للظلم


وبعدين البدون ناكرين جميل حلوه هاذي
ليش العسكريين بالدفاع ناكرين جميل. اسري الغزو ناكرين جميل


اقسم بالله. اقسم بايات الله ابوي عسكري من قدامي الجيش زين وكان اسير ولو بتحجي عن خدماته يبيلي سطور طويله بس بختصر ابوي نفسه واييد بالدفاع واهم. سنين. بخدمة الكويت انه تجين وتقولين. طلعوا برا غلطانه ماما.


شوفي تبين النقاش الصح البدون منهم الشهيد ومنهم العسكري اللي بغزو اسير مثل الوالد
وفيهم بالغزو تعاون مع ربع صدام وهذا عددهم قليل. تجين تجمعين ابوي مع هالشخص اللي تعاون مع ربع صدام. اسالج بالله هذا. عدل بنظرج


انا ابوي بالغزو لما تاسر انطق برجله للحين يتعالج علي حسابه. لعلمج بس


اذا صج كنتي بلجنة حقوق الانسان قولي كلمة حق طلعوا البدون اللي متعاونين مع ربع صدام وسفروهم. والانسان العسكري الوفي يتجنس سهله جدا سهله
جذي تنحل المشكله

بس مافي احد يتخذ قرار


وانه تقولين انه انا صواريخ وهالكلام. وايييد ظلمتيني ناقشيني بس بدون تبلي ماراح اقول ماني محللتج. بس بقول الله يسامحج




وانا في كلام ماحبيت اذكره بس مدامج سبيتيني. لعلمج انا ما اعتبر بدون لانه ابوي قيادي كبير بالدفاع. وللعلم مبصمين يعني باي لحظه نتجنس. انا ما حبيت اذكر هالكلام بس قلته لانه كلامج جرحني


يعني صار بهالزمن اللي يقول كلمة حق. الكل يكرهه استغفر الله

اللهم اني احبك واحب من يحبك واحب عمل يقربني الي حبك.

واقول كلمة الحق ولا اخشي بالله لومة لايم استغفره واتوب اليه

 

[فطوم 84]

جنون العاطفه تاج راسي انا ماقلت الكويت ظالمه انا ذكرت تعامل رجال الداخليه. انا وضحت تعامل الداخليه
والكل صار يعرف انه فيه بالداخليه ناس تتعامل بعنف مع الناس. بدون وكويتين وهالشي وايييد ينذكر حتي بالصحافه

الكويت ديرتي حشا مااقول عنها ظالمه. جنون حياتي اسالج بالله انا شنو كاتبه اقري كلامي. كاتبه. يالداخليه خافوا الله. صح. ركزوا بالكلام. حشا ماتطلع مني اسب ديرتي

انا اموت بترابها. بس انا لومي كان للداخليه فقط

وعزيزه وغاليه. جنون العاطفه تامر علي قلبي. من اعز خواتي بالمنتدي يشهد الله 

 

[جنون العاطفه]

بالتاكيد فطوم انا ما اشك بحبج للكويت
وانتي اكييد نيتج خير وتعاطفج ويا هالفئه واضح

وانا متاكده ان في اسر كثيره يستحقون الجنسيه
والداخليه فيها فساد حتى بحق مواطنيها
الشكوى لله هذا همم نوابنا الله يعطيهم العافيه
يراكضون وما قصروا


والبدون ان شاءالله ربي ياخذ حقهم ان مو بالدنيا بالاخره

لكن طريقة المناقشه ممكن توقعج بمشاكل


وانا جدآآ احترمج تحياتي لج ​

 

[فطوم 84]

تاج راسي. جنون العاطفه لا خلا ولا عدم

والله. احبج في الله


ماقصرتي عسانا ماننحرم منج

تاج راسي 

 

[ياحُبِي لِلكويت]

الله يفرج عنهم ويرزق المستحقين الجنسيه عاجلا غير آجلا يارب .،

 

[sadan111]

الله يفرج عنهم ويرزق المستحقين الجنسيه عاجلا غير آجلا يارب .،

آآآآآآآآمين:eh_s(17):

 

[رحيل المرافيء]

زين يسووون فيهم بدون وعايشين بطريقة غير قانونية ويتظاهرون
زين سووا فيهم
كل من هب ودب قال انا كويتي
وحركة البدون هذي شتطلع بعد
معروف شنو اصل البدون

 

[hazel eyes]

أنا عضوه مليت من مشاركاتج ومواضيعج بس ناقص تقولين البدون كانوا هم حكام الكويت والصباح اغتصبوا الحكم منهم ياحلوه مو معناته انج بديرة الخير والحريه كل يوم مطيره صاروخ الحين الفقير المسكين الصغير ولد رفيجتج مسكوه يلعب تيل بالسكه والا مقصي واحجزوه بغرفه هي حمام هي نوم مايقدر يمد رجوله فيها والا لايكون صايدينه يشرب كولا عند الفرع بسج بسج بسسسسج افترى عالكويت اللي مو عاجبته الديره حافظه الله كل المنافذ مكتوب عليها رحله سعيده ماتشوف شر اقنعيني ان كل البدون كويتيين اقنعيني واقنعي الاثباتات الرسميه اللي دشوا فيها انهم كلهم مظلومين ماأقول الا الله يعينج ياديرة الخير على ناكرين الجميل ، لعلمج انا شخصيا كنت عضوه بلجنه خاصه بالبدون واقدر اسطر لج سوالفهم البطاليه تترس كتب بس أمانة الوظيفه تحتم علي حماية ديرتي وحفظ اسرارها حسبي الله على ناكرين الجميل

:eh_s(15)::eh_s(15)::eh_s(15):

 

[sadan111]

زين يسووون فيهم بدون وعايشين بطريقة غير قانونية ويتظاهرون
زين سووا فيهم
كل من هب ودب قال انا كويتي
وحركة البدون هذي شتطلع بعد
معروف شنو اصل البدون

في من نفس اصولهم من يحمل الجنسيه الكويتيه ولا يعني عمرج ما شفتي حربي ولا عنزي كويتي !؟؟

الا بسألج شنو يعني البدون المستحقين من وجهة نظرج ؟؟

 

[ديماا]

لا حول ولا قوه الا بالله والله يفرح عنهم اخوانا البدووون والله وايد شفت حالات تقطع القلب واللي تتكلم عن الاصول وايد نعرف كويتين ما يعرفوون يتحجون عربي عدل مو كويتي بعد