حبيبتي والله كسرتي خاطري الله يعينج!!
شوفي مشكله اذا اهل الزوج لهم دور كبير بقرارته و من كلامج فهمت ان حموانج كلهم في البيت
فزوجج يشوف الوضع الطبيعي و الصح انكم تقعدون مع اهله و هو ما جرب الراحه لما تكونون في بيت بروحكم
و لو شنو تقولين ما راح يقتنع
الحل لازم يكون تدريجي و شوي شوي تقنعينه و تغيرين نظرته للموضوع
انا بعطيج نصايح بسيطه و انتي بذكائج فهمي قصدي و طبقي اللي ينفع مع زوجج
السر انج تورينه الخيار الثاني و شلون راح تتغير حياتكم للاحسن
هو ما شاف الفرق ...بتقولين شلون
ابتديها بشي بسيط حجزي ويك اند بفندق و صدي عن اهله و لويتهم
لما تكونين بروحج بدعي معه باللبس بكل شي حسيسيه انه ملك
نسيه كل المشاكل و الهموم و لا تجيبين له طاري البيت و مشاكله و مشاكل اهله
و لما ترجعين البيت عقب هالطلعه هو رايح يلاحظ الفرق
بين الراحه و انتوا بروحكم و بين اللجه و الصيحه و اللويه اللي في بيت اهله
غير جذي عيالج كلميه بهدوء عنهم و لا تحطين السبه براس امه او اهله
ترى ما راح يسمع كلمه و حتى لو مقتنع ما راح يسوي شي
قوليله حبيبي صج انت تحب القعده ويا اهلك و اليمعه بس حبيب البيت ظروفه قاعده تأثر علينا
تأثر على عيالك و علاقتنا انا و انت
قوليله "ظروف البيت" مخليتنا متوترين و مو قادرين ناخذ راحتنا
لا بالكلام و لا بالنوم و حتى انا ودي ادلعك و البسلك و نعيش حياة غير
ركزي انج تتكلمين بصفه عامه عن الظروف مو عن امه او اخوانه او خدم اهله
و بهالطريقه انتي ما تكونين تهاجمينهم شخصيا فيحس انج حاقده عليهم
نصيحه شوي شوي و بالهداوه تقدرين تاخذين اللي تبينه
و اسمحيلي ممكن فيها شوي جراة و احراج بس ترى هذا جانب مهم عند الريايل العلاقه الزوجيه
حسسيه انج ودج تريحينه اكثر بس ماكو مجال حسسيه انج تقدرين تعطينه اكثر بكل جوانب حياتكم
مثل الراحه النفسيه و الاهتمام و تربيه العيال و الطبخ و الترتيب و الهدوء حتى اهتمامج بنفسج
بس اهم نقطتين تركزين عليهم انج تبينين له شنو اللي راح يختلف لو طلعتوا و تقنعينه
و حاولي ما تذكرين ان سبب الطلعه الاشخاص نفسهم اللي هم اهله
فهميه ان ظروف البيت و الاوضاع هي اللي حدتكم
اتمنى اكون فدتج
و عسى ربي يهنيج و يسعدج
طمنينا عليج حبيبتي
