اخطاء الآخرين في الترتيب ...خلينا نستفيد منها &&&

[خبيرة اعشاب]

السلام عليكم

حبيباتي , اكيد كلكم اتروحون زيارات و عزايم ...فدائما حنا يا الحريم انحب اندقق علي كل شي ..فاكيد اختي الغالية مرج موقف ينم عن ترتيب و تنظيم ربة البيت الي يحسسج انها صدج مرتبة و ذووق ..و ايضا ممكن مرج موقف او لاحظتي شي ينم عن سووء الادارة .......

كل البيوت في الكويت فيها تقريبا خدامة او 2 بس مو كلهم مرتبين و نظااف ..لان اهم شي ادارة ربة البيت لشؤون المنزل ...

و طبعا انا ما اقصد الماديات يعني هل الاثاث حلو او غالي ..لان ياما بيوت انروح لهم اثاثهم راقي ..بس يا ما من الغبرة تحت الغنفات ....

و في بيوت اثاثهم متواضع و امكانياتهم ايضا قليلة و لكن كل شي يلمع و كل شي مرتب ...

لان المسالة لا تتعلق بالماديات كما ذكرت انما بحس التنظيم و الترتيب

فخلينا اختي نستفيد من ملاحظاتج
:tek:

تحياتي

 

[خبيرة اعشاب]

بالنسبة لي اكثر شي يغثني لا جيت ناس و دشيت حمامهم عزكم الله و لقيت الزبالة عزكم الله بعد متروسة بامبرز ..ووووع اتلوع جبدي

كلنا عندنا عيال بس احس الديكور هذا اي شي .....

بالنسبة لي اول ما اغير لولدي حفاظته عندي اكياس ابو مية الي الرول ..اسحب واحد و احطها فيه و اخلي الخدامة اتقطها بررة مستحيل اخليها بالبيت دقيقة وحدة

عاد في حريم الله يهديهم اتخليها تتحلل يوم او يومين و بعدين اتفكر هل ايطلعون الزبالة عزكم الله برة او لا ؟؟؟

 

[y7lok_7loho]

انا بصراحة ما احب اشم ب االبيت ريحة يعنى اهم شى ريحة البيت عندى .

بعض الناس يطبخون مقالى وتصير الريحة با البيت عاد شوفى شلون تكووووووون وععععععععععععععع والله

انا عادى مو مشكلة الغبار تهون عندى من الريحة لا ما احبهااااااااااااااااااااااااااااااااااااا


اذا كلش فى خلطااات فى منظفاااات معطرة فى فناتك بس ما ادرى الناس ما تخبرهااا

 

[amazing_heart]

انا رحت .. عزيمة .. الأكل واايد حلو والترتيب مافي احسن منه .. لكن . لما تيين تاكلين ... الله لا يواريكم ... ريحة الزفرة اتلوع الجبد .. جنها ( ميده ميته بالصحن وصار لها ايام ) ويييييييييييييييييييييييع .. ابيخ شي ريحة الزفرة ولا ريحة المكان عقب القلي والطباخ .. اشدعوة ما اتعرفون الصابون والديتول والبخور ..​

 

[فطومه]

السلام عليكم ورحمة الله وبركاته

بصراحه موضوع حلو لانه غريب شوى

بالنسبه لى انا استفدت من انسانه عزيزه على بوايد اشياء الصراحه زقرت وذوق وسنع الله يبارك لها

لما تروح زواره اهى مع بناتها لازم يكون معاها علاق الملابس والجيس النايلون علشان لابدلت تعلق البدله وتجيسها بالعلاق(طبعا الجيس ينباع بدايسواللى تحفظ فيه الملابس)

*تكرمون تحتفظ بجياس الجناط اللى مثل الخام وتستغلهم حق هدوم الاوتى ماتحطهم بجيس نايلون لا بهالجنطه العلاق

*الاحذيه تخليهم بكراتينهم وكل موسم تبدلهم علشان ماينتلفون كذلك الجناط بجياسهم الخام لانهم غاليين حسافه يتدمرون من الغبار

*لاصار عندها عزيمه اهى مع بناتها اللى يستقبلون ماتخلى الخادمه تسوى ولاشى فقط انها تشيل الصحون والجلاصات الفاضيه بس

*طاولة الطعام مشاء الله دايما ديكووور اما اوراق شجر...اما شموع...اما تحط عليها المواعين والاكل لا لازم ابداع

*عندها مبدأ حلو اذا كان زوجها فى البيت قاعد معاها ومع عيالهاالتلفونات كلها تتسكر لانها تتفرغ لزوجها ولاسرتها

*مره طلبت منها جيس نايلون لما يابته لى الخادمه شى غريب مسفطته بطريقه ذربه موطبيعيه صاير صغيرون تقول لى الفلبنيات دايما يسوون هالطريقه اذرب

هذا اللى اذكره الحين

 

[om-farh]

يعطيج الف عافيه
حلوووووه الذرابه والسنع

 

[فطومه]

شى اكيد منو يعوف الذرابه والسنع....على فكره فى اشياء بسيطه وسهله الكل ممكن يسويها لكن احنا نجهلها اوماندرى عنها فشى طيب ان الواحد يستفيد من خبرات غيره

 

[العاذرية]

خوووش موضوع

انا ماحب ريحته البيت اللي تغمت على النفس اففففففففففف في شي اسمه بخور ومرشات الله مكثرها

وماحب الخدامه تضيف الناس وتصب قهوه والله مره رحت لوحده الله يذكرها بالخير من زود الدلع ماتقدر تشيل المطاره نادت الخدامه تصب لوووووووووووووووووووووول

اما عالترتيب ترى صح يدل على صاحبة البيت تلاقين ناس دثره وعفسه لان صاحبة البيت ماهمها اصلا الا بوقت العزايم والزوارات بسسس

ولي ييتيها على غفله ياسااااااااااااااااتر


وصج احب يكون حمام لضيوف مستقل في ناس حمامهم الخاص وانتو بكرامه اهو حمام ضيوفهم نقول لا حول ولا قوه يمكن ظروفهم وحجم البيت وهالسوالف بس اغراضكم الشخصيه شيلوها وقت مايكون في ضيوف او بكبت خاص مقفل

وفي ناس ترتب وتنظف وتنسى البيبان والدرايش تلاقين الغبار مكود عليهم

وبس وسلامتكم

ومشكوووووووووووووووووورين

 

[ياعشيري جعلك السلال]

انا انقهر اذا تموا يضيفووونج وما يشيلووون الي على الطاوله جاي عصير والطاوله تنترس قلاصات وصحوووون


ولا الفلبينيااات الي يقدمووون الاستكانه مو متروووسه والعصير بعد يعني موحلووو جذي حلاته المرا تأكد على هالشغله

 

[لعيـــ ترخص أرقاب ـــوني]

انا اشوف اهم شي ترتيب ونظافه الحمام والمطبخ << اانا عندي اعرف الشخص لنظافتة من هالشييين ..

 

[~*~الملكة~*~]

واي ذكرتوني

توني يوم السبت كنت معزومه

مثل ماقلتي اهم شي النظاااافه

تخيلي ريحة الحمام مكرمين

واصله لي عندنا وعازمه وايد ناس

والمكان مايشيل هالعدد تخيلي لدرجة


ان البنات قعدوا بالقاع!!!

ولما حطوا العشا يايبين صحون

اطرافها فيها كسر واااي مادري شلون جذي

صج اتمنى من كل ربة منزل تتاكد من مواعينها

ولازم البيت تكون ريحة حلوه والحمامات مكرم السامع

لازم تتنظف على طول ويعطرونها

مشكوره على هالموضوع

الي يخلينا نقول ملاحظاتنا

 

[alzen_kilah]

موضوع حلوو وغريب بس علشان نستفيد ومحد يكرر نفس الاغلاط

من الاشياء اللي شفتها انه يخلون باب الغرف مبطله يعني غرفه الضيوف قاعدين فيها وجدامج غرف مبطله والملابس عالارض ووصخه ولويه المفروض يسكرون الباب علشان محد يشوف بلاويهم لوووول دامها مو مرتبه

شغله ثانيه اللي يكونون حاطين ارفف للجواتي عزكم الله عند الدخله .........

 

[سما الكويت]

الغباااااااااااااااااااااااااااااااااااااااار...

اكثر شي ينرفزنى منظر الغبار..

تلقينها مرتبه البيت كله ويهبل...والستاير مغبررررره..والله الغبار عالق بجفسات الستاره..على بون الستاره فيها حركه ومابي اخربها!!!

والثانيه فاصله المجلس عن الصاله بحديد مطروق...سمعته وانا داخله يصرخ يقول تكفى قوليلها تنظفنى..وووووووع..منظره مو شي..

شلون مايلاحظون الغبار..ماادري..

 

[ســـآرونه]

اكثر شي يقرفني منظر الملااااابس وهي مبعثرررررررررررره

وريحة البيت رحية قلي واكل

منجد مدري شلون عايشين

 

[ثلاثينية]

اتنرفز من البيت المعفوس ... واحبه مرتب وبدقه بعد
وما احب ريحه الاكل في البيت ...
مره انعزمت في بيت والناس اللي فيها كشخه ولقيت غرفه الكوي عندهم مثل سوق الجمعه ...

 

[عشقته ولاتلوموني]

احلى شي النظافه والترتيب
مره انعزمت بيت وحده الله يستر عليها
بيتها ريحته دخان (زوجها يدخن ) والعصير مكبوب على الارض والغبره في كل مكان
والعاب ولدها موزعه على كبر الصاله وتحت الكنب كله وصخ وقذاره وغرفة الملاس كلها ملابس والله الارض ماتبين ومن الغثره
والمطبخ المجلى مليانه مواعين
والمشكله انها تقول انها تحب النظافه وماتقدر تشوف بيت وسخ
بس الغريبه انها شخصيا نظيفه ولازم تسبح وتتعطر وعبايتها لازم نظيفه
مشكوره اختي على الموضوع المفيد:edbf4317b9:

 

[أساور]

ماصادفني هالشي لاني من انعزم اتم بمكاني مادش غرفهم والاستقبال طبعا نظيف ومبخر

 

[مغيب الشمس]

صحيح كلام البنات انا غرامي الترتيب والنظافه وسواسيه حتى زوجي الله يخليه ليه دايما يقولي ما شفت نفس نظافتج ، مرة كنت رايحه عزيمه وحبيت اساعدهم والا المرة تطلع الصحون من الكبت للسفرة على طول من غيررررررررر غسييييييييييييييل اخذت الصحون وغسلتهم وفيه ناس اعرفهم حي يييييييييييييييل نظاف بس ما يعرفون يرتبون هذول عني احسن مية مره من المتب وهو مونظيف ينطبق عليهم المثل (من فوق هالله هالله ومن تحت يعلم الله )

 

[MZajEyA]

خوووش موضوع

بس اشدعوه في حريم جذي ؟؟ما يهتمووون

بنات انا لي بخرت احس تروح ريحة البخور مع ان اللي يدخل داري يشمها بس انا ما احسها قوية

ابي بخور قوي او خلطات قوية و حلوة

 

[جوري!]

خوووش موضوع

بس اشدعوه في حريم جذي ؟؟ما يهتمووون

بنات انا لي بخرت احس تروح ريحة البخور مع ان اللي يدخل داري يشمها بس انا ما احسها قوية

ابي بخور قوي او خلطات قوية و حلوة

مدام اللي يدش يشمهآ معنآهآ موجوده الريحه مآرآحت بس انتي تحسين جذي لأنج بالغرفه ,,



/



مشكوره صآحبة الموضوع على الموضوع الحلو ..
خوش انتقآدآت ..



بانتظآر تعليقآت بآقي البنآت ..​