احس اني اراح اكرهه بعد 3 شهور من زواجنه

[lulu0]

السلام عليكم

انا قاعده اكنب هالموضوع اهني لانه الصراحه ماقدر افضفض حق اهلي لانه مابيهم يكرهون ريلي خصوصا اني انا الي اقنعتهم فيه

انا صارلي متزوجه تقريبا 3 اشهر ونص ومتزوجته عن حب وهذي المشكله مالي عين اكلم احد

كحياة اجتماعيه وعادات انا واهو مختلفين وايد لانه بدوي وانا حضريه بس انا ماهمني هالشي لانه حبيته واهو نفس الشي

المهم مشاكلنه بدت عقب زواجنه بشهر النجره والخلافات بدت واهو من الناس الي ماتشوف نفسهم غلط كلش يعني مستحيل

يكون غلط وانا استحمل واطوف صرنه نتناجر مرات كل يوم وترك ومرات كل اسبوع والله اني ماحسيت بالسعاده

واحس اني مخنوقه اهو زين وطيب ويحبني بس مشكلته يوم يعصب مافي كلمه مايقولها ويصير حقيير جدا وينسي كل شي زين

بينه وانا اقولكك بصراحه مشاكلنه كلها علي اشياء تافهه جدا ولي يحرني اشلون يكبر الموضوع ويقعد يصارخ وانا اتنرفز اهني يقط

اللوم علي وتنقلب السالفه علي راسي مرات صح اغلط بس كل انسان يغلط ويقط كلمه ليش انا اتحاسب مليوووون مره واهووو مايحاسب

نفسه ومشكلتي ارضا بسرعه عشان اصك الموضوع بس اهو لا ينفس ويغير اسلوبه معاي والله مرات احس ماراح انكمل مع بعض

والسبه هالمشاكل امس تناجرنه لانه كنه متفقين نطلع طلع ساعه 5 يودي خواته بيت عمه ويردهم مارد الا الساعه 9 انزين بس

رد قلتله تاخرت تره قلت بترد علي ال 7 ونص قالي شسوي وسواها سالفه وطبعا طلعت انا غلطانه طنقر طلع ساعه ورد طبعا

خليته ومادقيت كلمته بس رد الاخ يطالع فيلم قالي مو وقته قلتله ميخالف انا بصير احسن منك وانهي السالفه اامهم طبعا اهو

يكلمني اليوم بس بنفسيه والله هذي مثال من المشاكل التافهه والله اني مابي اكرها ومابي اصير لا مبالاة بس

اهو قاعد يجبرني علي هالشي شسوي والله ما قمت اعرف اشلون اعامله ان تكلمت معاه بشي وماعجبه صارت مشكله عووده

شنو اكون طوفه في البيت يعني شوروا علي شسوي ؟؟؟؟؟​

 

[al-musk]

كل الناس فيها عيوب وفيها حسنات وليلحينكم جداد بالحياة وشوي شوي راح تتعودون على أطباع بعض وهو راح يتعلق فيج ومع الايام ماراح يقدر يزعلج بس طبعا لازم تتعاملين بذكاء مع اطباعه وهو بعد طريقته غلط بس شوي شوي يتغير .. عطي حياتج واختيارج فرصة وحاولي تتجاوزين كل مشكله بذكاء وماترجعيلها مرة ثانية ولازم بلحظة هدوء تتفاهمون على هالشي .. لأن كثرة الجفا تولد جفا .. وهو مفروض يفهم ان مو عالطالعه والنازله طنقر ونفس .. لان هذي مو حياة

 

[M!SS.LOBY]

الله يعينج
مادام تحبينه ويحبج خليه يتذكر هالشئ هذا

 

[lulu0]

والله اني تعبت حاسه اني بموت من القهر قام يمد ايده علي اموووت واعرف ضميره وين بس يمد ايده علي وتوه صار هالشي والله مادري شسوي اروح بيت اهلي ولا اقعد شسوي

 

[Shinexo]

لاتسمحين له يمد ايدده عليج

مهما صار هذول اهلج مردج لهمم

اذا صار فيها ضرب لا حبيبتي شلي شلايلج وروحي بيت هلج

ولا تردين عليه كلش

اذا هو يحبج بيرررد لج ندمان

 

[lulu0]

انا خذيت اغراضي ورجعت بيت اهلي لانه قام يطقني بوحشيه خلاص مابيه حرام الي قاعد يصير عمري ماقصرت بحقه

 

[Patcholli]

شنو سبب مدة الايد ؟؟
حبيبتي انتي مطوله لسانج عليه ورافعه ظغطه ولا بدون سبب ؟؟
اذا انتي مراددته ومطوله لسانه فحبيبتي حاولي تعدلين من نفسج
وخري عن الاشياء الي تستفز ريلج
نظام التحقيق وخري عنه
وين كنت وليش طولت لاتفتحينه معاه
اهو ريال مو ياهل
يعني حطي فبالج ان ممكن تصيرله ظروفه ومايرد بالوقت الي وعدج فيه واهو اساسا يقولج برد الساعه الفلانيه من باب الذوق ولانه يحبج مو من باب الاستئذان
حبيبتي هاذا ريلج انتي محاسبه عليه وحطي فبالج انه خذاج من بد كل هالبنات لانه يبيج وشاريج
اهني دورج انج تريحينه وتونسينه وتدلعينه وتتغاظين عن التصرفات الي تبط جبدج مو كل حركه لازم تسوين عليها سين وجيم
طوفي تأخر عليج قوليله عادي حبيبي مو مشكله عمري وحتى لو بتطلعون وكنسل الطلعه قوليله عادي عمري معوضه ان شاء الله
اذا حسيتي انه متنرفز بوسيه وطيبي خاطره بكلام حلو خليه يحس نفسه ملك وانتي مدلعته اخر دلع
لاتخلين علاقتكم عناد وتحدي وتقولين انا طوفه
لا منتي طوفه
يعني اذا رديتي عليه وتناجرتي تحسين روحج قويه وخذيتي حقج وانتي بالمقابل قاعده تنفرين الريال منج ؟؟
الريال ما يي بهالطريقه
الريال نفس الياهل يبي دلع وحنان واحترام ويبي حرمته دلوعه ولينه مايبي وحده قويه وتداحره
شوفي بعض الحريم تكون مو حلوه ولا فيها زود بس اسلوبها مع ريلها يخليه مايشوف غيرها ويخليه خاتم بصبعها
الاسلوب والابتسامه وكلمة ان شاء الله وحاضر وتامر امر حبيبي كافي
واسلوب العناد والشد وخري عنه ترى ينفر الريال منج والله لاتستهينين بهالشي لاتخلين ريلج يتغير ويتصرف معاج تصرفات ماتعجبج ولاتعجبه بس عناد ولانج مطلعته عن طوره
خلاص اذا شي يخليه يعصب وخري عنه حتى لو كان غلط لاتسوينها قصه طنشي طالما انه شي تافه ومو قوي
راجعي حساباتج وشوفي بعض الجنسيات العربيه اغلب الرياييل يتمنونهم بسبب دلعهم ومعاملتهم للريال
تصير نفس الجاريه حقه تحسسه انه ملك واهو بالمقابل مايقصر معاها لو تطلب شنو ماتبي يقولها تامرين لانها مقدرته ومعطته الجو الي يبيه

 

[lulu0]

والله اني سكت ومرات يزف ويعصب وانا اسكت بس مرات هم الانسان يغلط يعني محد معصوم من الغلط ليش جذي تكبر المشاكل والله ماكو شي ماسويته وحطيته علي راسي بس مشكلته ينسي كلشي بعصبيته وقام يمد ايده والله انه عجزني انا رديت بيت اهلي وبشوف شنو اخرتها بس تعبت والله تعبت

 

[أدعج غنج]

الله يكون في عونج ....كل مشكله ولها ظروفها وجوانبها..... بس مهما صار ما يحق لرجل انه يمد ايده على زوجته...
ولو الموت ما أقعد عنده ال معززه مكرمه

 

[مدّهره !]

خلافااتكم عااديه دام عرفتِ مووده ومزااجه لاتدققين طوووفي إستخدمي معااه التسليك


عشاان تريحين رااااسج



وهذاا مو معنااته تصيرين طوووفه بالعكس معناته قاعده تحاولين تتوافقين مع شخصيته


لكن الغير مسموح مدة الإيد حطي لهاا حد

 

[سندس 90]

كل واحد له عيوبه ماراح نلقى شخص كاااامل
ودام هذي عيوبه تحملي حبيبتي شتسوين
طوفي وطنشي
واهم شي لي صارخ سكتي لا تكلمين عشان ما ينزل مستوى الحوار

الله يصلح مابينكم يااارب 

 

[أحلى البشر]

الله يهدي سركم

 

[عـيّــآره]

البنات مابيقصرون بردودهم ان شاءالله بس عندي استفسار

كتبتي المشكله الساعه 2

طقج الساعه 4

6 انتي في بيت اهلج


؟؟؟؟


مجرد استفسار لا اكثر ​

 

[كنوشة 2009]

دائما في اول سنة زواج تصير مشاكل ونجرة
بس بعدين تتعودون
لكن بعد ما قلتي ان قام يمد ايده عليج
انا اقول زين سويتي ورحتي بيت اهلج لازم يحس ان وراج اهل
مو طوف هبيطة يطقج وتسكتين اذا هذا اوله ينعاف تاليه
والله يعينج

 

[sverige]

لاحول ولاقوه الا بالله حسبي الله على هيجي بشر مااعرف ليش يورطون بنات الناس وياهم

 

[lulu0]

البنات مابيقصرون بردودهم ان شاءالله بس عندي استفسار

كتبتي المشكله الساعه 2

طقج الساعه 4

6 انتي في بيت اهلج


؟؟؟؟


مجرد استفسار لا اكثر ​

انا مشكلتي من امس وكتبتها اليوم رد تكلم معاي بنفسيه وصصار حجي مني ومنه ومد ايده علي وكانت اول مره قعدت وشفت انه اهو راكب راسه وموحاس بغلطه وطلبت اروح بيت اهلي

 

[ツ...Яāώặή...ツ]

انا اقول حيل تسرعتي بقرارج ( انج رحتي بيت اهلج )
جان قعدتي معاه وصارحتيه وقلتيله
سأليه شنو السبب الي غيرك
شفت مني شي ضايقك
شفت مني تقصير
شفت مني ........ الخ

اكيد في شي غيره مو مني وطريج يتغير سمعي رايه اهو بالاول ​

 

[lulu0]

والله يابنات اقسم بالله العظيم انه عمري مافكرت اهد بيتي واليوم هم كلمته بس اهو مو متندم انه مد ايده هذا الشي الي خلاني اتﻻك بيتي

 

[سور المدينه]

بصراحه البنات صدموني البنت تقول مد ايده
ويختلق المشاكل ويعصب على اقل شيء وانتوا تقولون لها تسرعتي
وعدل نفسج
ليش اهو مايعدل طبعه الخايس الحياة تنازلات من الطرفين مو دايما المراة تتنازل تتنازل
وهي مكرمه عايشه بيت اهلها وبنت ناس
اذا يبي جارية على قولتكم يروح ياخذ له
وين حقوقها عليه
المفروض المشكله تنحل من الطرفين والطرفين يتنازلون لين يتعودون على طبايع بعض
مو اهي تتنازل وهو مستانس وعايش دور سي السيد عليها

 

[سعوديه 1]

السلام عليكم ,,


حبيبتي الله يهدي ما في سرررك ..

وحاولي دايم تذكرينه بأيام حبكم وانه اشلون كنتو تبون بعض واخذتو بعض رغم الكل ,,

وحطي ببالج شي انه ممكن يعاني من ضغوط من قبل اللى حوله بخصوص انه خذا حضريه , يعني الموضوع يبي له طوله بال وتفاهم

حاولي تاخذينه مشوار طلعه شي ,,, وتسئلينه عن اللى مضايقه او اللى يخليه كذا متنرفز ,

وفهميه انه مده اليد ممنوعه وانه اول واخر مره يمد يديه عليك ,,


والله يوفقك ويسهلك كل الخيرررر