سجلت دخول بس عشان ارد عليك مع اني من زمااان مادخلت المنتدى
حبيبتي ترى كلنا مرينا بهالموقف اغلب البنات نفس السالفه هي تحب و تخلص وتوفي وهو ينسى ويتركها بسهوله مهما قال من كلام اني ماراح انساك ومن هالكلام السهل بس النهايه وحده ماتتغير!!
ياقلبي الله يهدي قلبك وبالك مافي رجال بالدنيا يستاهل تبكين عليه الا ابوك.
فيه جمله قالها لك كثير لفتت انتباهي : . (انا مراح انسااج ولوو باخذ اربع), طيب دامه يقدر ياخذ اربع ليش ماقال ابيك الثانيه والا الثالثه والا الرابعه,, اي شي.. الاهل مهما كانوا مايزوجون البنت الا ولد عمها ترى لو جاهم رجال يستاهل ابد مايرفضون, صديقتي بدو وماياخذون الا من عيال العم لكن يوم جاها الرجال السنع ابد وافقوا عليه وخلوا ولد عمها.
يعني كان ممكن يحاول الاخ محمد , ماراح ينقص عمره لو حاول ترى!!
المسأله واضحه انك منتي في باله, كنتي مجرد تمضيه وقت ويتسلى معاك زيه زي كل الشباب. صدقيني مافي واحد يكلم بنت ويحبها من صدق مهما حلف واقسم.
الرجال يتحدا اهله والمجتمع كله اذا حب خدامتهم ويآخذها ولايهمه احد. لكن يوم تجي للبنت اللي تموت فيه وعارف تربيتها واخلاقها وانها مستحيل تفكر بغيره هنا يقول لا اهلي مايوافقون الا لازم اخذ بنت عمي!!! سبحان الله!!
حبيبتي والله مايستاهلك دام باعك وقال اهلي وبنت عمي نفس الاسطوانه اللي كل شاب بيترك اللي كان يكلمها نفسها هي هي ماتتغير .
الزم ماعليك نفسك. من هذا اللي تبين تدخلين في غيبوبه عشانه وتآخذين حبوب وماعرف ايش!!! والله لو ابوك ماسويتي عشانه كذا !!! وربي ماحد يستاهل ان اي بنت تتعذب عشانه,, اللي يبيك يدل طريقك مو يعذبك و اهلي وما اهلي .
عزي نفسك. واهتمي بنفسك . اذا بتقعدين تتذكرين انه كان يهتم فيك والا يقولك نختم قرآن واهتمي بصلاتك ومن هالحكي, ترى كل الشباب لازم نفس السالفه عشان يبين قدام حبيبته انه الخلوق اللي غير عن كل الشباب. لكن يوم تبي تشوف منه موقف مو مجرد كلام تلاقيه يهرب ورى اسطوانة اهلي وبنت عمي وغصبوني. فكري بعقلك والله بتلاقين انه مايستاهلك. وبتلاقين ان كل شي حلو حبيتيه فيه هو مجرد كلام يقوله, لكن دوري موقف سواه وكان حلو اتحداك تحصلين. كله كلااام بس , واحنا عبيطات نحب ونضيع شبابنا واحلى مرحله من عمرنا عشان كلام ماشفنا منه الفعل!!!
احمدي ربك انك متملكه واشغلي نفسك باللي شاريك واختارك من بد البنات كلهم. لاتخربين حياتك الله يخليك.
كل شي خيره , والله لو كان حبيب الغفله خير لك ماكان ربي بعده عنك.
كل ماحنيتي تذكري بس يوم ترسلين له وانتي تعبانه ودخلتي مستشفى عشانه ومع هذا ماهز منه شعره ولا اهتم.. كان همه نفسه وان محد يدري عنك وينفضح. وليته قال سلامتك والا شي, لا قام يهاوش ليش ترسلين وفضحتيني ومعرف ايش!!!! هذا يحبك بالله؟؟
تذكري انه كان عنده خيار انك تكونين الثانيه لكن ماحطك حتى لو الرابعه, وكل اللي قاله ماراح انساك!! شتفيدني فيه انك ماتنساني!!! اكدي ماراح تنساني الا لي فقدت الذاكره مايحتاج تحلف فيها هذي
تذكري انه كل شي كان كلام معسول لكن موقف رجال مافي
تذكري انه منتي لحالك في هالسالفه , غيرك كثير بنات تعذبوا وقاعدين يتعذبون بسبب شباب مايستاهلون ,ودايم الخسران والحزين واللي يبكي ويدخل مستشفى ويفكر يآخذ حبوب ويموت نفسه هو البنت!!! لكن مافادهم شي وندموا على كل لحظه ضيعوها من تفكير والا دموع في واحد مايستاهل حتى انه يكون مجرد خيال فكيكف سنين تضيع منها بسبته.
عمرك بالله دخلتي منتدى شفتي واحد من الشباب يكتب ماقدرت انساها والا احبها والا ابي اتزوجها واهلي رافضين؟؟؟؟ كله البنات بس يعانون ويحبون من قلب. لكن الشاب مستحيل يحب من قلب , وان حب عادي يترك بسهوله مايوقف حياته على بنت. عندهم البنت بدالها الف.
فكري وانتي تبكين عشانه هل هو الحين قاعد يبكي علي وحالته حاله؟؟ والله وانا ماعرفه بظمنلك واقولك لا والف لا, شلون اجل وانتي تبين تآخذين حبوب وتدخلين مستشفيات عشانه وهو حتى الدمعه مانزلها عشانك؟؟
وزي ماقالت وحده من البنات قبلي بس يوم تصير مرته نفاس والا عند اهلها وطفشان وقتها بتجين فباله ويحاول يتصل, فعزي نفسك من الحين وغيري رقمكواي وسيلة اتصال معاه, ولو حاول يرجع ابد لاتعطينه مجال. اللي ماخلاك حتى خيار زوجه ثانيه . لكنه بيخليك مجرد خليله وتمضية وقت. وانتي اشرف من هالشي.
عندي كلام كثير ودي اقوله لاني عانيت وللحين يمكن اعاني واحس بقهر لكن بوقف لي هنا. واتمنى تفكرين زين بكلامي وكلام البنات.
الله يهدي قلبك ويريح بالك.
