اجراءات عمل الفيزا البريطانية بالكويت وتنبيهات مهمه

[!amorra!]

السلام عليكم ورحمة الله وبركاته​

يمكن يخفى على البعض طريقة عمل فيزا دخول للبريطانيا ​

فهالموضوع راح اعلمكم الاجراءات ​

اول شي المكتب اهو مو السفاره نفسها اهو مكتب متعاملين معاه السفاره وتقدرون تشتكون اذا معاملتهم سيئه او بايخه او لاي سبب ومشكله تحصلكم عن طريق الويب سايت مال المكتب نفسه وترا تقدرون توصلونه بعد للسفاره البريطانيه :eh_s(15):​

هذا الويب سايت للمكتب ​

UK Visa Information - Kuwait - Home Page​

المكتب موجود قبال البنك المركزي داخل الديره ويمه بالضبط ادارة بنك برقان ​

يبطل من 9-الى 4​

وبرمضان من 9 الى 2 ونص وبعدها مايستقبلون الا اللي معاهم ارقام فقط او مواعيد​

راح يعطلون بتاريخ 19 -20-21 اغسطس

المكتب يستقبل جميع الجنسيات راح تلقون اجانب وخليجيين وعرب بعد كل الجنسيات ​

يلا نبلش بالفيزا : الفيزا صالحة للدخول اكثر من مره للاراضي البريطانيه خلال 6 شهور فقط يعني صلاحية الفيزا 6 شهور. ​

الفيزا انواع :​

1-سياحية
2-دراسية
3-علاج بالخارج
4-فيزا للخدم (راح يدخلون بصفتهم عماله وينطبق عليهم قوانين العمل البريطانيه)​

انا اللي اعرف اجرائاتهم ا+3​

السياحية.
اكو طريقتين للتقديم اما بالخدمة العاديه او الـ vip​

اللي يختلف معاج الرسوم​

الـ vip رسومها 57 للشخص الواحد شاملة تصوير شخصي +تصوير مستندات ​

العاديه لازم تاخذين موعد عالانترنت وتطبعينه وتروحين لهم بيوم الموعد ومعاج ورقة الموعد المطبوعه. ​

اكو ابليكشن يتوزع تعبين فيه بياناتج واهو وايد سهل انا دايما اعبيه مايحتاج يعبيه المكتب لانه ياخذ 5 دنانير على كل ابليكشن:bbbiu:​

ملاحظه مهمه جدا ​

اللي تحت الـ 18 لهم ابليكشن يتعبى اونلاين وتطبعينه وتودينه معاج حزة الموعد ​

الاطفال الـ تحت 5 سنين مالهم بصمة ولايحتاج تاخذينهم معاج بس عبي الابليكشن اللي بالنت واخذيه معاج​

اللي مايعرف يعبي اكو مكتب تحت يم السفاره يعبي الابليكشن ويترجم بعد :rerrerek:​

اللي تحتاجين تاخذينه معاج​

صور شخصية ( تكون حديثه +الريال بدون غتره يعني شعر +المره بدون نقاب +الويه واضح مو تغطين نص ويهج بالملفع +الخلفيه بيضا) انتوا روحوا المصور قولوله فيزا بريطانيا ​

الجواز وتأكدوا انه صالح على الاقل لمدة 6 شهور والا مايدخلونكم ترا :rgewrg:​

العلاج بالخارج​

لكم استثنائيه ومعامله خاصة بانكم تدخلون الخدمة العاديه بدون موعد مسبق بس انها تكون خلال 5 ايام عمل (يعني الويكند مو مشمول بالحسبه).​

مثلا طلع كتاب العلاج من تاريخ 8-8​

لكم من 9-8 اللي اهوا الخميس والاحد والاثنين والثلاثاء والاربعاء تقدمون اوراكم ويدخلونكم بسرعه ​

اهم شي لو لكم طفل مريض ينطبق عليه شروط الاطفال اللي اهو انكم تعبون ابليكشن بالانترنت.​

يعني الاوراق المطلوبه:​

1-صور شخصية
2-للكبار الابليشكن اللي يتوزع بالمكتب.
3-للصغار الابليكشن اللي بالنت (تقدرون تخلصونه من المكتب اللي تحت مال الطباعه وكل شي )
4-كتاب علاج بالخارج اللي ترجمتوه ومرفق فيه موعد الطبيب ​

ملاحظه ثانيه:​

المرضى اللي مايقدرون ينطرون واصحاب الاحتياجات الخاصه راح يدخلونكم على طول ويسون اجراءاتكم ماله داعي تنطرون بس كلموا الريسبشن واشرحولهم الوضع​

تنبيه مني انا اللي رحت مليون مره لهالمكتب :​

حق الناس اللي اول مرا تقدم​

اول شي ماله داعي التنرفز والخوف المكتب مو السفاره اهو مكتب تجاري يوصل الاوراق​

يعني لاتتنرفزون وتعصبون وتصيرون جباريت وياله متحملين عمركم ​

محد بياخذ رزق احد ​

الكل راح يدخل عالدور ويخلص وماراح يتعطل دام اوراقه جاهزه​

اللي نشوفه بعض المرات بالمكتب ترا والله عيب ناس مداحر وهواش والنفسيات اللهم ياكافي ليش عاد!!:rgewrg::rgewrg::rgewrg:​

حتا مايعطون مجال حق الناس اللي تبي تسأل الاستقبال لازقين لزق عالباب مع انه ينادون بالارقام ​

صج هالشي مو حضاري ابدا ابدا ​

واحب اطمنكم ​

اللي قدم 10 الصبح واللي قدم 2 الظهر ​

اوراقكم راح توصل للسفاره بنفس الوقت​

لان المندوب ايي الساعه 3 العصر ويلم الطلبات ويوديها السفاره​

يعني المخامط ماله داعي بس قاعد تحصلون ذنوب وتضايقون الناس :bbbiu:

طبعا اهبا حواث فرديه ومانعمم ​

ونصيحه اخيره استفسروا منهم عن الاجراءات واسألوا اكثر من واحد من الموجودين لان انا واحد منهم عطاني معلومه غلط وتبهذلت بسبته :rgewrg:​

ومابي الا دعواتكم ​

وشكراااا :eh_s(7):​

 

[M&&m]

يعطيج الف عااافيه
انزين اناحجزت موعد المفروض اروح اليوم وكنت طابعه الموعد والابلكيشن بس صار ظرف ومارحت
والحين ادش عالنت باخذ موعد حق باجر مافي كله فللل
يصير اروح من غير موعد
انا طابعه الابلكيشن ومخلصه اوراقي
وبسالج جم تطول الفيزا علي ماتطلع
انا ابيها قبل العيد

 

[!amorra!]

يعطيج الف عااافيه
انزين اناحجزت موعد المفروض اروح اليوم وكنت طابعه الموعد والابلكيشن بس صار ظرف ومارحت
والحين ادش عالنت باخذ موعد حق باجر مافي كله فللل
يصير اروح من غير موعد
انا طابعه الابلكيشن ومخلصه اوراقي
وبسالج جم تطول الفيزا علي ماتطلع
انا ابيها قبل العيد

يصير تروحين بدون موعد

روحي باجر ودشي عالخدمة المميزه vip

ورسومها 57 على كل جواز

يقبلون كاش وكي نت وحتى الفيزا بس بعموله للـ 100 دينار ياخذون 3 دنانير طبعا العموله للبنك مولهم

تخلص خلال 5 ايام بالكثير يعني بحالتج ان شالله تاخذينها قبل العيد

بس ضروري باجر تقدمين

روحي مبجر

او حجزي موعد للفي اي بي من الويب سايت

موووفقه :eh_s(7):

 

[M&&m]

انزين اذا رحت من غير vip متي تخلص؟؟
لان وايد ٥٧
واذا بحجز vip لازم من النت؟؟ لان مافي موعد حق باجر
عادي احجز vip من المكتب؟؟

 

[!amorra!]

من غير vip

ماتدخلين الا بموعد للاسف

الا اذا كان عندج موعد للعلاج بالخارج

 

[M&&m]

بس دخلت عالنت ماعرفت احجز vip
شلون الطريقه

 

[!amorra!]

الـ vip مو ضروري تحجزين تقدرين تروحين اليوم الخميس عادي بدون موعد

بس عموما

روحي للسايت وضغطي على حجز موعد

يطلعلج مربعين دخلي الاسم ورقم الجواز عقبها راح تختارين ياموعد عاد او premium البريميوم اهوا الـ vip

بس الرسوم 57 ​

 

[M&&m]

مشكووووورة حبيبتي ماااااقصرتي
ان شاإاءالله باجر بروح مبجر واقووولج شصار معااي

 

[صمت الكويتيه]

انزين اختي انا سمعت ان الفيزا تطول يمكن ١٥ يوم هل هذا الكلام صحيح لان يمكن اروح اقدم عالفيزا قبل العيد بربع ايام وبتكون السفره انشالله ثالث يوم العيد

 

[@ام يوسف@]

يعطيج العافيه

 

[نياره]

يعطيج العافيه

 

[حبي عبادي]

حبيبة اذا بحجز للعيد شلون الإجراءات أنا اول مره بروح لها اذا والفي اي بي ممكن تخلص ب٣او٢يومين

 

[!amorra!]

لا مستحيل 15 يووووم!!

الفيزا حدها اسبوع

الفي اي بي تخلص بـ 3 ايام ان شالله

 

[chelabteen]

انزين اختي باخذ خدامتي معاي وسويت لها ابلكيشن وموعد بس قبل لا اروح للسفاره شنو الاوراق المطلوبه؟

 

[M&&m]

انا قدمت عليها الخميس وخذيت vip بس قالي نفس الشي بتخلص 5 ايام
تتوقعون تخلص قبل العيد امبيه حدي احاتي انا سفرتي٢٠/٨

 

[ام بنتها]

الابلكيشن لازم اروح أخذها ؟ ملتقطو لطبعها من النت ؟

 

[نـعـومـه]

احتا قدمنا في اي بي عن طريق النت بس موعدنا بعد أسبوعين وطبعنا الاوراق وجاوبنا على الاسئله !! جنه على شرحج اجرائاتنا نفس العاديه !!