اتزوج بدون عرس (( رايكم بنات ))

[كيوت قطر]

السلام عليكم ورحمة الله وبركاته


اشلوووونكم بنات , ان شاااء الله طيبين

بنات حبيت استشركم بشي ,

كل وحده بحياتهااا وهي صغيرة تتمنى عرس لااا صارت ولااا ستوت
فستان ابيض وزفه , وتعزم كل حبايبهااااا ,؟

بس اللي يقهر تكاليف العرس مب شووي , مثل ما انتووو عارفين مكلفه وغالية :eh_s(2): واحس حرام في ساعات قليلة وينقط هالفلوس

فحبيت استشيركم ,
اشرايكم ماسوي عرس بقاعة كبيره وانتنازل عن حلمى :eh_s(16):
واسوي حفله بسيطه في البيت بين اهلي وبين اهله واعزم اصدقائي

وتكاليف العرس )) اسوي فيه مشروع خيري , واسافر فيه :eh_s(7):

وحبيت اسال لكل ماسوت عرس في قاعة , هل ندمتي ؟
واللي سوت عرس فخم ولويه وخسرت الكثير من المال , هل بعد ندمتي ع التكاليف والخساير ؟

 

[كيوت قطر]

اشدعوه ولااا رد

 

[dectora 7elwa]

ما كو مشكله
سوي حفله صغيره
والباجي خليه لج
بالعرؤوس مهما تقطين الزعلان اكثر من الراضي

 

[Leann]

زين ما تسوين

انا بعد بغيت اسوي حفلة صغيرة في بيتنا بس يوم حسبتها .. المكان صغير ما يكفي كل اهله و اهلي و اذا بيبب اكل و بوفيه يبيله تنظيف ثاني يوم و احنا ما عندنا خدامة فقلت مو مشكله نسويه بقاعة خصوصا اني اول بنت تتزوج بين خواتي و اهوه الولد العود و اهله يايين من بره الكويت عشان يشوفونه و يزفوونه فقلت مدام انا بعزم وايد و اهو نفس الشي .. خل اسوي شي سنع مو حلوة ضيوف ايوونا و ما اكلهم شي عدل

بس اذا تقدرين تسوين حفلة صغيرة و ظروفج تسمحلج و الله احسن و ابرك :eh_s(7):

 

[randomy]

بالبيت سويه واستانسي ولبسي ابيض جنج مسويه عرس كامل

والله يوفقك

 

[قلب ضعيف]

بالعكس فكره حلوه

انا اعرف صديقتي من الدرجه الاولى سوت حفله كبيره حيل بكل شي غالي المكياج الفستان الا الا وبالاخيره الناس تنقد
وهي من ذاتها تقولي وربي ندمانه لما فكرت اللحين قلت غبيها انا ليه سويت كل هذه

والله توكلي على ىالله والناس راضاهم لاتفكرين فيه مو نافعينك اهم شي اهلك واهله يفرحون فيك الباقااااااااااااااااااي طااااااااااااااااااااااف

 

[اروى77]

صدقيني مو بس انتي تفكرين هالتفكير وااااايد اعرفهم يفكرون يسوون حفلة بسيطه تجمع المقربين منهم
ومن اللي اعرفهم اللي ماسوو حفلة عرس لما اسالهم عن شعورهم لانهم ماسوو حفلة عرس يردون علي انهم
مومتحسفين كلششش
تفكيرك سليم وبدال ماتقطون الالاف على حفلة العرس استفيدو منها في تجهيز شقة الزوجيه
وتسافرون لاحلى مكان تقضون فيه شهر العسل

والله يوفقك ويسعدك ان شاءالله

 

[pusy cat]

مو شرط بصاله

انا لبست ابيض وجبت بوفيه وعزمت اهلي علا البيت وجبت مصوره وصورت مع زوجي

وكان احلا يوم بعمري لا ربكه ولا شي الحمدلله

 

[noo7a]

تفكيرج حلو و اهنيج عليه
بس عن نفسي سويت عرس وماتحسفت عليه لانه ليله بالعمر بس الذكرى و الصور تظل لطول العمر

 

[• JoJo •]

اي حبيبتي انا مثلك ماراح يكون فيه عرس وقاعة ,, لا مجرد عزيمة بسيطه عشا ,, وياعريس خذ عروستك وتوكل على ربك

واكون صادقه بالاول كنت مرة متضايقه ان ما بيكون فيه عرس مثل غيري ,, بس لما جيت فكرت حسيته افضل بكثيرررر خاصة الحين اغلب المتزوجين مبتلشين بالقروض بسبب العروس وتكاليفها

 

[Tulips]

انا وحده ما أأيد العرس

مصاريف واسراف وعلى الفاضي .. تقطين مبلغ وقدره على ٣ او ٤ ساعات .. انتي اولى فيهم استانسي فيهم سافري ولا على قولتج تبرعي بجزء بسيط عشان الله يبارك بزواجج

ومهمها قطيتي على العرس وتكلفتي اخر شي الناس بتعيب لانه مايعجبهم العجب .. وبتشوفين ناس بس يايه تتفرج وانتي ماتعرفينها

سويلج حفله صغيره بالبيت ولبسي ابيض وعزمي المقربين واللي يعزون عليج فقط لا غير

والله يوفقج *

 

[Queenleo]

ان شاء الله لما ربي يكتبلي النصيب ماراح اسوي عرس كبير
انا نفسج متحسفه عالمخاسير واحس ربي ماراح يبارك لي
بس بعد صعبه طلعتي من البيت بسكاات ووخاصه اني الكبيره واكيد امي ودها تستانس بعرسي
فان شاء الله بسوويه بقاعه صغيره ومحفووفه بين االاهل وواعز صديقاتي بس

 

[مـزآج ــــية]

و الله انا احس انه حفلة بسيطة بالبيت ابرك

فكري فيها انتي ليش تبين عرس ؟
عشان تلبسين نفنوف ابيض و تصورين مع ريلج جم صورة حلوة و يفرحون فيج الناس القراب منج عدل ؟

بالعرس الكبير شوفي شكثر تتكلفين فندق و عشا و لبسج و يا ويلج ان نسيتي احد يحقدون عليج خخخ
و كل هالتعب و اخر شي اللي مو عاجبها و اللي تعلق تعرفين سوالف الحريم

احسنلج من كل هالدندرة حفلة صغيرة بالبيت تفرحين فيها

و بفلوس العرس سافري سفرة سنعة اشتري كل اللي بخاطرج او جهزي بيتج باحلا اثاث و لا تخلين ع نفسج قاصر

 

[ضي الدنيا]

الله يووفقج ويسعدج ياا غناااتي **

اذا كان بخاطرج العرس سويه بصاله موشرط فندق والصاله قيمتها 100 دينار

واحجزي كل شي موشرط فخم وغالي خليه متوسط 00

واي مسااعده اناا حاااضره اعرف صالات رخيصه ومطاعم بوفيهات مو غاليه ودي جي سعره معقوول 00

واذا سويتي بالبيت لبسي النفنوف الابيض ودي جي وتصوير يكون عرس حلوو يعني عاادي اذا كان بصاله او فندق او بيت **

الله يوووفقج ياا غناااتي **

 

[مساء الرياض]

خير الامور وسط لاتبالغين وتخسرين وعموما الناس مايرضيهم شي سوي حفله وزفه واعزمي الي تعزين حيل

 

[$ الذوق كلهــ $]

عين العقل

ثلاث من رفيجاتي ملكات جمال وربي الشاهد كلهم سوا حفله بالبيت بس حفله للاهل ولبسوا وتمكيجوا جنهم داخلين الصاله ويقولون ابدا ما تحسفوا انهم ما دخلوااا بالعكس اريح لهم

 

[رتو الكيوت]

الصراحه اذا عندج هالمبلغ سووويه !
ان لو بتحضرين عرووس حلوو بتحسفين انج ماسويتي

وكل وحده منا لها ليله عمر تسوي الي وجها فيه وتشوف الفيديو وتستانسسس

الفلوس وصخ دنيا هي رايحه راييييحه

 

[ام الدرر]

زين ما سويتي
بارك الله لكما وبارك عليكما وجمع بينكما بخير ​

 

[اهداب]

العرس بصالة فندق فخمة مو شرط ...او صاله افراح ...

المهم حفله بصالة بيت تجمع اهل العروسين .. والاصدقاءء المقربين ؟

لا تنسين سفرة مدة شهر (العسل ) مهمه وحرصي عليها

( اعتقد شهر العسل باحدى الدول الاوربية اهم من العرس )

 

[أم توتو]

الله يوفقج حبيبتي والناس مايعجبها العاجب ولا صيام في رجب سويتي بفندق سويتي بصاله بالبيت لازم الناس تنتقد الله يهديهم