مطعم ستون جريل .. Stone Grill Restaurant
مطعم جريل ستون يقع في شارع سالم المبارك في مجمع أمنيه التجاري .
المطعم أكله عادي لكن مايجذب فيه هو طريقتهم في تقديم الستيك وبعض الأطباق الأخرى لتطبخها أنت بنفسك على الطاوله .
المكان صغير الصراحه الطاولات تقريبا كلها عشر طاولات .
المنيو : الإختيارات فيه مو وايد لكن في من كل الأصناف الستيك والبحري والدياي .
أول ماتقعد ع الطاوله يحطونلك هالخبز مع زبده وخل البالسميك وخلطه بهارات هنديه .
.
شوربة ربيان كانت عادية جدا ومالحه وفيها حبة وحده ربيان
الطبق الثاني بروشيت الفطر : عباره عن فطر مقلي محشو بالسبانخ والجبن
بما أني أنا الي طالبه فأنا أحب الفطر والربع نص ونص وياه وبالتالي الطبق بالنسبة لي حبيته .
وفلاينج بولو : قطع دجاج مقليه مع السمسم والصلصه
الدياي كان عادي جدا الصلصه كانت حلوه
كارباشيو لحم البقر : عبارة عن شرائح لحم بقر متبله مع سلطة الروكا
الأطباق الرئيسية
أهم مايميز المطعم هي الأطباق الرئيسية وطريقة تقديمها
وطبعا يخيرونك تبي انت تطبخ ولا هم اييبولك اياها جاهزة
أول شي يلبسونك غطا عشان ملابسك ماتتوصخ مثل صدرية اليهال
وبعدها اييبولك هالصخره الحااااره مع الصلصه والخضار وتكون مرشوشه ملح خشن وفلفل
وبعدها اييبون اللحم بعدين عاد اييك الجرسون يعلمك اشلون تطبخها وبعدها تعتمد على نفسك
الستيك عادي جدا لكن ممارسة الطبخ على الصخره تجربه جميله جدا وفكرة فريدة
أنصح بزيارة المطعم لتجربة طبخ الستيك والتمتع بأكله والتحكم بمدى نضج قطعة اللحم الخاصة بك
التقييم
المكان 7 / 10
الخدمة 9 / 10
جودة الأكل 7 / 10
السعر 8 / 10
أسعاره غالية عند مقارنتها بمستوى الأكل الي يقدمه
(من مدونة بوفلان )
