ابي شي يهدي المعده وايد تعبانه منها

[الفتاة الثلجية]

السلام عليكم ورحمة الله

خواتي يا ريت تفيدوني بشي يهدي المعده تعبانه ((الم وحرقان ولوعة جبد )).....وخصوصاً الصبح احس روحي بتطلع من لوعة الجبد واقعد اكح من الاسيد اللي يرتفع عندي بشكل كبير....وهالمشكله عندي من زماااااان بس تروح وتجي اذكر من أيام الثانويه :eh_s(2):

عطاني الطبيب بانتزول ومجربه نكسيوم بس ما ابغي اعتمد عليها على طول لها آثار جانبية...وبعدين مو بسرعه تخوز الالم...
ابي شي طبيعي الله يرضى عليكم.

 

[ranh]

ما تشوفين شر حبيبتي
البيكربونات الصودا تعالج الحموضه وما في منها ضرر باذن الله
ولا تاكلين قبل النوم مباشره خلي 3 او 4 ساعات

طريقه تحضير بيكربونات الصودا هي
جفشه صغيره على كوب ماي وذوبيها وشربيها


كل يوم بعد الغدا خذي جفشه كمون بودر مع ماي او يبي باكيت كمون وحضريه مثل الشاي بس بدون سكر لان السكر يسبب انفاخات بالمعده

 

[MoonDiamond]

افضل شي للمعده

الروب

وعصير الفراوله​

 

[شندوخه]

شوفي حبيبتي انا فيني معده وعارفه باللي تحسينه
اول ماتقعدين من النوم اكلي بسكوت مالح وايد ممتاز يمتص الاحماض الزائده بالمعده (هالحجي علموني عليه مستشفى بامريكا)
وعصير التفاح الطبيعي ممتاز بعد شربيه ولاتشربين عصير برتقال او ليمون وقللي من البهارات والفلفل والكاكاو
وشربي حليب بارد - روب - بابونج ويانسون
كلهم حلوين ويهدون المعده وان شاءالله ماتشوفين شر

 

[غلا-زوجي]

الروب ينظف المعده ويشيل البكتيريا اللي فيها

 

[FsForya]

أب أب

الله يشفيج

 

[جــــود]

انا بعد فيني حراره بالمعده
بس اشرب الحليب العادي بس يكون باااااارد والحمدلله ارتاح على اني مااحب الحليب

والله يشافيج ويعافيج يااارب

 

[معزوفة عشق&]

ايه انا بعد سمعت ان الروب مفيد للمعده
ربونا يشفيك
آآآآآآآآآآب لعيونك

 

[الفتاة الثلجية]

جزاكن الله كل خير .....واي وحده عندها معلومة يديده لا تبخل علينا
لإن هالمشكله وايداااين يعانون منها

 

[فـدوه]

سلامتج و ماتشوفين شر, لازم تشربين الدوا الأبيض اللي جنه طباشير( من احسن الأنواع Gaviscon ) هذا يهدي الحموضة و اذا استدعت حالتج كلمي الدكتور و شوفي اذا تحتاجين حبوب من طقة ( zantac)

ومن الأكلات اللي تهدي المعدة الحليب البارد و الخيار

 

[جمرة غضى اضمها بكفي]

اشربي عصير الرمان يوميااا اخذي الحبات الي داخل وحطيها بالخلاط واشربي العصير

واخذي قشر رمااان جففيه او اشتريه من العطار مجفف وطحينيه لين يصير ناااعم

وحطيها بعلبه عندج وكل يوم حطي ملعقه صغيره داخل قلاص ماي باااااارد وعقب ربع ساعه اشربيه

يوووميا قبل الاكل او اللهميه مثل اللهوم

الرمااان مفيد وذكره الرسول عليه الصلاة وسلام لقووله عليه الصلاة والسلام : كلوا الرمان بشحمه فإنه دباغ للمعدة".

وامي الله يشفيهاا دايم تطحنه لنا بعلبه لاحسيت بمعدتي خذيت منه

ولاتنسين العصير بعد يومياااا وباااذن الله بتشوووفين العافيه

ولاتنسينا من دعائج

 

[شيماتو]

حبيبتي انتي نفس حالتي انا ليلحين اعاني من الاحماض ولا يعه جبدي منها سويت قياس الاحماض طلعت نتيجتي 224 والطبيعي 14 الدكتور انصدم ماكو شي ماكليته ماكو فايده وسويت منظار بمعدتي قال عندج ارتخاء بالمعده وفتاق وسويت عمليه وماشفت نتيجه تعبت والله تعبت وياست وكل يوم ابجي وقالولي عن دكتور بالرياض بمستشفى سليمان الحبيب رحتله هم ماكو فايده شربت حليب وخيار وروب ورمان وما قمت اشرب لاشاي ولا قهوه ولا ككاو وعقب الاكل بربع ساعات انام وماكو دوه مال الاحماض ماشربته ولا كليته ماكو نتيجه الله يعينج ويعني معاج انا كل يوم اشوف الموت بعيوني ليدرجت اقوم من النوم مخنوقه من الاحماض ويهي يزرق ماقدر اتنفس هذاغير الحرقه وعوار المعده والام بالصدر والكحه والشرقه والترجيع الله يشافينه يارب وشافي كل مريض

 

[الفتاة الثلجية]

مشكورات خواتي وجزاكن الله كل خير

والاخت شيماتو .....جربتي خلطة اللبان الذكر ((أحسن شي العماني او اليمني اللي يكون مخصص حق الاكل ))....؟؟...

تجبين قنينه زجاج ((لا تستخدمين قنينة المياه البلاستيكيه تطلع منها مادة مسرطنة مع إعادة الاستخدام)) المهم وتحطين فيه لبان ذكر بس يغطي القاع مال القرشه .....وبعدين تصبين فيها ماي صحه او معدني ....ما اعرف شو تسمونه...
وترجين الغرشه زين ما زين بعدين ترجعين بعد ساعتين وتشربين لج استكانه من القرشه....وتمي على هالحال لين ما تخلص الغرشه يعني بتقعد معاج يومين ....
والله هالطريقه وايد تهدي المعده
بس أنا للاسف ما عندي الحين لبان ذكر من الزين ....وإلا بسويها
في بعض محلات السوبرماكت يبيعون مياه في قراش زجاجية.....تقدرين تشترين وحده وتعيدين استخدامها بعدين عن خطر البلاستيك مثل هاذي