ابي شي يهدي الربو غير الكمامات

[احلى عيون]

السلام عليكم

ابي شي يهدي الصدر الرئتين مرات تضيق واطلع اصوات
ويصعب علي اتنفس .. ما احب اخذ كمامات .. صج انها تهدي بس فتره بسيطه ويرد الربو مره ثانيه ..
ابي خبراتكم بشراب طبي .. يوسع الشعب الهوائيه ..

 

[*ستايل*]

اكثر شى بيريحج الكمام والاكسجين ياقلبى حطى لج توقيت على حسب تعب صدرج وراح تلاحظين انه يخف عنج ان شاء الله

واذا عندج كحه حيل شربى ينسون مع بابونج تلقينهم بالجمعيه جاهزين بعلبه مخلوطين مع بعض على شكل اجياس شاى ..تهدى الكحه عندج

وديرى بالج لا تقعدين بمكان حاار حيل عشان ما تختنقين ولا يحوشج بعد هووا بارد لين تخف الازمه معاج
لا تاكلين مانجا وربيان وبيض وفراوله وطماط وخيار يزيد الحساسيه

بس اذا صدرج ملتهب حيل اخذى مضاد احسن وماتشوفين شر ان شاء الله
الله يعينج الربووو يتعب ​

 

[كويتية أصيلة]

حبيبتي البمبر معروف حق الربو والصدر

عليج بالبمبر وما عليج إلا العافيه باذن الله

وما تشوفين شر يا عمري

 

[احلى عيون]

ستايل انا ما ودي اتعود على الكمامات والاوكسجين
بجرب الينسون مع البابونج ..


كويتيه اصيله .. شنو البمبر ؟؟
وين احصله ؟؟

والله يعطيكم العافيه .. والشر مايجيكم ..

 

[ياسمينا]

احلى عيون استعملي مغلي اللبان المر تلقينه عن الحواج اشربيه مثل الجاي بس لا تثقلينه وعندج مغلي البابونج هم زين للصدر وتقدرين تحلينه بعسل وادعيلي اذا طبتي
نسأل الله العافية

 

[منطلقة بطموحي]

اختي ما تشوفين شر ..
انا سمعت انه اكو سائل تشربينه بدل الكمامات .. روحي الصيدليات الكبيرة و سئلي عنه ..

 

[hada]

البروميلين مكمل غذائي مستخلص من الاناناس مفيد للربو تلاقينه في محلات gnc بس استمري فترة طويله عليه والله يشافيج

 

[om el7elwen]

حبيبتي الكمام صج يتعب بس اهو الحل لان اريح ويطرد البلغم بس اذا تبين دوا اخذي الميكوليت وسع القصبات وبذره السفرجل اتلاقينها عند الحواي فوحيها وشربي منها مافيها طعم وعندج المرة عجيبة جنها مضاد حيوي والله اشافيج ويشافي كل مريض

 

[رفرف]

عاد انا صج صج صج متأذية من الربو خاصة مع هالجو لا وحامل بعد الدكتورة تقولي لا تكثرين من البخاخ شسوي اموووت ان ماخذيته صج أبي حلللللل

 

[omneyaty]

الله يشافي الكل والله انا اعاني مثلكم مع ولدي بو 7 سنين


مرات ربو بالصدر ومرات ضيق بالحنجره مسكينتعب من هالكورتيزون


والمضادات والكمام يارب تشافي الجميع

 

[نوف&&]

حبيتي عليج بالعناب تلقينه عند الحواج بصراحه حلووووووو للصدر وعليج بورق الجوافة بعد عند الحواج احسن لج من الكمامات والكرتيزون....

 

[النبع الصافي]

الله يشفيج ..

 

[[]نهاوند[]]

انا معاي ربو ويزيد بعد المطر
استغفرالله صرت اكره المطر
لما يطق مطر لازم آخذ كمام
في طريقة جربتها نفعت معاي اغلي شوي ماي واستنشقيه ولما يبرد سخنيه مرة ثانية يعني كرري هالعملية 3 او 4 مرات صدقيني بترتاحين ​

 

[ريمه الكويت]

فيه عسل من العويد خاص للشعب الهوائيه مرسوم عليها جهاز تنفسى

خواتى يستخدمونه واهم فيهم ربو جربيه انشالله ترتاحين عليه

 

[مسك 3]

البمبر تلقينه عند الحواي اخذي جم حبه واغليهم بماي وشربي الماي مع قفشه عسل
ما تشوفين شر

 

[لؤلؤية]

الصراااحه

شي غريب...

غالبية اهل الكويت فيهم ربووووو

ويزيد بايااام المطر...حتى مرة بالليل كاان الجو مطرررر...وتعبت وتأزمت..ووداني زوجي للمستشفى العسكري...الدكتورة قالت لزووجي

الليلة وصلنا اكثر من 75 حالة ربو... الجو فيه شي...

وهالشي من بعد التحرير...لا حول ولاقوة الا بالله

واذا سافرنا مافينا الا العااافيه...

حبيبتي...

بالنسبة لكلااام البنات..العنااب سمعت انه زين...واوراق الجوافه...والحلبه

لكن..فيه شغله..اكيد ما سمعتي عنهاااا

قبل فترة ام زوجي قالت لي عن شي..روووووعه

اهو ( صمغ العسل) اسمه جذيه... تحصلينه عند العويد ...على ما اعتقد

سعره 6 او 7 دنانير(زوجي هو اللي شاريه)...شكله مثل القطرة الصغيرة...قزاز لونها بني...والملصق اللي عليها لونه اصفر...اسئلي عنه..لزيادة التأكيد

تحطين 7 نقط...فقط...على كوب ماي...مرات احط معاه شوية ليمون...وعندي عسل اصلي...احط معاه قفشه..

والله اني اشربه بالليل..اناااااااااام مرتاااااحه

وصار مده..ما رحت للمستشفى...ولا اخذت كمامات...ولله الحمد

واي شكثر هذرت​

 

[rudy]

مرحبا بنات انا اعرف دكتور تخصصه انف واذن وحنجره ودايما يوصف لنا بخار البابونج
اتعرفين جهاز البخار ما الاطفار بدل ما تحطين فيه ماي خالي لا حطي بابونج مغلي وزيديه ماي وشغلي الجهاز بغرفتك وقت النوم باليل يقول هالدكتور ان اهو ابنفسه يحطه يم راسه على الكومادينه ويقعد الصبح اشزينه " سجع:eh_s(6): " لأن البابونج يوسع الشعب الهوائية​

 

[أميرة الورد]

الله يوسع عليكم دنيا وآخره صج أفدتونا ما قصرتووووا

بس انا أستخدم شراب pectoral- sikisan هذول وايد يريحون الصدر ويوسعون الشعب الهوائية ومالج حل لازم البخاخ يكون معاج على طول

 

[احلى عيون]

الله يعطيكم العافيه ما قصرتوا ان شاء الله بجرب على شغله شغله بشوف اللي عندي وبجربه واذا ما شفت اي نتيجه بشوف الحلول الثانيه اللي ذكرتوها الله بجزاكم خير و يشافي كل مريض ..آمين

صدقتي يام فيصل من بعد التحرير والناس اصدورها تعبانه خصوصا الجهال والكبار في السن..يكسرون الخاطر

رودي اي والله يمدحون البابونج .. بس حسافه ما عندي جهاز بخار ..
بسال عنه بالصيدليات ..

 

[ANGELICA]

الله يشفي الجميع