ابي رايكم وياليت الكل يشاركنا

[aseman]

السلام عليكم خواتي شلونكم و شخباركم

بما ان نعاني من ازمة خدم بالبلد واغلبنا موظفات حبيت اسوي استفتاء علشان كلنا نستفيد من راي وخبرات بعضنا بعض عن موضوع الخدامة الي بالساعة شرايكم بفكرتها هل من الممكن انها تسد مكان الخادمة الدائمة؟اذا ممكن انها تكون مفيدة ياريت تفيدونا بالمكاتب الي توفرها واذا ماكانت تسد برايكم شنو الحل ؟
انا عن نفسي اشوف انها تسد حق الاسر الصغيرة يعني اثنين توهم متزوجيين وعندهم بيبي واحد ومكانهم صغير ليش خادمة على طول ووين بنيمونها اذا مكانهم صغير
يا الله يا حلوات عطونا رايكم ​

 

[ام الدرر]

اذا من شركة او مكان مضمون
فكرة حلوة وتسد عالاقل لو حصل مشكلة بينج وبينها
او فقدتي شي او تسببت بشي
في احد ترجعين له
اما من الشارع وماتدرين عندها اقامة ولا منحاشة
فماوراهم الا البلاوي ​

 

[aseman]

صاجة ام الدرر اذا تبع جهة تعرفينها اامن بوايد
انا سمعت من المنتدى عن مكتب ينقال له ماستر سيرفس وراسلتهم بشوف شنو شروطهم وراح احط حق بنات المنتدى كل شي علشان تعم الفايدة

 

[الشامريه]

حطي لج غسالة اتوماتيك وغسالة مواعين والمخمه الاليه
ممكن تحل جزء من المشكله

 

[الباسمه]

أكييد تسد غالبيه الشغل
يعني اهي تشيل الكوي والمسح وغسيل الحمامات
وتلمع وتنظيف الأدراج والخم وجذيه
ويبقى عليج غسيل المواعين اليومي وغسيل الملابس بالفل اوتوماتيك
جيبيها كل 3 أيام 4 ساعات وحسب اذا تحتاجينها أكثر
ياريت تفيدونا بالمكاتب اللي توفرهم​

 

[رفيعة الشآآن]

انا توني متزوجة فمو حاسة ليلحين بشي لان بس انا وريلي بيت اهله ساكنين

بس بيت اهلي ماعندهم خدامة وامي يايبة موقتة تشتغل من 12 ظهر وتروح بعد غسيل مواعين الفطور

وشايلة من امي تنظيف مسح الصالات والحوش وطلعة عزكم الله الزبالة لي شارع

بس غسيل الهدوم والكوي لان نظامنها ما نحب خدم يمسكون اللبس

 

[aseman]

الشامرية صح كلامج بس احيانا تبين احد يحرك القنفات والاثاث حق التنظيف لو مرة بالاسبوع

 

[aseman]

الباسمة مشكورة على المرور الكريم انا الشركة الي راسلتهم ماردو الظاهر لازم اجرب ادق الصبح لاني جربت عقب الفطور ما يردون 

 

[aseman]

رفيعة الشان نورتي صفحتنا اهو اكيد لما تكونون اثنين ما تحسين بالموضوع بس لي الله كتب وحملتي وايد راح تحتاجين احد يعاونج بشغل البيت خصوصا لي بديتي تثقلين شوي واذا ما فيها ثقاله بس الخادمة الي تيي حق الوالده طلبتها من مكتب ؟*

 

[رفيعة الشآآن]

لا مو من مكتب

اهي فراشة بالمدرسة وامي خذت رقمها كانت اني بوقت المدارس مع اختي الصغيرة و تروح مغرب ومادري جم تاخذ وقتها

بس من بدت الاجازة قامت اتي وقت اطول وتاخذ ٢٠٠ لشهر ادري وايد بس شتسوي امي مالقت خدامة سنعة

 

[الغاليه نونو]

الخدم قناابل موقوته والله اا اكلمكم وعندي ثلاث بالبيت وحده مالت ولدي وثنتين عندي بس مطلعين عيني يامال عينهم البط
وحده بتخلص سنتن عقب العيد بتمشي والثانيه منفسسسه ماتبي تقعد تقول هذى تسافر لازم قبل ماتروح اتييبون ثانيه تساعدني واذا مايبتي ماقعد وماكو خدم بالمكااتب حسبي الله عليهم مادري اشصار فيهم فص ملح وذاب المسترجعات يخرعون والطلبات يتأخرون وماخفي اعظم
اذا لقيتوا اللي يشتغلون بالمدارس هذوله احسن شي وغيرهم لا اتييبون ببيوتكم والله احس انهم عصابات يدشون ويبوقون ويمشون من يدري عنهم عسا الله يفكنا من ازمتهم ويرخص اسعارهم ويسخرهم لنا يارب قولوا آمين

 

[aseman]

لا مو من مكتب

اهي فراشة بالمدرسة وامي خذت رقمها كانت اني بوقت المدارس مع اختي الصغيرة و تروح مغرب ومادري جم تاخذ وقتها

بس من بدت الاجازة قامت اتي وقت اطول وتاخذ ٢٠٠ لشهر ادري وايد بس شتسوي امي مالقت خدامة سنعة

مشكورة حبوبه عالرد والله يعينها الوالدة صج وايد بس على قولتهم الواحد يشتري راحته

 

[aseman]

الغالية نونو حياج ومشكورة عالرد بس ليش الخدم من يقعدون شوي يبون يمشون ويطنقرون مو مثل خدم اول الي يقعدون 13 سنه الي يظلون عمر ويانا نتعود عليهم ويتعودون علينا عموما الله يعينج على الي عندج

 

[PuPa^^SWeeT]

اذا تبع شركة زينة و بينج و بينهم عقد ساعات معينة ايام معينة تشتغل عندج هذا حلوو

 

[انوار87]

انا مادري ما احب صراحه اخاف تبوق مني شي وانا نوعي انثر اغراضي كل مكان
على الاقل خدامتي اقدر قبل لاتسافر اجيك جنطتها

 

[still there]

والله انا معاج و يا ليت فيه عاملات بالاجرة بالساعة او باليوم ,, و حتى بالنسبة للموظفات اللى عندهم اطفال يا ليت يصير عندنا مثل البيبى ستر بس شغلها مع الطفل و تكون مرخصة من الشؤون مثلا و حتى العربيات ممكن يدخلون هالشغلة ..

و المشكلة الخدم المؤقتين وضعهم يكون غير قانونى لكن لو نطالع مثلا للاسر الاوربية و الامريكية اللى عندهم خدم تلاحظون ان ما يبيتون عندهم , يخلصون شغلهم و يروحون بيوتهم لانهم اصلا ساكنين بنفس البلد مثل امريكا اكثر العاملات من المهاجرين المكسيك , وهذا الصح و ممكن نفذه بالكويت عن طريق شركة مساهمة عامة تجيب الخدم بكل تخصصاتهم تنظيف او اطفال او غيره و تكون على كفالة الشركة اللى توفر لها السكن بعد , و تختار الاسرة الخادمة عن طريق المقابلة و الاتفاق بين الطرفين على كل شى عدد ساعات العمل و كم يوم تشتغل و الاجرة تكون محددة مسبقا , و بنهاية الساعات المتفق عليها للعمل ترد لسكنها و ممكن حتى تبيت عندهم اذا احتاجوها بالاتفاق بين الطرفين ,, اتوقع لو تحقق هذا الحلم راح يقضى على مشاكل الخدم نهائيا و يرتاح الطرفين .
​

 

[aseman]

اذا تبع شركة زينة و بينج و بينهم عقد ساعات معينة ايام معينة تشتغل عندج هذا حلوو

حبوبه ما يسون عقود شهريه بس الي اعرفه ان تتفقين معاهم باليوم الي تطلبينها جم ساعه تبينها

 

[aseman]

انا مادري ما احب صراحه اخاف تبوق مني شي وانا نوعي انثر اغراضي كل مكان
على الاقل خدامتي اقدر قبل لاتسافر اجيك جنطتها

مشكووورة على المرور حبيبتي صج خدامتج غير بس ازمة ازمة ماكو خدم

 

[aseman]

والله انا معاج و يا ليت فيه عاملات بالاجرة بالساعة او باليوم ,, و حتى بالنسبة للموظفات اللى عندهم اطفال يا ليت يصير عندنا مثل البيبى ستر بس شغلها مع الطفل و تكون مرخصة من الشؤون مثلا و حتى العربيات ممكن يدخلون هالشغلة ..​

و المشكلة الخدم المؤقتين وضعهم يكون غير قانونى لكن لو نطالع مثلا للاسر الاوربية و الامريكية اللى عندهم خدم تلاحظون ان ما يبيتون عندهم , يخلصون شغلهم و يروحون بيوتهم لانهم اصلا ساكنين بنفس البلد مثل امريكا اكثر العاملات من المهاجرين المكسيك , وهذا الصح و ممكن نفذه بالكويت عن طريق شركة مساهمة عامة تجيب الخدم بكل تخصصاتهم تنظيف او اطفال او غيره و تكون على كفالة الشركة اللى توفر لها السكن بعد , و تختار الاسرة الخادمة عن طريق المقابلة و الاتفاق بين الطرفين على كل شى عدد ساعات العمل و كم يوم تشتغل و الاجرة تكون محددة مسبقا , و بنهاية الساعات المتفق عليها للعمل ترد لسكنها و ممكن حتى تبيت عندهم اذا احتاجوها بالاتفاق بين الطرفين ,, اتوقع لو تحقق هذا الحلم راح يقضى على مشاكل الخدم نهائيا و يرتاح الطرفين .​

[/QUOTE
حبيبتي مشكورة على المرور وترا في مكاتب تتعاملين معاها رسمي وبشكل قانوني

 

[aseman]

مكتب ماستر سيرفس 22274708
وهذا مكتب ثاني 66777905
والتعامل معاهم وايد حلو