ابى اسافر ما ادرى وين؟

[umhomood]

مرحبا بنات مثل ماقلت فى الاعلان ابى اسافر ضايق خلقى حدى بس ما اعرف وين؟ فكرت فى مصر اروح سينمات ومسرحيات وادش حق سمير غانم يضحكنى شوية وعادل امام مع انى ما ضحكت من قلبى على مسرحيته اللى صار لها دهر واروح حق الرقاصة مع انى ما عرف شىء فى الرقص بس اكيد اذا رحت هناك بشترى بنص الميزانية هدايا حق اللى اعرفهم هناك لاتقولون ليش لانى فى كل مرة اقول ماراح اجيب شىء القى نفسى اسوى العكس :eh_s(3): اوكى ا قلنا نستبعد مصر ابى اروح لبنان بس اخاف على حظى يصير شىء وما استفيد شىء وتضيع السفرة 0000 يالله فكروا اروح وين؟؟؟؟؟؟؟؟؟؟؟؟؟؟؟ اروح وين ؟ الامارات اوكى ممكن بس انا عندى 16 يوم اكيد ما فى داعى اقعد هالكثر 00000000000 انزين فكروا معاى اروح وين اروح وين ؟؟؟ ضايق خلقى وشكلى ماراح اروح اى مكان الا المباركية واى يحلو المباركية ابى اسافر المباركية واشترى سمبوسك بربع دينار واكل وانا امشى ما يهمنى احد واشترى صوغة حق اللى بمصر من ابو50 فلس و100 فلس خصوصا انهم منزلين اكسسوارات عجيبة اقط لى 10 دنا نير واترس جنطة بنات اللى تبى تسافر معاى المباركية وتا كل سمبوسك انا اوعدها بانها تستانس من قلبها على فكرة الناس يروحون فيلا مودا وانا والله للحين مارحت هناك المباركية اهى فيلا مودتى 00 اللى عجبتها الفكرة تقطع تذكرة معاى :eh_s(8):

 

[Featured Lady]

انا اول وحدة ابى اقطع تذكرة معاج
تدرين ليششششششششششششششش؟؟؟؟؟؟؟؟؟
عشان بنفسي اشوف سوق بو50 فلس اللى يسمونه الشايع
اسمع فيه بس ما ادله
ياليت توصفينه لى عشان اروحله بروحى اذا ماوديتينى معاج ؟؟؟؟؟؟؟؟

 

[mooomooo]

حبيبتي انتي والله

لا يضيق خلقج ولا شي

افا عليج بس

بدال لاتروحين القاهره تقدرين تروحين شرم الشيخ ... او تقدرين تروحين تايلند تقعدين في بوكيت .... والله كذا ديره في بس انتي قوليلي منو بروح معاج وانتي تبين راحه واستجمام

 

[umhomood]

حبيبتى والله يا فنن تذكرتك على حسابى افا عليك 000سوق بو 50 فلس وبو 100 فلس يهبل بس ابى اعرف معقولة للحين ما زرتى المباركية ؟ شوفى بو 50 فلس موجود فى المباركية يا بنت الحجية يم سوق السمك وسوق الخضرة واللحم انا متاكدة انك اذا رحتى راح تستانسين بس نصيحتى تروحين بعباة اوتنورة طويلة لانه السوق الوحيد اللى ما تحتاجين تلبسين له ماركات انتى روحى مرة وما راح تندمين اسالى اذا وصلتى والكل راح يدليك000

 

[umhomood]

مووموو يا ماما انا بروح مع اولادى واحد 7سنوات والثانى عشر سنين وزوجى ما راح يكون معانا عندى اصحاب كثير فى مصر اتصور شرم الشيخ او تايلند لازم يكون زوجى معاى وهذا اللى مو مخلينى استقر على مكان ومشكورة حبيبتى على المرور 00

 

[استغفرك يارب]

روحي باريس ومري يورو دزني على دربك واخذي القطار لا خلصتوا ومري لندن كم يوم

 

[مسك الخير]

السلام عليكم ورحمة الله وبركاته اذا ضايق خلقج وتبين الراحه النفسيه والطمانينه روحى لبيت الله مكه افضل مكان تحسين بالراحه فعلا مو فى المسارح اوالرقص هداج الله

 

[أم طه الحولة]

الله مكان الوناسة صج شرق اسيا .. بحر ووناسة وطبيعة وتسوق واكل وكل شي !! وشرم الشيخ بعد وناسة وحلاتها مع جمعة حلوة

 

[المعنقيّة]

هههههههههههههههههه

 

[ضحـاوي]

روحي بو خمسين اخذي الهدايا

وبعدين روحي حق ام الدنيا

والله مصر عجيبه الي يبي يستانس ويرفه عن نفسه يروح مصر وبس

 

[ظلال القرآن]

روحي مدينه رسول الله عليه افضل الصلاه والسلام ايام وصلي في الروضه الشريفه وهي روضه من رياض الجنه وستشعرين انك فعلا في الجنه
ثم احرمي وانطلقي الى احب بقعه لله سبحانه وتعالى مكه المكرمه واشبعي ناظريك برؤيه الكعبه المشرفه
الله ما اجملها من رحله

 

[نور مصر]

هو سوق بو خمسين وبو مية فلس ينفع هدايا ؟ عالعموم هو منتشر في مصر في كل المولات ومش لازم هدايا وتتعبي نفسك الحكايه ابسط من كده
انا رحت شرم الشيخ جميلة جدا وفيها فنادق كتير خمس نجوم وكمان الغردقه ودهب وطابا بس طابا ودهب اكترها اسرائيليين فبلاش دهب خليكي على شرم احسن وعندك الساخل الشمالي فيه المارينا تجنن