أقوى المادرس الامريكية فى الكويت؟؟؟

[أم ضارى]

بنات الكتاب باين من عنوانه ان شاء الله بنتى السنه اليايه اولى ابتدائى وولدى ثانيه روضه وابى ادخلهم مدرسه نظام امريكى

ابى تقولولى شنو اقوى المدارس الامريكيه بالكويت موووو مهم المصاريف اهم شى مستواهم

ويريت اذا فيه مدرسه البنات بصوب والاولاد بصوب يعنى مومختلطه

يريت تعطونى اسمهم بالضبط ومكانهم علشان ابى اروح اشوف المدرسه

وشاكرتلكم

 

[كشوخه]

شوفي حبيبتي انا مدخلة بنتي في المدرسة الأمريكية ثنائية اللغه ABS اللي في خيطان ، والحين بتروح KG2 والصراحه انا وايد مرتاحه من المدرسة ونظام التدريس يكون نص اليوم انجليزي والنص الثاني عربي وبنتي وايد مستفيده وتعلمت الحروف كلها كتابة وقراءه والأرقام بعد ، ويكون الروضه والإبتدائي مختلط بس من المتوسط البنات لهم مبنى منفصل عن الأولاد ، ومبنى الروضه منفصل عن باجي المباني لهم مدخل بروح وعندهم حمام سباحه خاص لمرحلة الروضه وصالة العاب وساحه خارجية كلها منفصلة ، وبالنسبة للبس ترا عادي تقدرين تشترين منهم او تلبسينهم لبس عادي بس يكون القميص ابيض والبنطلون او التنورة كحلي يعني اللبس مو الزامي ماعدا لبس ال pe او لبس الرياضه لازم تشترينه ، والإدارة ممتازه والصراحه انا مرتاحه منها وايد ... واتمنى اكون افدتج بالموضوع وانا حاضرة لأي سؤال ...

 

[حلم الطفولة]

الأبداع اتهبل وايد العيال مستانسين فيها ومستفيدين وقويه وايد.
والبنات مبناهم غير مبنى الأولاد . والمدرسين والمدرسات من أمريكا وكندا , والعربي عندهم وايد قوي ضايفين منهج غير منهج الحكومه حق صف رابع وغير أوراق تدريبات اتهبل لكل المراحل.

 

[اثمان]

التكامل وايد زينه

 

[أم ضارى]

بنات لاخلا ولا عدم ان شاء الله ماقصرتوا ياعمرى

بس المدارس اللى انتو حاطينها ثنائية اللغه انا مابى ثنائية اللغه انا ابى مدارس امريكيه

 

[DooNy]

الإبداع مو ثنائية اللغة
اسمها مدرسة الإبداع الأمريكية
وانا مع حلم الطفوله في كلامها المدرسه ممتازه

 

[ام حمود 81]

انتو تتكلمون عن الابداع الي بحولي ؟

 

[رفرف]

شلونج ام ضاري ؟ وشلون اليهال ؟

حتى التكامل أمريكية مو ثنائية

 

[سيدة الكويت]

حرام تخلون عيالكم ينسون اللغه العربيه احسن المدارس الثنائيه على شنو باجر اذا راح يخطب يحسبون امه مو كويتيه ما يعرف عربى

اشوف الناس سارت تتفاخر انا عيالهم يعرفون انجليزى حتى بالجمعيه تكلم ولدها انجليزى
انا عندى المدارس الثنائيه وايد احسن واللغه الأنجليزيه مو اهيه الى بتخليه يدرس بكليه الطب ولا الهندسه

 

[رفرف]

سيدة الكويت ..

منو قال ينسون اللغة العربية ؟
ندخلهم قاعدة حلبية ونأسسهم احسن من تأسيس الحكومة افا عليج ..
ومو سالفة تفاخر .. كلمن يبي الأحسن حق عياله واللي يقدر ليش لا

 

[سيدة الكويت]

رفرف اكيد كل من يبى الأحسن حق عياله ............ انا اقصد افضل المدارس ثنائيه اللغه احسن يعنى عربى وانجليزى احسن بس امريكيه ولا بريطانيا يسير تدريس اللغه العربيه شئ يسيط......

 

[sereen]

اقدم واعرق مدرسه امريكه بس اختلاط اللى بحولى اللى لونها ازرق كانت فى سلوى وراحت حولى اعتقد اسمها الامريكيه العالميه انا شفت منهاهجهم نفس اللى عيالى ياخذونه بامريكا ونفس النظام اقرب وحدة للنظام الامريكى اهى بالنسبه لتجربه ناس اعرفهم بعد توهم يايين من امريكا يقولون ان الابداع اللى فى حولى كلش مو عاجبتهم ومتحسفين ان العيال فيها صح منههاجهم اعتقد من ويست فرجينيا بس التطبيق مو نفس اللى المفروض يكون عليه وعيالهم نزل مستواهم ----- احتمال لانهم كانوا فى مدارس امريكيه فى امريكا بالتالى مافى مقارنه حتى لو كان النظام امريكى بس يظل فى قصور على العموم انتى الافضل انج تفترين وتشوفين بنفسج خاصه اذا بتكملين مع عيالج الى الثانوى والله يوفقج يارب

 

[أم ضارى]

بنات بالنسبه للتكامل والابداع وايد من رفيجاتى دخلوا عيالهم فيهم وطلعوهم قالولى مو ذاك القوه

وهالشغله مايحس فيها الا اللى كان يدرس فى امريكا فا يعرف الفرق بالتعليم

 

[أم ضارى]

شلونج ام ضاري ؟ وشلون اليهال ؟

حتى التكامل أمريكية مو ثنائية

هلا والله رفرف انا الحمدلله بخير عساج بخير .... واليهال ياحلوهم لويه عافسينى مانركد الا مع المدارس لى الظهر بالمدرسه وابالليل ينامون مبجر

ان شاء الله بنوتاتج بخير ؟؟

 

[أم ضارى]

حرام تخلون عيالكم ينسون اللغه العربيه احسن المدارس الثنائيه على شنو باجر اذا راح يخطب يحسبون امه مو كويتيه ما يعرف عربى

اشوف الناس سارت تتفاخر انا عيالهم يعرفون انجليزى حتى بالجمعيه تكلم ولدها انجليزى
انا عندى المدارس الثنائيه وايد احسن واللغه الأنجليزيه مو اهيه الى بتخليه يدرس بكليه الطب ولا الهندسه

حبيبتى انتى خيالج وايد واسع منو يقول ان الواحد لما يدخل عياله مدرسه امريكيه بينسون العربى وماراح يعرف يخطب!!

عيل هاللى يدرسون بجامعات امريكا مانعرف نتفاهم معام الحين

انتى اللى تتكلمين عنهم هذوله شواذ ... بالمدرسه انجليزى واهلهم حتى بالبيت مايكلمون كلمه عربى ومايهتمون ان يقوونهم بالدين والعربى... وهذوله ناس نادر وجودهم يعنى مايصير تعممين

مثل ما انتى قلتى انتى اتشوفين ان المدارس ثنائية اللغه احسن هذا رايج وتقدرين اطبقينه على عيالج وبالنسبه لنا ربى بيحاسبنا اذا احنا قصرنا بلغتنا وبدينا وماعلمنا عيالنا ...الحمدلله ان شاء الله محنا مقصرين

وعلى فكره انا عيالى الحين بمدرسة ثنائية اللغه ومن المساوئ اللى شفتها بالنظام بطلعهم

 

[أم ضارى]

اقدم واعرق مدرسه امريكه بس اختلاط اللى بحولى اللى لونها ازرق كانت فى سلوى وراحت حولى اعتقد اسمها الامريكيه العالميه انا شفت منهاهجهم نفس اللى عيالى ياخذونه بامريكا ونفس النظام اقرب وحدة للنظام الامريكى اهى بالنسبه لتجربه ناس اعرفهم بعد توهم يايين من امريكا يقولون ان الابداع اللى فى حولى كلش مو عاجبتهم ومتحسفين ان العيال فيها صح منههاجهم اعتقد من ويست فرجينيا بس التطبيق مو نفس اللى المفروض يكون عليه وعيالهم نزل مستواهم ----- احتمال لانهم كانوا فى مدارس امريكيه فى امريكا بالتالى مافى مقارنه حتى لو كان النظام امريكى بس يظل فى قصور على العموم انتى الافضل انج تفترين وتشوفين بنفسج خاصه اذا بتكملين مع عيالج الى الثانوى والله يوفقج يارب

مشكوره حبيبتى على ردج ... هاذى المشكله كل المدارس القويه مختلطه ... يبيلى فره عليهم خصوصا انى سمعت ان بعضهم مبجر يكتفون حتى قبل لايفتحون باب القبول لان الاولويه حق اخوان الموجدين وحق السلك الدبلوماسى

 

[سيدة الكويت]

ام ضارى خيالى مو واسع هذى السالفه سارت حق اثنين ااخوان يسيرون حق رفيجتى يوم يو يخطبون كلامهم مكسر حتى البنات قالو هذول من وين يايين؟؟ وبعدين وايد كان عندهم اختلاط لحد الثانوى عاداتهم مثل مدرسه اليونفرسال الأمريكيه والبريطانيه طبعا انتى حره لكن وجه نظر فى ناس كلشى عندهم عادى

 

[HERMITAGE]

الابداع لا يعلى عليها مستواهم قوي جداا تخيلي يوم ولدي كان بقريد 3 عمه كان راجع من امريكا شاف منهجه الساينز انصدم قال هذا ناخذه بالجامعه وهو ياخذه من اللحين غير العربي ودين قوي جداا ويهتمون حيل حتى سيرة الرسول صلى الله عليه وسلم يدرسونهم انصحج فيهم

 

[أم ضارى]

الابداع لا يعلى عليها مستواهم قوي جداا تخيلي يوم ولدي كان بقريد 3 عمه كان راجع من امريكا شاف منهجه الساينز انصدم قال هذا ناخذه بالجامعه وهو ياخذه من اللحين غير العربي ودين قوي جداا ويهتمون حيل حتى سيرة الرسول صلى الله عليه وسلم يدرسونهم انصحج فيهم

والله مادرى هالمدرسه ناس امدحوها وناس ذموها

انزين انا بسئلج اشلون الاكسنت مال ولدج وشلون طلاقته بالكلام بالانجليزى؟؟

اذا زين بروح امر اشوفها انا ماره ماره على المدارس ان شاء الله

 

[[--SuSHa--]]

مدرسة التكامل قويه .. اختي فيها و انا متخرجه منها .. و يايين بنات محولين من الابداع لي التكامل و يقولون ان التكامل اقوى و احسن من الابداع .. اقوى من ناحية الدراسه و اونس لأن وايد فيها activities و اشياء اونس للطالب.. و من grade 6 يفصلون البنات عن الشباب .. الشباب بدور و البنات بدور .. و اذا عن الدين و هالسوالف فالتكامل ملتزمه بسالفه الدين .. يعني اليونيفورم للبنات مايسير يكون ضيج ولا قصير .. و مهتمين بفتره الصلاه الكل لازم يصلي .. و بين فتره و فتره ايينا الشيخ طلال العامر ( رئيس قسم التربيه الإسلاميه ) و يعطي محاضره صغيره قبل الصلاه ..
والله على ايامي كانت المدرسه زينه و قويه .. و الحين اختي الصغيره فيها اهيا اب grade 10 .. بس هالسنه غيروا النظام كااااااامل و عاد مادري شلون ماقدر افيدج لأني ماعرف شلون =) .. هذا عن ال high school ..
اما عن المدل سكوول و الإليمنتري فهم عندهم فتره للصلاة =) .. ولد خالتي بgrade 2 جنه اهوه الحين اهناك .. اسأل خالتي انشاءالله شلون شايفه المدرسه قويه ولا لأ و شنو سلبياتها و ايجابياتها و اردلج خبر انشاءالله =)

و عندج مدرسه BBS هاذي ثنائيه اللغه بس وايد زينه .. بس مختلطه =)


و الامريكيه العالميه قويه بس وايد مسخره تره :$ !! يعني فيها وايد بلاوي ليش انها مختلطه .. طبعا ادري بتقولون كل المدارس لازم فيها خرابيط .. بس هاذي كلمن قال عنها =S .. بس هم ما ننكر ان الكل يقول انها قويه =)