أعاني من هالأعراض ...... طمنوني حدي خايفة واوسوس !

[محتارة]

السلام عليكم ....

بنات من بعد الولادة بشهر تقريبا بديت احس بهالاعراض ... اول شي سخنت ماعرفو السبب وعطوني مخفض حراره وراحت عني ولا ردت الحمدالله بعدين ريولي قامت تعورني والعوار صعد لي الجلوة رحت الطبيب قالو مانعرف ليش بعدين راح وبعدها بديت احس قلبي يعورني وماقدر اتنسم ... واحس اني مقموتة جنه احد يضغط على صدري ولما اتنفس احس انه نص الرئة تمتلي وابذل مجهود وانا اتنفس واتعب من اقل شي واحس برقعه .. ومرات احس بصوت زنين بالرئة وبلاعيمي احس جنه في كره او احد زانطني ومرات احس بطعم دم واقعد اكح واتفل تكرمون بس ماشوف لون دم ... بس احس بطعمه !!!.. قمت اوسوس واحاتي وهالحالة فيني من 5 شهور ... ولا قاعدة اتحسن واحاول انسى واشغل نفسي واضحك بس من داخلي بجي ودموع .... شاكه بوايد اشيا واوسوس

رحت ولا مليون طبيب مايفحصوني عدل .... ومرات مايفحصوني خير شر ويقولولي انتي صغيره مافيج شي روحي روحي واخر واحد رحتله عطاني رقمه وقالي روحي لاتيين بس دقي طمنيني عنج ..!!!!!! وبعدين بطلت اطباء زهقت منهم ...

 

[مُناي]

ياحياتي

أول شي شيلي الوساوس ... لأن الوسواس اييب لج المرض
داومي على قراءة القرآن والأذكار
لأن بعض الحريم يقولون إن فترة الأربعين تكون المرأه أكثر عرضه
للجن والمشاكل النفسيه لأنها تكون غير طاهره
اذكر أول كانوا يقولون لنا ... داوموا على الذكر
وخلي احد ينام معاج ... ماتظلين بروحج

عالعموم هذا كلام مايندرى صح والا لا
بس كنا نسمعه ...

اعتبري اعراضج نفسيه
وداومي على القرآن والأذكار

وإذا ماحسيتي بتحسن

روحي حق وحده من اللي يعالجون ... وحده ثقه مو أي كلام

لأن فيه وايد امراض مايعرفونها الأطباء

مثل الفريه اللي تصير بروس العيايز الطب عجز عنها
والحريم عالجوها باللبخه
والشمم وقف قدامه حاير الطب
والحريم عرفوا له



اتمنى لج الصحه والعافيه

وماتشوفين شر

يمكن يكون جوابي مو شافي

بس حبيت اسجل رد

لأني ادري انج محتاجه اي رد





ولكي حبي

منوووووي

 

[محتارة]

مشكووورة على ردج .... تبين الصراحة خوفتيني لما قلتي بالنفاس المره معرضة للجن والمشاكل النفسية @@

 

[فروتى]

يا حبيبتى ماكو فيج الا العافيه ان شاء الله استعيذى بالله من الشيطان وشيلى الوهم والوسواس من بالج اشغلى نفسج وةلا تفكرين بهالموضوع الا اذا اشتكيتى من اى الم بعد الشر عنج يا قلبى

 

[شهدQ]

مافيك الا العافيه ان شاء الله بس اخذي تحليل بوول يمكن صار معاك التهاب بالبول بعد الولاده من ادواتهم

 

[عديلة روح]

ما تشوفين شر ان شاء الله .انا عندي سؤال انت تشمين ريحت الدم والا تستطعمينه؟؟
انا لما كنت انفاس كنت اشم ريحت الدم وعقب عورني ظهري وانشليت من كثر الالم . القصه طويله بس اللي صارلي خلاني اخاف واوسوس من كل شي. انا طلع فيني سحر من خدامتي الندونيسيه حطتلي دم بالاكل وانا انفاس
مابي اخرعج بس شوفي لج شيخ واقري سورة البقره..
الله يشفيج ويطمنج