أتمنى ألقى الحل تعبت والكل قاهرني ((قطعت شعري البارحة من الضيج))

[اشتياق]

ماقول الاالله يشرح صدرج وييسر امرج يارب ..

 

[غــ q6r ـلا]

الله يفرج عليج

 

[جيتارا]

رد : رد: أتمنى ألقى الحل تعبت والكل قاهرني ((قطعت شعري البارحة من الضيج))

أول شي سامحوني لأني ما دشيت موديم النت عندي خربان

وادش من دوامي,,


أليكم اللي صار خلال ثلات أيام للبارحه بالليل,,


الخميس قالي بيي الجمعه بيتكم ,,قلت له أوك,, وتم يسولف وياي شرات كل مرة اقل من خمس دقايق ويبند ع قولته مشغول وهو تمشي ويا ربعه ويا أهله قلت ما يخالف ,,

الجمعه قالي انا ما بيي البيت عندج ولا راح أيي عندج ,, قلت لها أوك قالي لي بييب لج فلوس عسب العيد ,, أجعز نفسي,, لأغراض العيد,,انا طلبت من 2000 درهم عسب اكمل اغراضي((156 دينار كويتي))

قالي ما بدش بروح مب مشغول قلت له ,,اوك اتصل فيني مرتين ما رديت كنت أتسبح,, ورديت أدق له,, قالي انا عند الباب وطرشت له الخدامه((دزيت له)) ويابت من عنده البيزات وكان المبلغ
500 درهم ((39 دينار كويتي))انصدمت واضاربت وياه قالي انا وايد عندي ألتزامات ودفعت المخالفات اللي عندي على السيارة ,,

قالي ترا عندج راتب قلت له انا طلبت منك,,وما شي قلت له تعال وخذهم ,,انقهرت وايد ,,,ما شي أكلمه اعفس البيزات أستغفغر الله ,,

ماشي تمييت أصيح وانقهرت وهو يضحك علي,, ماشي وكله مب حافظ لي غير جملة وحدة والله أني عندج راتب,, وراتبج 8000 (623 دينار كويتي)) قلت له هذه فلوسي ومحد منكم له حق فيهن,, وماشي تمييت أتصل به ومطنش ومرة يرد ومرة يرد يضاربني ويبند الخط على ويهي ,,

وحلف أنه يطلقني,,وقالي ألف من تتمناني,,وابوي ما راح يجبرني تمييت ساكته,, عنه ,,وخبرت أهلي,, واهلي تتوقعون شو سووو


قالو والله أنه مسكين متوهق ويا وحدة شراتج والله انج ظالمتنه كل خواتي وأمي واهلي ,, واقفين ويا,,


واتصلت به البارحه الظهر,, وتمييت أتكلم ويا وايد في شغلات وايد وقالي انا بفكر في مووضوع الزواج ,, قالت لي انا غلطت قلت له تظن الزواج لعبه تعرف أنه عرش الله سبحانه وتعالى يهتز يوم الوحدة تتطلق,,قالي انا بتكون عندي أسبابي قلت له ليش شفتني انا اخونك دايسه على عرضك وين اسبابك وتم يقول اسباب كلها مجرد اسباب تافهه اونه انتي ما تفهمينوانتي ما تقدرين ,,وما شي على العصر اتصل فيني من رقم أبوه اللي استغربت منه يقولي ما تبين شي ما تامرين بشي ,, انا مستغربه منه ,, قالي اروح دوامي وانا مطمن قلت له اتوكل على الله قالي بيي بفطر عندكم ((قلت يالمنافق هذا الكلام بس جدام أبوه)قلت له انا قلت لك ما بتيي عندي البيت قلت له لأ ما تبي تييي عندي البيت ,,قالي بروح بيت اختج وبفطر وياكم قلت له كيف أسمح لك تدخل بيت ريال والريال مب راضي لأنه ما خبرته ((لأنه كنا بنفطر بيت أختي))

وفطرت هناك والله ما كان لي نفس على شي,, واتصل فيني قالي أنتي خبرتي أمج عن شي,, قلت له هيه,,كنت مضايجه وخبرتها قالي ما برد عليج لأني قلت له انا ف بيت أختي الحين ,,,

والكل قم يحط علي وانتي وانتي ظالمتنه ,, وهو مسكين (( وأختي اللي قالت لي انتي خذتي فضالتي,))وقفت ويا وانا الدموع في عيوني اقول ف خاطري ليش محد مصدقني,, قالوا لي هو طيب وايد وانتي ما تحسين فيه هو يتيم فاقد امه من فترة ,, وانا اسمع ودخل ريل أختي وهو راد من صلاة التراويح,,



رحنا البيت وانا ما اتصلت به وهو ما اتصل فيني


لين ما يت الساعه تقريبا 12 اتصلت فيني أخته العوده ,, وتمت تسولف وتكلمت وياي بموضوع أخوها,,

وتكلمت وياها وحكت لي ,,

اللي صدمني,, أخوها أعترف بكل حركاته وياي واللي قهرني اكثر ,, انه قالهم من تتصل فيني أارد وابند الخط على ويهها وترد تتصل فيني قلت لها انا مب تامه وياه عشان خاطر عيونه عشان خاطر عمج الشيبه,,اللي اتحمل كلام ابوي ووعشان امج المرحومه واعشانج انتي ولا انا كارهتنه ,,طايح فيهم انا اخق عليه ((يعني اشوف نفسي عليه))قالت له لو تشوف جيتارا نفسها كنت ودرتها من زمان لو أني اشوفها وحدة مب زينه كنت قلت لك طلقها,,

قالت له الإختبار اللي حطيناك فيه رسبت فيه عاملتها زين عسب الموبايل ويوم رفضت تعطيك رديت تعاملها ألعب عن قبل قالت له انته واحد مب مال زواج ,,طلقها احسن قال اذا هيه طلبت الطلاق,,هيه اللي بتدفع قالت له لأ وعن الظرر النفسي اللي سببته لها انا بشهد وياها ف المحكمه

قلت لأخته انا ما راح اكلمه كله يقول عني اني ما عندي اسلوب وااحرجه اوك يبا يرمسني,,ايي بيت أهلي ويتكلم وياي لين ما يشبع,,ولكن لا يحلم أكلمه ,, واللي زاد الطين بله,,


خواته الحين صرت ف نظرهم وحدة مب زينه ووشايه ,, لأني خبرت أخوهم علي وحدة منهم أبي اعرف قصدها,, غنت لي اغنية راشد الماجد خلهم ينفعونك,,دامهم يعجبونك,,قلت لها شو قصدج قالت لي ما شي قلت له شو شايفتني أرمس ريال عسب تقولين لي وماشي اضاربت ويا وبالباجر خبرت أخوهم ورد يضارب وياي
و

واخته ردتها علي وطلعونيانا المب زين رغم أني سترت عليهم في شغلات واييييييد والله


والله اكتب لكم وانا ف الدوام,,ومرة أشتغل ومرة أكتب والهندي شوي وبيجتلني,,

تقبلو تحياتي,,

 

[هونـــه]

رد : رد: أتمنى ألقى الحل تعبت والكل قاهرني ((قطعت شعري البارحة من الضيج))

الله يعينك حبيبتي و يفرج همك
شوفي يا قلبي لو تنازلتي لزوجك من البدايه اعرفي ان كل حياتك بتكون نكد بنكد
لا تجاملين احد على حساب نفسك
و اهلك الله يعينك عليهم بس برضو احسن من انك تبتلشين بزوج استغلالي
و ادعي ليل نهار ان الله يصلح حالك مع اهلك و يرزقك بالزوج الي يستاهلك لان هذا حرام تكملين معاه

 

[شقرديـه عالطل]

اصبري على اهلج والله يصبرج
بس سالفت الخطبه استخيري فيها لان باين على طمع
والله يبرزق احسن منه
بس ادعي ربج دايمن

 

[شقرديـه عالطل]

شنو يعني شراتج لان اكثر من مره قلتيها ومافهمتها:lkmnkl:

 

[حكستار]

يبه مو عشان تفتكين من اهلج تتوهقين مع واحد الله اعلم شنو وراه

استخيري واذا حسيتي انه داخل بس على طمع عشان معاشج اتركيه
لين الله يرزقج الزوج الصالح واذا على اهلج تحملي لين تفرج وتتركينهم

معاها بكل كلمه

 

[تحلا~بعيني]

رد : رد: أتمنى ألقى الحل تعبت والكل قاهرني ((قطعت شعري البارحة من الضيج))

الله يعينج حبوبه

ماعليه ربج اذا حب عبده ابتلاه عشان يشووف قوة تحمله للبلاء

وهونيها وتهون وادعي ربج واستغفري واايد ماعليه حبوبه

ترا في اهل العن من اللي عندج اهم يمكن يعاملونج جذي

عشان دروا انه لج علاقه وياا زميل بالجامعه فمن عقبها طحتي من عينهم

وقاموا يعاملونج غير استهدي بالله محد بيفرج عليج هالهم والحيره اللي

انتي فيها غير ربج وريلج هذا قبل لاتعرسين عليه استخيري ربج

واذا انتي شايفه انه العيشه وياا هلج لاتطااق وبتستمرين وياا ريلج الله

كريم يمكن مه الايام يتعدل عالاقل اتحملين مغثة ريلج ولا اتحملين مغثه عاايله بكبرها

والله يسخر لج ريلج واهلج ياارب ويحببهم فيج ياااارب

 

[DooLy88]

الله يعينج

 

[تحلا~بعيني]

رد : رد: أتمنى ألقى الحل تعبت والكل قاهرني ((قطعت شعري البارحة من الضيج))

شنو يعني شراتج لان اكثر من مره قلتيها ومافهمتها:lkmnkl:

يعني نفسك بالكويتي:dddds: