آه واويلاه من عمٍ ظلوم..

[ضوى العيون]

سهيل:السلام عليكم
العم راشد:وعليكم السلام...
سهيل:اشحالك ياعمي راشد..
العم راشد مستغرب:......بخير يا ولدي..من انته..
سهيل:أنا سهيل..
العم راشد مستغرب ويطالع لحيت سهيل:سهيل ولد منو..
سهيل:أنا سهيل بن حمد ولد أخوك يا عمي...
العم راشد منزل راسه:سهيل ولد أخوي...اشحالك يا سهيل...
سهيل:بخير يا عمي..اشحالك أنت عساك بخير..
العم راشد:والله يا ولد أنا تعبان وخايف ومتلعوز..
سهيل:قول الحمد لله على كل شي..يا عمي..
العم راشد:الحمد لله..واسمحلي يا سهيل ع اللي سويته فيكم...
ترى اللي سويته مهب شويه..
سهيل:مسامحينك يا عمي وعمر الظفر ما يطلع من اللحم..ومهما كان
أنت عمنا من لحمنا ودمنا..
العم راشد والدموع تارسه عينه:والله فيك الخير يا سهيل وأنا ما عرف وين
اودي ويهي منكم انا غلطت في حقكم وما اهتميت فيكم..وعذبتكم..
سهيل:افا عليك يا عمي..اللي فات مات..
العم راشد:وكيف عرفت اني فالمستشفى..
سهيل:سرت بيتكم وحصلت عمتي وخبرتني بالموضوع..
العم راشد:وشو حالتها عمتك تعبانه ولا شو.
سهيل:بخير والبشكارع عندها..
العم راشد:سهيل اباك تساعدني ماعندي غيرك ياسهيل..
سهيل:أنت تامر أمر يا عمي...
العم راشد:ما وصيك على عمتك اسكن عندها فالبيت وساعدها الين الله
يفرجها علينا..
سهيل:ماعليك ياعمي...أنا عندي بيت وقريب من بيتك وبمر عليها
كل يوم الصبح ...والظهر...بمر عليها دوم...
العم راشد:ماتقصر يا سهيل الله يخليك...وشو هالتغيرات ياسهيل..
ماشاءالله اطوعت..

وخبره سهيل بكل شي من يوم انطرد من البيت ودخوله السجن وكيف
ضاع وادمن المخدرات ويوم حصل حسن وكيف التزم ...

العم راشد والدموع في عينه:أنا السبب يا سهيل انا اللي دخلتك السجن
وأنا اللي عذبتك..سامحني يا ولدي..
سهيل:كل شي مكتوب يا عمي والحمد لله انا اهتديت والتزمت..ويمكن
لولاك ما كان اهتديت والتزمت يمكن انته سبب هدايتي...
العم راشد:الله يوفقك يا سهيل..
سهيل:الجميع..واسمع يا عمي شو ناقصنك الحين أنا بسير المسجد..
وبرد بعد الصلاه شو اييبلك وياي..
العم راشد..سلامتك يا سهيل...


وفي مركز الشرطه
طلعوا البصمات وكانت المفاجئه..حصلوا بصمات اليازيه على الخزنه...
ووياها بصمات سلطان...

المحقق:اليازيه اعترفي ويمكن نخفف الحكم او طلعي الاوراق والفلوس
ويمكن يسامحج زوجج.
اليازيه:والله أني مظلومه والله اني ماسرقت..
المحقق:وشو اللي ياب البصمات فالخزنه..
اليازيه:زوجي عطاني الاوراق والفلوس وقال حطيها فالخرنه..
المحقق:يعني ما بتعترفين.
اليازيه:اعترف على شي ما سويته..
المحقق:خلاص بنحولج المحكمه وهي اللي بتتصرف وياج..
اليازيه وهي تصيح:لا حول متى بفتك من هذي المصايب من مصيبه
لمصيبه لا حول متى الله بيفرجها على..

وتحولت اليازيه المحكمه وحكموا عليها بالسجن اربع سبع سنوات
وانسجنت وعاش سلطان فرحان ومستانس لانه هو اللي دبر هالشي..
وبعده ما طلقها بعده ناوي يعذبها إذا طلعت من السجن...






في بيت أحمد...
بعد مرور اربع سنوات..


فاطمه تخرجت من كليه الطب..وتوظفت في مستشفى توام بالعين..وكانت تدرس تخصص بعدها...وندى تخرجت من كليه الهندسه
والين الحين تدور على وضيفه...ومحمد باقي له يوم على التخريج
ويستوي ضابظ...وأحمد ونوره تقدم بهم السن كانت أعمارهم عند وقوع
الحادث قرب 38 والحين 57 وتدبل الحال في بيت أحمد ونوره...
ندى وفاطمه اللي يهتمون فيهم يردون الجميل...

ندى:خالتي نوره شو تبون عالغدا اليوم شو اللي فخاطركم...
نوره:البشكاره بتسوي الغدا...
ندى:لا انا بسوي الغدا وأحكموا على طباختي..
نوره:اللي يريحج ...
ندى:خلاص بسويلكم مفاجأه...
أحمد:أهم شي يا ندى ما نسير المستشفى من الغدا..
ندى:ههههههههههه...لا معليك فاطمه بتعالجكم فالبيت..
أحمد:ههههههه..واثقه بعد..
فاطمه توها داخله البيت:شو عندكم شو ضحكونا وياكم...
أحمد:ييتي في وقتج عندنا حاله طوارئ بعد الغدا...
فاطمه:ليش!!!
أحمد:ندى ناويه تسوي الغدا...
فاطمه:هههههههههه...تراها تعرف تطبخ آآآخ يوعتوني...
ندى:منو بيسير باجر لتخريج محمد..
أحمد:أنا بسير وبييبه..
ندى:بسير وياك..
أحمد:ما يحتاي يلسي فالبيت مب زين زحمه هناك ورييايل..
ندى:والله خاطري اسير بس لا حول ولا قوه..بترياكم فالبيت

وتخرج محمد من الكليه وفرحوبه أخوانه واحمد ونوره..وأحمد مستانس
مب مصدق..ويقول لو كانوا عند عمهم كان ضاعوا..
أحمد:محمد مبروك التخريج والله يوفقك ان شاء الله.
محمد:الله يبارك فيك وكل بفضلك لولاك ماكان درست وتفوقت.
نوره:مبروك يا ضابطنا...
محمد:الله يبارك فيج يا خالتي..
...

 

[ضوى العيون]

وفي مستشفى توام...
فاطمه خلصت التخصص وكان تخصصها أمراض سرطان...واشتغلت
فالقسم...وكانوا كل المرضى يحبونها معاملتها كانت طيبه..وكانت تشجع
المرضى وتييب لهم هدايا...وكانوا المرضى نصهم على الدكتوره فاطمه
والنص الثاني على الدكتور خالد...

في غرفه العم راشد...
سهيل:اشحالك يا عمي شو صحتك اليوم..
العم راشد:الحمد لله بخير يا سهيل اشحالك انت..
سهيل:بخير يا عمي...
سهيل:تراني سرت الديوان وقدمت اوراقك واورق عمتي عشان نسير
الخارج يمكن شي علاج هناك..
العم راشد:ماتقصر يا سهيل الله يخيلك...


وفي يوم من الايام كان الدكتور خالد في إجازه وأستلمت الدكتوره فاطمه
المرضى اللي فالقسم...ودخلت على عمها راشد وسهيل بس ماعرفتهم.

الدكتوره فاطمه:هااااه يالوالد اشحالك اليوم...
العم راشد:بخير الحمد لله...
الدكتوره فاطمه:هذا دواك اليوم يالوالد
العم راشد:مشكوره يا دكتوره..


وكان سهيل موجود عند عمه وما عرف اخته...15 سنه وهم متفارقين...
من كان عمره 18 وهو فالسجن...وكان عمر فاطمه 14 سنه وسارت عند
احمد ونوره ودرست اربع سنين وخلصت الثانويه وسبع سنين فالطب
واربع سنين فالتخصص...وهي بعد ماعرفته...بس سهيل كان يحس باحساس غريب تجاه الدكتوره فاطمه...بس كان مستغرب...شو اللي
يجذبه للدكتوره...وبعد ما طلعت الدكتوره فاطمه من عند أخوها
وعمها......شافت اسم عمها راشد ع الكشف..وانصدمت...
ويلست تفكر وتقول هيه والله انه عمي كيف ماعرفته...
مسكين ومن اربع سنين مترقد فالمستشفى..لا حول ولا قوه الا بالله..

واتصلت فاطمه على محمد..

فاطمه:محمد اشحالك...
محمد:بخير يا دكتورتنا...
فاطمه:محمد شفت شي ما بتتوقعه وما عرف شو اسوي الحين..
محمد:خير شو فيج..
فاطمه:عمي راشد يا محمد.
محمد:شو فيه..
فاطمه:عمي راشد فيه السرطان ومن اربع سنين وهو فالمستشفى..
ماعرف اسير عنده واساعده واقوله انا بنت أخوك ولا شو والله اني متردده
محمد:والله ما عرف شو اقولج...صح انه لعوزنا وعذبنا بس بعده عمنا..
وانا ما عرف شو اقولج..
فاطمه:محمد شوف لازم نوقف ويا عمنا ونساعده وننسى الماضي وكل
اللي سواه..
محمد:اللي تشوفينه..
فاطمه:خلاص تعال العين انت وندى الحين...
محمد:خلاص مسافه الطريق ونحن عندج.
فاطمه:اوكيه اترياكم...
....
وصل محمد وندى المستشفى وقرروا انهم يدخلون عند عمهم راشد..
ويسلمون عليه....


في غرفه العم راشد...
دخلوا على عمهم راشد وسلموا عليه...بس عمهم راشد ماعرفهم.

محمد:اشحالك يا عمي راشد عساك بخير..
العم راشد:بخير وسهاله...
فاطمه:اشحالك يا عمي راشد..
العم راشد:بخير يا دكتوره..
ندى:اشحالك يا عمي..
العم راشد:بخير وسهاله..
العم راشد:خير يا دكتوره فيه شي...
فاطمه:لا مافيه شي....وفاطمه تغمز لاخوها محمد عشان يتكلم..
محمد:فيها شي إذا زرناك يا عمي
العم راشدمستغرب:لا مافيها شي يا ولدي...بس منو انته..
محمد:أنا محمد بن حمد ولد أخوك وهذي اختي فاطمه وهذي اختي ندى
العم راشد مستغرب ومب مصدق اللي يسمعه:شو تقول...
محمد:اقول نحن عيال اخوك..ويايين نسلم عليك..
العم راشد بعده مب مستوعب الموقف ومستغرب:الله يسلمكم من الشر...والدكتوره فاطمه اختك..
محمد:نعم اختي..
العم راشد وهو يصيح ويحضن محمد:سامحوني يا عيالي سامحوني
محمد:مسامحينك يا عمي لا تصيح ارتاح يا عمي لو بعدنا زعلانين عليك
مازرناك...
العم راشد:خلاص انا ماابغي شي من الدنيا غير انكم تسامحوني...
فاطمه:مسامحينك ياعمي...

الحلقه التاسعه والاخيره...
وبعد ما جلسوا عند عمهم وسامحوه يلسو يسولفون وياه....وسهيل كان مب موجود وعمهم بعده ماخبرهم
عن سهيل...وفجأه إذ بالاجهزه تصيح...توقف نبض عمهم راشد...وسارت فاطمه تخبر الاطباء عشان
يساعدونها....وحالوا لكن هذا القدر...توفى العم راشد...والكل متأثر من وفاته وفاطمه تقول لو كنت أعرف أنه من زمان طايح فالمستشفى كان يلست عنده وساعدته......ويلست غي زاويه من زوايا الغرفه تصيح وتذرف الدموع
على عمها...عمها اللي ظلمهم في يوم من الايام...وسامحوه على كل اللي سواه...الكل كان يصيح سبحان الله..
نفس اليوم اللي سامحناه يموت,.,

محمد:فاطمه خلاص انتو سيروا بيت عمي راشد...وأنا بخلص الاوراق وبلحقكم...
فاطمه وهي تصيح والدموع في عينها:أن شاء الله..الحين بنسير...

وسار محمد يخلص اوراق الوفاه لأن اكرام الميت دفنه...وسهيل كان في بيت العم راشد كان يالس عند زوجه
عمه...وطلع من البيت وسار المستشفى...وفاطمه وندى طلعوا من المستشفى وساروا بيت عمهم وأختلفوا فالطريق.
وسهيل وصل الغرفه وشافها فاضيه وسار عند الدكتور...

 

[الطموحه]

اختي ضوى العيون تسلمين ومشكورة على مجهودج الرائع:eh_s(15):
بس لو تتكرمين وتكملينا القصة وااااااايد احسن
علشان الدموع تنهمر مرة وحدة مو متقطعه:eh_s(6):
لالالالا تتاخرين علينا
نحن بانتظارج :eh_s(17):

 

[ضوى العيون]

ان شاء الله يااختي ولا يهمج بس اليوم شبه انشغلت هذا السبب لا اكثر ولا اقل

 

[ضوى العيون]

سهيل:السلام عليكم يا دكتور...
الدكتور:وعليكم السلام....هلا..
سهيل:لو سمحت يا دكتور وين المريض راشد اللي في غرفه رقم عشره..
الدكتور:المريض...الله يرحمه مات قبل نص ساعه...
سهيل منصدم ومتأثر من الخبر اللي نزل عليه مثل الصاعقه:مات عمي راشد...
الدكتور:الله يرحمه....وشد حيلك...
سهيل:الله يرحمه...بس وين الاوراق يا دكتور بسير أخلص معامله الوفاه...
الدكتور:الاوراق فيه شاب كان عند المتوفي أخذ الاوراق عشان يخلص الاجراءات..
سهيل:منو هذا الشاب...
الدكتور:والله ما أعرف بس أعتقد أنه من أهل المتوفي...
سهيل:وين يمكن احصله..
الدكتور:يمكن فالاداره...
سهيل مشكووور يا دكتور...وسار سهيل صوب الاداره وما حصل حد...وسار صوب ثلاجه الموتى..
ينتظر هذا اللي اخذ الاوراق...



وفي نفس اليوم في السجن المركزي..
اليازيه كانت يالسه الصبح وتفكر أربع سنين مرت وهي مسجونه ومصيرها بعده مجهول....وفجأه وصلت الشرطيه...وخبرت اليازيه تجهز عمرها للأفراج لانقضاء أكثر من نصف المده ولحسن سيرتها وسلوكها
فالسجن...وجهزت عمرها اليازيه...للرحيل من هذا المكان الكئيب..وفي نفس اليوم سلطان مات متأثر بمرض القلب
بس محد كان يعرف

الشرطيه:اليازيه مبروك الافراج...والله الله بعمرج...وانسي اللي فات وحاولي تبدين من جديد...لا يأثر فيج السجن
اليازيه:أن شاء الله...وهي دارت الافكار في راسها...وين تسير؟؟؟بيت سلطان ولا بيت نوره؟؟؟ولا بيت عمها؟؟
ولا بيتهم القديم...؟؟؟وقررت أنها تسير دبي عند نوره وتتلاقى ويا اخوانها...وسارت ووصلت دبي...واتصلت على نوره ودلتها على البيت...

وفي بيت أحمد...
اليازيه:السلااااااام عليكم...
نوره:هلا اليازيه اشحالج....عساج بخير....والله ولهنا عليج...واسمحيلنا ع التقصير...
اليازيه:بخير وسهاله والله يسمح ذنوبج...اشحالج انتي واشحال اخواني..
نوره:كلهم بخير الحمد لله...
اليازيه:بس وينهم ما اشوفهم,,
نوره متردده تخبرها بوفاه عمها ولا تسكت:موجودين بس طلعوا قبل شوي وبيردون...تعالي الحين خبريني
شو سويتي وكيف طلعتي من البيت...

وخبرتها اليازيه بكل شي وأنها طلعت من السجن....وش سوا سلطان فيها....

نوره:الله يعينج يا اليازيه ولازم تسيرين وتشتكين عليه...
اليازيه:ما بشتكي....لو أشتكيت بيرجعني للبيت...وأنا ما برجع عنده يكفي اللي استوالي منه...
نوره:والله ما تستاهلين.....تعالي أكيد انتي تعبانه...وهذي الغرفه ارتاحي فيها وأنا بطرش البشكاره والدريول
السوق اييبون لج ملابس....
اليازيه:مشكوووره يا خالتي.....



وفي مستشفى توام....
سهيل بعده عند الثلاجه...ويفكر منو هذا اللي أخذ الاوراق وينه ما شفته...ووصل محمد مستشفى توام بعد ما
خلص الاجراءات في الطب الوقائي....وسار صوب ثلاجه الموتى...لاستلام الجثه لدفنها...أكرام الميت دفنه..


محمد للموظف:السلام عليكم..
الموظف:وعليكم السلام...
محمد:لو سمحت هذي الاوراق وانا ياي استلم الجثه راشد بن.....
الموظف:دقايق وبحط الجثه في سياره الاسعاف....
محمد:مشكووور..

كل هذا وسهيل يالس يسمع ويقول هذا اللي انا اترياه لكن منو هذا...وسار سهيل صوب محمد..

سهيل:السلااام عليكم يالطيب...
محمد:وعليكم السلاااام...
سهيل:لو سمحت يالطيب انت ياي تستلم جثه راشد...
محمد:نعم...بس ليش السؤال...
سهيل:ماشي بس شو يقربلك المرحوم...
محمد:عمي....
سهيل مستغرب:عمك!!!!!!كيف عمك ومنو انته...
محمد:هذا عمي وأنا ولد أخوه محمد بن حمد...
سهيل مب مصدق اللي يسمعه معقوله هذا اخوي محمد:انت محمد وهذا عمك...
محمد باستغراب:نعم أنا محمد وهذا عمي ليش فيه شي...
سهيل حضن أخوه محمد وهو يالس يصيح ومحمد مستغرب منو هذا وليش يالس يصيح....وسهيل يقول أخوي محمد الحمد لله اني شفتك بعد هذا العمر...وأستغرب محمد من اللي يقول..

محمد:منو انته ياخي..
سهيل:أنا أخوك سهيل...يا محمد أنا سهيل...
محمد مذهول من اللي يالس يسمعه ويقول انا في حلم ولا علم:سهيل أخوي...!!!!!!ويلس يطالع اللحيه الكثيفه والطويله...
سهيل والدموع تارسه عينه:أنا سهيل أخوك..
محمد أمتزجت عنده مشاعر الفرح بلقاء أخوه ومشاعر الحزن بوفاه عمه راشد..:وحضن أخوه سهيل وذرفوا
الدموع ويلسوا يتكلمون وكل واحد خبر الثاني عن اللي استوالهم...

سهيل:وين اليازيه وفاطمه وندى...
محمد:فاطمه وندى في بيت عمي راشد...واليازيه الله يعينها عند زوجها سلطان..
سهيل:الله يعينها...بس لازم نسير عند سلطان ونساعدها..
محمد:خلاص بس بعد مانخلص من المقبره...
سهيل:إن شاء الله والله خاطري اشوفهم الحين...

 

[ضوى العيون]

وساروا سهيل ومحمد وأحمد مقبره العوهه(الفوعه)وصلوا صلاه الجنازه ودفنوا عمهم راشد...وساروا بيت العم راشد....

وفي بيت العم راشد...
دخل سهيل البيت وكله شوق للقاء أخواته بعد الفراق...ودخل عليهم وأول ما شافوه تغشو منه لانهم ماعرفوه.

سهيل:السلااااااام عليكم...
فاطمه مستغربه:وعليكم السلااام...خير إن شاء الله فيه شي...
سهيل:الخير بويهج....بس ياي اسلم عليكم...واشوفكم...
فاطمه:ومنو انت؟؟؟؟؟
سهيل:أنا سهيل أخوج ....!!!!
فاطمه مب مستوعبه اللي تسمعه ومب مصدقه:أخوي سهيل...أخوي سهيل !!!!
سهيل:هيه أخوج...
فاطمه وهي تذرف الدموع:هلا ياخوي ويلست تصيح وما قدرت تتحرك من مكانها وريولها ما شالتها من الفرحه..

وندى كانت تسمع اللي يدور بينهم ولا إرادياً راحت تركض صوب سهيل وارتمت في احضانه وهي تصيح...
وسهيل شاركها الدموع.....وفاطمه وياهم تصيح ومحمد ماقدر يتحمل هذا الموقف وشاركهم...
ويلسوا يسولفون وكل واحد يقول للثاني عن مصيره وش اللي استوا وياه...

سهيل:ماشاء الله عليكم فاطمه دكتور وندى مهندسه ومحمد ضابط...الله يوفقكم...وكله من بفضل الله
ثم فضل احمد وزوجته اللي ساعدوكم..بس اليازيه مسكينه مانعرف عنها شي...

وفجأه أتصلت نوره على فاطمه...
نوره:الوووووو فاطمه اشحالج...واشحال اخوانج...
فاطمه:بخير وسهاله...اشحالج انتي
نوره:عندي لج خبر حلو يا فاطمه...
فاطمه:شو هالخبر...
نوره:اختج اليازيه...
فاطمه:شو فيها اليازيه...
نوره:اليازيه موجوده عندي....
فاطمه:هاااااااااااااااااااااه...وطاح التليفون من أيدها....
محمد:شو فيها اليازيه!!!! شو فيها ...
سهيل:فاطمه شو فيج تكلمي واليازيه شو فيها...
فاطمه:اليازيه موجوده في دبي عند خالتي نوره...
ندى:اليازيه في دبي!!!...أنا بسير عندها....
سهيل:الجمد لله انها طلعتمن عند سلطان...

وساروا ككلهم صوب دبي يشوفون اليازيه.....وكلهم مستعجلين...أول مره بيلتم شملهم بعد فراق أكثر من 12 سنه...

وفي دبي في بيت احمد...
نوره ماخبرت اليازيه بان أخونها يايين الحين...ونوره ماتعرف نا سهيل وياهم...ووصلوا البيت ودخلو...يبغون يشوفون اليازيه...وكانت اليازيه فالغرفه يالسه ترتاح......والكل دخل الغرفه عليها....
وأختلطت مشاعر الحزن بمشاعر الفرح وأختلطت الدموع....

فاطمه وهي تصيح وتحضن اليازيه:اليازيه والله نا مب مصدقه اللي اشوفه الحمد لله اللي جمعنا..
اليازيه والدموع في عينها:الحمد لله اني قدرت اشوفكم ان شاء الله مانتفارق بعد اليوم...
والكل يلس عند اليازيه الكل يقول للثاني شو اللي صارله بعد ماتفارقوا....
بعد فراق طويل التم شملهم...

وسار سهيل ومحمد يتخبرون عن سلطان وعرفوا انه مات وخبروا اليازيه بوفاه سلطان...
وورثت اليازيه كل اللي عند سلطان وساروا وسكنوا في بيتهم القديم...بعد ماعدلوه وعاش وياهم
أحمد وزوجته نوره عوضوه عن اللي سواه لهم وزوجه عمهم راشد سكنوها عندهم فالبيت واهتموا فيها...
وعالجوها فالخارج ورجعت لحالتها الطبيعيه....وتزوجت اليازيه من حسن ربيع سهيل....وعوضها عن كل
العذاب اللي مرت فيه....وعاشوا حياه سعيده بعد فراق طويل وعذاب شديد..واليازيه وأخوانها
موجودين الان في كل مكان عايشين بيننا ونشوفهم في كل مكان...


وأترك لكم أن تتخيلوا باقي الاحداث
أنتهت القصه....

 

[ضوى العيون]

أخوكم السنافي_1




أعزائي القراء لقد كتبت هذه القصه لتوضيح بعض مايعانون منه الايتام من ظلم بعد وفاه الاب والام...

وماذا علينا ان نفعل لهذا اليتيم...وتذكروا أخواني حديث الرسول صلى الله عليه وسلم(أنا وكافل اليتيم فالجنه
كهاتين وأشار باصبعيه السبابه والوسطى)

فيا أخواني تذكروا قول الله تعالى (فأما اليتيم فلا تقهر) وأي قهر لليتيم أشد على نفسه من ان يرى الاطفال
يأكلون مالذ وطاب ويلبسون أفخر الثياب وهو محروم من العيش الذي يحلم به كل طفل وطفله...

 

[الطموحه]

الله يجزاج خير الجزاء يا اختي ضوى العيون
قصة قطعت القلوب وانهمرت الدموع
وكانت درس حلوووووو ارجو من كل ظالم قرائت هذه القصه ومعرفة النهايه الحلوه
فالله سبحانه يمهل ولا يهمل
والجزاء من جنس العمل
وتسلمييييين يالغاليه على هالقصة الحلوه وننتظر المزيد:eh_s(15):