آهي شدخلها فينا ؟؟؟... ليش ادخل عصها فشي مايخصها ؟؟

[Şhώasha . . ~]

السلام عليكم
بنات شلونكم شخباركم .... ابي اقولكم مشكلتي .. اهي مادري غيره ... فراغه ماعندهم سالفه الا احنا .. مادري شفيهم الحمدلله و الشكر ..
المهم بقولكم السالفه ... احنا الحمدلله ناس عاديين .. و كل شي نبيه تقريبا متوفر لنا بس مو كل شي تقريبا .. المهم .. عماااتي مادري شفيهم علينا الحمدلله و الشكر حتى مرات اكره اني اروح بس عشان لا يقولون شي ... بقولكم السالفه ... بس بلييز اي وحده تدخل ترد وتقول لي رايها ..

ابوي بالنسبه لـ عماتي وعيال عماتي انه اهو مدلعنا و يسفرنا ويطلعنا كل مكان ويشتري لنا كل شي ومو مخلي علينا قاااصر .... هذي بالنسبه لهم ... ليييش ؟؟؟ ... لانه تكون عندنا اشياا ماتكون متوفره عندهم ولا عند عيالهم ... و اشياا عاديه ويقولون ابوكم مدلعكم .... واااي شدخل ؟؟؟ ... خل اقولكم عن المواقف اللي صارت ...
مره اخوي الصغير بـ ابتدائي كان بـ بيت يدتي ماسك الايبود ماله ويلعب فيه .. الا تشوفه عمتي عبالها مال اختي .. تقوله : حبيبي هذي مال اختك ؟؟؟ .. جان يقولها : لا مالي امي شرت لي اياه .. جان تقول اهاا .. وفعيونها مادري شلون حسد ولا شنو .. جان تقولي شواشه هذي صج ماله ولا يجذب ؟؟؟ جان اقولها ايي ماله وياريتني ماقلت ... قالت : ايي من شراله ؟؟؟ .. جان اقول امي .. جان تقول : ايي يحليلها امج مدلعتكم دلع بتضيعكم ... اوكي انا سكت بس عويت بوزي انه مو عاجبني عشان تحس شوي ..

ومره بعد .. كنت لابسه بيدي سوارة هرمز .. قالت لي بنت عمتي من وين شاريتها قلت لها من الاند قالت بكم قلت لها بـ 300 ريال وشي يعني تقريبا 25 دينار عندكم .. قالت : اهاا ، حلوه وكم لون عندج ؟؟ ... قلت لها واايد قالت مثل شنو .. قلت برتقالي ، ابيض وردي ، ازرق ، بنفسجي والله ماتذكر بعد وعمتي اسمعتنا جان تقول : انتوا ابوكم وايد مدلعكم عيل حد يصرف هالمبالغ على اساور والله تاخذين لج اشيا مفيده احسن .. خاطري اقولها انتي شتبين ؟؟؟؟ ... بس ماتكلمت وتميت سااكته ... صح كلامها بس اهي شعليها شتبي ؟؟؟؟ ... وبعدين الفلوس انا ميمعتها وشريت فيها اهي شتبي ؟؟؟

وموقف ثاني .. مره كنا بسفره معاهم .. وهي يايه معانا .. بس احنا كنا بنرجع الدوحه .. وهي بتم .. عاد انا عندي كام سوني بروفشنال يعني مو الصغيره حق التصوير العادي .. لاني اهتم بالتصوير .. عاد انا كنت اسولف ويا اختي .. و الشنطه مالت الكام و مكتوب عليها سوني حذاي ع الكرسي جان تقول : هذي كاميرا ؟؟؟ .. جان اقولها ايي .. جان تقول .. هذي مالتج ؟؟؟؟ .. قلت لها ايه مالتي .. جان تقول .. والله فلان اخوي وايد مدلعكم .. ياحسره علينا .... آنزين شتبين ؟؟؟؟ شاللي حااارج ... شاللي مخليج تحترقيين ؟؟؟؟

وموقف ثاني .. قبل كم يوم انا كنت رايحه و بشنطة الليدي ديور .. جان تشوفني عمتي وتقولي .. يه يه طايحين فيها البنات هالايام صح ؟؟ قلت لها ايي .. جان تقول تهنين فيها حبيبتي .. قلت لها تسلمين .. جان تقول عمتي الثانيه .. هذي اصليه .. جان اجذب عليها و اقول لها ايي .. جان تقول حلفي ؟؟؟ .. قلت لها لالا اقص عليج شدعوه اصليه تقليد درجة اولى .. جان تقول وييي عبالي بعد ابوج يسويها ياخذ لكم شنطة بكم الف والله يسويها عاادي ...

وهذا آخر موقف ادري مللتكم .. قبل كم سنه .. يعني في 2009 تقريبا .. كنا رايحين البحر .. وانا قبلها بكم يوم كان عندي الكام الصغيره .. بعدها شريت لي كام اكبر منها .. جان تقولي انتي كم وحده عندج شنو ماتشبعييين شفيه ابوج هذي كل شي ويشتري لكم ؟؟؟؟؟

انا ابي اعرف شفيها بالضبط ؟؟؟ .. ولا شافتني هذا اليوم بعد وكنت حاطه ميكب جان تقول والله ابوج مدلعكم ع الاخر يخليج تحطين مكيااج حق اي شي انا ماخلاني الا بالجامعه .. جان تقولها اختي جيلنا عن جيلكم يختلف .. جان تقول لا مافي فرق .. جان تقول اختي لا في فرق عاد اختي بالملاسن هههه .. جان تقوم وتروح غرفتها ... انزين ليش حارقه قلبج ؟؟؟؟
( طبعا هذا الكلام كل موقف على 3 عمات من عماتي )
انا مو اكرههم بالعكس اذا سافرت هم اول ناس اييبلهم هدايا .. مادري شفيهم جذي ؟؟؟ :eh_s(2):
يعني هل هو حقد حسد علينا او على ابوي ... مادري شلون افسره .. بتقولون يتغشمرون معاكم .. لا مايتغشمرووون ... وسوالف وااايد ماقلتها حتى مع اختي يسوون اكثر ... بس آبي آعرف السر وليش يسوون هالشي ؟؟؟؟ ... هل هم يكرهونا ؟؟؟؟ .. مايحبونا ... مستحيل ... بس مادري تصرفاتهم ادل على جذي !!!
بليز بنات اي وحده تدش ابي ردها .... بليييز وتقولي رايها بتصرفات عمااتي ؟؟؟ :eh_s(10):

 

[فوشية...]

اول شي لاتورونهم اي شي تشترونهم والله انا نفس الحاله بس مو مع عماتي لا مع خالتي وبناتها بس حسدهم بقلوبهم يعني مو نفس عماتج يقطونها بالوجه

انا اقول يمكن وحده من عماتج منقهره لانها مثل مافهمت انه ابوج ماخلاها تحط مكياج الا بالجامعه

صدقيني خشي كل شي تشترينه لانه حتى لو ماقالوا قدامكم بيحسدونكم من وراكم

ارقوا انفسكم لايصكونكم عين ويقلبون ابوج عليكم لاسمح الله​

 

[BaiTotia]

لا مايكرهونكم شدعوه أنتوا أهل

تلقينهم ملاقيف في ناس جذي يناشبونج بكل شي

 

[الملكة فيكتوريا]

ردي عليها برد خليها تعرف انه الناس تطورت
اذا قالت والله مدلعكم ابوكم قولي لها لا دلع ولا شيء الناس كلها عندها مثله صغيرهم وجبيرهم الا انتم ..!
كنغزه عشاان تسكت مره وحده

والا اذا ماتبين الهواااش لا تورينها شيء والوجهه للوجه ابيض
الله يهدي النفوووووس يارب

 

[Şhώasha . . ~]

مشكورين حبيبااااتي .. و اختي بيتوتيه انا ادري انهم مايكرهونا بس مثل الاحساااس عرفتي ... يعني الانسان شي موو عاجبه ويقعد يقل نغزات و ينشب لج ليش تشترين جي وليش مادري شنو ... ماتقصرون حبايبي ..

 

[nora al]

وااي نفس عمتي وبنااتها قطيعه

الله يعينكم لي تزوجتوو وكبرتووو واهما بناتهم لااا يفضيحتكم

بصراحه ماعندي حل لاني عشت الحاله من الصغر وانتي ليش ملابسج من برا وهذا جم سعره وهالسوالف وعقب قمت اقول مادري او مارد اسوي نفسي ماسمع واهما يتفشلون ويسكتون !!

الحين الحمدلله بعدنا عنهم حييييييييل وارتحناا

 

[nono93]

في ناس جذي

عيونهم عليكم

صح انهم عماتج بس الناس اطباع

اقروا ع عمركم

وعلى ابوج

وقللي الروحاااااااااااااااات

لهم

 

[بـ سـ كـ وتـ ة]

اتوقع حالتهم المادية أقل منكم وإن اهم يتمنون يسوون هالشي عيالهم ومو قادرين

عموما قبل كل يمعة معاهم قولوا "اللهم اكفنيهم بما شئت"

وان شالله ما تسمعون إلا اللي يسركم يا رب

ولما يسئلون عن شغلة انتي شاريتها ويستغلون سعرها ما فيها شي قولي يمعت من مصروفي لما شريت

ومرة قولي يتني هدية بس كثر ما تقدرين ما يكون جذب عشان ما تستاثمين على شي ما يسوى

وعليج بالعافية كل اللي عندج والله يزيدكم ان شالله من خيره

 

[بـ سـ كـ وتـ ة]

اتوقع حالتهم المادية أقل منكم وإن اهم يتمنون يسوون هالشي حقهم وحق عيالهم ومو قادرين

ويمكن مو قصدهم بس أسلوبهم فيه دفاشة شوي علبو يمونون

عموما قبل كل يمعة معاهم قولوا "اللهم اكفنيهم بما شئت"

وان شالله ما تسمعون إلا اللي يسركم يا رب

ولما يسئلون عن شغلة انتي شاريتها ويستغلون سعرها ما فيها شي قولي يمعت من مصروفي لما شريت

ومرة قولي يتني هدية بس كثر ما تقدرين ما يكون جذب عشان ما تستاثمين على شي ما يسوى

وعليج بالعافية كل اللي عندج والله يزيدكم ان شالله من خيره

 

[الجوريه الحمراء]

اذا مره ثانيه قالت لج ابوكم مدلعكم قوليلها حد محصل الدلع ولا يدلع

ما عليج منهم يبا هذا كله من حسدهم ومكرهم

 

[Şhώasha . . ~]

مشكورين بنات ماتقصرون ... عماتي هذول الـ 3 كلهم مو متزوجااات يعني معاشهم كله لهم بروحهم لنفسهم .. بس انا عندي عمات وايد قولوا ماشاء الله ....

 

[دبي العز]

حبوبه

مهما كان هذيلا عماتج واكيييييييييييييد يحبونج


بس المشكلة اختلاف بالتفكير ووجهات النظر هم يشوفون ان ابوكم مدلعنكم بشكل مبالغ فيه وهم من رايهم ان هالشي غلط

انا ما اقولج الي يسوونه صح بس الناس انواع والعقليات تختلف في ناس جييه تفكر ولها منطقها الخاص

لو عماتج في قلبهم شي جان ما عطوكم كاش بالويه الي تعطيج بالويه عرفي ان مافي شي بقلبها لا بتحش فيج من وراج ولا بتنافقج بشي

الخوف من الفئة الثانية الله يفك الجميع من شرهم

ويمكن هم محرومين ويشوفونكم تصرفون على اشياء من رايها فاضيه فللاسف صاروا يلاحظون الفرق بينكم

الله يبعد عنكم الحسد ان شاء الله انتي اقري اذكارج ولا تخافين من شي

وهذيلا عماتج ومهما كان يحبونج وتحبينهم وغير جييه احترامهم واجب وولا تسوين لهم حركات او شي بالعكس خذيها بصدر رحب كفاية انهم خوات ابووووووووووووووووج

واشكري ربج عالنعمة والله يزيدكم ويرزقهم عشان يعيشون الوضع الي يتمنونه ويرزق جميع المسلمين ويآلف بين القلوب

 

[نفهمها صح]

ههههههههههههههه
ذكرتييني بحريم حماي وعمات عيالي
هم الاغلبيه معندهم اوولد من كرهم لي ولعيالي وغيرتهم
يقلوون احنا بنجيب ولد علشان ميطلب ولا يبغي سياره وجوالات ولا لب توبات
وبنربيه زي فلان الي هوو حماي 2 ملتزم الله يخليله عياله
وتعالي سمعي نغزات
عني محب اوريهم شي ولا اقوول لهم شي اصلن احاوول مختلط فيهم
بس زوجي اوول بوول الاخبار عندهم اذا شرينا شي
زي مقالوو البنات لا تورونهم شي
ولا تقوولون لهم اذا رحتوو مكان

 

[امحــٌق وُليـٌف]

عندنا وعندج خير ...

بس صراحه انا اشووفه شي عاااادي وما اشيل همه كلششش

طاااف بطقااق مايستاهلون احر جبدي عشااانهم

 

[عاشقه رويشد]

عادي عادي بكل عايله في جذي سمعي مني وطنشي

 

[سوزي الشرقية]

عندناوعندج خيرمن الله والله موبس انتين تعاني من هذه المشاكلــ..
شوفي هذه مره بيت عمتي ويصيرون الينا بيت خالي بعد اتصلوعليناعزموناعلى الاستراحة على اساس كل العائلة معزومين وبيروحـو..
فاقررور امي واختي الصغيرة انهم بيروحون وياهم الاستراحة
واختي الصغيرة بتحمل اغراضهاحق السباحة الله يهديها ماعجبها الاكيسسس محل جلابيات اليشمكـ...واتذكرقلنا اليها يابنت الحلال خذي كيس ثاني غيره بيآذونش هناك ماتسمع الكلامـ
والله تقول من وصلنا الاستراحة وشافوني صغير ة ولاحدويايـ منكم استلمونيـ بالاسئلة
اييي انتون بعرس اخوكم كاشخين من وين اخذتوملابسكم...اي خالنا مدلعكم والدليل حتى عمتنا لبسها هاي وغالي وفوق كل هذا قامو يسآلوها كم مصروفش اليومي بالمدرسة..ويقولواليها ترى خالناموجالس على بنك حرام عليش تصرفي هالقد.....ولمن دريو ابوي عطاهاهدية نجاحهاكمبيوترمكتبي قالوكلام ازيد وازيدبعد
وتالي هم تقدمو حق اختي وافقت على ولدهم وقامت الاشاعات تزيداكثرررررر
لدرجة بنت عمتي الصغيرة من حرتهاعلينا طلعت اشاعه على ابويي انه يملك 3اراضييييي ومدري شنو وسمعنا الاشاعات من الناسس والبناتـ...
وحتى لليلة العرس ماسلمنامنهم
تخيلويلعبوحتى على عيال اختي ويع موحلوة دي ووولداخوكم رقعه وجهه تفشلـ
ماقول غيرالله يهديهم جميعا

 

[Şhώasha . . ~]

اجمعييين ان شاء الله ... انا ادري والله و اسمع وايد من البنات ان وايد يعانون من المشكله بس صراحه تصرف غريب يعني مادري شلون @@
وتسلمووون بنات يعطيكم العافيه ماتقصرون ..

 

[جوهانة]

ياقلبي انتي مثل هالامور صح تقهر بس لاتعطينها اكبر من حجمها يمكن المساكين محرومين من هاشي
لما ابوك كان مسوول عنهم
بس انتي خليك ايجابيه واحمدي ربك ان عماتك متواصلين معاكم مافيه احلى من جمعه الاهل صدقيني

 

[Şhώasha . . ~]

مشكوره حبيبتي ... الحمدلله على كل حال

 

[ZIKO_FDEETA]

لووووووول تصير فيني مع عيال خالاتي وخوالي واااااايد صدقيني اصلا اهم يقولون انتوا شايفين نفسكم واللي يقهرج انهم عندهم بس ما يتحجون لووول اصلا انتي روحي واللي يقولونه قولي لهم الحمدلله الواحد يعيش مره وحده ليش يقصر على نفسه
وشواشه يقولج الحقران يقطع المصران كااااااااااااااك