آآه من الزمن ...

[meen_ana]

الجزء الثلاثين والأخير..
=====
الفصل الأول
====

الليله كانت مثل الحلم تمر على مريم.. ما كانت تتصور انه حلمها راح يتحقق بعد ساعات قليله من هالليله.. رغم الظروف الي مروا فيها واجلت من موعد عرسهم.. وانحرموا من سفره شهر العسل لأنه ما بقى شي على بدء دوام الجامعات.. لكنها ما حرمت نفسها من لذه فرحه هالليله الي تعتبر ليله من العمر..
دخلت على موسيقا هاديه ملائمه لملامحها الطفوليه.. وجمالها الطبيعي.. وتمت تمشي خطواتها وعيون الي حواليها عليها ويسمون الرحمن.. بإبتسامتها جلبت كل الأضواء بالإعجاب صوبها كانت هالبسمه سر جمالها .. مشت والكل من وراها يمشي ويرقص ومستانس.. كانت عروس ولا كل العرايس.. كل شي في الصاله كان منسق على ذوقها.. كل شي كان استايل غربي ودزاين بسيط وناعم.. وفستانسها حبت انه يكون بسيط.. ضيق وهاي نك... من التور.. ينزل الذيل على شكل دانتيل مطرز اطرافه .. كأنه طاووس.. وباقه من الورد المخلوطه مع الريش الأبيض.. كانت مريم.. حبيبه ابراهيم..
مرت الليله بسرعه غير متوقعه كان كل شي فيه مرتب.. والكل مستانس.. ومتفاعل.. كان الكل مفتقد لهالفرحه لفتره طويله بالنسبه لهم.. ولكن هناك هم يملك قلوبهم؟؟ بوخالد متى بيرضى على ابراهيم.. كان معاند ومب طايع يدخل الصاله يسلم على بنته ويبارك لها
بوخالد: انا مب داخل.. خلاص زوج وزوجتهم.. شو تبون بعد..
خالد: ابوووي عشان خاطر مريم.. يهون عليك تكدر عليها ليلتها
فيصل: صدقه خالد يا بوي..
بوخالد: اقول انا راد البيت.. يلا في امان الله
ام خالد: بوخالد.. اتريا.. عشان بنتك والله حرام كمل فرحه بنتنا لا تحرمها من الفرحه هذي
العم خليفه: يلا يا اخوووي.. خل عنك... انسى ان ابراهيم موجود.. انت بتدخل عشان بنتك..
بوخالد: لا حول ولا قوه الا بالله .. بدخل اسلم وبظهر.. لأني تعبان..
خالد: خير .. ماشر ان شاء الله ..
بوخالد: ماشر.. بس مادري احس بعوار في كليتي.. صاير لي فتره.. واليوم ما خذت دواي..
خالد: كليتك؟؟!!!.. ماتشوف شر.. خل انسير انسلم عقب بوديك المستشفى
بوخالد: مايحتاي..
دخل بوخالد ومشى صوب الكوشه.. ومريم كان عينها على ابوها .. كانت قاعده جان اتنش ويا ابراهيم عشان اتسلم على ابوها.. والخوف ممتلكها .. وابراهيم عرف بالموضوع عن طريق غانم وهو الثاني كان كل ما يناظر عيون بوخالد يشوف فيهم غضب ما يتصوره.. وكان ينزل راسه..
بوخالد: مبروك مريم..
مريم: الله يبارك فيك..
بوخالد بعد ما سلم على مريم وبارك لها توه ابراهيم بيجرب صوب عمه يسلم عليه الا بوخالد يرد ويعطيه ظهره ويطلع من الصاله,.. الكل انصدم من الموقف.. وابراهيم حز بخاطره هالموقف وايد.. ومريم من شافت هالشي وبطبعها الحساس ما قدرت تمت اتصيح..
خالد: هدي روحج مريم.. ماعليه .. الله بيهديه ان شاء الله.. بيخترب مكياجج يلا عاد
مريم: بس ليش.. ؟؟ ليش جيه ابوي صاير قاسي..
ابراهيم: ماعليه يا مريم.. انا صابر.. بسوي المستحيل وبخلي ابوج يحبني .. صدقيني
مريم: ربي لا يحرمني منك..
فيصل: عاشو الكناري..
مريم: ههههههه
خالد: هي جيه ابتسمي شوفي شقايل حلوه.. يلا وقفي عدل.. خل اتصور وياج وفيصل بعد.. ابتسمي..
وقف خالد عدال مريم وفيصل عدال ابراهيم.. وكان خالد حاط ايده على كتف مريم وضمها لصدره وهي لاويه شوي صوبه..
انتهت الليله على خير والكل رد البيت.. ومريم وابراهيم طبعا هاي اول مره ينخلون فيها مع بعض من يوم ما ملجوا.. كانت صدق ميته من الحيا.. ومصبغه فيه.ز
ابراهيم: فديتج قمر كيف ما كنتي..
مريم: هههه(منزله راسها)..
ابراهيم نزل وقعد على الأرض جدامها ومسك ويها وضمه بإيديه: لا تنزلين راسج ابد دامج حرمه ابراهيم..
مريم: ربي لا يحرمني منك.. (نزلت الدمعه وعلى طول مسح ابراهيم الدمعه بإيده).. الحمد لله يارب..
ابراهيم: صدقج الحمد لله.. بقوم احين بتيدد وبصلي ركعتين شكر.. وانتي بعد..
مريم: ان شاء الله.. ابراهيم ممكن اقول شي..؟
ابراهيم: لبيه..
مريم: دخليك ادعي في صلاتك ان ربي يصلح حال ابوي وياك..
ابراهيم: من غير لا تقولين انا دوم ادعي هالدعا..
مريم: الله يسمع منك ويهدي ابوي..
ابراهيم: ابوج طيب يا مريم.. وانا عاذرنه .. السبب مب شوي.. لو انا مكانه عمي كان وايد شكله متعلق في ابوه.. عشان جيه..
مريم: فديتك والله..
ابراهيم: شو قلتي ما سمعت؟؟
مريم: ها.. ماشي.. قلت بسير ابدل واتيدد
ابراهيم: يالله على الحيا ماروم انا..
..
في بيت بو خالد..
بوخالد زاد عليه الألم وتعب زود.. وماكان قادر ينش من فراشه ويمشي خطوتين على بعضهم.. كان التعب متملك كل جسمه.. والألم كل ماله يزيد عليه.. والكل لاحظ هالتعب على ويهه ومحد طاع يودره من خوفهم..
خالد: نش ابوي.. خل اوديك..
بوخالد: مافيني شي قلت لكم.. شو بلاكم انتوا..
خالد: ماشي لازم انوديك..
فيصل: يلا ابوي..
فطوم والخوف باين على ملامحها: عشان خاطري نش الله يخليك..
بوخالد: بنش.. وبروح.. وبتشوفون ان مافيني شي..
اول ما نش بوخالد من على فراشه ومشى خطوه ما قدر يكمل.. حس ان ريله تنشل الحركه فيه وطاح على الأرض.. ومن شده الألم ماكان قادر يتحرك.. على طول شله خالد ويا فيصل ونزلون ودوه السياره عشان ينقلونه المستشفى.. وفطوم تمت اتصيح وما خلوها اتسير وياهم.. ولا حتى ام خالد.. بس الي سار خالد ويا فيصل.. ودوه بسرعه المستشفى. ونزلوه قسم الحوادث الي على طول من شافوا حالته نقلوه للعنايه المشدده وتموا الدكاتره عنده يفحصون حالته حوالي الساعه ونص.. دكتور داخل وثاني طالع.. على عينه دم وعلى اشعه.. ومحد طايع يطمن خالد ولا فيصل على حاله ابوهم..
وريم كل شوي تتصل على تليفون فيصل الي ماكان يرد عليهم لأنه ناسي تليفونه في الموتر.. وخالد يرد وما يكمل وياهم ولا يقول أي شي..
وبعد تقريبا ساعه و45 دقيقه.. طلع الدكتور وكان وياه تقارير الفحوصات والنتايج..
الدكتور: منو فيكم ابنه..
خالد: نحن الإثنين عياله.. خير طمنا..
الدكتور: والله الطبيب المتخصص الي طلبناه للفحوصات وكشف عليه.. طلعت النتيجه ان ابوكم عنده فشل كلوي في كليته اليمنى..
خالد+فيصل: شوووووو
خالد: والحل؟؟
الدكتور: لازم حد منكم ولا أي شخص فصيله دمه تتطابق فصيله دمه..
فيصل: انا مستعد دكتور..
خالد: وانا بعد...
الدكتور : خلاص.. عيل روحوا انتوا غرفه فحص الدم عشان نشوف فصايل دمكم..
راح فيصل ويا خالد وسواا فحص الدم وكل شي.. وطلعت النتيجه انه مافي تطابق في فصائل الدم.. يعني ما ينفع.. تم خالد وفيصل يحاتون هالسالفه.. بعد ما تطمنوا على ابوهم ردوا البيت وطمنوا امهم على ابوهم.. ونفس الشي الباقي وما قالو لهم شي عشان ينامون شوي من التعب الي تعبوه في هاليوم..
...
اليوم الثاني
كان طبعا صباحيه زوج ابراهيم ومريم.. الي مب عارفين شي عن الموضوع.. قرر ابراهيم انه الصبح من وقت يزور قبر امه وابوه.. وعقب ما رد من المقبره خذا مريم عشان يروحون بيت ابوها لأن ابراهيم ما عنده حد ثاني.. يوم وصلوا البيت حسوا ان في شي صاير لأن الكل شغله متغير.. ومهموم..
ام خالد: مبروك بنتي..
مريم: الله يبارك فيج يمي.. الا وين ابوي ما شفته؟؟ لايكون مب طايع ينزل.. بروح عنده
ام خالد: لا .. ابوج مب في البيت؟؟
مريم: شوووو.. بس ابوي مب من عادته يظهر على الصبح من وقت جيه..
الكل تم ساكت متردد انه يقول شي لمريم ويعكر عليها مزاجها في اول يوم زواج لها.. اما ابراهيم فعرف الموضوع عن طريق خالد وابراهيم..
مريم: اشفيكم ساكتين.. فهموني.. والله اني قمت احاتي.. ابوي فيه شي..
خوله: مريم.. عمي في المستشفى تعبان...
مريم: شوووووو.. شو فيه..
خوله: مادري امس طاح تعبان علينا ودينا المستشفى..
مريم: كله مني ادري.. ياريتني ما تزوجت من غير رضاه.. ابوي والله لا حرااام
فيصل: اشفيج انتي.. شو هالرمسه الي اتقولينها.. ما يخصه زواجج في الموضوع.. ابوي تعبان من كليته..
مريم: من متى هالكلام؟؟
خالد: شكله ابوي ما يراجع المستشفى بإنتظام عشان جيه..
مريم: الله يهديه ابوي.. وشو بالضبط الي فيه؟؟
خالد: فشل كلوي.. ومحتاج لكليه .. يينا انا وفيصل نتبرع طلع فصيله دمنا ما توافق فصيله دم ابوي..
مريم: انا بتبرع..
فطوم: وانا..
فيصل: مستحيل.. الا اذا خلاص كل الأبواب انسدت بويوهنا.. اما الحين نحن اندور.. بنشوف يمكن انحصل.. بس انتي ولا فطوم.. انتوا حريم.. مب زين عليكم.
مريم: مالي شغل.. انا مافيني شي لله الحمد.. فدا راس ابوي والله..
فطوم: وانا ما يهمني شي غير حياة ابوي..
فيصل: وكلنا هالشي يهمنا..
مريم: وين ابراهيم باخذ الإذن منه..
خالد: توه ظهر .. قال انه ناسي شي في الفندق راح اييبه..
مريم: ناسي شي؟؟ بس انا جيكت على كل شي ما في شي.. خل اتصل فيه..
..
في المستشفى..
الدكتور: انت متأكد انك تبا هالشي..
ابراهيم: كلي ثقه.. ومتى ما تقدرون اتسوون هالعمليه انا جاهز..
الدكتور: هاك هالأوراق وقعها.. وروح ويا الممرضه عشان انكمل الفحوصات الي لازمه لك
ابراهيم: خلاص ان شاء الله.. بس عندي طلب دكتور..
الدكتور : اتفضل..
ابراهيم: مابا احد يعرف لين ما ادخل غرفه العمليات.. واهم شي بوخالد نفسه ماباه يعرف الا عقب انا بقول له..
الدكتور: خلاص ان شاء الله
راح ابراهيم كل فحوصاته وما كان يرد على مكالمات مريم .. وكمل كل فحوصاته وكل شي طلع اوكي.. وينفع انه يسوي العمليه.. والدكتور طبعا على طول راح يجهز المريض(بوخالد) عشان العمليه .. واتصل في مريم..
مريم: وينك انت.. ليش ما ترد..
ابراهيم: موجود.. سلمي بسم الله..
مريم: والله خوفتني عليك..
ابراهيم: مريوم انا في المستشفى؟
مريم: شووووووووووووووووو.. ليش؟؟
ابراهيم: بعد ساعه راح يدخلوني غرفه العمليات ويا ابوج.. راح اتبرع له بكليتي.. طلع كل شي مطابق له في الفحوصات..
مريم: شووووووو.. لحظه انا مب ادره استوعب؟؟
فيصل: شوفيج.. ويهج اصفر جيه.. شو السالفه..
مريم: اقول رمس فيصل لأني انا مب قادره اجمع ولا كلمه من الي تقوله؟
فيصل: هلا والله بالمعرس.. خير فهمني... ترا العروس الي عندنا من عرست خرفت..
ابراهيم: هههههه.. فيصل.. انا بترع لأبوك بكليتي.. وانا الحين في المستشفى والعمليه بعد ساعه تقريبا
فيصل: لحظه.. انا بعد مب قادر استوعب.. ليش يعني؟؟
ابراهيم: شو بلاكم.. هيه انا بتبرع له بكليتي.. النتايج طلعت اوكي.. ووقعت على الأوراق وخلاص..
فيصل: بس ليش انت اتسوي جيه؟؟
ابراهيم: ها واجبي.. انا ما عندي ابو في الدنيا .. ابوي توفى.. احين عمي هو ابوي.. وها اقل شي اسويه لأبوي..
فيصل: ولد اصول يا بو خليل.. خلاص.. عيل .. نحن احين بنيي المستشفى عندك..
ابراهيم: بس انا مابا عمي يدري الا يوم يقوم بالسلامه..
فيصل: خلاص مره تم..
.. بند فيصل من عند ابراهيم ومريم كانت اتصيح.. خوفها على ابراهيم وفرحتها كان هو الشعور الي مختلط في قلبها.. ما تعرف تم فيصل يهديها.. ولبست عباتها والكل اتزهب عشان يروح المستشفى.. ومريم طول الوقت تدعي ربها انه يقوم ابوها وابراهيم بالسلامه..
دخل خالد وهو بعده ما يدري عن شي: اقول فيصل.. توه المستشفى دقوا لي.. قالو حصلوا متبرع لأبوي الحمد لله بس ما طاعوا يعطوني اسمه..
فيصل: خبر جديم.. اسمع اليديد. اسمه ابراهيم.. ريل مريم يا خالد..
خالد: شوووو
فيصل: بسم الله .. عيونك عن تطلع من مكانها؟؟
خالد: من صدق ترمس انت.. ؟
فيصل: هي من صدق.. شوفيك..
خالد: لا مستحييييييل.. ابراهيم؟؟ بس ابوي ما يحبه وهو يدري كيف يسوي هالشي له..
فيصل: عشان اتعرف انه ريال والنعم فيه.. ينشد الظهر فيه
خالد: هي والله..
فيصل: يلا نش .. بنسير المستشفى ما تم شي بيدخلونهم غرفه العمليات
خالد: مريم.. اهنيج على هالريال.. احين صدق تطمنت على مستقبلج
مريم: هي والله.. ربي يحفظه لي.. ولا يحرمني منه
الكل: آمييييين..
..

 

[meen_ana]

الفصل الثاني من الجزء 30..
الحلقه الأخيره..

الكل وصل المستشفى ودخل عند ابراهيم الي كان تحت تأثير المخدر.. بس بعده ما نام كليا كان يشوف الي حواليه.. من دشت مريم الغرفه ركضت صوبه..
مريم: ابراهيم.. حبيبي.. اشحالك؟
ابراهيم وهو غصب يفتح عيونه: بخير.. مريم.. احبج..
مريم: وانا بعد.. ان شاء الله ترجع لنا بالسلامه وربي يخليك لي..
ابراهيم: مريم احبج..
مريم: انا بعد احبك..
ابراهيم: احبج..
في هاللحظه غمض عيونه ونام.. ودخلوا الممرضات وحطوه على سرير الي راح ينقولنه عن طريقه وودوه غرفه العمليات الي كان فيها بوخالد قبله.. وتموا الباقي قاعدين في الغرفه ينتظرون.. مريم من التعب نامت على السرير.. والباقي الي قاعد.. والي رد البيت لأنه كان وقت الغدا.. ومريم ما طاعت اترد ولا حتى ام خالد وتمت وياهم فطوم بعد..
نامت ام خالد على الكنبه المحطوطه ومريم بعد.. وفطوم حست بملل فقالت بتطلع وبتتمشى في الممر.. وهي تمشي شافت ام نوال واختها يعدون جدامها استغربت.. شو الي يايبنهم هني.. فلحقتهم شافتهم دخلوا غرفه في قسم النساء.. فراحت عند الإستقبال وسألتهم عن المريضه الي في هالغرفه.. فطلعت الي في الغرفه هيه نوال.. على طول شلت عمرها وراحت صوب غرفتها ودقت الباب ودشت.. من شافتها ام نوال استغربت..
ام نوال: فطووووووم؟؟
نوال: منو الي ياي امي..
فطوم: الحمد لله على السلامه.. من متى وانتي هني يالظالمه وما تخبريني.. سلامااات شو صاير..
الكل تم ساكت ومبهت مب عارفين شو يقولون.. حسوا بفشله جدامهم.. خصوصا بعد الي سوته نوال في فطوم.. كيف فطوم اترمسهم جيه ولا كأنه في شي صاير؟؟
فطوم: شو بلاكم صاخين بسم الله.. ردوا علي.. شو صاير في نوال؟؟ ليش مجبسين ريولها؟؟
هيفا: سياره دعمتها وهي تعدي الشارع
نوال من شافت فطوم كانت منزله راسها وتمسح دموعها.. اخر شي تتوقعه ان فطوم تسأل عنها عقب السالفه الي صارت واتكون مسامحتها.. لحظتها بس حست بطيبه فطوم.. وعرفت ان الشيطان كان مسيطر على مشاعرها
فطوم: ما تستاهلين والله .. ما تشوفين شي.. سامحيني ما كنت ادري والله
نوال: لا عادي.. انتي اشحالج؟؟؟ شو يايبج هني وكيف عرفتي؟؟
فطوم: الله يسلمكم ابوي في غرفه العمليات ياسين يغيرون كليته.. ويوم طلعت امشي في الممر شفت خالو ويا هيفا يايين هالقسم لحقتهم وسألت عن الي في الغرفه فعرفت انج انتي قلت لازم اسلم..
نوال: فيج الخير.. فطوم.. سامحيني دخيلج.. ادري ان الي صار لي عقاب من الله.. بس انتي سامحيني..
فطوم: اسامحج على شو.. ما عندج سالفه انتي.. انسي انسي..
نوال: صدق والله يا فطوم.. (تمت اتصيح).. سامحيني
فطوم من شافت دموع نوال جربت منها وخذت المنديل ومسحت دموعها وابتسمت لها وحضنتها.. : فديتج.. انا ما اقدر ازعل عليج.. انتي ربيعتي ورفيقه دربي..
نوال: سامحيني.. والله مادري كيف خليت الشيطان يقص علي..
فطوم: اهم شي انج ندمتي وعرفتي غلطتج.. مب مهم لي .. لا لنفسج عشان مره ثانيه ما تخلين الشيطان يلعب بج
نوال: تسلمين لي..
فطوم: المهم انا سايره اخاف امي اتنش واتحاتيني عقب.. بزورج ان شاء الله عقب..
ام نوال: سامحينا يا فاطمه.. وان شاء الله بزوركم.. وسلمي على امج
فطوم: يبلغ ان شاء الله..
طلعت فطوم من الغرفه وسارت الغرفه عند امها شافتهم نايمين بعدهم قعدت على الكرسي وغطت عيونها في نوم..

الساعه 5.30 العصر
الكل وصل المستشفى عشان يطمنون على حال ابراهيم وبوخالد الي مر عليهم 6 ساعات وهم في غرفه العمليات وبعدهم ما ظهروا.. كان غانم ويا ابوه وامه ويدته يايين.. وهنادي.. دخل غانم شاف فطوم مستنده على ظهر الكرسي ولامه روحها على الكرسي ونايمه..
غانم: وحليلهم تعبانين..
بوعبدالله: خلهم نايمين.. الله يقوم سلطان بالسلامه.. صخ عن يقومون
غانم وبصوت واطي يرمس يدته: اقول يدو.. حلوه صح.. جنها قمر.. وهي راقده
اليده: طالعه علي فديت روحها..
غانم: انتي تتحريني ارمس عن منو
اليده: فطوم منو غيرها..
غانم: شووووو.. انا احين بقول حق هالسباله قمر.. تبين القمر يطيح.. انا اقصد مريوم..
عصبت اليده وتوها بتشل عصاتها تضربه فيه جان يزخ غانم عصاتها بإيده: اشششش.. بعدين بصيح وبقومهم من الرقاد..
اليده: حسابك بعدين..
غانم: لا والله.. ما يصير انا في خبر شرطه.. انت في واجد حساب مال انا ما يعطي حق انا..
اليده: هههههه.. غربل الله ابليسك.. صخ بتقومهم..
غانم نش من مكانه وجرب من فطوم وياب كلينكس وتم يلفه سواه مثل الريشه وجربه صوب خشمها وتم يلعوزها جان اتفز من الرقاد وتعطس عطسه قويه..
فطوم: الحمد لله..
غانم: خييييييييبه.. قومتي اللي في المستشقى كلهم وسبحتيني بعطستج.. حشا مب عطسه اوادم..
مريوم: هلا والله..
فطوم: طاعي يدو.. قاعد يتمصخر علي..
اليده: ماعليه ها بعد حطه في الحساب خل انرد البيت اليوم .. هلا والله بعروستنا.. تعالي تعالي..
مريم: يدوو حبيبتي.. (تمت تحضن يدتها واتصيح).. يدو خايفه..
اليده: لا تخافين كلها شوي وبيظوي ابوج وريلج من غرفه العمليات
ام خالد: السلام عليكم.. شو ماشي خبر؟؟
ام عبدالله: ماشر ان شاء الله.. توه سار خليفه يسأل..
هنادي: هدي روحج يالعروس مب زين عليج.. ام خالد.. قولي لبنتج شي.. ذبحت عمرها صياح
ام خالد: بيني وبينكم انا الي ماكلني الهم زود عنها.. ولدي وابو عيالي..
مريم: ربي يظهرهم بالسلامه..
غانم: بسير اكيد ابوي اتوهق ماعرف يرمس كلمتين انجليزي على بعضهم..
اليده: فديت خليفه ولدي.. يعرف واحسن عنك..
غانم: هههههه.. هي نسيت انه خريج جامعه الملا محمد العالميه..
اليده: لا عاد هاي ماروم اطوفها لك (وجان تضربه بالعصا بس ما يت الضربه عليه لأنه شرد).. ماعليه وين بتشرد بييك الضرب بييك
غانم: ويييييو.. خلاص عصاتج ما تنفع..من كثر ما ضربتيني فيها صرنا من نفس النوعيه نتنافر..
الكل: هههههه
فطوم: فايج تضحك وانا احاتي ابوي..
مريم: وريلي بعد لا تنسين..
فطوم: هي والله.. ربي يطلعهم بالسلامه
دخل خالد ويا عمه خليفه والإبتسامه على ويوهم..
خالد: مبروووك.. نجحت العمليه وخلصت.. وهم بخير احين..
الكل: الحمد لله..
مريم: ابوي.. ابراهيم.. ابا اشوفهم..
بوعبدالله: ماعليه تصبري شوي.. لين ما يقومن من تأثير البنج الي عليهم..
فطوم: وافيديت ابويه انا..
ام خالد: وين المصلى .. لأني ما صليت العصر.. وبالمره بصلي ركعتين شكر..
مريم: هي والله يبالنا..
..
ومرت الساعات وابراهيم وبوخالد كانوا بعدهم تحت تأثير البنج لليوم الثاني نقلوهم للجناح.. خلوا ابراهيم في الغرفه الي حذال بوخالد.. وبوخالد للحين ما يدري من الي تبرع له بالكليه
مريم: الحمد لله على السلامه ابوي..
بوخالد: الله يسلمج يا بنتي.. انزين ما قلتوا لي من الي تبرع لي بكليته ابا اعرف.. ؟؟
الكل تم ساكت يتطالع بعض.. ومريم تمت اتساسر خالد بصوت واطي: ترا ابراهيم برع على الكرسي المتحرك يبا يدخل..
خالد: خله يدخل ليش تام برع؟؟
مريم: يبا يقول حق ابوي..
فيصل: انا بسير اييبه..
بوخالد: انتوا شو بلاكم تتساسرون شو عندكم.. في شي انتوا خاشينه عني..
العم خليفه(بو عبدالله): والله يا بوخالد.. ماعرف شو اقول لك.. انت ما عطيت الريال فرصه يثبت نفسه جدامك.. كرهته وحكمت عليه على غلطه سواها ابوه انه حرمك وحرمنا من ابونا.. بس الحين هالإنسان قطعه من جسمه داخل جسمك.. وانت عايش على قطعه من جسمه..
بوخالد: شوووو.. انتوا شو ترمسون عنه.. رمسه الألغاز هاي ماباها.. قولو لي منو هو
دخل فيصل وهو يدز ابراهيم.. جان يبتسم ويجابل بو خالد: انا يا عمي
بوخالد من شاف ابراهيم على الكرسي.. وقال انه هو.. تم مبهت يطالع.. مب قادر يجمع شي من اللي يشوفه يحس عمره في حلم مب علم.. كيف هذا؟؟ معقوله هالإنسان الي انا كرهته وما بغيته زوج لبنتي يسوي هالشي فيني.. هالشخص الي صديت كل محاولاته انه يتقرب مني يكون سبب في اني انكتب لي عمر جديد؟؟ ااااااااه يا الدنيا.. ابوه يكون سبب في موت ابوي.. وهو سبب في وجودي للحين صاحي بين عيالي..
ام خالد: عشان اتعرف يا بوخالد ان ابراهيم ريال والنعم فيه مثل ما قلنا لك.. عيالك بغوا يتبرعون بس هم فصيله دمهم طالعه علي يعني ما نفعوا لك.. وابراهيم من سمع السالفه ما شاور حد ولا قال لحد.. يا المستشفى هني وخلص كل شي واخر شي قال لنا انا شوي وبدخل غرفه العمليات.. شو رايك؟؟ احين اباك تتطمن انت بنتك بين ايدين ريال.. والنعم فيه
بوخالد: تعال يا ابراهيم يا ولدي حذالي..
الكل من سمع بوخالد ينادي على ابراهيم ولدي.. ويشوفونه يبتسم له لأول مره استانسوا ومن خاطرهم.. وابراهيم بعد ما جرب من سرير بوخالد.. قام وقف على ريوله مع انها صعبه عليه يرص على ريله يسبب له الم.. لكنه نسى الألم وكل شي.. شوقه لحضن بوخالد كان هو الدوا للألم.. من جرب.. وقف وباس راس بوخالد..
ابراهيم: شرف كبير لي اني ابوس راسك عمي..
بوخالد: يسلم راسك يا ابراهيم.. والله انت ريال والنعم فيه.. سامحني يابوك على الي سويته في حقك.. ومبروك على الزواج..
ابراهيم: لا تقول جيه يا عمي.. لو انا كنت مكانك كنت بسوي جيه.. وانا الي علي اني لازم اثبت لك بأي طريقه اني مب راضي على الي سواه ابوي.. واحاول اثبت وجودي بأي طريقه
بوخالد: ياحيج يا مريم على هالريال.. عاد حط بالك على مريومه مالنا غيرها..
ابراهيم تم يطالع مريوم ويكلم بوخالد: تطمن .. مريم في عيوني وعلى راسي.. لو تباني اشلها على ظهري وادورها الدنيا كلها مشي على ريولي بسويها.. لو طلبت لبن العصفور ما ابخله عليها..
بوخالد: ادريبك .. والنعم فيك..
الكل تأثر من الموقف وما قدر يمنع دموعه انها تنزل.. والفرحه اخيرا عمت عايله بوخالد والعم خليفه.. وهنادي قدرت اتعوض شوي من ألمها على فراق علي ولدها.. الوحيد.. لأنها انحرمت من الحمل طول هالسنين ما كانت تحمل واذا حملت الياهل ما يتم عندها.. لكن الله اراد انه يعوض عليها وحملت وثبت حملها..

بوعلي: شوفي من اليوم وساير ماباج تتحركين خطوه وحده فاهمه.. اتمين مكانج ترتاحين..
هنادي: انت شكلك بتخربني وبتخرب الياهل الي في بطني.. ؟
بوعلي: انتي ما تدرين شو معناته اني بصير ابو من اول ويديد.. كم سنه واحنا محرومين 17 سنه وانا اتريا هالياهل.. واخيرا..
هنادي: بس تدري .. وايد مفتقده علي.. ولدي العود..
بوعلي: اطلبي له الرحمه.. الا ما تعرفين شو اخبار البنت؟
هنادي: البنت .. بخير.. امسات سألت عنها قالو لي انها تحت العنايه الشديده في العلاج الطبيعي عشان اترد تمشي..
بوعلي: الله يشافيها.. هاي نهايه الي ما يفكر بعقل.. الولد وراح.. والبنت هاي حالتها
هنادي تمت اتصيح ما تعرف شو اتقول.. لأنها بعد تعتبر نفسها السبب في الي صار لولدها ولولا عنادها جان ما فقدت ولدها: الله يرحمك يا علي ياولدي..
بوعلي: الله يرحمه برحمته يارب.. المهم تعالي احين ارتاحي وماباج تتحركين..ان شفتج تتحركين ياويلج..
هنادي: ربي لا يحرمني منك..
..
في بيت بوخالد..
بوخالد: اام خالد... هاتي الجاي..
ام خالد: حاضر..
بوخالد:اشحالك بوخليل.. ان شاء الله بخير..
ابراهيم: والله بخير عمي.. سلمت.. انت اشحالك احين..
بوخالد: شو بيكون حالي.. اكيد بخير.. وها كله من بعد فضل الله ثم فضلك..
ابراهيم: لا تقول جيه يا عمي.. ها اقل من واجبي..
فطوم: ههههههه.. الله ياخذ ابليسج يا مريوووم
بوخالد: عساها دوم الضحكه.. ضحكونا وياكم..
فطوم: سوالف حريم ابويه .. ما يصير ارمس..
ابراهيم: خلها عمي تضحك احين.. ما تدري وحليلها بالثانويه العامه الي يايتنها في الدرب.. بتصيح..
فطوم: طاع ريلج الشري.. يباني اصيح..
مريم: لا ما ينخاف عليها فطوم.. دحيحه..
فطوم: قولي عن بنت عمتج الي دحيحه مب انا.. نواااري تاكل الكتب يوم اتيوع..
ريم: حرام عليكم لا تحشون في البنت في غيابها..
فيصل: اقول يالمصاروه تعالوو .. الفواله جاهزه..
فطوم: اقول الأناناس حقي محد ياخذه..
فيصل: كيفج جان تبين الحقي بسرعه..
تمت تركض فطوم عشان توصل للسفره.. وماانتبهت ان في ماي على الرخام جان تزل ريلها واتطيح..
مريم: بسم الله عليج...
فيصل: شهيده في سبيل الأناناس..
الكل: ههههههههههههه
فطوم: بايخه تدري..
فيصل: وين غانم عنج يشوف هالموقف.. بيقطعج..
فطوم: هههههه عادي كول واحد حق يدتي يحل السالفه
مريم: مشكله غانم ان يدوو اتدافع عنج
فطوم: فديتها انا والله.
وابراهيم وبوخالد استقرت حالتهم الصحيه وقدروا انهم يمشون من غير الكرسي المتحرك.
بوظبي بيت عبيد.. كانت سلامه تتجهز لملجتها ويا ثاني.. الي كان مثل المينون طاير من الفرحه مب مصدق.. والعنود عايشه احلى ايامها ويا ناصر..
ناصر: ياروحي.. ياقلبي انتي .. فتحي الباب الله يخليج..
العنود: مااااابا.. مشغوله ..
ناصر: ابا اعرف شو اتسوين داخل ..
العنود: مو شغلك.. شغل حريم..
ناصر: لا والله.. ابا اعرف شو هالشغل العجيب الي في الحمام..
العنود: يوم اقول مو شغلك يعني مو شغلك..
ناصر: يالظالمه اكثر من نص ساعه وانتي داخل.. ما اختنقتي..
العنود: بسم الله علي ليش اتفاول..
ناصر: انزين عيل ظهري.. ابا اسبح
العنود: ماشي حمام ثاني.. روح..
ناصر: انا مااحب غير هالحمام شو رايج..
العنود: اتريا عيل..
ناصر: لا زوديتها.. ماشي اذا ما فتحتي الباب بكسره على راسج..
العنود: خييييبه شري الريال .. طلع على حقيقته.. فتحت الباب ها.. شو تبا احين..
ناصر: شو الي خاشتنه ورى ظهرج..
العنود: شي مال حريم مو شغلك عيب..
ناصر يحاول يسحب ايدها وهو تضربه : عيب اقولك عيب..
ناصر: والله اذا ما عطيتيني بالطيب براويج..
العنود: هاك شوف(كان في ايدها جهاز فحص الحمل وطلعت النتيجه انها حامل).. خلاص ارتحت..
ناصر: قولي والله
العنود: احين ما عرفنا لك الجهاز جدامك واتقول لي قولي والله شو تباني اسوي
ناصر: هاتي ايدج.. تعالي وياي...
العنود: على وين..
ناصر: تعالي وانتي ساكته..
سحبها ناصر من ايدها وطلعوا من الغرفه وراح للصاله الي فيها اهله كلهم قاعديه.. : يا جماعه ارجوا الإنتباه ابا اقول شي..
الكل: قول..
ناصر: امي مبروك بتصيرين يده.. وابوي مبروك بتصير يد.. انتوا الباقي بتصيرون عمات..رقصني يا قدع..
الكل: ههههههه..
ام ناصر: الف الف الف مبروك.. كلولولولولولووووش
العنود ماتتت من الحيا وتمت امنزله راسها ما تعرف شو اتسوي.
وتم ناصر من فرحته يغني وايول ويرقص.. والكل يضحك.. والعنود كانت الفرحه باينه على ويهها انها قدرت اتفرح ناصر ولو بشي بسيط..
..
وبدت دوامات المدارس والدراسه...
نوره وفطوم طبعا اخر سنه لهم في الثانويه.. وغانم اخر سنه له في الكليه وراح يتخرج..
غانم: مشكله اليهال يوم يسيرون المدارس.. هههه
فطوم: لا والله.. يعني انت مووول من انولدت دخلت الكليه..
غانم: اصلا من قالو بيدخلوني المدرسه قالو ما يصير طالب بهالذكاء يدخل مدرسه
نوره: ماشاء الله.. فطوم.. اهنيج عندج ريل ذكي بصراحه.. لدرجه انه فاتح المجله الي بيقراها بالجلب..
فطوم: ههههههههههههه.. يابو الذكاء انت.. الصراحه احسدك على الذكاء الي عندك..
غانم انتبه للمجله وارتبك وحاول يبرر موقفه: جب جب.. اصلا ها اسلوب يديد في القراءه بالجلب..
نوره: هيه ماشاء الله مبين..
فطوم: اقول لا تقعد تتفلسف.. انت حدك يايب نسبه في السبعين ومستانس.. جان ما نطلع من الأوائل ونكسر راسك
غانم: الله لا يقووول
نوره+فطوم: شوووو
غانم: اقصد ان شاء الله ربي يوفقكم..
..
ريم وخوله في شهرهم الأخير من الحمل..
وريم طبعا الخوف متملكنها.. خصوصا بعد الي صار لعذاري الله يرحمها.. خايفه انها تمر بنفس الموقف.. والكل يحاول يهدي فيها..
فيصل: اشفيج جالبه الدنيا مناحه.. امي وامج ربوا ما صابهم شي.. انتي خلي ايمانج بالله
ريم: زايغه والله يا فيصل..
فيصل: لا تخافين ان شاء الله ما بيصير الا كل خير.. وخوله بعد وياج ترا.. يارب اتربون في نفس الوقت اتفكونا...
خالد: هي والله..
خوله: ريم هدي روحج.. الخوف ها ترا ما بيكون في صالحج.. لازم اتكونين هاديه..
ريم: الله كريم.. وصح ما قلت لكم ان عواش حامل بعد..
خوله: صدق.. مبرووووك تستاهل يحليلها.. شو احين مطر وياها.. اتعود عليها
ريم: هيه الحمد لله.. مطر صار اوكي معاها.. يحبها
خوله: يالله الحمد لله .. ربي يهنيها..
ريم: امين..
..
في بيت مبارك.. مبارك طبعا ما نسى نوره.. وبعدها في باله.. بس المشكله انه صارت ظروف هي الي منعته من انه يخطبها فكان ينتظر اللحظه المناسبه عشان يفتح الموضوع ويا غانم على موضوع الخطوبه.. فاتصل في غانم عشان يتفق وياه على يوم يزورهم ويا اهله..
غانم: يا حياالله والله.. وين هالغيبه.. انت من متى قلت بتينا ورحت ولا ييت
مبارك: تدري انت الظروف الي كنتوا فيها ما كانت تسمح.. فكنت اتريا لين ما تهدا الأوضاع عندكم واييكم مع هلي..
غانم: حياك في أي وقت.. اقرب عنا انت بس..
مبارك: تسلم.. ندريبك راعي اصول واجب.. بس غانم انا بغيت اقولك شي.. ؟
غانم: قول..
مبارك: انا ياي ويا اهلي وفي غرض في راسنا.. نحن مب يايين لمجرد زياره..
غانم: كيف يعني ما فهمت؟؟
مبارك: حنا يايين نطلب القرب منكم..
غانم: كيف؟؟؟ بس انا ما عندي خوات اصغر عني.. ؟؟
مبارك: ههههههه.. لا مب جيه.. لأننا نحن ما ندل بيت عمتك.. قلنا اني عندكم ونبي نخطب بنت عمتك لو انكم تطلبون منهم يتواجدون هناك في نفس اليوم؟؟
غانم ما فكر في نوره.. لكن الي يت في باله على طول كانت فطوم.. انصدم.. : انت شو تقول.. تبا تخطب خطيبتي..
مبارك: الله يهديك يا غانم.. يعني لازم اقول اسمها
غانم: هيه قول اسمها شو يعني.. تراك تبا تخطب..
مبارك: اظني ومب متأكد اسمها نوره..
غانم: قول والله؟
مبارك: شوفيك؟؟ اذا ما عندكم مانع يعني؟؟
غانم: لا عنا سعيد.. هههه
مبارك: هههه,... صدق ارمس..
غانم: بقولك شي.. انا ما عندي مانع ابد يا مبارك بالعكس هالشي يشرفني يوم ريال شراتك ياخذ وحده من خواتي.. ونوره تراها اختي..
مبارك: بس اتهقي انها بتوافق علي؟؟
غانم: وريلها فوق راسها بعد..
مبارك: ههههههه.. لا صدق ماباكم تجبرونها خلوها على راحتها
غانم: اصلا نحن مب من النوعيه الي نجبر حد على حد.. ماعليك انت بس.. انا برمسها وباخذ شورها.. وبكلم عمتي..
مبارك: يارييت والله..
غانم: خلاص عيل.. ملتقانا يوم الخميس على العشا
مبارك: ان شاء الله.. بس انا بطلب من عمي ايي ويانا لأن ماعندي ولي غيره
غانم: افا عليك بس.. حياك..
مبارك: تسلم والله..
..
بند غانم عن مبارك وراح عند يدته وخبرها الموضوع.. وتم يرمس عن مبارك.. وقال لها كيف انه ضحى بكل شي عشان اخوانه..
اليده: والله ريال .. ابوه راح وخلا ريال وراه.. الواحد يقدر يعتمد عليه
غانم: بس مبارك حالته الماديه مب لهناك.. يعني اذا وافقتوا عليه.. لا تثجلون عليه بالطلبات
اليده: نحن شارين الريال يا غانم.. شو نبا في فلوسه
غانم: وانا بعد شاريني اكيد .. ما تبون فلوسي.. دنا غلباااااااااان .. ماعندي فلس.. قولي حق عمي سلطان
اليده: انت بالذات الي بخليك يوم اتعرس ريال ماشي في مخباك..
غانم: خيبه.. قالو اذا حبيبك عسل لا تلحسه كله.. انتوا عاد ناوين تشفطوني..
اليده: اخبرك انا مب جنه عندي حساب عندك..
غانم: ها.. شو .. لا شو ماشي..
اليده: شو بلاك قمت تتخربط في الرمسه.. شوف يلا نش شغل الموتر.. وسخنه خل انروح بيت عمتك كلثم وانكلمها في السالفه ويا ريلها ها الي مادانيه
غانم: افا عليج انتي بس.. بس دخيلج بمر على فطوم..
اليده: يعني انا ما اكفيك..
غانم: لا اخاف عقب اتقول لي اني خنتها وظهرت ويا وحده غيرها..
اليده: ههههههه.. غربل الله ابليسك من ولد
غانم: بس لا تقولين لها اني امسات رقمتج في السينما..
اليده: لا ما بقول..
غانم: ياخوفي منج يوم اتقولين كلمه ما بقول.. اتزيغين الواحد.. يدتي واعرفج عدل..
اليده: ههههه.. يلا نش وبلا كلام زايد..
ام عبدالله: على وين ناوين؟؟
اليده: بروح بيت كلثم.. ابا ارمسها في واحد خاطب نوره.. وابا ارمسهم..
ام عبدالله: والله.. ماشاء الله زين.. ومن الريال انعرفه؟
غانم: ها ربيعي مبارك الي كان ويانا في ماليزيا شفتيه يوم كان وياي وعبدالله يعرفه بعد
ام عبدالله: هيه.. لا مبين عليه كان ريال زين.. وانت شو تقول؟
غانم: والله امي ريال ما يتعوض.. واحد يقدر يوم يعطيه بنته ينام وهو مرتاح ان بنته في ايادي امينه..
اليده: اقول.. كلام الجرايد ها ما احبه.. يلا امش جدامي
غانم: لحظه بتصل في فطوم خل تتزهب..
اليده: جي وين سايرين نحن.. خل تلبس عباتها وبس.. الا هو بيت عمتها
غانم: انزين..

 

[meen_ana]

اتصل وردت عليه فطوم .. على تليفون البيت ..
فطوم:هلا والله بهالصوت
غانم: يا مرحبا.. فديتج انا والله.. وفديت هالصوت وراعيه الصوت.. اشحالج؟؟
فطوم: بخير يسرك حالي.. وانت اشحالك؟؟
غانم: حالي.. من غيرج مب شي.. تعبان ودي بشوفتك يالحبيب..
فطوم: الله لا يحرمني منك..
غانم: ولا منج.. شو الدراسه وياج ان شاء الله بس مرتاحه.. ؟
فطوم: الحمد لله مقزرين.. وانت اباك اتييب امتياز اقل من جيه ما برضى
غانم: افا عليج..
اليده اتصارخ: اييييييه انت.. والله فايج.. قاعد يتغزل ويسولف قول لها خل تتزهب وخلاص..
غانم: ههههه.. خليني شو فيج انتي اتغارين..
فطوم: شو فيها يدو؟؟
غانم: ماشي.. يدتج قاعده وغيرانه ليش اني اغازلج ومطنشنها..؟؟
اليده: ههههه.. نش ترا والله بغير الحساب احين..
غانم:لا ما صدقت انج غيرتي الحساب على التوصيله.. ايه.. فطيم.. نشي يلا وقفي.. احين احين احين..
فطوم: انزين اناالحين واقفه شو اسوي بعد...
غانم: انقزي..
فطوم مب منتبهه لعمرها وياسه اتسوي الي يقولها: ها نقزت احين..
غانم: ههههه.. هبله .. سبال انتي.؟؟
فطوم: يالحماااااااااار.. انا اراويك..
غانم: يلا يالسباله.. لبسي عباتج.. بنمر عليج نبا انسير بيت عمو كلثم..
فطوم: محد سبال غيرك.. مب يايه
غانم: يلا عاااااد.. فطوومه.. بيفوتج والله ..
فطوم: شو هو الي بيفوتني؟؟
غانم: كيفج.. حدث عظيم.. يلا باي
فطوم: لحظه لحظه.. لا خلاص بيي..
غانم: ههههه.. يلا انزين انقزي وركبي الدري وناقزي عليه لين توصلين غرفتج.. هههههه
فطوم: انا براويك..
وبندت عنه وطلع غانم ويا اليده وراحوا صوب بيت بوخالد وخذوا فطوم
فطوم: شو السالفه؟؟ غريبه يعني اول مره اتروحون بيتهم؟
غانم: ماشي مشتاقين لهم..
فطوم: لا والله.. صدق اكيد في شي..
غانم: انتي شو الي حارنج.. خل عنج اللقافه..
فطوم: يدوووووو.. ادبيه الله يخليج من عندج.. هالسبال شو سوى فيني اليوم.. واحين مب طايع يرمس.. انتي قولي لي..
غانم: يدو. لاتضربيني.. تراني اسوق
اليده: والله الريال كيفه يكفخج يضربج.. برايه تراج انتي حرمته انا اشلي..
غانم: عاشوووووو (ودر السكان وتم يصفق بإيده ومن غير لا ينتبه انحرفت السياره صوب الرصيف بغا يدعم بس اتمالك الموقف).. اشششششوه من عينج بل..
اليده: حاسب.. بتجتلني وانا في شبابي..
فطوم: هههه.. بس ماعليه اشوف انجلبتوا علي؟؟
غانم: افا والله ما عاش.. انا بقول لج.. شوفي صرت طيب وبقول لج.. تعرفين مبارك
فطوم: أي مبارك؟؟
غانم: ربيعنا مال ماليزيا الي رمستج عنه..
فطوم: ههههه.. هيه بلاه
غانم: ليش في شي.. ؟؟ جيه تضحكين؟؟
فطوم: كمل انت الحين رمستك؟؟ شو يخصه مبارك في السالفه احين؟
غانم: ترا السالفه كله عليه.. مبارك يبا يخطب نوره..
فطوم: هههههههههههههههههههههههههههههههه
غانم: ايه بسم الله.. شو بلاج..
فطوم: قول والله.. مبارك مبارك ماغيره
غانم: هيه.. ليش في شي؟؟
فطوم: يبا يخطب منو قلت لي.. نورووووو
غانم: هيه.. شو بلاج تضحكين..
فطوم: احين وصلنا ما ينفع .. يوم بنرد البيت بخبرك..
غانم: لا احين اتقولين
فطوم: لا خلاص .. هذوا ريل عموو كلثم بننزل انسلم..
غانم: اففف.. خلاص يلا..
اليده: فطوم.. شو السالفه.؟؟ خبريني..
فطوم: ماشي قلت تراني عقب بقول..
غانم: يحليلها يدو الفضول بياكلها احين
اليده: جي اتحيديني ملقوفه شرواك.. ؟؟
نزلوا من الموتر وسلموا على ابو نوره ودخلوا سوا الميلس وطلعت لهم كلثم وسلمت عليهم.. وفطوم صعدت غرفه نوره.. الي كانت تذاكر..
فطوم: احم احم..
نوره: فطووووووووم..حبيبتي.. تعالي تعالي..
فطوم تمت تحضن نوره: اشتقت لج يالدبه
نوره: انا بعد والله.. اشحالج؟؟
فطوم: بخير بخير.. خبريني.. وين الرسمه الي كان مبارك راسمها لج؟؟
نوره: ليش؟
فطوم: انتي بس قولي وين؟؟
نوره: في الكبت..
فطوم: هههههههههههه.. والله ما اتخيل..
نوره: شو السالفه؟؟
فطوم: بتستوين عروس يانوره..
نوره: شوووو.. شو اتخربطين انتي؟
فطوم: يالهبله.. مبارك خطبج..
نوره تمت فاجه عيونها وحاطه ايدها على قلبها ومب مستوعبه: شووووو
فطوم: الله الله .. ما اصدق.. ههههه .. انتي تاخذين مبارك.. جنكم قطوه وفار..
نوره: انتي من صدق ترمسين ولا تسولفين؟؟
فطوم: صدق..حتى نزلي بتسمعين غانم يرمس ابوج.. لنه ناوي ايي هالخميس يخطبج رسمي.
نوره: قولي والله؟؟
فطوم: شو بلاج.. عيونج نزلوا على ايدي شوفي..
نوره : ههه.. مب حلوه.. سخيفه
فطوم: ادري.. بس صدق والله..
نوره: معقوله؟؟
فطوم: معقوله ونص..
نوره: مبارك مبارك مال ماليزيا ماغيره
فطوم: هيه مبارك ماغيره..
نوره: هههههههههه
فطوم: تضحكين ماشاء الله.. شو رايج؟؟
توها نوره بترمس بس سكتت على صوت دقه الباب.. كانت كلثم داخله .. من شافت نوره ركضت صوبها وتمت اتصيح وهي حاضنتها..
كلثم: والله كبرتي يا نوره.. وصرتي عروس.. قاموا يخطبونج..
نوره: امييي.. فديتج لا تصيحين..
كلثم: نوره.. اكيد فطوم قالت لج؟؟ شو رايج..
نوره تمت منزله راسها مب عارفه شو اتقول.. الحيا ماكل ويها اكال.. وامها تتريا منها رد
نوره: مادري انتي شو اتقولين؟؟
كلثم: امي.. نوره.. هاي حياتج.. انتي شو رايج.؟؟ الريال ماعليه كلام.. ابوج ماعنده مانع والريال شاريج.. والكل يمدح فيه..
فطوم: بس عمي ما يعرفه كيف وافق بسرعه؟؟
كلثم: لا طلع يعرف عمه.. من زماااان.. وهو سامع عن مبارك عند عمه..
فطوم: عاشوووووو. بناكل عيش ولحم.. وناسه
كلثم: هههههه.. الي يسمعج يقول ماشاء الله دبه مسكته..
نوره: مادري شو اقول يمي.. بس الي تشوفونه زين سووه
كلثم: عيل انقول مبروك..
فطوم: عمو.. ماعليج منها.. تسوي شرات المسلسلات .. موافقه ماعليج منها..
نوره: انجبي انتي.. انا اراويج..
كلثم: مبروك عيل.. بسير اقول لأبوج..
فطوم: عاشو.. كلولولولولولوووووووووش
نوره عصبت جان اتفر المخده الي في على السرير على راس فطوم.. : يالسباله
فطوم: هههههه.. عمو.. بنتج هبله.. كيف بتيوزونها مادري..
كلثم: شيخه الحريم..
نوره: امممممموح.. فديتج والله امي..
استغلت فطوم وردت انتقامها وفرت نوره بالمخده:انا السباله احين..
نوره ردت ضربتها.. وتموا على هالحال والضحكه ما تفارقهم..
ونزلت كلثم وخبرتهم ان نوره موافقه.. وتمت الموافقه من قبل الكل.. وغانم ما قدر يصبر اتصل في مبارك وقال له انهم موافقين.. وقاله ان ابو نوره ربيع عمه.. يوم عرف مبارك استانس وايد لأن هالشي بيسهل عليه وايد.. وكلم اهله وقالهم.. الي استانسوا من قلبهم وتموا يستعدون للخطوبه.. وخذوا لها الشبكه.. وكان مبارك يحاول كثر ما يقدر انه ما يقصر بأي شي عشان نوره .. يباها تستانس ولا يكون في شي قاصر عليها..
وفي طريجهم وهم رادين البيت.. غانم طبعا ما نسى الموضوع الي قالت فطوم راح اتقوله عن مبارك..
غانم: ايه انتي بالعيوز.. تراني ما بنزلج بيتكم الا يوم اتقولين لي ليش ضحكتي يوم قلت لج ان مبارك خاطب نوروو
فطوم: هههههههه.. لأنه سلمك الله يوم وصلنا مطار ماليزيا هي دشت حمام الرياييل بالغلط.. وتمت تتالسن ويا مبارك ليش داخل حمام الحريم.. فهي من يومها ما اتدانيه ليش انها افتشلت جدامه وهو ضحك عليها
غانم: هههههههههه.. قولي والله.. ياحيهم.. وليش ما خبرتيني يومتها
فطوم: بس جيه كيفنا.. لازم اتعرف كل شي ..
غانم: هيه لازم..
فطوم: لا مب لازم..
غانم: لازم قلت لج..
فطوم:مب لااااااااااااااااااااازم..
غانم: لالالااااااااااااااااازم
اليده: أيه انتوا انجبوا.. صدعتوا بي؟..
غانم: فديتج هاتي راسج ببوسه وعقب بيطيب.. اممممممموح
اليده: سلمت والله..
فطوم: يدو.. قمل على راسج.. غانم وهو يبوسج نط القمل من راسه لراسج..
غانم: انا اراويج ما بنزلج بيتكم.. بوديج بيتنا وهناك براويج..
فطوم: ابيييييييه.. يدو.. لحقيني..
اليده: يزاااج..
فطوم: افا..
..
يوم الخميس طبعا كان هو اليوم الموعود بالنسبه لمبارك ونوره..طبعا نوره كانت وااااايد مرتبكه مب عارفه كيف راح اتجابل مبارك.. هالمره غير عن كل مره شافت مبارك فيه.. كل مره كانت تتضارب فيها وياه.. بس هالمره الوضع مختلف.. راح تقعد يمه وهي راح اتكون خطيبته.. يعني راح يصير هالإنسان شريك حياتها..
نوره: فطييييم.. والله زايغه
فطوم: خلج عاديه.. ماعليج انتي..
نوره: فطووووم والله زيااااااغ..
فطوم: ياربي منج انتي.. قلت لج خلج عاديه..
نوره: اففف الله يستر..
عواش: يلا العروس ظهري..
نوره: مابا..
فطوم: شو بلاج ما تبين.. ؟؟
ريم: هدي عمرج خلج طبيعيه..
نوره تمت تمشي واتحس ان انفاسها متتابعه وبتنقطع.. والخوف والرجفه ممتلك كل جسمها.. وكانت لابسه مخوره من يشمك لونها احمر.. مطرزه بخيوط ذهبيه.. والمكياج كان بسيط على ويهها لأنها ما تحب انها اتكثر.. تبا تطلع طبيعيه اكثر.. وشعرها الطويل المنسدل على ظهرها تمت تمشي خطواتها ببطء.. والخوف ممتلكها.. واحلى شي فيها نقشات الحنا الي مغطيه كفيها وريولها.. كانت طالعه فعلا جمييييله.. ومشت وقعدت على اليلسه الي كانوا مسوينها لهم.. وما مرت نص ساعه الا وغطو شعرها ولفت الشيله بطريقه حلوه.. بينت فيها تدويره ويها عشان يدخل مبارك الي كان مرتبك هو الثاني مب عارف شو يسوي.. والي دخلته كانت شيماء اخته الي كان ماسك ايدها ويرص عليها من الخوف والخجل الي ممتلكنه في وسط هالحريم الي جدامه.. ومن رافع راسه وشاف نوره الي كانت موخيه راسها نسى كل الي حواليه وابتسم ابتسامه عريضه اه واخيرا اتحققت امنيتي.. وصارت لي انا.. انا وبس.. فديتج يا نوره.. جمال الدنيا فيج .. ربي يحفظج لي.. وقف عدالها وكان هو اطول منها.. لكنهم كانوا مناسبين لبعض.. صحيح ان مبارك ملامحه مب لذاك الزود من الجمال الا انه كان يمتلك شخصيه حلوه واااايد.. وكانت له هيبه.. وشموخه هو الي كان مبهر الكل.. قعد حذالها وتم الكل ينثر عليهم بيزات وحلاوه.. ونوره حاسه بفرحه كبيييره في قلبها.. لكنها مفتقده لوجود علي.. الي كان بمثابه اخو لها..
مبارك: اشحالج انسه منشن..
نوره وبضحكه رقيقه: هههه... بخير يالديناصور..
مبارك: خييبه .. خلج حنونه من اول يوم.. قولي شي حلو.. ديناصور عاد.. ماعليه مقبوله منج.. بس اقول لوحه المناليزا مالتي بعدها عندج ولا طريتيها..
نوره: لا عندي...
شيما: يلا نشو.. لازم اتلبسون بعض الدبل..
فطوم: الله كشخه.. هاللحظه الي اترياها..
مريم: يالملقوفه..
شيما: خليها تتدرب حق خطيبها..
فطوم: هي وصدقها عشان اسويها في غنووم..
مبارك: عنبو.. صبوعج هب صبوع.. اقلام رصاص.. دبله يهال لازم ناخذها لها..
شيما: جب انت.. شو عرفك بالجمال.. حلاته اصلا
مبارك: لا تخافين عايبيني صبوعج..
فطوم: عاش المغازل..
نوره تمت تتطالع فطوم بنص عين على تعليقاته.. والكل مستانس كان في هاللحظه.. وغانم كل شوي يتخيل عمره في هاللحظه ويا فطوم.. حلم حياته يوم يجتمع وياها ونفس الشي فطوم.. كل واحد فيهم يفكر في الثاني..
وتمت خطوبتهم وتحدد انهم يملجون عقب ما تخلص نوره دراستها عشان ما يعيق هالشي على دراستها.. والكل كان مستانس... وكل واحد عايش حياته مرتاح ومستانس..
....


مرت الأيام عليهم وخلصوا الثانويه.. نوره يابت نسبه 89.3% علمي.. وفطوم 88.1% علمي.. وبدوا كل وحده فيهم اتجهز لملجتها .. وخوله طبعا ربت ويابت ولد سمته سيف.. وريم يابت بنت وسمته علي على اسم المرحوم.. واما هنادي كانت في شهرها الأخير.. والي عرفته انها بنت.. قالت بتسميها شيماء.. وسجلت فطوم اسمها في التقنيه.. ونوره بعد وياها طبعا.. وكل وحده راح تحقق حلمها بسعيها وتفوقها سواء في الدراسه.. او في حياتهم ويا رياييلهم..

سلامه طبعا كانت مكمله كل تجهيزاتها ليوم العرس الي تترياه .. اليوم الي كانت تتوقعه راح يتحقق مع المرحوم طلال.. بس شائت الأقدار انها تجتمع في ثاني.. الي فعلا عوضها غياب طلال.. وحبته من كل قلبها.. لأنه كان يحاول انها يسعدها بكل الطرق.. والكل كان مستانس وقتها.. ان سلامه راح تستقر في حياتها وياانسان والنعم فيه يعتمد عليه..
وثاني طبعا انهى كل التجهيزات.. عشان يحقق حلم سلامه في عرس لا صار ولا استوى.. اسوبع قبل العرس كل ليله فيه كان هناك احتفال.. ويوله ورقص وعزايم.. ليوم العرس الي كان في صاله نادي ضباط ابوظبي.. الصاله هذي من اجمل الصالات في ابوظبي.. وكان العرس بحضور مغنيين الي اتحبهم سلامه.. والي كان يحبه طلال المرحوم..
وسلامه طبعا كان فستانها مسواي عند زهير مراد في لبنان.. فستان ولا اروع.. فكره يديده وحلوه.. كان لونه طبعا اوف وايت.. وعليه تطريز بلونين الأزرق الفاااااتح والوردي.. والطرحه كانت يايه على شكل شال.. وكانت فعلا ايه من الجمال..
نزلت على انغام اغنيه راشد الماجد.. الي كان حاضر الحفله.. وماكانت متوقعه انه موجود.. واتفاجئت يوم سمعت الإغنيه تمت تمشي بين الحضور والدموع محبوسه في عيونها ودها تصرخ واتقول ياثاني احبك.. واشكرك .. لأنه اعاد ذكراه.. وثبت لها كلام الدكتور ناصر انها ممكن اتعرس ويا واحد يعيد ذكرى طلال في بالها.. ومرت الليله وزفوا المعاريس لغرفتهم فوق.. واول ما فتحت باب الغرف تفاجئت للي شافته جدامها ما قدرت تمنع دموعها من انها تنزل وعلى طول لوت صوب ثاني وحضنته بكل حب وشوق.. صحيح ان ثاني تفاجأ من ردة فعلها بس في نفس الوقت استانس يوم انه قدر يفر قلبها.. كان مزين السرير بوروود مرتبه على كلمه احبج يا ام طلال.. الي خلاها اتصيح كلمه ام طلال.. استانست لدرجه كبيره.. وتمت تحمد ربها على نعمته..

 

[meen_ana]

سلامه: والله ماتخيلت انك اتسوي هالشي..

ثاني: هذا كله شوي عليج يا احلى وأرق إنسانه في هالوجود.. يا مرت ثاني..

سلامه: امممم.. انزين ممكن تطلع برع احين..

ثاني: خيبه ليش تطرديني انزين..؟

سلامه: لأني وبكل إختصار أبا ابدل واسبح..

ثاني: بس يمكن تحتاجين مساعده ولا شي..

سلامه: لا ما بحتاج شي.. كل الي اباه تطلع برع..

ثاني: شريه هالحرمه من اول يوم تطردنا..

ظهر ثاني من الغرفه وبندت سلامه الباب.. وتمت تتحايس في الغرفه ومب عارفه شو اتسوي.. كانت مرتبكه .. لأن هالليله راخ تتغير مجرى حياتها كليا.. وكل شي راح يتغير.. من اليوم وصاير دخل حياتها انسان يديد راح يشاركها هالحياة مدى العمر..

تم ثاني يترياها لين ما تظهر.. بس الظاهر تأخرت واايد.. لأن مر تقريبا أكثر من ساعه وهي بعدها ما ظهرت ولا فتحت الباب .. خاف عليها.. جرب من عند الباب ودق على الباب..

سلامه من خوفها وربكتها من بعد ما ظهرت من الحمام وسبحت تمت ياسه في الحجره خايفه تظهر..

ثاني: سلامه.. شفيج .. مب جنج تأخرتي؟؟

سلامه تمت ساكته.. ويوم سمعت ثاني ارتبكت زود وتمت ترتعش خايفه..

ثاني: انزين انا ابا اسبح يالظالمه .. طاردتني من الغرفه.. ترا بنام على الكنبه..

سلامه من سمعته بسرعه ربعت صوب الباب وفتحت الباب وانخشت ورى الباب مستحيه انها تظهر جدامه بهالمنظر واللبس.. لأنه العنود إختها سوت فيها مقلب.. شلت شنطه الثياب كلها وخلت لها .. لبس النوم ولبس الصباحيه بس.. وباقي الثياب شلتها.. وكانت حاطه لها ورقه على اللبس..

(( لازم تتعودين من اليوم وساير وبلا دلع))..

ثاني دخل الغرفه استغرب يوم ما شافها عرف انها منخشه ورى الباب.. : احم احم.. تراني دخلت..

سلامه: بسرعه روح الحمام ولا تتطالع..

ثاني: شو ماطالع؟؟

سلامه: ماشي ماشي..

كانت منخشه ورى الباب ومستحيه من خاطرها.. مب عارفه شو اتسوي.. ترتجف من راسها لريولها..

ثاني صابه فضول وده يعرف شو سالفتها هالبنت.. مشى شوي شوي صوب الباب عشان يشوف سلامه.. وهي كانت منزله راسها ومستحيه ومب منتبهه له.. انصدم يوم شاف سلامه جدامه وبهالجمال.. ابتسم وفهم هي ليش منخشه .. : مندسه عني ماعليه..

فهاللحظه حست سلامه بقرب ثاني منها.. صدت صوبه وشافته .. ماتت حيا واحمرت خدودها من الخاطر.. ونزلت راسها زود.. ابتسم لها ثاني وراح الحمام..

=-=-=-=-=-=-=

في الدرب.. كانت فطوم في موتر غانم طبعا وياها يدتهم.. واليده من التعب كانت حاطه راسها على السيت وراقده..

فطوم: وحليلها يدوو تعبت .. ورقدت..

غانم: هي وحليلها.. شو العرس؟؟ كان حلو.؟؟

فطوم: هي ماشاء الله العروس كانت طالعه اتخبل.. وسلامه اصلا احلى من العنود..

غانم: لا انا مب وياج في هالشي.. لأن انا عندي الي احلى عنهن كلهن..

فطوم صدت صوبه وهي مستغربه.. : منوووو؟؟

غانم: منو غير فطومه قلبي..

استحت فطوم من رمسته ونزلت راسها.. وابتسم لها غانم وكمل الدرب صوب بوظبي.. وكان مقرر طبعا بعد شهر من هاليوم ملجه غانم وفطوم.. ومن بعدها بإسبوع ملجه مبارك ونوره.. كانت الأفراح متتاليه في عايله بوخالد وبوعبدالله ماشاء الله من بعد المشاكل الي مروا فيها في الفتره الأخيره..

=-=-=-=-=

في بيت هنادي..



طبعا هنادي ماسارت العرس وهذا بسبب ظروف حملها والتعب الي حاسه فيه.. ولأنها في الشهر الأخير.. كانت ياسه ويا ريلها بوعلي.. وتحس بآلام بسيطه في بطنها بس أهملت هالآلام على اساس انه بعده على موعد ولادتها باقي اسبوع..

هنادي: بوعلي؟... تبا اسوي لك جاي؟؟

بوعلي: ياحرمه اقعدي .. من الصبح وانتي تحوطين في هالبيت وترتبين وتشتغلين ارحمي حالج.. مابا شي... تعالي يلسي وجابليني..

هنادي: وانا من لي غيرك اخدمه وجابله في هالدنيا قول لي..

بو علي: ربي يخليج لي.. ولبنتنا ان شاء الله.. يلا عاد خل تنولد لأني مشتاق لها بالحيل..

هنادي: هي والله انا بعد ودي اشوفها..

بوعلي: شو بنسميها؟؟

هنادي: ظبيه؟؟

بوعلي: على اسم امج؟؟

هنادي: هي ودي اسميها ظبيه على اسم امي..

بوعلي: خلاص افا عليج.. ظبيه ظبيه.. ماعندي اي مااانع..

هنادي: تسلم لي والله..

ونشت هنادي عشان اتييب الجاي لأن الماي فار خلاص .. تمت تمشي صوب المطبخ واتحس بالآلام اتزيد عليها.. لين ما وصلت المطبخ وشلت الصينيه من بعد ما سوت الجاهي.. حست بالألم زاد بالمره وانهد حيلها.. ومارامت وطاحت الصينيه من ايدها.. ومن سمع بوعلي الحشره نش من مكانه يربع يشوف شو صار.. شاف الصينيه طايحه وهنادي مب رايمه تتحرك وهي قابضه عمرها على كبت المطبخ.. مسك ايدها بسرعه وياب عباتها وركبها الموتر ومشى صوب المستشفى..

هنادي: لا تسرع بوعلي دخيلك..

بوعلي: شو ما اسرع ماتشوفين حالتج كيف..

هنادي: ماعليه .. بنوصل ان شاء الله.. دخيلك اتصل في كلثم اختي.. وامي..

بوعلي: ان شاء الله..

واتصل بوعلي في بيت كلثم وردت عليهم نوره وقال لها عن هنادي عشان اتخبر امها ومن بعدها اتصل في غانم الي كان توه واصل البيت..

بوعلي: مرحبا غانم اشحالك؟؟

غانم وهو مستغرب من اتصاله في هالوقت المتأخر.. : مرحبتين كبار.. بخير.. خير شو هالإتصال الغريب.. عمتي فيها شي؟؟

بوعلي: هي شكلها بتربي اليوم.. فلو تقول لعمتيه اتيي المستشفى..

غانم: يدو هني في الموتر عندي.. خلاص احين بييبها المستشفى..

وبند غانم عن بوعلي.. وقال ليدته عن وضع عمته وفطوم احتشرت الا اتروح وياهم.. وساروا سوى صوب المستشفى..

وراحوا المستشفى.. وهناك شافو بوعلي واقف في غرفه الإنتظار لأنهم دخلوا هنادي غرفه الولاده .. وصلت لهم كلثم بعد في هالوقت.. وتموا ينتظرون هنادي لين ما تظهر الممرضه واتطمنهم على حالتها.. طبعا اليده احتشرت في المستشفى وغصب طيب دخلت عند هنادي غرفه الولاده.. ومن شافت هنادي امها ارتاحت نفسيتها شوي لأنها شافت حد يهون عليها..

وفطوم من التعب الي كانت حاسه فيه .. من بعد العرس والتعب والدرب ها كله ياها نوم.. وهي كانت يالسه على الكرسي في غرفه الإنتظار غفت عينها ونامت.. وياسه حذالها عمتها كلثم.. دش عليهم غانم وشاف فطوم وهي راقده..

غانم: فديتها تعبانه..

كلثم : نعم؟؟

غانم افتشل.. : لا .. ماشي.. اقول رقدت..

كلثم: هي.. من التعب ليش خليتوها اتيي جان وديتها البيت..

غانم: هي روحها احتشرت ماتعرفين فطوم وحركاتها..

كلثم: وحليلها.. فطوم حبيبتي..

فطوم تمت تحج عيونها بإيدها.. وهي تفتحهم شوي شوي.. : هلا عمو.. شو ربت؟؟

كلثم: لا بعدها.. عمو ردي البيت احسن خل غانم يوصلج.. تعبانه مب زين عليج..

فطوم: ها.. لا ابا اتم..

كلثم: ترا انا ويدتج وبوعلي موجودين بس نسد.. ويوم بتربي باجر تعالي لها وزوريها.. بس مب زين لج تعبانه جذي واتمين هني..

فطوم: خلاص مب مشكله انا برد البيت.. وين غانم خل يوصلني..

كلثم: يلا فديتج.. سلمي على امج..

فطوم : ان شاء الله.. يلا غنوم وصلني..

غانم: بشكارها انا.. غنوم.. يلا امشي..

فطوم مشت ورى غنوم وخاطرها تنام وما تتحرك من مكانها بس من التعب مشت غصبن عنها عشان تركب الموتر وترد البيت.. ومن وصلت الموتر يلست ورقدت.. تم يطالعها غانم وابتسم.. كان شكلها طالع بريء وااايد وهي راقده.. وصلها البيت وتم يهمس بإسمها عشان تنش وتنزل.. ونزلت من الموتر ولا هي بحاسه بشي .. غير كل تفكيرها كيف توصل الغرفه وتنام ومن وصلت امها كانت في الصاله تترياها..

أم خالد: ها امي طمنيني شو حال عمتج؟؟

فطوم وهي نفسها في الرقاد..: بخير.. بعدها ماربت..

أم خالد: فيج رقاد.. روحي يمي صعدي غرفتج ونامي..

ومشت فطوم وسارت غرفتها ومن دخلت وفتحت الليت وشافت السرير ماحست بعمرها غير راقده وبسابع نومه.. وبثيابها..

دشت عليها امها وشافتها بهالحاله.. قومتها عشان تبدل وبدلت وصكت الليت ولحفتها وظهرت من الغرفه..

=-=-=--=

اليوم الثاني انتشر خبر ولادة هنادي عند العايله كلهم.. والكل كان مستانس من الخاطر لهالخبر.. وكانوا مجتمعين عند هنادي يتحمدون لها بالسلامه ويباركون لها بالبنوته اليديده الي انضمت للعايله..

غانم: شو قررتوا اتسمونها؟؟

بو علي: والله قررنا انسميها ان شاء الله اذا الله راد.. ظبيه على اسم عمتيه..

اليده وهي مستانسه: فديييت بنتي عيل يوم افتكرت فيني وسمت بنتها على اسمي..

نوره وهي تتطالع امها: الله يسامحج امي يوم ما سميتيني ظبيه.. خلاص احين بسير اغير اسمي..

كلثم: ويدي.. وانا اشعلي.. قولي لأبوج هالرمسه هو الي سماج هب انا..

فطوم: اكيد احين ظبيو بتغدي حلوه شرات يدو..

غانم: دام ان العايله كلها متيمعه ابا اشاور عمي في موضوع بوجود فطوم والكل..

بوخالد: خير ياولدي شو الموضوع؟؟

غانم: والله ياعمي ودي ان بدال الملجه تخلونها عرس مره وحده.. اشله كل هالتأخير..

فطوم فجت ثمها متفاجئه من طلب غانم وفي نفس الوقت مفتشله من الكل يوم صد يطالعها هي ويا غانم..

بوخالد: والله يا غانم انا ماعندي مانع بالمره.. واعتبر فطوم حرمتك من احين لو بغيتها.. هذي جدامك ياسه إسألها وشوف شو بترد عليك؟؟

غانم استانس لرد عمه.. وصد صوب فطوم.. : ها فطوم ما قلتي رايج بالكلام الي قلته..

اليده وهي تضربه بعصاته على ريله: صدق ويهك لوح وماتستحي.. ولا جنه عندك أبو تشاوره قبل لا ترمس.. وتدريبها البنت مفتشله تسألها وتفشلها زود..

بو عبدالله: ههههه.. امي هوني على الولد تراه معرس.. وغانم شاورني وسوى الواجب وانا قلت له يرمس عمه..

اليده: هي اذا جيه زين.. ها فطوم ما رديتي علينا..

فطوم كانت ميته من الحيا.. ومن كثر الحيا ربعت بسرعه وظهرت من الغرفه ولحقتها نوره.. والكل تم يضحك عليها..

اليده وهي معصبه.. : ويدي.. وليش تضحكون على بنتي.. يلا اسكتو عن امرغكم بهالعصا..

غانم: لاحوووووول.. اقول يدو انا بكتب على بطاقه العرس.. ممنوع اصطحاب العصي بدال الأطفال..

خوله: لا عاد هالشي الوحيد الي مستحيل تستغني عنه يدتي..

نش غانم وظهر من الحجره يشوف فطوم.. وشافها واقفه في الممر ويا نوره.. : يالفشيله.. دشي فضحتينا واقفه برع جنج سيلانيه رايغينها من الحجره..

فطوم: لا والله..

نوره: بخليكم عيل..

فطوم وهي تسحب نوره من عباتها: وقفي مكانج ماشي طلعه..

غانم: ههههه خايفه اكلها.. يلا جدامي.. سمعي كلام ريلج ولا ترا بشتكي عند ابوج..

فطوم وهي ترفع راسها وتعدل شيلتها بسرعه .. وتمشي جدامه عشان تدخل الغرفه.. صد غانم صوب نوره ويغمز لها.. : حريم ما ايون الا بالعين الحمرا..

تمت تضحك عليه نوره.. ودخلوا داخل.. ويلست فطوم حذال يدتها.. صدت صوبها اليده تمت اتصاصرها..: ها يدوو شو رايج؟؟

فطوم: تهقين يمدي لي خلال شهر ازهب؟؟

اليده فجأه وهي ترفع صوتها .. : هيييي.. ليش شو تبين اتسوين الا هو زهاب..

فطوم من الفشيله لأن الكل صد صوبهم خشت عمرها ورى يدتها..: وطي صوتج فضحتيني جدام الكل..

اليده: ايه.. وانتوا ليش تتطالعون بنتي يلا صدوا عنها..

الكل: هههههههه..

أم خالد: شوفيها فطوم؟؟

اليده: اتقول ما بيمدي لها تزهب في شهر..

مريم: هي وانا بعد اقول جي.. لو اتخلونه بعد شهرين يكون أحسن..

اليده: ها شو قلتي فطوم؟؟

فطوم ابتسمت وهزت راسها بمعنى موافقه.. ومن شافتها ام عبدالله .. نشت اتيبب.. مسكها بو عبدالله ويلسها: فضحتينا عنبوج من حرمه.. يايين انزور الحرمه توها مربيه ويبالها ترتاح وانتوا مسوين حشره هني.. يلا نشوا كلكم ظهروا..

هنادي: لا والله تموا.. بالعكس مستانسه لقعدتكم..

وفي هالوقت الكل سمع دقه باب.. نش غانم بما إنه كان قريب من الباب يشوف منو.. من فتح الباب شاف مبارك خطيب نوره.. وياه امه واخته شيما وفي ايدهم باقه ورد كبيره..

غانم: هلا والله اقرب اقرب.. والله واكتمل شمل العايله احين..

الكل استغرب عن منو يرمس غانم.. صدوا صوب الباب يشوفون منو.. ماقدروا يشوفون حد لأن باقه الورد كانت مغطيه ويوهم.. لين ما نزل مبارك الباقه على الأرض الكل صد صوب نوره الي كانت ميته حيا .. خصوصا انها ماشافت مبارك من يوم الخطوبه.. نزلت راسها وتمت تلعب بأطراف صبوعها.. والكل نش يسلم.. ومن بعد القعده والسوالف.. عرف مبارك من غانم موضوع الزواج..

مبارك: والله تستاهل.. ياحيك بتعرس.. مب نحن بنخيس..

غانم: افاعليك.. ليش اتخيس؟؟ ليش ما نعرس سوى في نفس اليوم..

مبارك: يستوي.. ياريت والله ..

غانم: ههههه.. وليش ما يصير.. منها نوفر المصاريف.. ومنها نعيل العرس..

مبارك: والله على ايدك..

غانم: احم احم..

ام عبدالله: تبا ماي؟؟

اليده: لا شكله وده في العصا..

غانم: حرام عليج يدوو.. لا مشكوره امي.. ممكن ارمس احين؟؟

اليده: ارمس اشوف شو بتخربط بعد..

غانم: الله يسامحج.. بس الموضوع ومافيه اني قلت لمبارك عن موضوع زواجي.. والريال غيران.. قالي ارمس عمي بونوره لو يوافق يجدمون العرس بعد...

 

[meen_ana]

ترى مابقى شي على نهايه القصه ناطره تفاعلكم عشان انزل لكم التكمله اوكي انا بروح العزيمه اذا رديت ان شاء الله بكملها

 

[غرنوووقه]

ترووووحين وترديييين بالسلامه
تسلميييييييييييييييييييييييييين
اما اذا تبين تفاعل ما عليج الحين اسويلج معادلة شكر <<بنت علمي

 

[غرنوووقه]

تروحيييييييين وتردييييين بالسلامه
:ggdw:تسلميييييييين:ggdw:
اما على التفاعل ألحييييين اسوييييلج معادلة شكر <<بنت علمي
:e3:
:e3:
:nbvppw:
:e3:
:e3:

 

[meen_ana]

تسلمين حيااتي واليوم بختم لكم القصه يديده ترقبوهاا

 

[meen_ana]

نشت نوره وتوها بتظهر من الغرفه .. رفعت اليده العصا جدامها تمنعها تخطف.. : شو ناويه اتعيدين فلم فطوم..

الكل: ههههههه..

اليده: انثبري مكانج.. اسمع بو نوره.. جان بتسمع شوري..

بونوره: افا عليج.. انتي تاج روسنا .. شورج عالعين والراس..

اليده: شو رايكم اتخلون عرس فطوم ونوره في نفس اليوم؟؟

بو نوره: والله انا ماعندي مانع بالمره.. مبارك ولدنا.. وغانم ولدنا.. وحلو يوم نخلي الفرحه فرحتين بعرس عيالي الإثنين..

مبارك ابتسم واستانس.. ونوره نزلت راسها وتمت تتحايس ببوزها وتحرطم بصوت واطي.. وليش ان ريم مرت فيصل كانت جريب منها سمعتها.. : شفيج غديتي يدوو..

نوره: محد شاورني..

ريم: هههههه.. انزين ومحد سأل البنت شورها..

الكل صد صوب نوره الي انصدمت من رده فعل ريم وعصبت ليش انها فضحتها..

اليده: نحن ما بنخطي خطوه من غير ما ناخذ بشورها شرات ما خذنا بشور فطوم.. ها نوره شو رايج..








نوره صح انها خجوله.. بس هاللحظه كانت حاسه بجرأه على غير عادتها.. رفعت راسها واتطالعت مبارك بنظره خبيثه.. وصدت صوب أمها الي كانت ياسه مجابلتها.. وتمت ساكته شوي..

مبارك وهو يطالع الصوب الثاني.. ويتحرطم لغانم..: هاي شكلها مب ناويه اتوافق.. خل اظهر احسن لي..

غانم: استهدي بالله واتريا انت بس..

نوره وهي منزله راسها.. : ماعندي مانع .. والشور شوركم.. والي تشوفونه..

وفي هاللحظه الكل استانس من الخاطر.. وحسوا ان ولاده ظبيه فال خير عليهم.. لأن من قعدوا واجتمعوا عشانها.. والمفاجآت ما تنقطع عليهم.. وغير الأخبار الحلوه الي يتهم بقرار ارتباطهم..



=-=-=-=-=-=-=

الكل روح البيت وتمت فطوم ياسه عند عمتها ومعاها نوره.. قالو بيباتون وياها..

هنادي: انزين يالعرايس.. مستانسين احين؟؟

فطوم: ههههه.. لا عادي..

هنادي: هيه علينا.. الا طايرين من الفرحه..

نوره: اتصدقين خالو.. ماتخيل عمري بعرس في نفس يوم عرس فطوم.. كيف؟؟

هنادي: عادي بسيطه.. بسوون كوشتين.. وطبعا بيخلون حاجز ما بينهم عشان ريل كل وحده ما يشوف الثانيه.. والفرحه بتكون فرحتين..

فطوم: اقول انا عطشانه بنزل الشوب الي تحت وباخذ لي شي..

نوره: مفتوح احين؟؟

فطوم: هيه عنبو الساعه 8 يادوب.. بس الزيارات الي خلصت بس الشوب ما ظني بيصكون..

نوره: بيي وياج.. تبين شي خالوو؟؟

هنادي: سلامتج خالو..

ظهرت فطوم ويا نوره من الغرفه وتموا يسولون ويضحكون وكل وحده تعلق على الثانيه.. وقفوا عند باب المصعد ويتريون المصعد يوصل للطابق الي هم فيه عشان ينزلون.. بعد خمس دقايق انفتح باب المصعد.. ودشت فطوم المصعد من بعد ما ظهر منه واحد.. وتوه بيصك باب المصعد رد نفس الشخص ضغط على باب المصعد عشان يفتح.. وفتح.. فطوم ونوره استغربوا منه.. رفعت راسها فطوم تشوف الريال.. انصدمت.. كان يطالعها وهو مبهت فيها..

هزاع: اشحالج فطوم؟؟

نوره كانت مستغربه.. شو يايبنه هالريال.. ؟؟ وشو عرفه بفطوم..

فطوم: خير شو بغيت..

هزاع: انا اسف على كل الي سببته لج من مشاكل..

فطوم: خلاص مسموح دخيلك لا تحرجني زود في هالمكان العام اكثر..

هزاع: المهم طمنيني عليج.. ؟؟ شو سويتي في الثانويه؟؟

فطوم: نجحت الحمد لله.. يلا فارج..

هزاع: وشو عرستي ولا شي؟

فطوم: هي بعرس بعد شهرين..

هزاع: قولي والله.. مبرووووك تستاهلين.. انا بعد عرست ومرتي ربت من يومين.. يابت ولد..

فطوم: انزين مبروك يلا فارج..

هزاع: مستحيل اني انساج يا فطوم.. صح علاقتي كانت وياج قصيره بس سوالفج دايما اتذكرني فيج.. وخصوصا ويهج ما انساه..

فطوم: بس بيحترق فص المصعد .. دخيلك لا تسوي لي مشاكل وروح لحرمتك احسن..

هزاع: اسف.. مع السلامه..

وترك هزاع فص المصعد وانصك باب المصعد.. صدت نوره صوب فطوم.. : منو ها؟؟

فطوم: هذا هو هزاع؟

نوره وهي فاجه عيونها: والله.. صدق ويهه لوح..

فطوم: صخي عنه الله يخليج مابا اتذكر الي ياني من وراه.. المهم يلا وصلنا الشوب.. شو بغيتي..



=-=-=-=-=

ومرت الأيام وكانو فطوم ونوره كل يوم مطيحين في السوق يتشرون ويتزهبون ويدورون في محلات ايجار الفساتين عشان يأجرون لهم فستان لأن مستحيل يحصلون مصمم يخيطه في شهرين..

مريم: فطوم تبين رايي..

فطوم: شو قولي؟؟

مريم: شفتي فستان سلامه.. كان رهيب وايد حلو.. ومحد شافه غيرنا.. ليش ما تأجرينه منها..

فطوم: والله فكره.. ليش لا؟؟

نوره: وانا شو اسوي؟؟

مريم: انا برمس سلامه والعنود جان عندهم حد من رباعتهم ولا اهلهم في بوظبي مفصل عشان تأجرينه منهم .. شو رايج؟؟

نوره: خلاص والله تسوين خير..

=-=-=-=

ومرت الأيام وكان باقي شهر واحد على العرس.. وتقاسموا اهل غانم ومبارك بيزات الخيمه الي راح يطلبونها من البداد على حسب عدد معازيم كل واحد فيهم.. ومبارك طبعا راح يسوي يومين قبل العرس حفله للرياييل عند بيتهم.. وغانم راح يسوي حفله الرياييل الليله الي بعد حفله مبارك عشان الكل يحضر في حفله الثاني.. وكانوا هم الإثنين بعد مشغولين في حجوزات شهر العسل وتجهيزات العرس وغيره.. ومتحمسين..

غانم ومبارك انحرموا من شوفه حريمهم خلال هالشهر.. مبارك ما كانت تفرق عنده لأنه بالأساس ماكان يرمس نوره.. الا جان بالدسه فطوم كانت تتفق ويا غانم ويخلونهم يرمسون بعض.. وفطوم وغانم طبيعي يرمسون بعض لنهم عيال عم..

غانم: انا اراويج يالسباله.. عيل ايي بيتكم وما تظهرين لي..

فطوم: ههههه.. كيفي مابا اظهر لك.. عشان تشتاق لي..

غانم: من ناحيه الشوق.. فأنا ميت شوق..

فطوم: ياويل حالي عيل..

غانم: أحبج يابنت عمي أحبج...

فطوم: اقول مريوم تناديني بروح لها اوكي..

غانم: اونها استحت.. انا اراويج.. روحي..

فطوم: هههههه.. يلا مع السلامه..

وبندت فطوم عن غانم وحطت راسها ونامت لن وراها شغل وايد على راسها اليوم الثاني .. لأن ماباقي على العرس شي..

=-=-=-=-=-

مريم: تدري وايد متحمسه لهالعرس..

إبراهيم: ليش يعني؟؟ بيطلع احلى عن عرسنا ما اعتقد..

مريم: هههههه.. لا بس لأن عرس بنت عمتي واختي وولد عمي..

إبراهيم: ومبارك مقطوع من شيره حاله من حالي..

مريم: ههههه.. منو قال انك مقطوع من شيره.. بالعكس انت مقطوع من قلبي..

إبراهيم: فديت هالقلب انا.. ياما عذبني وسهرني ليالي.. لازم اعذبه احين..

مريم: وهي تنش عنه عشان تشرد لأنها عرفت نواياه..: لا دخيلك.. شرده يا جماعه..

إبراهيم نش يربع وراها ويصك الباب قبل لا تظهر.. : ماشي شرده اليوم.. تعالي اقول لج..

مريم: ههههه.. مابا..

إبراهيم: ماشي شرده.. غرفه فيها اربع يدران ودريشه .. وباب مقفول.. وحمام مابخليج اتروحين له.. شو بتسوين؟؟

مريم: اهئ اهئ اهئ.. شكلي انهزمت..

إبراهيم: ههه.. فديت الي يصيح انا تعالي احضنج.. تعالي..

مريم: مابا زعلانه..

إبراهيم: إزعلي انا اعرف اراضيج..

وراح إبراهيم وبند الليت.

 

[meen_ana]

ومرت الأيام وعدت.. وصلنا ليوم حفله الرياييل في بيت مبارك.. كانت الربشه ماليه المكان كله.. الكل كان مستانس ومتفاعل من الخاطر.. وحتى غانم.. نسى نفسه انه معرس بعد.. نش وايول ويا اليويله.. وهالشي الي شجع مبارك نفسه انه ايول.. يوم شاف عبيد وثاني وعبدالله وخالد وفيصل والرياييل كلهم ايولون.. وغانم وياهم.. نش من مكانه وراح ايول وياهم.. ومرت الليله ولا أحلى.. والكل طبعا كان معزوم لحفله غانم الي كانت مب أقل روعه من حفله مبارك..

كان عبيد ومرته ناعمه.. والعنود وناصر وسلامه وريلها والكل كانوا يايين دبي وبايتين في فندق عشان يحضون هالعرسين الي على قولتهم يوم عالمي لا يتفوت..

في حفله الرياييل عند غانم..

كان جاسم ريل عواش (إخت ريم مرت فيصل).. يالس وحذاله ولده مطر: ها ما تبا اتيول وياهم..

مطر: مابا.. امي عايشه قالت لا عشان ما يحسدوني..

جاسم: اشعليك من امك.. اسمع كلام ابوك..

فيصل: ههههه اتشيش الولد على امه..

عبيد: خل تسمعك عواش..

مطر: انت بابا ليش ما اتيول انزين..

جاسم: ها.. لا بس توني ماكل ماروم بابا..

مطر: انت قوم وانا بقوم وياك..

جاسم: يلا بتحداك..

عبيد: عاشووو..

نش جاسم ويا ولده وتموا ايولون ويا بعض.. رغم ان مطر كان صغير بس كان يعرف ايول بطريقه حلوه.. كانوا طالعين ثنائي حلو.. تم عبيد يصورهم بالتليفون.. وغانم طلب من المصور يصورهم.. والكل يلس تم يطالعهم.. ومن بعدها نش ثاني وايول وياهم وكانوا صدق متونسين.. وخلصت الحفله ورد كل واحد لبيته.. جاسم رد للفندق ومعاه ثاني وناصر وعبيد.. لأنهم كانو حاجزين في نفس الفندق.. دش جاسم الغرفه وشاف عواش تترياهم..

عواش: ها شو كانت الحفله..

مطر: وااايد حلوه ماما.. بس انا سويت شي.. ما بتزعلين مني؟؟

عواش: شو؟؟

مطر: يلت ويا بابا..

عواش:والله.. افا فاتني.. اكيد غلبت ابوك..

مطر: اكيد..

جاسم: روح اصلا انا معلمنك..

مطر: انا روحي اعرف..

جاسم: انزين يلا ادخل الغرفه وارقد باجر ورانا يوم متعب .. ويا صالونات امك..

مطر: هي انا برقد.. تصبحون على خير...

باس راس امه وابوه وسار رقد.. ويلس جاسم حذال عواش وشبك ايده بإيدها .. وحط ايده الثانيه على بطنها الي بدا يكبر شوي من أثر الحمل..

جاسم: ها شو الحمل وياج؟؟

عواش: الحمد لله.. صح تعب.. بس وجودك يمي شايل عني التعب..

جاسم: فديتج والله.. يلا نشي خل نرقد لأن باجر وايد بتتعبين فإرتاحي وخزني طاقه..

عواش: هي والله صدقك..

=-=--=-=

في غرفه عبيد.. الي كان صدق مرتبش.. دش وهو يغني وايول.. كانت ناعمه ميته من الضحك عليه وعلى حركاته..

ناعمه: هههههه اشفيك؟؟

عبيد: مستانس حبيبتي.. ومتوله عليج..

ناعمه: مو مبين..

عبيد: لا والله.. شو شايفتني ما احبج؟؟

ناعمه: لا..

عبيد: ااااااه من هالحرمه بتذبحني.. وين سويج الليت..

ناعمه: لا لا لا.. صدقت صدقت..

عبيد: حسبالي بعد..

ناعمه: هههههه .. احبك..

عبيد: شو ما سمعت ردي عيدي..

ناعمه وبكل برود وهي تحرك شعرها المبلول بالماي على الصوب الثاني من جتفها.. : أ..ح.. بك..

عبيد: لا انتي ناويه تذبحيني.. اموووووووووووووت فيج..

ناعمه: خف صوتك الكل سمعنا..

عبيد: خل يسمعون.. الغرفه الي على اليمين ثاني وسلامه اكيد يتغزلون في بعض.. والي على اليسار.. العنود وناصر.. وهاييل مب اقل عنا..

ناعمه: لا لا لا.. محد كثرنا..

عبيد: اكيييييييد..

=-=-=-=-=

عند عنود كان الجو رومانسي للغايه.. كان الليت خافت في الغرفه.. وناصر سادح على الكنبه وحاط راسه على ريل العنود.. وهي تلعب بشعره.. وتتطالع في عيونه..

ناصر: آآآآآه منك يا عنود.. لقد أسرتيني..

عنود: لا ترمس جي لا.. (وهي تضرب على يبهته).. ههههه اتضحك والله اتحسسني كني اتابع فلم تاريخي..

ناصر: ههههه.. أحبج بكل اللهجات واللغات والله..

عنود: انزين ما يحتاي ترمسني بهاللهجات..

ناصر: فديتج.. اقول.. شو تتوقعين سلامه وثاني يسوون احين..

عنود: يالسخيف.. شو شو تتوقعين.. ريال ومرته اشعليك انت..

ناصر: تتوقعين عايشين الي نحن عايشينه؟؟

عنود: لا .. محد يعيش الحب شراتنا..

ناصر نش من مكانه بسرعه وقبض عنود من راسها.. : امممممممموح (باسها على خدها)..

عنود احمرت من الخجل وصفعته على الخفيف على خده..

=-=-=-=-=-=-=-=

أما عند ثاني فكان الجو مختلف تماما.. ما يخلو من الضحك والسوالف.. من دخل ثاني تم يسولف ويا سلامه عن الي صار في الحفله بالتفصيل ونش ايول لها يراويها كيف كان ايول.. وسلامه كانت متخبله عليه وعلى حركاته.. وميته من الضحك.. ومستانسه من الخاطر ان الله رزقها بريل شراته.. فاهمنها وفاهم الي هي اتحبه..



=-=-=-=-=-=-=

طبعا المعاريس ما ياهم نوم بالمره في هالليله .. كل واحد ينتظر بزوغ شمس اليوم الموعود.. يوم زواجهم.. واليوم الي الله بيجمعهم فيه مع حبهم.. اليوم الي بيكتمل فيه الحب وبيعلن انتصاره.. وبيعلن بدأ حياة جديده كلها فرح وسعاده..

ومرت الساعات وشرق شمس اليوم الموعود..

الخميس 2/8/2004

يوم زواج كل من

غانم & فاطمه

مبارك & نوره

كان هاليوم مثل الحلم بالنسبه لهم.. وكان الكل مشغول .. مريم كانت ويا فاطمه ونوره الي كان مقرر ان هيفاء اتييهم البيت عشان اتعدل العرايس لأن الخيمه منصوبه جدام بيت فطوم لأن في براحه عوده اتسد الخيمه جدامهم.. وريم خوله وسلامه والعنود وناعمه وعواش كلهم ساروا صالون إيمان عشان يتعدلون هناك.. مريم في هاليوم كانت تعبانه شوي... ومب على حالها.. مب عارفه السبب .. بس حاولت اتقاوم التعب لأن هاليوم يوم عرس اختها الوحيده.. ومستحيل اتفرط في اي دقيقه اتمر عليها..

فطوم طبعا راح تلبس فستان سلامه.. ونوره لقوا لها فستان لربيعه سلامه عرست قبل نوره بإسبوع يعني الفستان يديد ومحد شافه.. وكانوا متفقين على اساس ان كل وحده فيهن تدخل الصاله روحها عشان تاخذ حقها من الناس.. وماتغطي اي وحده فيهن على الثانيه.. وكانوا طالبين من قسم الكوشات انهم يحطون اضائات خاصه على كل كوشه بحيث تنطفي إضاءة كوشه الي توصل قبل وما تبين لحين تدخل الثانيه وتقعد.. وكانوا مسوين حاجز بين الكوشتين عشان يغطون على بعض..

ومرت الساعات وحان موعد دخول فطوم قبل نوره بناء على طلب نوره نفسها .. لأنها بعدها ماكانت جاهزه كليا.. وقفت فاطمه عند باب الصاله وتنفست نفس عميق.. ودخلت الصاله على انغام موسيقى كلاسيكيه.. كانت طالعه آيه من الجمال.. وتمت تمشي برقتها وهي قابضه الباقه بإيدها والإبتسامه الرقيقه ما تفارق شفاتها.. وسلامه كل ما تشوف فاطمه تذكر يوم عرسها يوم كانت لابسه ذات الفستان وتبتسم.. وصلت فطوم لكوشتها وقعدت .. وبعدها بعشر دقايق أعلنوا دخول نوره .. الي دخلت هي الثانيه وابهرت الكل بدورها بجمالها ورقتها .. كانت نعومه بشكل كبير.. ولأنها اصرت يسوون لها ميك اب خفيف كانت طالعه طبيعيه للغايه.. ومشت على انغام موسيقى كلاسيكيه مختلفه عن الموسيقى الي دخلت عليها فطوم.. ولين ما وصلت لكوشتها ويلست وفتحوا الأنوار صوب فطوم.. الي كانت مستانسه يوم شافت دخله نوره.. كأنها كانت حاضره عرسها ولا كأنها هي بعد عروس.. وكل وحده فيهن كانت آسره الكل بجمالها الخاص وملامحها.. والكل كان مستانس من الخاطر ومستانس..

عواش كان جاسم حاشرنها بالمكالمات..

عواش: شوفيك؟؟

جاسم: ماشي ابا اقول لج ياويلج لو رقصتي .. تراج حامل..

عواش: ههههه.. ماعندك سالفه.. انا اصلا ماعرف ارقص..

جاسم: لا تعرفين وبترقصين لي بس بعد ما تربين..

عوااش:انزين مو وقته خلني مشغوله في العرس..

جاسم: احبج..

عواش: وانا بعد والله..

ومرت الليله واعلنوا دخول المعاريس.. وقرروا يدخلون بالأول مبارك ويا ابوه ومعاه خوال نوره الي هم بوخالد وبو عبدالله.. وكانو مغطين فطوم عشان ما يشوفها مبارك.. وكان مبارك مستانس من الخاطر اخيرا شاف نوره.. وهالمره غير.. هي حرمته.. مرته وحليلته جدام الناس والخلق كلهم.. ومن بعد ما ظهر بومبارك راحوا بوخالد وبو عبدالله ويابو غانم الي كان متحرقص عند الباب يتريا يدخلونه ومعاه خالد وفيصل اخوان فطوم.. من بعد ما غطوا نوره.. الي كان داش والضحكه شاقه بوزه.. ومن وصل الكوشه تم خالد ويا فيصل ايولون ويترقصون وهم من الخاطر متونسين..



ومرت اللحظات الحلوه عالسريع.. وكانوا حاجزين كل من مبارك وغانم التذاكر لماليزيا على اليوم الثاني الليل السفر راح يكون لشهر العسل.. وراح يكونون سوى..

ونشت اليده اتبارك للمعاريس وتصورت في البدايه مع نوره ومبارك وبعدها سارت عند غانم وفاطمه الي كانت الفرحه عندهم اكثر لآن المعاريس اهل.. وقفت اليده في وسط غانم وفاطمه والحريم الباقين على الأطراف..

غانم: يدو شلي عصاتج بتخترب الصوره..

اليده: انجعم لا افلعك فيها..

غانم: حرام عليج حتى في يوم عرسي..

اليده رفعت عصاتها وصدت صوب غانم توها بتفلعه بالعصا .. وقفت الصوره المصوره وصورتهم على هالحال.. تم غانم يتحرطم شو ها حتى في الصوره انفلع..

فطوم: عشان كل ما تشوف الألبوم تتذكر.. ههههههه..

غانم: جب انتي.. حسابي وياج بعدين..



مريم كانت في هالوقت تعبانه زود .. مارامت تقعد زود.. سلمت على المعاريس وباركت لهم.. ومشت وتوها بتظهر من بعد ما تغشت واتصلت في ابراهيم عشان يترياها برع.. داخ راسها توها بتطيح قبضوها ودوها عند ابراهيم..

أم خالد: امي مريم شفيج؟؟

مريم: مادري .. يمكن ارهاق عشان هالشهرين وايد راكضت وتعبت..

أم خالد: سيري امي البيت ارتاحي.. ودي ايي وياج بس ماروم اودر المكان تدرين..

مريم: لا عادي امي..

ام خالد: أمي إبراهيم حط بالك عليها..

إبراهيم لا توصين حريص..تعالي شوي شوي..

مسكها ابراهيم وركبها الموتر وسار صوب اقرب مستشفى عشان يشوفون حالتها.. ..

.. .. ..

ومر الوقت وزفوا المعاريس.. وكانوا حاجزين في حياة ريجينسي اليديد سويت عشان يقضون الليله فيها.. وطبعا زفوهم من بعد مسيره كبيره سووها.. وصلوهم الفندق وزفوهم لغرفهم.. وراحوا عنهم..



وكل واحد دخل غرفته وصك وراه باب العزوبيه .. وبدوا حياة جديده مختلفه عن حياتهم الي قبل..



مريم طبعا وصلت المستشفى .. وسوولها فحوصات وظهر ان الإجهاد الي فيها طبيعي من أثر الحمل وهي مب عارفه انها حامل.. بس لازم ترتاح شوي .. كانت طايره من الفرح مريم يوم درت بالخبر.. وظهرت ويا إبراهيم..

إبراهيم: ها طمنيني شو قالو؟؟

مريم: ماشي.. ارهاق وبس..

إبراهيم: اها.. انزين ليش تضحكين يضحك هالشي؟؟

مريم: هههههه.. لا.. بس امش صوب البيت لأني تعبانه..

إبراهيم: مريوووووم.. الضحكه هاي وراها شي انا متأكد..

مريم: مافي شي.. يلا رد البيت..

إبراهيم وقف الموتر عطرف الشارع: لا .. الا تقولين لي شو السالفه؟؟

مريم: انزين انزين.. افففف منك.. انا حامل..

إبراهيم والفرحه مب شايلته: شوووووو.. ما سمعت..

مريم: حامل..

إبراهيم .. : قولي والله..

مريم: والله..

إبراهيم: يعني بستوي ابو..

مريم: هيه..

إبراهيم نش من مكانه وجرب صوب مريم وباسها على خدها .. ثم على راسها.. : احبج والله احبج..

مريم: احبك .. يا أغلى البشر..

وسلامتكم

**~~<]النــــــهايه[>~~**

 

[boys are toys]

مشكورة ويعطيج الف الف عافية
على مجهودج
وتسلمين
في انتظار باقي قصصج الحلوة ياحلوة :ggdw:
لاتطولين علينا

 

[غرنوووقه]

:ggdw:يعطيييييييج العافيه حبيبتي ماقصرت:ggdw:
:tek::e3::nbvppw::nbvppw::e3::tek:

 

[meen_ana]

االعفوو حياكم الله ياحياتي وان شاء الله انزل لكم قصه بس هذى اشوي حزينه وتعور القلب اسمها
يكرهكـ نصفي ونصفي فيكـ ذايب...