هلا حبيباتي مشكورين لردودكم
اكملكم... وانا عاهاتي ما ادري ليش مع الاهل اكثر من الريال نفسة وهذا الموقف من سنتين تقريبا
اكملكم عاهة رقم 4 :
هذا من طرف رفيجة امي واحنا معاهم من عمر .... اساسا من قبل ما انولد
فحيل كلوز جينة اهل
اهي اتينن واتعرفون الحريم ملوت اول الي حيل سنع.. وطبعا راح اتعرفون ليش مدحتها
المهم دقت على امي قالتلها انه مرت اخوها ادور لولدها وقالت انا ذكرتها (عني )
والولد كان منفصل بس ما اطول باول سنة .. امي طبعا اتعرف ام الولد فقالتلي ترا امة وايد انفيسة ومغرورة
وحتى يدتج الي اهي ام امي ما اتحب يدته الله يرحمها .. لانها نفس الشي حيل مغرورة وووو يابتلي امي تاريخ الكويت القديم
هههههههه صراحة سالفت امي اتضحك .. قتلها بالله شهالعداوة المتوارثة هذي !!!انا شكو بامة ويدته المهم الولد
( وبهذي الفترة بنات بجد رفيجاتي كانوا متحلفين فيني اني ما ارفض بسرعه ..لانه اول اي شي ما يعجبني سيدا اقول لا .. بدون تفكير احس من الخوف
واهلي نوعهم ما نغصبج كيفج .. وخصوصا امي .....هههههههه عاد امي حياتي قصة بروحها اقولكم بعدين )
فاقتنعت انه صج ما ارفض خل نشوف نكمل بلموضوع
المهم رفيجة امي حيل حبوبة وصريحة قالت بصراحة انا ما ادري ليش انفصل بس مع السؤال راح يبين كل شي الكويت صغيرة
ثاني شي اهي امة قالتلي لا تقوليلهم بنخطب بروح انشوف البنت جينة مسيرين علشان نبي البنت اطول ونشوف حبابتها وجذية ( شوفوا عذر الام ) .. اتقول بس انا عييت قتلها لازم انقولهم يمكن البنت مو مستعدة يمكن ما تكون موجودة وبعدين من حقهم يدرون مافيها احراج .. والبنت من غير ما تقعدين معاها انا اقولج حبوبة وتينن(
(عاد مسكينة رفيجة امي هذي خطبتني حق ولدها بس فشلة انا اكبر منة بجم سنة ...لا وكل ساعه اتقول لو تاخذين فلان شفيها اصغر منج
وتبون الضحك فلان تزوج وانا ليلحين قاعدة هههههههه هذا الي اصغر مني )
المهم يوا رفيجة امي ومرت اخوها وبنت اخوها ...انا طبعا شايفتهم من قبل بمناسبات عروس وجذية
بس ناسيتهم واهم نفس الشي
المهم تطمشوا علي واستاذنت ..
الطامة الكبرى تاتي الان:
اتقول امي لما بيطلعون جان اتقول امة طبعا فلانة عني حدها اتينن ووووو وصج خاطري فيها بس ان شاء الله خل اقنع الولد بالزواج لانه الحين نفسيتة تعبانة من الطلاق ورايح العمرة واقنعه لما ايرد وانيكم ..
نعم ؟ انتوا مستوعبين الي صار ؟؟؟؟؟؟؟ يعني الريال ماا يبي الزواج الام بكيفها مخططة ...لا والاخ نفسيتة تعبانة ما ادري ليش ؟
اتقول امي حدة طقتني البوها بس سالتها قتلها مدام ما يدري شلون اتخطبيلة ؟
جان اتقول( طا العذر ) لانه من كثر ما سمعت عن فلانة ( انا ) ومدحوها خفت انها تروح تنخطب فقلت اكلمكم عنها احجزها
بضاعه انا ؟؟؟؟؟
رفيجة امي مسكينة انحرجت ويها صار احمر
عقب ما طلعوا
دقت الرفيجة على امي وتعذر اتقول والله ما ادري والا جان ما يبتهم والله الام قايلتلي انه نبي نخطبلة معناته الصبي يدري شنو ما يدري ونفسيتة وهالخرابيط .. اتقول لو ادري جذية جان ما يبتهم اساسا .. اتقول صج اهو ولد اخوي بس اهي بنتي
مسكنة اكسرت خاطري حسيت الموضوع صار بويها ... المهم امي قالتلها لا عادي وانتي علشان تحبينها ذكرتيها شدراج عن الي بقلب الام
بس بجد خلاص ماله داعي تقنع الولد ولا شي اذا مو بخاطرة الزواج مو بلغصب .. ( طبعا امي ما صدقت لانها من اول ما تبيهم قتلكم )
بس صج يعني بصراحة نقدت عليهم .. يعني والله عيب هذا واحنا ناس تعرفونا مو غرب يعني يايين وحالتكم حالة والولد ما يدري
لا والضحك اني اصادفهم عقب بمناسبات وايد واهم ايون يسلمون انا مشكلتي يبين علي اذا مو مشتهية احد .. اسلم عادي برسمية
واختة كل ما تشوفتي اتمدح طبعا احس بترقع الموقف .... بس شقول ما يترقع
