تجمع للمعالجات في مستشفى الصباح قسم اطفال الانابيب

بنات من اسم الموضوع

حبيت نسويلنا تجمع

ونشوف منو الدكتوره الي تعالجين عندها

وشنو سويتي وندردش شوي عن هذا القسم في المستشفى

انا صايرلي فتره عندهم وودي نجتمع

شرايكم ؟؟

اهلين اختي

انا صراحة توني فاتحة ملف عندهم مع اني صارلي 10 سنين متزوجة والحمدلله حملت 4مرات 2 منهم كمل الحمل وجبت احلى صبيين الثاني جبته تلقيح صناعي بالخاص....

وتوني ادري انه تحويل لمركز الانابيب سهل لها الدرجة ...اول شي ماكنت ادري عن هالمركز..ويوم عرفت استصعبتها وناس قالولي لازم واسطة ..أيست وتوني الشهر اللي طاف تلحلحت وسويت تحاليل بالولادة وعلطول حولني الدكتور لهالمركز...

قرقت عليج واجد..الله كريم ان شاء ويزق كل محرومة يارب...
قوليلي المهم..وين وصلتي بالعلاج عندهم؟؟؟ انا قالولي راح اقعد 6 شهور اعادة كل التحاليل وبعدين يقررون لي تلقيح صناعي!!!!

بس مشكله الصباح كل يوم وحده تسويلج السونار وكل شهر دكتوره انا ارتحت حق دكتوره رائده الفضلي يحلوها والله
بس الحين صارت عندها مسوليه واهي الاداره وانشغلت عنا

الله كريم قاعده اخذ منشطات الحين ويوم الثلاثه عندي موعد هناك

الله ييسرلج هالشهر هذا وتحملين يارب

اللي فهمته منج انه بديتي تلقيح صناعي؟؟؟
جم صارلج فاتحه الملف عندهم وعقبه بجم شهر بديتي منشطات وعلاج؟؟؟ تكفين جاوبيني!!
انا زوجي عنده ضعف وأول مره بعد اقناع ياخذ مقويات وعسل وخلطات..اذا ما بيسوولي شي بالصباح هالشهرين هذول..الحق على عمري واسوي بالخاص تلقيح قبل لا يوقف زوجي علاج ونرجع للصفر!!

انا توني مسوية بالصباح اشعة الصبغة والحمدلله مافيني شي يمنع الحمل..قالولي هناك تعيدين كل شي من اول وجديد ويسوون اشعة الماي بعد..الله يعين..شكلها السالفة مطولة حيل

انا ما سويت تلقيح صناعي

بس وايد حريم يسونها اشوفهم ياخذون ابر تحت الجلد وبعدها ايسون لهم التلقيح

بس انا ولا مره سويتها لان البويضات عندي ماتضبط على الحجم الطبيعي

الله يوفقج انشالله وروحي وكل شي بيد رد العالمين والله يرزقج اانشالله يارب

انا بادية علاج اطفال الانابيب بس مو بالصباح انا في مستشفى خاص

الله يوفقج حبيبتي وين سويتيه

مرحبا مرت الغالي
الله خوش موضوع و الله
يعطيج العافية
توني أدري انه فيه تجمع عندكم
يالله ما طافنا شي ان شاء الله
انا بلشت اراجع عندهم من كم شهر
ومثل ما قالت الاخت توني ادري انه سهل تراجعين هناك
و انا بديت من المستوصف تبعنا أمراض نساء
و طلبت تحويل للصباح بس صراحة الشغله متعبه
تدرون ليش الروتين اللي ما يخلص
طبعا الدكتورة قالت انا ما احولك هناك الا لما تسوين
جميع التحليل لي و لزوجي عاد تخيلوا من ثاني يوم الدورة
و خامس يوم الدورة و سونار و هرمونات
و طيعا طولت لما خلصت التحليل هذا الكلام نهاية سنه 2006
و اخير عطتني تحويل للصباح
و لما خذيت التحويل و رحت هناك انصدمت من الجماهير اللي هناك
جنسيات متعددة و زحمة و صراخ و مواعيد متلخبطة
و هم ضعت في دوامه و خطأ من موظفة اللي يهديها و ضيعت ملفي و انا بسم الله توني اقول يالله الفرج
صراحة تعقدت و عصبت و يأست ولما اجي لموعدي يقولون الدكتور في اجازة طبيه او مو جاية و تخيلوا عاد النطره و الاستئذان من الدوام
تعبت صراحة و طريق و زحمه و يالله توصلين و تجين تبين تشوفج الدكتور
واخر شي يقولوج ما يصير مستحيل انتي ما عندج موعد ما يصير نطلب ملفج
و ما دخل الكمبيوتر صراحه انا انقهرت و بغيت اهون
تصدقون اسابيع وانا للحين ما دخلت عالدكتورة بس عشان تشوف لتحويل
وبكل سهوله رحت للملفات و ترجيتهم يطلعون ملفي و تخيلوا شكلي بجد
شي يقهر و خذيت ملفي و رحت للدكتورة و كانوا محوليني للدكتور رائد الفضلي
تخيلوا لقيتها قاعده بروحها و تنطر مراجعين و لا عندها و زحمه و لا هم يحزنون والامر كان سهل جد شفتوا شلون هاللوية و اخر شي سهالات بس طمنتني و نستني التعب بس يا بنات رديت من اول و جديد و طلبت مني تحاليل غير عن اللي سويتهم بالمستوصف هني انقهرت قلت يا لييل
بس هي صارحتني و قالت ترا التحاليل راح تاخذ منج 3 شهور
تقريبا لازم تصبرين معنا
و طبعا للحين و انا في تحاليل و سونار و هم تعبت لانه محولين ملفي لطفا انبوب يعني مو معقوله بنطرهم بس بجمع تحاليلي و بروح سيده
عالخاص اتلاحق عمري
أدري هذرت و ازعجتكم بس من الضيم و الله و القهر ديره شكبرها و غنية وهذا مستوى وحده اطفال الانابيب يعني الدور للحين ما خلص مبلشين من دفعه 2002 ؟؟
هي نصحتني الدكتور و قالت اذا انتي الحين زينه ترا بكره العالم شراح يكون الحال ؟؟؟
و الله كريييييييييييييييييييييييييييم
و دمتم سالمين

الغــ مرت ــالي قال:

الله يوفقج حبيبتي وين سويتيه

أنقر للتوسيع...

مستشفى لندن

انا رحت لهم حولونى المستوصف ولما رحت الصباح يحليلهم قلت لهم حولونى على الانابيب ما ابى امراض نسا وحولونى وعطيت الاستقبال اوراقى وقالت نتصل عليج واتصلت على عقب اسبوعين وعطتنى موعد بس للاسف رااااااحت على نومه

ومن ذاك اليوم لى هاليوم مارحت لهم

باااااااااااااااااااااااااااااااااارده

يعنى سالفة الصباح .... يبيلها عباله ولا سهاله ؟؟؟؟

عاد تدرون انا كان صايرلي فتره متبهذله بالصباح بقسم امراض النسا

بس لمن حولوني طفل الانبوب الحمدالله مرتاحه وادعولي بسوي تلقيح صناعي يوم الخميس ادعولي بنيات

الله يوفقج و يسهل أمرج
و يرزقج بالذرية الصالحة السليمة
يا رب

يارب يرزق الجميع

توني ادري ان عندكم تجمع هني ويني عنكم

الله يسلمكن انا كنت اتعالج عند معصومة مخصيد 6 شهور وماكو فايدة ...

بعدين عمة زوجي دكتورة اكتبت لي تقرير علشان اتعالج بوحدة اطفال الأنابيب بدون تحويل ولا عبالة ... رحت حق الدكتورة طيبة السبيعي وفتحت لي ملف هذا الحجي كان سنة 2004 ...

سويت كل التحاليل المطلوبة انا وزوجي وخذت التحاليل تقريبا شهر ...

وبعدها على طول بلشت بالتلقيح الصناعي ... والحمد لله رب العالمين اكرمني الله بالحمل من ثاني تلقيح

بعد ولادتي بسنة .. رجعت المركز وعدت التحاليل
علشان اسوي تلقيح صناعي

وتخيلوا قعدت اسوي تلقيح 5 مرات وما في حمل

ولمن يأسو مني قالوا لي خلاص نطري الأنابيب ...

قالت لي الدكتورة طيبة السبيعي سوي بعد مرة ... وسويت هالمرة ووكلت امري الى الله سبحانه وتعالى ... والحمد لله رب العالمين حملت بالتلقيح رقم ستة
بس مع المداومة على قراءة سورة البقرة يوميا والمسح على البطن والمبايض

وسورة مريم يوميا ... والدعاء في جوف الليل ... وشرب ماء زمزم بنية الحمل

والإستغفار ... وكنت دايما اردد " ربي هب لي من لدنك ذرية طيبة انك سميع الدعاء "

بالتوفيق حق كل الي يعالجون للحمل

الله يرزقكم الذرية الصالحة يا رب


واي استفسار انا حاضرة

ماانصحج بمستشفى لندن لانى تجربه مريره مريت فيها

الله يوفقج يارب ويسهل عليج يا قمر ضاوي

عطيتينا الامل والحمدالله

هلا وغلا فيكم خواتي العزيزات
انا ناويه هالجم يوم اراجع الصباح عشان اسوي طفل انبوب
بس خايفه السالفه تطول على الفاضي
صارلي 7 سنوات متزوجه وللحين ما حملت
جربت التلقيح الصناعي مره وحده بس

مشكووره اختي على هالموضووع بس حبييت اسال انا أعالج بالصباح من زمان أخذ ابر مع كلومييد بس ماكو فايده البويضات ماتكبر اكثر من 11 مم ايصيير يحولووني على طفل الانابييب وبغييت اسال عن التلقييح الصناعي عباره عن شنو اذا تقدروون تفييدووني ومشكووريييييييييين

حبيبتي انا سويت التلقيح الصناعي

ياخذون عينه من الزوج وينضفونها ويعقمونها وبعدين يحطونها فيجج

يفتحون المهبل عن طريق البطه على قولتهم
وبدخلون السائل المنوي عن طريق انبوب ضعيييف وماتحسين بعوار كلش
الا البطه شوي بس تضايق

اذا بتسوينها قوليلي عشان اعطيج بعض النصايح