روايتي الجديدة مثل ما وعدتكم " حبيب الأمس" ..حياكم

rawona

rawona

**مشرفة قسم السياحة والسفر**
إنضم
14 يونيو 2006
المشاركات
6,616
مستوى التفاعل
0
النقاط
0
الإقامة
On the moOn



مرحبا بنات .. شلونكم ؟؟

في البداية حابة أشكر كل البنات اللي راسلوني على الخاص .. واللي شاركوا بالاستطلاع .. واللي قروا قصتي الاولى "طلال وشيخه" وحبوها ..وردودهم الحلوه اللي تبرد القلب بصراحة :)







ومثل ما وعدتكم .. هذي قصة يديده .. من امكانياتي المتواضعه .. حبيت اكتب عنها .. واخليها حصرية لمنتداي الغالي كويتيات ..




ما أحلل أي شخص ينسب القصة لنفسه .. او ينقله لمنتدى ثاني او ايميل ..الخ أنا حابة القصة تكون حصرية للمنتدى ..
​



القصة من تأليفي .. مافي قصة ما تنبني على واقع "يعني الكاتب من وين راح اييب افكاره"؟ القصة خيالية مستوحاة من الواقع .. وان شاءالله تحوز على اعجابكم وتحبونها .. ما اوصيكم بالتعليقات و ردودكم اول باول :)

والحين أنزل الجزء الأول منها..





​
 
rawona

rawona

**مشرفة قسم السياحة والسفر**
إنضم
14 يونيو 2006
المشاركات
6,616
مستوى التفاعل
0
النقاط
0
الإقامة
On the moOn



بيت بوجاسم –

الكل قاعد على السفرة حزة الغدا .. بو جاسم وام جاسم والعيال .. ألاء و جاسم ويعقوب ..

ام جاسم: ألاء حبيبتي خلج جاهزة من عقب صلاة المغرب .. كشخي و لبسي و ابتسمي ابتسامة لي يونا الناس .. مو اتكشرين بويهم واتنحشينهم مثل ما نحشتي اللي قبلهم!

غصت ألاء باللقمة و اسكتت .. ماردت على أمها .. مو أول مره ايون ناس يخطبونها وتردهم .. كل مره تفاتحها أمها بموضوع زواجها اتعصب وتصارخ .. بس هالمره اسكتت و ما اعترضت ولو بكلمه! .. وكملت غداها بالغصب ومن غير نفس!

بو جاسم: عاد والله والنعم فيهم .. بو علي رفيجي من عمر .. وام علي ماشاءالله عليها عرفت اتربي عيالها .. ويا زين ما ربت .. وحسين شاب ممتاز .. واخلاقه عالية الكل يمدحه و يذكره بالخير .. ومهندس ماشاءالله بالشركة وسمعته طيبه وحبايبه وايد ..

جاسم: اي والله والنعم فيه .. كل من معانا بالدوام يحترمه ويعمله حساب ..

ألاء : الحمدلله ..

ام جاسم: وين يمه؟ ما كليتي شي! صحنج مثل ما اهو!

ألاء: شبعت يمه .. باروح ارتاح وانام لي اشوي .. اليوم كرفت بالدوام ومحتاجه أرتاح!

اصعدت ألاء دارها .. وسكرت الباب وراها بهدوء.. وتسندت عليه .. دارت نظراتها بالغرفة لين طاحت على صورته .. على شاشة الكومبيوتر جدامها! مشت صوب المكتب بهدوء .. قربت من الشاشه واهي تطالع ملامحه بشوق .. تلمست أصابعها صورته على الشاشه .. وتنهدت .. ودي اسمع صوته .. خذت الموبايل و دورت فيه بسرعة بقائمة الأسماء .. لين طاحت على اسمه .. "خالد" .. وطالعت الرقم فترة طويله ..ترددت فتره .. وردت بأفكارها لي ورا .. وسرحت بذاك اليوم البعيد!





​
 
rawona

rawona

**مشرفة قسم السياحة والسفر**
إنضم
14 يونيو 2006
المشاركات
6,616
مستوى التفاعل
0
النقاط
0
الإقامة
On the moOn



قبل سنوات – قاعة الراية : حفل تخريج طلبة كلية الطب

كانت ألاء ورفيجاتها نوف وساره حاضرين حفل تخرج اخت ساره من كلية الطب و كانوا البنات الثلاث بسنة ثانية بكلية الهندسة والبترول – هندسة مدنية .. وكل وحده فيهم اتحلم اتخلص دراستها على خير .. ويصير حفل تخرجها مثل حفل تخرج ريم – اخت ساره – و احلى بعد!

كل وحده منهم كاشخة حدها ..

نوف كانت مو متحجبة ولابسة بدلة قصيرة عباره عن توب وتنوره من ايس بيرغ لونها بنفسجي راقي و رافعة شعرها بتسريحة شانيون بسيطة .. وحاطة اي لاينر و ماسكارا .. وشوية بلاشر على الخدود .. وغلوس خفيف .. كان شكلها ذرب وناعم

أما ساره فكانت كاشخة ولابسة بدلة "توب وتنوره" شيفون مشيرة دامجه اللون الاورانج والبيج والفوشيا وشوية خطوط تركواز بنقشه عجييبة وخلط مميز للألوان .. ولابسة ملفع ستراس بيج و شايلة بيدها جنطة بيج من كلوي .. مكياجها كان حيل ناعم وكيوت

وألاء .. كانت غير! كانت لابسة قميص طويل ستايله مغربي .. والوانه حلوه الرمادي الفاتح والبيبي بنك (الوردي الفاتح) .. وتحته بنطرون رمادي فاتح .. والشوز مسكر ولونه غريب جنه يلد حيه بلون رمادي في بيج فاتح .. واللفه رماديه وعليها توقيع بالستراس على جنب .. والميك اب مشابه لمكياج نوف بس الحمره لونها وردي فاتح .. سيمبل و ناعم

راحوا البنات واقعدوا بالطاولة المخصصه لهم .. مستنانسين ويسولفون .. توه الحفل ما ابتدى .. كانوا يايين مبجر اشوي فقعدوا يتطمشون على الموجودين ..

نوف: واااااااااااااي شملحهم هالدكاتره يهبلوووووووون .. ادعولي الله يرزقني بواحد منهم!

ساره: ما تيوزين عن سوالفج بسج خز بالرياييل وطالعي جدامج

نوف: اوف وانتي كله داقرتني!

ألاء تضحك عليهم: بس عاد انتي وياها خلوني اركز!

لفوا عليها البنات مستغربين ..

نوف: شتركزين فيه؟

ألاء: بالدكاتره المزايين اللي جدامي .. على وعسى.. واحد فيهم يتحطم فيني!

البنات : لوووووووووووووووول

ساره: هذا وانتي اعقل وحده فينا .. عيل تدرون اشلون لا تخزون هالصوب أنا حاجزته .. كل وحده اطالع بمكان ثاني!

البنات : هههههههههه ان شاءالله

لفت نظر ألاء مجموعة شباب داخلين القاعة .. طاحت عينها بعين واحد منهم .. وحست بقلبها قام يرقع .. وانها مو قادره تشيل عينها وتبعدها عن نظراته!


انتبه خالد لعيون وساع تطالعه .. وطاحت عينه بعينها .. وحس انه اول مره بحياته يشوف عيون بهالوسع .. وهالجمال! ما شال عينه عنها الا من لوية ربعه!

عبدالله: يالله الفال لنا ان شاءالله عقبال ما انتخرج ونكون بمكان وهيب وجراحو ومشاري!

فهد : الله يسمع منك .. أقول خويلد .. انتوا بعد يخرجونكم معانا اذا خلصتوا والا بس تخريجكم اللي في بريطانيا؟

خالد: والله مادري .. وتبي الصج مو مهتم!! المهم اتخرج واخلص 3 اسنين راحت وباجي سنتين الله يعديهم على خير!

عبدالله: اي اشعليك سنتين وتخلص طب اسنان اشهامك! مو انا باجيلي 4 اسنين بعد!

خالد: والله محد طقك على ايدك وقالك ادرس طب بشري .. قلعتك!

فهد: ههههه قرادته!

عبدالله: اوه! .. هذي مو جنها اخت ريم؟
فهد: وين؟؟

عبدالله: كاهي اهناك .. اللي قاعدة يم ام البنفسجي .. الطالوله اللي عليها البنات اهناك..

فهد: اي شفتها .. اي والله جنها ساره.. اه يا قلبي .. صبولي ماي.. قلبي يرقع!

خالد: اشدعوه!! اشفيك!!

فهد: بلاك ماتدري .. العشق ياولد .. العشق! << يقلد طارق العلي بمسرحية صح لسانك بدور شليويح!

خالد: هههه صج مو صاحي .. انتوا تعرفون هالبنات؟

عبدالله: من بعيد لي بعيد .. ريم معانا بالكلية اهي خريجة الحين .. واختها هذي اللي متولع فيها فهيدان .. جم مره تمر اختها عندنا بالكلية مع رفيجاتها وتولع فيها الصبي! ما ينلام .. البنت دميرا! (فهد بدوي بس امه حضريه وربعه كلهم حضر بس ساعات يقط قطات ويتكلم فيها بدوي)

فهد: اقول.. لا يكثر!! مالك شغل فيها << واهو معصب!

عبدالله: اسف يبى .. اسف .. ول! مو مال غشمره كلش!

فهد: حدك لي اهني ووقف.. هذي فيها قبايل!

خالد: ههههه .. اوله! لا يحوشك!

عبدالله: هههههه

فهد: بس انت وياه .. لجيتونا .. خلاص الحفل بيبتدي الحين .. "ستليت" !

سكتوا الشباب مع بداية الحفل .. التفت خالد صوب طاولة البنات .. وقعد يطالع ألاء وسرح بملامحها الحلوة ..



​
 
rawona

rawona

**مشرفة قسم السياحة والسفر**
إنضم
14 يونيو 2006
المشاركات
6,616
مستوى التفاعل
0
النقاط
0
الإقامة
On the moOn


حست ألاء بعيون تراقبها .. عرفت بغريزتها الشخص اللي يراقبها بس حاولت كثر ما تقدر انها ما تلتفت صوبه واندمجت بفعاليات الحفل .. وافرحوا لريم حيل وصفقولها يوم نادوا اسمها وكرموها ..
كان خالد مستانس لربعه اللي تخرجوا .. بس ماكان حيل مندمج بالحفل .. كل شوي يلتفت صوب ألاء .. ياربي في شي بهالبنت يشده .. شنو مايدري!

طبعاً لما نادوا اسماء ربعهم الخريجين القاعة كلها امتلت بأصوات فهد و عبدالله وربعهم اللي شالوا القاعة بالتصفير و التصفيق والتشجيع! كانت لويتهم تشد انتباه البنات و الكل يلتفت صوبهم يضحك..

نوف: وااااااااااااي شحلاتهم .. يونسون .. ساروه .. حظج قعد!! المزيون اللي مع ريم الكلية قاعد يطالعج !

ساره واهي تلتفت بقوة صوبهم: صج؟!!!!!! ويييييييييين؟؟ وطاحت عينها بعين فهد وحست انها بقمة الاحراج!!

ساره: يا الهبله!! زين جذي!! شافني وانا التفت عليه!! يا فشلتي! الحين بيقول عني خفيفه والا ياخذ عني فكره غلط!

ألاء: وانتي على اولج التفتي صوبه! صج خفيفه!

نوف: هههههههه حط حيلهم بينهم .. وجنه ألوءه انتي بعد قام حظج !! رفيجه قاعد يتلفت صوبج ويطالعج! وااااااااااي وانا اشفيني حظي طايح من يومه! وعفست ويهها باحباط!

البنات: ههههههههههههههههه من حنتج .. ثقلي اشوي و بيقوم حظج..

نوف: بس انتي وياها .. خلاص مابي .. اصلاً من زينهم .. شحلاتهم الشباب اللي بكليتنا .. مو هذيل دكاتره ومعقدين.. لا لا لا .. انا مستواي احسن من هذيل بوايد!

ساره: عشتوا! انزين بس خلاص خلونا نروح صوب ريم ورفيجاتها .. اكيد الليموزين ناطرتنا برا .. منو بتركب معاي ومنو بتلحقنا بالسياره؟

نوف: انا بالحقكم .. خلي ألاء تروح معاكم ..

ساره: ماشي..

ألاء: الحين وين رسيتوا عليه؟ أي مطعم تبون؟

ساره: برج الحمام ..
نوف: خلاص عيل أنا بأسبقكم .. تشاو!

البنات: الله وياج!


فهد: شوفوا انتوا روحوا وانا الحقكم!

خالد: اشحقه بعد .. نروح كلنا يميع أحسن ..

عبدالله: طالع الثاني! يا بابا .. الريال يبي يصرفنا ويلحق حبيبته .. افهم وفج عنه!

استوعب خالد اشوي جان يضحك: خوش عيل انا بأروح وياك!

فهد: وانت شكو!

خالد: لا اتخاف مو حاط عيني عليها .. من زينها عاد !! بس ابي اشوف اللي معاها!

عبدالله: لاحول.. اقول .. انا باروح ويا الشباب ابرك من مجابل قيس وعنتر! باي!

وراح خالد ويا فهد والحقوا الليموزين والبنات لين وصلوا للمطعم ..

فهد: يازينها!

خالد: اي والله!

فهد: هيييييييييييي انت!... ووجع! شكو انت فيها!

خالد: والله ابتلشت! يبا ما اقصد جولييت مالتك! انا اقصد هذي.. (وأشر خالد على ألاء)

فهد: والله شكلك طبيت يابو وليدان! ما اصدق .. خالد! اللي عمره ماراح غازل معانا .. واللي دراسته وناديه وكمبيوتره كل حياته .. تعجبه بنت!! لا مو معقول!!

خالد: مادري شاللي فيها جذبني .. شكلها غير .. فيها شي غير.. شنو مادري!

فهد: ايييييييه .. ما تدري.. ها؟ اقول .. امش انزل نتغدى بس!




​
 
rawona

rawona

**مشرفة قسم السياحة والسفر**
إنضم
14 يونيو 2006
المشاركات
6,616
مستوى التفاعل
0
النقاط
0
الإقامة
On the moOn


خالد يدرس في نيو كاسل في بريطانيا وتخصصه طب أسنان .. انقبل بعثة وراح اهو ورفيجه فيصل والبقيه انقبلوا بالكويت .. اهوا ماكان حاب يصير طبيب بس هذي رغبة والده وماحب يكسر بخاطره .. طول ما اهوا يقدر يسوي هواياته والأشياء اللي يحبها .. فما عنده مشكله بدراسة طب الاسنان .. لأنه متفوق وشاطر ويقدر يمشي بأي مجال .. يموت على السباحة وبفتره المتوسط والثانوي اشترك بنادي القادسية وصار سباح واشترك معاهم وخذوه لبطولات على مستوى الخليج والدول العربية وياب ميداليات ذهبية وفضية.. وبنفس الوقت يحب يتعبث بالاجهزه الكهربائية والالكترونية ويموت على شي اسمه كومبيوتر .. بداره 4 اجهزة كومبيوتر 3 للتجارب و واحد صاحي ويستخدمه .. ويحب يرسم !! متعدد المواهب صح؟ بالنسبة للشكل فهو طويل و جسمه حلو لانه رياضي .. اسمراني ومملوح (سمار اهل الكويت) ..


نزل خالد وفهد للمطعم واقعدوا بطاولة قريبه من البنات .. نوف انتبهت لهم وأشرت حق ساره وألاء يعني طالعوهم .. ارتبكت ألاء يوم شافت خالد .. وحست انها مو قادره تتصرف بعفوية .. وبالها مشغول معاه ..

بعد السوالف والضحك وعقب ما خلصوا الغدا بدوا البنات يروحون وحده ورا الثانية وراحت ريم اخت ساره مع رفيجاتها .. واللي بقى بس ألاء ونوف وساره .. حست ألاء بتوتر اكثر لما فضا المطعم .. حاسبوا واطلعوا بره ..

فهد: يالله بسرعه قوم !

خالد : وين؟؟

فهد: نلحقهم بعد وين؟؟!!!!

قام خالد والحقه وهو منحرج .. ربعه ابخص منه بسوالف البنات .. واهو طول عمره مشغول بهواياته ورياضته ودراسته وماعنده وقت للطلعات والبنات!!

فهد: لحظة اشوي لو سمحتي!

البنات ارتبكوا وخصوصاً ساره .. ما توقعت انه بيكلمها اشكره جذي جدام رفيجاتها والناس!
ساره: عفواً؟؟ تكلمني؟

فهد وهم منحرج منها ومن رفيجاتها : ممكن أخذ اشوي من وقتج؟

ساره بعصبيه: خير؟؟ في شي؟

فهد: خير بويهج .. انتي اخت ريم عدل؟

استغربت ساره ما توقعت كلش انه بيتكلم واييب طاري اختها!

ساره: اي اختها .. ليش؟

فهد: لا أبد في موضوع يخصها وودي أتكلم معاج فيه ..

وقبل لا تتكلم او ترد عليه سحب تلفونها النقال من ايدها و كتب رقمه و اتصل .. رن تلفونه رنة وسكره وخزن رقمه ..

ابتسم واهو يطالع نظراتها المستغربه و عيونها الوساع ..

فهد: ان شاءالله اتصل فيج واقولج على الموضوع ..

التفت على البنات نوف كانت مستانسه وتبتسم .. وألاء كانت حالتها حالة رفيجتها ساره! مصدومه من تصرف فهد ومستغربه.. ولما التفت صوب رفيجه خالد انفجر بالضحك يوم شافه!! لانه بعد كان متعجب ومصدوم واول مره تمر عليه هالسوالف!!

اسحبه من ايده وركبوا السياره وحركوا راجعين البيت!




*******************************************************







أخليكم مع هالبداية .. بانتظار ردودكم وتعليقاتكم علشان أكمل والا لا ؟ :)

​





​
 
digital

digital

New member
إنضم
4 يونيو 2008
المشاركات
4,541
مستوى التفاعل
6
النقاط
0
عاااااااشت روونه


ليلحين ما قريت منهه شي بس حبيبت اكون اول وحده ترد :)
 
digital

digital

New member
إنضم
4 يونيو 2008
المشاركات
4,541
مستوى التفاعل
6
النقاط
0
بدااااايه حلوووووه روونه حلوووووه

واحب التفاااصيل تخلينى عايشه بالجو:ggdw:
 
زهور الجمان

زهور الجمان

New member
إنضم
18 يوليو 2007
المشاركات
1,883
مستوى التفاعل
0
النقاط
0
الإقامة
الكويت احلى بلد
حدهااااا البدايية حلوة


اندمجت فيها

بليز كملي لا تطويلين علي


الله يوفقج ان شاء الله مبدعة في سرد الروااااية
 
ام _خلودي

ام _خلودي

New member
إنضم
3 ديسمبر 2007
المشاركات
6,160
مستوى التفاعل
0
النقاط
0
بدااايه حلوووه وايد

لاطوولين عليناااا
 
dlo3t^baba

dlo3t^baba

New member
إنضم
24 مايو 2008
المشاركات
1,102
مستوى التفاعل
0
النقاط
0
اكييييد روعه لان انتي الكاتبه ^_^
يسلموووووووووووو وننطر التكمله
 
MeeMeeYoo_2

MeeMeeYoo_2

New member
إنضم
10 يوليو 2008
المشاركات
1,739
مستوى التفاعل
0
النقاط
0
الإقامة
عروس الخليج ( الكويت ) فديتهااا
لايوقف لايوقف لايوقف لا يوقف لايوقف لايوقف لايوقف لا يوقف لايوقف لايوقف لايوقف لا يوقف لايوقف لايوقف لايوقف لا يوقف لايوقف لايوقف لايوقف لا يوقف لايوقف لايوقف لايوقف لا يوقف لايوقف لايوقف لايوقف لا يوقف لايوقف لايوقف لايوقف لا يوقف
 
n00ni

n00ni

New member
إنضم
10 يناير 2009
المشاركات
919
مستوى التفاعل
0
النقاط
0
العمر
34
الإقامة
baitna
الموقع الالكتروني
www.nrnr10.com
خوش بدايه

فهد الله يهداه مو جذي يضبطون
 
rawona

rawona

**مشرفة قسم السياحة والسفر**
إنضم
14 يونيو 2006
المشاركات
6,616
مستوى التفاعل
0
النقاط
0
الإقامة
On the moOn
زهور الجمان قال:
حدهااااا البدايية حلوة


اندمجت فيها

بليز كملي لا تطويلين علي


الله يوفقج ان شاء الله مبدعة في سرد الروااااية
أنقر للتوسيع...

ام _خلودي قال:
بدااايه حلوووه وايد

لاطوولين عليناااا
أنقر للتوسيع...

dlo3t^baba قال:
اكييييد روعه لان انتي الكاتبه ^_^
يسلموووووووووووو وننطر التكمله
أنقر للتوسيع...

meemeeyoo_2 قال:
لايوقف لايوقف لايوقف لا يوقف لايوقف لايوقف لايوقف لا يوقف لايوقف لايوقف لايوقف لا يوقف لايوقف لايوقف لايوقف لا يوقف لايوقف لايوقف لايوقف لا يوقف لايوقف لايوقف لايوقف لا يوقف لايوقف لايوقف لايوقف لا يوقف لايوقف لايوقف لايوقف لا يوقف
أنقر للتوسيع...

n00ni قال:
خوش بدايه

فهد الله يهداه مو جذي يضبطون
أنقر للتوسيع...

ام _خلودي قال:
باالانتظااااااااار

:eh_s(7):
أنقر للتوسيع...




يسلموووووووووووو على الحضور والمتابعه .. وان شاءالله تعجبكم الرواية في الاخير .. اتصدقون اكتب وانا خايف!! اخاف ما تعجبكم :( شعور بايخ بس صج اتمنى انها تنال اعجابكم ..

اعتذر منكم على التأخير بسبب الدوامات اليوم والنومه الملخبطه ومدارس اليهال .. راح انزل بارت "تصبيره" وان شاءالله ارجع اكمل معاكم باجر ووعد بارتات طويله باذن الله .. تابعوني :)

​
 
rawona

rawona

**مشرفة قسم السياحة والسفر**
إنضم
14 يونيو 2006
المشاركات
6,616
مستوى التفاعل
0
النقاط
0
الإقامة
On the moOn



بعد شهر من حفلة التخرج ..

بيت بوخالد – يوم الخميس

الكل متيمع في بيت وليد "بو خالد" .. أم خالد .. خالد .. واخوه بدر .. وخواته نوره وحصه .. وريل نوره طلال وولده عبدالعزيز .. خلونا نتعرف عليهم قبل لا نكمل ..

بوخالد .. ريال طيب .. متقاعد من الشرطة ومبطل مكتب عقاري صغير .. حلم حياته انه يصير طبيب بس الله ما كتب له .. زرع في خالد حلمه وكبره لين خلاه يدخل الكلية ويحقق الحلم اللي ظل طول عمره يتمناه .. ريال غشمرجي بس حزة الجد ما يعرف اللي جدامه ..

ام خالد .. ناظره متقاعدة .. تحسفت لأنها تقاعدت مبجر قبل لا اتخلص بنتها حصة الثانوية.. على الاقل كانت بتصير تحت عينها.. تحب عيالها حيل.. وماترضى عليهم .. وتعبانه حيل على تربيتهم .. وهم عندها بالدنيا كلها ..

خالد وعرفتوه .. عمره 20 بسنه ثالثة بكلية طب الأسنان في نيوكاسل/ بريطانيا ..

نوره اهي الأخت الكبيره عمرها 23 .. تزوجت من ثلاث سنوات.. وعندها عزوز واهي حامل بالشهر الخامس بهالفترة .. أقرب وحده لخالد .. وايد يحبها وتحبه وأسرارهم مع بعض .. أهوا يشكيلها و اهي تشكيله .. وحيل متفاهمين..

بدر أصغر من خالد بأربع سنوات .. عكس خالد بالمره !! ماشي بدراسته بس مو متفوق ! عمره 16 سنه .. و24 ساعه يقز بالمولات وعلى شارع الخليج مع السايق وربعه .. مستهتر و مغازلجي .. وكل يشوي يصاحبله وحده.. بس حاطله حدود ما يتعداها .. يعني ماخذ الشغله بس تسليه ويقضي فيها وقت فراغه بس أبد ما يقرب للحرام.. طيب بس لسانه متبري منه!

حصه .. أخر العنقود .. أصغر من بدر بسنتين عمرها 14 وتوها بأولى ثانوي .. هاديه .. كافيه خيرها شرها .. دلوعه لحد الملاقه .. حبيبة امها وابوها .. دايما مع امها وين ما تروح .. ما تحب يمعات بنات خالاتها وعماتها .. وكل ما قالولها "طلعي ويانا" ما رضت وراحت يا مع امها او مع اختها! الوحيدة اللي تفهمها ورفيجتها بنت خالتها بدرية .. وعل طول مع بعض في البيت والزوارات ولأنهم يحبون يطلعون مع أمهاتهم بعكس باجي البنات .. شطوره بدراستها وتموت على أخوها خالد ..

على الغدا...

نوره: اوف ياربي متى تروح عني هاللوعه اللي مو راضية اتفج!! بعد خلاص دخلت الخامس متى ارتاح؟!

ام خالد: والله انتوا بنات هالوقت دلوعين .. وكل شي عندكم بزياده .. يمه منكم!

نوره: يمه! حرام عليج والله من صجي .. شوفي مشتهية أكل من هالربيان بس ماني قادره .. يعني شأسوي؟

طلال: ماعليج منها عمتي بعد اشوي اطقها اليوع وتروح تاكل!

طالعته نوره وهي معصبه وعطت ذيج الخزة << يعني هين

بوخالد: ها خالد ياولدي .. ماقلت لي متى سفرتك ان شاءالله؟

خالد: بعد اسبوعين باذن الله ..

بوخالد: على خير .. بس كافي يا مره بتذبحيني ! خفي من العيش اشوي!

ام خالد: هذا يزاي .. بارتك وناجبتلك .. وابيك تاكل عدل .. ايه لي الله !

بدر: افا! ام خلودي ازعلت! ولا يهمج يمه .. نجبيلي أنا و باكل كل اللي بتحطينه لي ماراح اردج..

ام خالد: وييي ياعلي ما ابجيك .. حبيبي والله ..

حصه: وانا مو حبيبتج؟

بدر: اوهوووووو .. تحجت الدلعهّ! انتي اشتبين تقلدين!

حصه: يمه! شوفيه!

تيتت تيتت .. تتت تيتت

وصل مسج على موبايل خالد .. وقعد يقراه ولهى عن النجره اللي صايره بين اخوانه وخواته على السفرة ..

المسج من فهد : "جم تعطيني؟؟ :) يبتلك رقمها!"

فهد من عقب ذاك اليوم بمطعم برج الحمام اتصل على ساره .. اول شي ردته وزفته .. وتالي استانست عليه وعلى سوالفه .. ومن ذاك اليوم وهم يدقون على بعض و صاروا ربع .. وكان خالد اذا دقت ساره على فهد واهوا قاعد يمه قلبه يرقع .. ويتذكر ألاء .. وجم مره راح كليتها مع فهد ولمحها من بعيد .. بس مشكلة خالد انه يستحي يرقم ابنيه!! يخاف ترده وخصوصا انه غرضه مو لعب .. بس كان وده يتعرف عليها .. وفهد حس بمعاناة رفيجه وقدر اييب الرقم من ساره!

استأذن خالد من أهله و راح غرفته وسيده اتصل على فهد ..

خالد: من صجك يبت رقمها؟!!

فهد: طالع المطفوق! الناس اتسلم اول .. تقول الو .. اي شي مو انت!

خالد: فهد عن الملاقة باليوم اكلمك اكثر من 10 مرات ان شاءالله تبيني اسلم كل مره!

فهد: المهم .. الحين انا بادزلك رقمها مسج .. وانت تصرف ..بس هااااااااااا لا اتقول لها انك خذيته مني وانه ساره عطتني اياه ترى اهي محلفتني ما اييب طاريها .. وانا ما اقدر على زعلها بصراحه!

خالد: انزين شاسوي؟ اتصل؟ شاقولها؟

فهد: تبيني اقولك شتقولها؟ بعد شرايك انا اكلمها احسن!

خالد: اكل هوى.. تحجى عدل .. انا اقصد اذا سألتني من وين خذيت رقمها شأقول؟؟

فهد: خلود قولها اي شي! انك لحقتها من الجامعه مثلا .. وعرفت بيتهم وطلعت الرقم أي شي يابابا !

خالد : اوكي صار .. يالله "ضف وجهك" << يتعمد يقط قطات بدويه على فهد

فهد: هههههههه ايا التعبان .. هين شوف منو بيدزلك الرقم!

خالد: فهيدااااااااااااااااااااااان!!

فهد: يالله اقلب وجهك .. خلني اشوف اشغالي!

خالد: يضرب الحب شو بيزل! باي!

فهد: ههههههههههههههههههههه ..باي!




******************************************************


يتبع في الغد بإذن الله.. وان شاءالله يعجبكم البارت ... :)

​
 
rose red

rose red

New member
إنضم
26 أغسطس 2009
المشاركات
577
مستوى التفاعل
0
النقاط
0
الإقامة
Q8
الله القصة حلوة و حدها تخلي الواحد يندمج كملي ناطريينج
 
^ليلاس^

^ليلاس^

New member
إنضم
13 أبريل 2006
المشاركات
3,887
مستوى التفاعل
0
النقاط
0
المكتووب مبين من عنوانه اكيييد حلوة القصه
 
يجب تسجيل الدخول أو التسجيل كي تتمكن من الرد هنا.
أعلى أسفل