عندج سوالف حزاوي مواقف ولا كلمات أهلج الأولين يقلونها ما قمتي تسمعينها وايد الحين..

جاي الضحى قال:

دان دان...الله يعافيج ...عافيه على الشيخة السنعة إلي تقعد مع يدتها...باراك الله فيج...ماني متحلحلا من مكاني إلا لمين تيبيلي سالفه من سوالفها...:bbbiu:​

أنقر للتوسيع...

اي اسم الله علي شاطره ترى لووووول

والله شكلها مالها خلق سوالف قاعده تشرب جاي

المهم من الكلمات اللي دايم تقولها :

يادافع البلا = يعني الله يبعد الشر

ياحافظ ياعقايل الله = اذا سمعت شي يخرع :eh_s(6):

<<ترى الترجمه اجتهاد شخصي عاد لوووووووول

وفي سالفه تعجبني سالفة (( ثــنـيه )) <<النون عليها شده

يقولولج هذي بنووته كانوا اهلها بيشدون قبل ايام البر يعني بغيرون مكانهم اتوقع

المهم الناس تشيل وتحمل على البعارين والاخت تنزل الاغراض << الظاهر مو صاحيه

عاد دايما اذا بغينا نسوي شي وصار العكس او خرب يقولون(( نفع ثنيه لاهلها )) يعني هي مانفعت اهلها اساسا :dddds:

<<اتخيل شكلها شلون الناس تشيل وهي تحط اقعد اضحك

ولي باااك ان شاء الله :eh_s(6):

ماشاء الله سبوج من ردج لين ناديتيني شوفي جم رد بيننا؟؟؟؟؟؟؟؟؟

انا عاد وحده وايد استخدم الحجي القديم بكلامي جني عيوز


يرهم يعني يطبج يعني يلبق === كلهم كلمات كويتيه بمعنى يليق


وهم كلمة لابج = مناسب

مخدي = دثوي = غبي

طقتني البوهه او البهره = انصدمت

جود = يمكن او لعل وعسى

فيني فقرة الشي الفلاني = محتاجه الشي الفلاني او ناقصني

شفاحه = شراهه على الأكل او تركب على واحد اشياء مشفوحه على الهدوم بعد هم تصير

قضى = خلص

مديم = دائما ( هالكلمه انا ما اسخدمها وايد بس سامعتها )

كويحه = اسمر ممولح

قلق - معطن = وصخ


واكيد في وااااااااااايد كلمات بجعبتي بس ناسيتهم الحين .. كل ماذكرت شي بمر عليكم ان شاء الله

حده موضوع حلو ياز لي = عجبني هههههههه

قووة بناات شلوونكم:eh_s(3):
امبييه الموضووع حده يونس
بكتبلكم اللي عندي حاليا

ميـر = لكن
هقوتي = الظن

هااا بنيـااات .. شلووووووونكم ؟؟


يالله ماتبونا نلعب طـمباااخيه ؟؟؟؟؟؟؟:dddds::dddds:


اليوم تذكرت لمن كنت صغيره كنت أسمي اللون البيج : حــلــيــبـي ....!!

:ggdw:
:ggdw:

ولي عوده انشاالله ..

مشكورين على الموضوع الحلو ... في اختلافات تصير بالنطق بعض الاحيان

وحلوة فكرت انتذكر بس احس اذا الواحد ما ربى على هل الكلام صعب ايتعلمه احس يصير مصطنع ..

يعني مرات تحسون الي جدامكم توه متعلم هل الكلمة وقصب ايدخلها بكلامه ما تصير عفويه ما ادري شلون احسها تطلع مو حلوة و في مرات لان البيت يكررها او من كلام اهل البيت تطلع لا شعوريا من ضمن الحجي يعني ساعات تقعدين مع بنت تقولين هذي عييز اسلوبها كووويتي كووووويتي ..

ايي صااجه شيهانه انا خالاتي يقولون حجي قدييم بس لمه اقط قطه يضحكوون علي يقولون يعني صايره كويتيه قديمه يتطنزوون بس هم ماايمنع انه نتعلم ونقول حجي قبل عشان عيالنه يتعلموون :eh_s(6):
امممم اليوم صدتلي جم كلمه من محظوظه ومبروكه بس نسيتهم لوووول قلت بكتبهم بالموضوع يعني :eh_s(3):

سمردحه = من غير رقيب ولا حسيب

ماعندنا كيري ميري = ماعندنا روح وتعال

بطيت = تأخرت

انتباصر = نتشاور

والبقيه تأتي ان شاء الله

جاي الضحى قال:

يا هلا مزاجي كول.....يلى كاني شوتاي أشوف بس لا تفنقرني ولا نكسر شي.....حليبي؟ أنا بعد أقول حليبي...ولا الحين أقول ادعم!!!! الدارج الحين إن الناس تقول بني مو ادعم....يا حلوج والله ....حياج ربي...​

أنقر للتوسيع...

وييي خلاااص مابي ألعب طمباخيه .. مالي مـقــاقـه أراكض وراها ... أنا أقول أروح اشتري غريضات من الحفيز وااايد أبرك ...!!!!

:dddds:

هلوووووووووووو بجاي الضحى القمر قريت القبس وذكرت موضوعج واخترت احط منه من اللي امي تقوله

هلا هلا هلي لي
وأخذي الصحن وغني لي
وان جان احد غمز لج
تعالي وقولي لي

خفيفة وجنها ريشة
من قلة المعيشة
ومثلك ومثلك ما يابوا
لو حندبوا لو شابوا


http://www.alqabas-kw.com/Article.aspx?id=438755&date=18102008

انا أذكر امي تناديني مدري شتبي فيني تبي تحنيني .....ومااذكر الباجي
فص نمر يهني رقم واحد او درجه اولى
دوج يعني اخذي
عياره يعني جذابه او دلع
بوشلاخ يعني جذاب
شوحه يعني احذفه
النقصه يعني الاكل او الشي اللي تعطينه حق الجيران والاهل يكون شويه موعارفه اشرحها فهمتني
قلعة وادرين يعني المكان البعيد
ابطيني الشخص اللي يحب الاكل
جمبازي الشخص اللي يلف ويدور
خنت حيلي تنقال اذا كسر خاطرج شخص
شقردي يعني الشخص الشغول وكثير الحركه
سمردحه يعني المكان الكبير
طنطل الشخص الطويل
اعنبوك وهي في الحقيقه كلمة توبيخيه يتقبلها البعض حيث يقولها الكويتي لأصدقائه وأبنائه واهل بيته مثال اعنبوك وين رحت ...اعنبوك يوز اذيتـنا لكن في الحقيقه هي مسببة قاسية محرفة ومخففه من كلمة ألعن ابوك ولكن تـلفظ بدون قصد.
وهالكلمه ابوي ماطيح من لسانه ذاك اليوم راحوا الريايل يخطبون حق اخوي عاد ابوي اندمج بالسوالف جان يقول حق ابو البنت اعنبوك يقول ريلي مت من الضحك عالموقف والحمد الله عدت على خير وابو البنت طافت عليه هههههههههههههههههههه ابوي نكته

تذكرت المنده يعني العامود
ملاله يعني سله تكون مرفوعه بحبل يحطون فيها الاكل الباجي
برجه كلمن يعرفها اتوقع يخزنزن الماي فيها
ليوان يكون الممرات اللي بالحوش
بقوووول شي وانتوا بكرامه مختله يعني الحمام عزكم الله

بنات تصدقون ضحكتوني!!

اشدعوة كل هالكلام نسيتوه و قاعدين تذكرونه و صار شي نادر و غريب عندكم

احنا ليلحين هذا كلامنا .. بيت يدي و بيتنا ليلحين نقول هالحجي .. أستغرب من اللي يقولون ما نسمع هالكلام

انا انتبهت على بعض البنات معاي بالمدرسة .. كنت لما أتكلم يقولون لي انتي شتقولين؟ كلامج قديم!! يحليلهم ههههه

انا كنت أستغرب منهم .. من صجهم ما يعرفون هالكلمات أو ما مرت عليهم أو يقولون عنها كلمات قديمة؟؟

بس لما شفت موضوعكم بعد .. تأكدت ان في ناس بالكويت نست كلام قبل

بحكم البيئة اللي عشت فيها .. كانت الحزاوي و الغطاوي ما تنقطع عن البيت .. و الحمدلله ليلحين يدتي الله يخليها لنا تحب تحازينا و تحازي عيالنا

و ليلحين لي غنت يدتي على الياهل الكل يصفق و يرد الاغنية معاها رياييل و حريم.. صغار و كبار .. الله لا يغير علينا