قصة فاطمه fa6ma story

q8_girl200 · 27 ديسمبر 2012

السلام عليكم .. شلونكم
قــــــــصـــــــــــــــــة فــــــــــاطـــــــمــــــــــه
قصه واقعيه ..
أنا مو كاتبه ولا بارعه بالكتابه بس قررت إني أكتب هالقصه لأني عشتها مع بطلة القصه وحبيت أكتبها بأحداثها وتفاصيلها وأتمنى تكون خفيفه عليكم وتعجبكم وتستفيدون منها

وترا هذي أول مشاركه لي بهالمنتدى وأنا توووووني مسجله حبيت أنزل هالقصه واقعيه 100%
وحيل حلوه أتمنى تعجبكم وأبي تفاعلكم اذا تبوني أنزل البارت الأول :eh_s(17)::eh_s(17)::eh_s(17):

q8_girl200 · 27 ديسمبر 2012

كان يا ما كان في هذا الزمان .. كان في بنيه أسمها فاطمه عمرها 19 .. جميله حيل حيل الكل يتكلم عن جمالها .. ومن كثر ما أهيا جميله وخلوقه وملتزمه وتفكيرها وعقلها غير عن بنات جيلها .. دايما عليها العيون .. الكبير والصغير يحسد أمها عليها .. وكل ما تروح مكان لازم الشباب يتنحون عليها .. جمالها رباني وطبيعي .. والحلو فيها .. أنها أنسانه حيل حيل طموحه تحب تشتغل من صغرها وتدرس بنفس الوقت .. ومن صغرها متحمله المسووليه وصديقة أمها .. يعني تقريبا أمها ماتشق خيط بإبره على قولتهم ألا تاخذ رايها ..
فاطمه المفروض أنها بالجامعه بس تأخرت لظروف صحيه جم سنه والحين تعالجت الحمدالله .. قاعده تكمل مسائي لأنها ما توالمت مع الصباحي .. حست البنات أصغر من عمرها ومو نظامها كلش .. وهم تداوم الصبح معهد تدرس تخصص تجميل .. خل أكلمكم عن هواياتها .. فاطمه من صغرها تعشق الفن تحب التصوير والأزياء والميك أب .. ف لما صار عمرها 15 بلشت تصمم بتشجيع من أهلها لما صارت مصممه معروفه .. ودرست تصوير وصارت مصوره .. وقريبا راح تصير خبيرة تجميل .. يعني بأختصار بنيه كامله والكامل الله .. الحين راح أكلمكم عن قصتها بقلمي المتواضع وأسلوبي البسيط جدا وأنشالله تعجبكم وعلى فكره اهيا قصه مو روايه يعني أحداث بتكلم عنها .. اذا تبوني أنزل البارت الأول وأكمل أبي تفاعل j

Loshi · 27 ديسمبر 2012

كملي ناطرينج

ام غازي 2012 · 27 ديسمبر 2012

كملي

لا يوووقف

Ms.romanceya · 27 ديسمبر 2012

رؤؤعةة اب اب اب
و احلى مآفيةة آسمي مؤجؤد لوووول
ؤؤ بس حبيت آطلب طلب لؤ تكبرين الخط اشؤؤي يكؤؤن احسن
ؤؤ سلآآمتج

شموخ منالوه · 27 ديسمبر 2012

كملي الغلا

q8_girl200 · 27 ديسمبر 2012

شكرا حق كل الي راح يتابعوني انشالله ارجع البيت واكمل واتمنى يزيد عدد المتابعين وشكراًً مره ثانيه

q8_girl200 · 27 ديسمبر 2012

Part1
بيوم من الأيام كانت فاطمه طالعه ويا خالها حسين عمره 24 حيل قريب منها وصديق الطفوله .. كانت تتمشى معاه بأحد المجمعات وهيا تضحك وماسكه أيده .. طبعا دايما الي يشوفهم يقول عنهم متزوجين .. فاطمه نصدمت لنه شافت خالها هدها وراح يسلم على شخص .. قربت .. حاشها فضول تبي تعرف منو؟؟ .. طاحت عينها بعينه .. وأهوا تنح لما شافها .. طقته البوهه لي درجة انه ما كان منتبه وأهوا يكلم حسين .. الشخص كان حيل مصدوم وعيونه كانت تتكلم .. نظراته كانت كلها شوق ولهفه .. تبووون تعرفون منو هذا ؟؟ ولا ما أكمل ؟
وعلى فكره ترا البارت قصير لأنه بشوف ردت الفعل

يعني الي حاب أكمل يعطي رايه :$

q8_girl200 · 27 ديسمبر 2012

part2
قبل سنه شهر 11 سنة 2011
أم فاطمه : يما فطوم أبيج تروحين ويا البنات تحجزون تذاكر حق مسرحية (....) خواتج لصغار يبونها
فاطمه : أنشالله ماما يوم العرض مالنا بحجز لهم

هاااا أكمل

?????????????
فاطمه كل عيد فطر ولا أضحى تطلع مع بنات خالها مسرحيات لأنه تدرون أيام العيد الكويت زححمه وكله هيلق يعني الواحد يا زواره يا مسرحيه أو شاليه .. راحت بهاليوم وكان في شخص كله يخزها وحيل حيل مبين أعجابه فيها بس فاطمه ما كانت تلقيله بال كلش بنات خالها لاحظوا ..
مريم بنت خال فاطمه : حركاات بنت خالي حركاااات ضبطينا يا معوده
فاطمه ستحت وبنفس الوقت منغثه منه لأنها ماتحب هالسوالف والخرابيط : ههههههه شتبييين يوزي عني
مريم : يعني تسوين روحج ماتدرين هالمزيون شيبي فيج وين مايروح يطالعج لا وشكله ثقيل هالنظرات بس حقج عشتووو
فاطمه : خيوولي زييين تلاقينه يستعرض مسوي هالحركات حق ألأف غيري
مريم تطالعها بنظره من فوت ليه تحت : مااالت بسسس مو كفوو واحد مزيون انتي مال عقيدي ويخب عليج بعد
فاطمه تضحك حست مريم نقهرت : ههههههههههه ويهج لعقيدي مليقه
وأهما طالعين ولما خلصت المسرحيه البنات شافو الشخص مره ثانيه وكان في بنتين يخزونه وأشكره يتحرشون فيه .. أهوا قمممممممه بالثقل نوعه جميل وثقيل وتبارك الرحمن حيل هيبه وعيونه تينن نظرته سااااااااحره
مريم : شووووووفي ياحظي شوفي مو قتلج هالنظرات بس لج
فاطمه جعمتها وراحو السياره ..
مريم : زيوون شغلي اغنيه شي السياره كئيبه خل نفصل شوي
فاطمه تطالع مريم بطرف عينها : على فكره يعني أكو وحده هني قاطعه الأغاني على اي اساس اخذ ذنوب عشان حضرتج
مريم تضحك : هههههههه يامعوده خو بس اليوم فطوووم عشاني ترا الناس عيد ساعه لألبك وساعه لربك :$
زينه : فطمووو يالله بس الحين خوو فليييييها وشغلت وليد الشامي ( يا أهل الهوى ) فصلوا البنات وراحو تعشوا بمطعم .. وفاطمه ردت البيت ونست الي صار ما حطت ببالها لأنه شي طبيعي بالنسبه لها إنه وين ماتروح لازم يخزونها ويتنحون بشكلها

VET-Nour · 27 ديسمبر 2012

<< كمليي

q8_girl200 · 27 ديسمبر 2012

شدعووووووووووه 43 مشاهد محد يبيني أكملللللللل ؟؟؟؟؟؟؟؟؟ :$

q8_girl200 · 27 ديسمبر 2012

رابع يوم عيد :
حضرت فاطمه المسرحيه مره ثانيه مع امها وخواتها واخوها لصغير وانصدمت انها شافت الشخص مره ثانيه .. طلع من الي يشتغلون بالمسرح .. وطبعا حتى هالمره عيونه ما طاحت من عينها وجنه ستانس انه شافها مره ثانيه ..
أم فاطمه : فطوم يما قومي حجزيلنا تذاكر تصوير قربت تخلص المسرحيه
فاطمه : اوووكي كاني قايمه .. وصلت مكان التذاكر حجزت وقعدت تمسك دور عشان لا يتأخرون .. كان المكان فااضي ماكو أحد .. بس مره عوده قاعده بالكرسي
الحجيه : ها يما خلصت المسرحيه ؟
فاطمه : لا خالتي بس بحجز حق خواتي لصغار تذاكر بيصورون مع الممثلين .. تدرين بعد بعد شوي بيصير زحمه فبمسك دور من الحين j
الحجيه : ايييي والله صاجه انا عيالي مطلعيني من الشاليه غصب الا بيصورون مع هالممثل الي شعره واقف ( أشرت العيوز على صورة ممثل كانت بالبوستر مال المسرحيه

) : من زينهم عاد ميتين عليهم هاليهال على شنووو يا حافظ
فاطمه : ههههههههه اي والله صاجه .. كانت تلعب بفونها وتسولف مع الحجيه ولا تسمع صوت يناديها من ورا .. أختي .. لفت ولا تشوف واحد من المنظمين يكلمها فاطمه : نعم اخوي .. الريال : تفضلي داخل عبدالله الفلاني يبيج .. فاطمه تنحت : نعم !! منو هذا وشيبي رتبكت وخافت لنه المكان كان ظلمه وفاضي للحين مافجو باب التصوير ..
دشت داخل .. ولا تسمع صوت مره واقفه برا تصارخ : اييييييه هذا الي فالحين فيه تضبطون ربعكم واسطات وبس .. الحين احنا ننطر دور وهالبنيه تدش بارده مبرده ..
فاطمه قامت تضحك وخافت يتحجون عليها الناس الي ناطرين برا .. لأنه الريال طلبها شخصيا
دشت داخل مشت شوي كانت مرتبكه .. شافت الشخص نفسه .. الي للمره الثانيه تشوفه وكله عينه بعينها .. بس هالمره كان حيل مرتبك .. وعينه كانت تتكلم قبل لا ينطق الحجي كان يبين عليه الخجل والربكه .. تبون تعرفون شنو يبي عبدالله ؟؟ وشنو قال حق فاطمه ؟؟ تابعو البارت 4

VET-Nour · 27 ديسمبر 2012

شقالها ؟؟؟ اكيد يبي رقمها واهيا ماعطته لانها ثقيله وجي و بعدين يلحقها لي بيتهم صح ؟

كمممملي

q8_girl200 · 27 ديسمبر 2012

Part4
خل أكلمكم عن شكل عبدالله : أهوا شاب مزيوون حيل حيل حيل أسمراني بس مو طويل وايد طوله عادي جسمه حلو وشعره بني قامج ولونه جنه مسوي تان بس اهوا طبيعي جذي وأحلى شي فيه عيونه كلها جاذبيه ونظرته تينن كلها حنان وطيبه ونوعه حيل ثقيل لمن يمشي كله عينه بالارض ما يعطي البنات ويه .. البنات اهمه يتحرشون فيه

عبدالله واهوا مبتسم : شفتي شسويتي فينا .. كله منج الجمهور عصبو علينا بسبتج شحقه داشه هنيه ؟
فاطمه تنحت لأنه كسر فيها .. طبعا كان مبين انه يتغشمر بس نرفزها بالذات انها كانت خايفه .. على طول لفت وكانت بتروح
عبدالله : سوري لأني ناديتج بهالظلمه بس أنا طوفتج المره الي طافت وماقدرت ما اكلمج هالمره .. يبا شسويتي فيني .. المسرح باليوم الواحد تمر علي 1000 بنيه .. ليش انتي الوحيده الي دشيتي خاطري ..
فاطمه طقتها البوهه تمت تطالعه مده كامله ماعرفت شترد .. بالأصح جنه أحد قاط عليها ماي بارد
عبدالله : ترا شفت أمج معاج اهيا قاعده داخل .. تبين اروح أخطبج منها الحين !! ترا ماكو مشكله عندي ,, طبعا كان يقول هالحجي واهوا يبتسم على ضحك على مرتبك ومستحي .. وفاطمه شكلها كان فلللللم مصدوووومه من كلامه وحاطه ايدها على حلجها وتضحك وترررجف من الخوف بس تبي تطلع من هالمكان
عبدالله : شفيج ساكته من صجي قاعد اتكلم .. ممكن تاخذين رقمي ولا اروح اخطبج من امج ترا اسويها طبيعي جدا اروح الحين اقولها خالتي بنتج عاجبتني من اول يوم شفتها وانا مو قادره اشيلها من بالي
فاطمه خافت وبقلبها ( امبييييه شهالوهقه ) مانطقت بولا حرف
عبدالله قرب شوي : يلاااا انا ناطر
فاطمه بعدت وبدت تتنرفز بقلبها : خل اخذ رقمه وافتك هذا شكله مينوون يسويها يروح عند امي) .. خذت الرقم وراحت وطول ما اهيا تمشي عينه عليها واهيا كانت خايفه حيل .. حست بشعور غريب لما كان يطالع عينها .. ماكو شي حرك مشاعرها كثر نظرة عيونه .. بس بقلبها تقول طاف اهم شي قدرت اوخر عن هالمينون .. ولمن ردت البيت دقت على مريم بنت خالها قالت لها السالفه كلها .. مريم حنجت عليها اول ماعرفت كلشي : امبييييه ونااسه فطمووو يا ويلج ان مادقيتي وكلمتيه
فاطمه : نعم نعم نعم خااف بسسس من صجج انتي ولا تغشمرين .. لا حبيبتي خيولي أنا وين وهالخرابيط وين
فاطمه من صار عمرها 16 سنه بدت تلتزم حتى اغاني قامت تقطعها شوي شوي يعني نوعا ما دينه بس مو معقده بحدوود وكلش ماتحب سوالف حب وخرابيط عندها مبدأ الي يبيني يطق باب بيتنا فكلش ما أيدت فكرة مريم أنها تكلمه .. بس مريم حنت عليها وحاولت تأثر عليها وبعد الحنه والقرقه الزايده فاطمه رضت تكلمه مسجات بس .. وتشوف شنو نظامه يبيها صج ولالأ ..
** من الغريب أن تتخلى عن قيمك ومبادئك من أجل شخص فجأه ظهر في حياتك!!
البارت الياي تبتدي قصة فاطمه وعبدالله J

q8_girl200 · 27 ديسمبر 2012

على فكره البارتات جاااااهزه أكمل ؟؟؟؟؟

رتبه دبلوماسيه · 27 ديسمبر 2012

وااي حبيت سرد القصه وآآيد

وآآصلي يالغلا

وسجليني من متابعينج ^_^

q8_girl200 · 27 ديسمبر 2012

اتشرف فيج حبيبتي

q8_girl200 · 27 ديسمبر 2012

Part5
فاطمه دزت مسج : سلام
عبدالله#مسج: هلاو غلا وعليكم السلام .. مابغيتي
فاطمه : سوري بس نشغلت شوي
عبدالله: عادي يبه .. ماقلتيلي شسمج يالجميله
فاطمه بقلبها ( وليييه شقوله هذا !! بالله طلع مو خوش واحد ماني قايله اسمي الصجي )
مسج# ساره :$
عبدالله : عاشت الاسامي سارونه
فاطمه : عاشت ايامك J
وتمو يسولفون بالمسجات لمن يا الوقت الي قالها بدق اكلمج فاطمه تنرفزت حيل ودقت على مريم : مريوووم شسوي هذا بيكلمني فوون ويع ماابيييي .. اخاف .. ومو متعوده !! شكوو اكلم واحد ماعرفه خووو .. شوفيلي حل حق هالورطه .. الحين انا ويني وين هالسوالف الماصخه حبني وأحبك وين قاعدين
فاطمه كلت مريم بقشورها ماخلتها تنطق كلمه .. مريم حست أنه فاطمه صج متنرفزه ومو بالعه هالموضوع كلش
مريم : خلصتي كلامج ؟
فاطمه حدها متنرفزه : ايييييييييي .. مريم : يا غبيه مادري ليش حاسه انه من صج نعجب فيج كلمي الريال شوفي نظامه شنو اذا طلع يلعب قطعي علاقتج فيه خو مو شي صعب .. !!
فاطمه سكتت مده وحست انه مو مقتنعه بس بتسوي هالشي مجبوره لنها خلاص كلمته مسجات وعرف رقمها ومارح يخليها اذا مادقت بيدق ..
الساعه 1 الفير فاطمه كانت منسدحه بفراشها بتنام طنشت عبدالله ماردتله خبر يدق ولالا .. وصلها مسج من عبدالله : قاعده .. أدق ؟
فاطمه حدها متوتره : أي
رن تلفونها خمس مرات يالله ردت .. بصوت يررجف ومستحيي حيل ومتوتر : .. ألوو
عبدالله بصوت حنوون : ما بغينا نرد ؟
فاطمه مستحيه ماعرفت شنو تقول بس ضحكت ضحكه خفيفه
عبدالله : شفيييه صووتج كنتي تركضين ؟
فاطمه قلبها كان يدق بسرعه بسرعه اول مره تكلم شخص غريب بالفون كله ساكته واهوا يسولف .. عبدالله حس فيها انها مستحيه .. اول سؤال سألها .. مرتبطه ؟؟ وكان جواب فاطمه طبعا لأ .. وقام يكلمها عن نفسه وخذتهم السوالف وقت طويل .. بس فاطمه ما زالت مستحيه منه ماخذت عالوضع ولا تقبلت كلش انه ممكن ايي يوم وتكلم ريال وتصير بينهم علاقه .. بعد أول مكالمه بينهم فاطمه ماقدرت تنام كانت ووايد تفكر وحاسه بتأنيب الضمير .. وأهيا نوعها وايد تحب تحاسب نفسها قبل لا تنام مستحيل يمر يوم ما تاخذ عشر دقايق عالأقل تقعد بروحها بفراشها وتحاسب نفسها شنو سوت وشنو ما سوت وشنو الي لازم تسويه .. كانت تقول : انا بنت ناس وعايله محترمه واهلي ما ربوني على جذي .. شلون بعرف هالشخص صج يبيني ولالا شلون بتم اكلمه فون كليوم .. يارب أذا في خير لي قربه واذا ناوي يلعب بقلبي نفس شباب هاليومين الي اسمع عنهم بعده بأقرب وقت .. ونامت

أكمل ؟؟؟؟؟؟

q8_girl200 · 27 ديسمبر 2012

امبيييه شدعوه ماكو تفاعل !!

رتبه دبلوماسيه · 28 ديسمبر 2012

كملي حببووووبهه وانشالله راح يدخلون وايد

قصة فاطمه fa6ma story

New member

New member

New member

New member

New member

New member

New member

New member

New member

New member

New member

New member

New member

New member

New member

*مساعدة مشرفات فرفشة كويتيات*

New member

New member

New member

*مساعدة مشرفات فرفشة كويتيات*

مساعدة مشرفات فرفشة كويتيات

مساعدة مشرفات فرفشة كويتيات