قصة عن الصداقه....واقعية 100%..راح تعرفين قيمة رفيجاتج..

[حياتي معاناة]

كوووكة ويـــنـــج لـــيـــش مــاتـــكـــملــيــن ؟؟؟؟؟

يـــلا انتــــظرج...................

 

[كوووكه]

العفو,,,حياج الله..

 

[كوووكه]

حاضر والحين بنزل آخر 3 بارتات....

 

[كوووكه]

البــــــــــــــــ(8)ـــــــــــــــارت...


**************************​

دخلت وانا شماغي على كتفي وماسك عقالي في يدي وحالي دمار, لقيت مو بس اخوانه حتى اعمامه واخواله وزوج اخته بعد، الكل كان متواجد, لما شافوني تغيرت وجيههم وحضنوني بحراره, كلهم اعرفهم ويعرفوني زين عرفت اني ذكرتهم فيه لما شافوني حتى واحد من اخوانه ما رضى يتركني كنه بتعلقه فيني يحس انه مع اخوه خالد والغريبه انهم كانوا يعزوني بدال ما انا اعزيهم , المهم جاني طلال وعلامات التاثر باينه في وجهه..تبي ادخل معك؟؟؟احنا تونا طالعين... قاطعته...لا لا بدخل لحالي... كانت هاذي اول جمله انطقتها من اول ما دخلت للمغسله حتى لما عزوني ما رديت عليهم..
تعوذت من ابليس وبديت اذكر الله و دخلت في الغرفه اللي دلوني عليها كانت فيها روايح غريبه الريحه اللي قدرت اعرفها هي ريحه المسك والصابون, الظاهر ان الرجال اللي كان فالغرفه هو المغسل, وقفت في مكاني عند الباب ماكنت عارف وش اسوي؟!! قرب جنبي و كان شخص يميل للقصر ,ابيض, لحيته طويله وصاحب ملامح سمحه, حط يده على كتفي وحس بالرعشه اللي تهزني كنت اطالعه بنظرات استغاثه... وبصوت وقور قال...عظم الله اجرك ياولدي واحسن الله عزاك ,الله يلهمكم الصبر والسلوان, قبّل جبهته وادع له بالثبات عند السؤال, وباللي يجي في بالك... كنت اطالعه وانا اشهق بدون دموع وطلع من الغرفه..
شوي شوي قربت من عنده وشفت منظر في حياتي ما مر علي مثله, حسيت الدم وقف في عروقي لما شفته انهارت كل حصون المقاومه والصبر اللي بنيتها , ما ادري وشلون اشرح الوضع كانوا حاطينه على شي زي الطاوله ومرتفعه عن الارض بمسافه قليله ,مغطين جسمه بشراشف بيضاء الا وجهه وجزء من صدره, كانت عينه وجزء من جبهته متحوله للون الازرق من فعل الصدمه اما خده ورقبته كانت فيها جروح بسيطه ,لكن واضح ان تركيز وقوه الصدمه كلها جت على صدره, كان زي اللي نايم بس بدون أي اثر للحياه والظاهر اني ما صدقت الخبر لين شفته بعيوني, فقدت اعصابي في ذيك اللحظات وصرخت صرخه مريعه، حضنته بين يديني وقعدت اصيح بحرقه زي الاطفال, دخلوا علي بعض اخوانه يوم سمعوا صوتي وحاولوا ياخذونه مني لكني كنت متمسك فيه بقوه.. يابندر قل لا اله الا الله لا تسوي في نفسك كذا ترى ما يجوز...وانا اصرخ من كل قلبي احس اني فقدت عقلي للحظات... اتركوني خالد يا اخوك رد علي , كلمني ياخالد ,طلال خالد ليش بارد؟؟ليش تاركينه كذا؟؟ ليش ماغطيتوه؟؟ حرام عليكم... نزل راسه وانسابت الدموع من عيونه...انا الله وانا اليه راجعون...تعال معي يا بندر تعوذ من الشيطان وخلنا نطلع...وانا احاول اكلمه..ياخوك وين رحت وتركتني؟!!انا من لي غيرك ياخالد؟؟.. ودموعي سيول واخوانه يحاولون يفكون يدي عنه..
وبعد جهد قدروا ياخذونه من بين يديني بعد ما بين اثر ضغطي على جسمه، وانا منهار وفي حال مايعلم فيها الا الله سبحانه, كل لحظه انادي بأسمه..جابوا لي كرسي وقعدوني عليه وانا كني معهم ومو معهم... واحد من اخواله شيخ كبير من الناس اللي فيه خير وصلاح والله هاديهم قعد يمسح على راسي وصدري ويقرى علي قرآن لين هدت نفسيتي شوي ناظرت فيه...خالد صدق راح يا خال؟!...شد على يدي وهز راسه ورجعت دموعي ويدييني على راسيوانا اهز على الكرسي..مايصير يا خال والله ما يصير...قعد يستغفر وانا على حالي، كنت مفجوع الله لا يفجعكم في حبيب...
رحنا نصلي عليه كان المسجد مليان واللي برى اكثر من اللي داخل, كان الله يرحمه رغم صغر سنه انسان محبوب من الجميع صغار وكبار, وفي المقبره مع الزحمه وكل هالعالم اللي حولي الا اني حسيت بوحده رهيبه,كنت بعيد عن الجماعه ما ابي احد يعرفني او حتى يشوفني رغم اني عارف ان الكل يسأل عني تلثمت بشماغي ولبست نظارتي الشمسيه ووقفت بعيد عنهم.
جاني تركي واللي كان له غلا كبير عند خالد بحكم انه الصغير وكان دايم يقول انه رغم صغر سنه الا انه كان حكيم ويفهم اكبر من عمره بكثير,كان عمره تقريبا ذاك الوقت12سنه سلم علي وحضنته وانا احاول اتماسك قدامه ولكم ان تتصورون مقدار صعوبه الأمر خاصه انه يشبه خالد كثير قال لي:بندر خالد كان يعزك اكثر من أي واحد في هالمكان وكلهم مجتمعين حوله الا انت!!لا تتخلى عنه في هاللحظات عشان ما تندم باقي حياتك, تشجع وادع ربي انه يصبرك بس لا تحاول انك تهرب من احزانك بهربك من هالموقف... كانت كلمات عظيمه اثرت فيني وشفت في هالطفل اللي فقد اخوه في حادث مفجع الصبر بمعناه الحقيقي,لميته لصدري مره ثانيه وكنا نواسي بعض بخسارتنا الكبيره, مسكت يده وتوجهنا لهم...استعدوا للدفن وسمعت اخوانه ينادوني...قلت لهم اني انا اللي بنزل فالقبر واحطه ونزل معي واحد من اخوانه يساعدني...سلمونا اياه من فوق وحطيته وانا ادعي له واذكر الله طول الوقت,كان ودي لو اجلس معه اوحتى اشوفه واسمع صوته لاخر مره لكن عرفت ان شمسي غابت خالد ((الرمت)) غاب من حياتي وهالحياه للابد.

************************** ​

 

[كوووكه]

البــــــــــــــــ(9)ـــــــــــــــارت...


**************************​

بعد وفاته رجعت ذاك الطفل الكتوم المنطوي على نفسه...انا تركت قلبي معه لما تهاوشنا,ولما راح..راح قلبي معه, ابتعدت عن الناس والعالم فتره طويله كنت فاقده بشكل خيالي واللي يحز في خاطري اكثر لما اتذكر انه توفى واحنا بعيدين عن بعض يعني16سنه عمرنا ماتفارقنا وقبل اقل من شهر على وفاته نتهاوش!!! اللهم لا اعتراض راضي بقسمتك وحكمك يارب,لكن املي فيه انه كان فاهمني وعارف اني ما اقدر استحمل زعله وقلبي ما يشيل عليه واني زي ما قال مهما حاولت آكابر وانساه مصيري ارجع له..
بعد عدة اسابيع على وفاته عطاني طلال دفتر وقال:هذا كان من اغراض خالد الله يرحمه واظن ان من حقك تتطلع عليه وتحتفظ فيه بعد اذا ودك, لما شفت الدفتر تذكرته على طول كنا يوم انا واياه في المكتبه بنشتري كتب للجامعه وشاف الدفتر وعجبه وقلت له هذا مايصلح للمحاضرات ياعمي قال عارف بس تدري وش باستخدمه فيه؟! بكتب فيه مذكرات لكن مو أي شي الاحداث المهمه في حياتي بس, اذكر اني ضحكت عليه من قلب وقلت له انت من جدك؟!!والله ما تصلح لك هالحركات ونسيت الموضوع بعد كذا,فتحت الدفتر وكان مكتوب بالصفحه الاولى:

بالرغم من اني اعتقدت ان اليوم الذي ستملئ به هذه الصفحات لن يأتي ابدا, الا انه اتضح لي عكس ذلك.
وعدت يوماً اني لن اكتب به غير احداث مهمة من حياتي ...احداث تستحق الكتابه وقد جاء هذا اليوم بالفعل...فاليوم أخطأت في حق صديق عمري ورفيق طفولتي.

بعد هاذي الكلمات القليله بعددها والكبيره بمعناها في قلبي لقيت بعض ابيات الشعر:

بندر حرك ضميرك واعترف اني وفيت
سيرة النكران هاذي فضها واذكر غلاي
اعترف بسك تكابر منت واصل ما بغيت
ريح عنادك وخلنا انتفاهم باللي جـــاي
لا تحاول تمتحني ما خذيت؟!الا خذيــت
قلبي الغالي بلاش وما تركت الا شقاي
صح في لعبة غيابك زاد شوقي وابتليـت
بس لاتظلم تراني ما صبرت الابرضاي
ما دريت ان المحبه قاسيه لكن دريت
خطوه المليون جرح وافقت دربي وخطاي
كم تذكرت الليالي وانت يا خلي نسيت
ومن تناسى صدق ذاته ويش اقول الله معاي
يابني آدم تلاحق خاطري لامن طريت
خلك الطيب وحاول تكسب الوقت بوفاي
لا تخليها معاند أن قويت او ما قويت
القوي الله((ياعمي)) وانت تدري عن مداي*2

وبعد كذا انهى كتاباته بهالبيت:

خسرت ولا ربحت الا قليل من الصبر وجراح
ربحت بندر وان خسرت العمر عسى تحييني اوراقي*2

وهذا كان اللي مكتوب بكل هالدفتر بس,الدفتر عنده قبل اكثر من اربع سنين وهذا اللي مكتوب فيه, ولاشي اعتبره مهم في حياته الا هوشتنا, ما ادري اذا كان حاس بموته من قبل والا البيت جا كذا المهم لميت الدفتر لصدري وقعدت ادعي له.
كنت اقعد مع طلال بعض الايام ومره قال لي ان في آخر سفره لخالد مع اهله واللي ماراح معهم طلال فيها قال له: ماوصيك على بندر ياخوي لا تخليه يحس اني مو موجود خلك حوله دوم..كمل كلامه وانا ماسك دموعي اللي اتعبتني...ادري انه مافي شيء يخليك متحس انه مو موجود مثل ماقال وما في شيء يعوضك او حتى يعوضنا بس ترانا كلنا حولك حتى ابوي يسأل عنك دايم...رديت وانا اغالب الدموع وافكر في حال اهله من بعده...ماتقصرون... حاولت اشكي له شوي يمكن اخفف من هالألم الفظيع اللي احس به.. والله انه ماعاد لي قلب ياخالد--.. يوم حسيت اني غلطت بالأسم خلاص انهرت وفضحتني دموعي..
رجعت للبيت وبعد فتره دخلت ريم علي تحاول تواسيني وتطلعني من دوامه الحزن اللي انا فيها...بندر يا اخوي كل شوي والله اني خايفه عليك..كانت جايبه عشاء لكني صديت عن الأكل...طلبتك ياريم والله ما اشتهي شي...هزت راسها..ياخوي فضفض وطلع اللي في قلبك انا اختك وحاسه فيك ما يصير تكتم كل هالالم في قلبك...رفعت راسي... وشلون تبيني اتكلم يا ريوم الوحيد اللي قدرت اشكي له في يوم راح وخلاني خالد راح ياريوم وتركني في هالدنيا لحالي...استغفر ربك يابندر هالكلام ما يطلع من واحد مثلك انت انسان مؤمن وتعرف الله, وبعدين حرام عليك تضغط على نفسك وتحملها هموم فوق طاقتها تتوقع خالد الله يرحمه يرضى لك بكذا..امتلت عيوني بالدموع زي كل مره اسمع فيها اسمه وانا احاول اخفيها عنها..مسكت يدي..لا تحاول تخفي دموعك ياخوي طلع اللي في قلبك اللي فقدته مو شوي، انا ياخوي جايه اقول لك ترانا كلنا معاك وحولك في أي وقت تحتاجنا فيه... ياريم انا شفت الدنيا على يده لكنه ماعلمني اعيشها بدونه، انا خسرت القلب الكبير، من بعده صرت اشوف كل شيء حزين، الدنيا ياريم ماعاد لها طعم بدونه، ليت الزمن يرجع و--ضغطت ريم على يدي...لا تعذب روحك ياخوي كلمة ياليت ماتنفع وهذا قدر الله..
ورغم مرور السنوات على وفاته الا اني عمري ما نسيته اوحتى راح من بالي عايش داخلي دايم وادعي له بالرحمه والمغفره كل الأوقات, رحت للعمره ادور الراحه النفسيه بالقرب من الله تذكرت وانا اطوف لما اعتمرت انا والشباب العام الماضي، قسمنا نفسنا عشان الزحمه كان خالد ماسك يدي و يمشي فيني بين الناس وانا اقرى من كتاب الادعيه وهو يأمن، ولما رحت اشرب من زمزم تذكرت شكله وهو يصب المويه على راسه وجسمه كنه في بيته واحنا نقوله ترى وراك سعي ما راح تعرف تمشي واحرامك مليان مويه و يرد "واذا صار؟!!والله ماعندكم سالفه هاذي بركه يالله سوو مثلي بلا دلع" ،وفي السعي لما شفت العربات تذكرته لما كنت اجره بالموت عشان ما يوقف وهو يأشر على العربات"الله يخليك خلنا نقعد شوي خلاص يابندر رجلي ما تشيلني خلنا نرتاح شوي والا شرايك نستأجر عربه وانت تدفني؟!" ...وانا اهاوشه على كلامه واجره بالقوه...خالد تراك اذيتني قسم بالله البزران مايسوون مثلك...ولما جينا نتحلل كلنا قصرنا شعورنا الا هو حلق شعره كله، كنت دايم في اي عمره اقصر شعري لكن هالمره حلقت.. واخيرا لما رجعت حافي للفندق زي ما كان يسوي خالد تذكرت لما خليناه ينام على الأرض فالغرفه وشكله وهو يهمز رجله بعد تعب العمره وهو يتأفف: ياسلام عليكم بتنوموني على الأرض هالسنه بعد؟؟ ترى ما بيني وبينكم الا شهور، حرام عليكم مو كل مره بندر وسامي ياخذون الأسره في هالغرفه المفروض يصير فيه تناوب!! فالغرفه الثانيه يتناوبون مو انتم يالظالمين...بس محد عطاه وجه ولما قام الصبح كان يشتكي من ظهره وانا اضحك على طريقة مشيته...امش زين لا تنصب والعمره الجايه انشا الله بتنام عالأرض بعد رد علي..هين يابنيدر ان ما خليتك انت تنام على الأرض انا مب خالد... سبحان الله دنيا دواره.. هالسنه اعتمرت لحالي ونمت عالأرض وتركت الأسره فاضيه، ولما قمت الصبح وحسيت ان ظهري يوجعني ابتسمت بحزن استقبلت القبله وقعدت ادعي بحراره ودموعي تنهمر...يارب اغفر له تراي احبه فيك، ياربي ارحمه و برد علي وامسح على قلبي واجمعني فيه..كانت هالعمره الله يتقبلها لخالد...

********************​

 

[كوووكه]

(........الأخـــــــــــــــــــــــــــــيــــــــــر........)
****************************​

اقترح علي شيخ فاضل من اهلنا اني احفر له بير في وحده من الدول الأفريقيه الفقيره واسميه بأسمه الله يرحمه عشان ارتاح بعد وعلمني عن الأجر الكبير اللي بيجيه انشالله وفعلا سويت هالشي ،كنت تعبان من جد اشوفه في كل الوجيه واسمع صوته في كل الاصوات وذكرى اخر يوم شفته فيها ما تفارقني ابد...
في عيون الناس اشوف اشياء كثيره، بعضهم يذكروني دايم ان خسارتي مو بسيطه وبعضهم وحشتهم شوفتنا مع بعض وهذا يتعبني زياده..
واللي يصعب الوضع علي بعد اني وين ما التفت القى ذكرياته ماليه حياتي، اثاث غرفتي اللي اخترناه سوى لما انتقلنا لبيتنا، سيارتي اللي اختار لونها وساقها قبلي وعطره اللي للحين في درجها!! ياغلاة اللي راح...
لكن كل ما اتذكر ان ذاك الانسان كان صديقي ورفيقي القريب في يوم من الايام افرح وابتسم واعرف ان الله يحبني اللي رزقني بأخ مثله,والله يعوض عليه شبابه في الجنه انشالله، واذا كنتم تقدرون تناظرون في عيون ربعكم اليوم وتسمعون حسهم في هالدنيا, احمدوا ربكم على هالنعمه وحطوهم على راسكم دوم خاصة الناس اللي يستاهلون صدق, واعرفوا انكم محظوظين لان غيركم ما يملك ولا بعض اللي عندكم, اما بالنسبه لي مابعد خالد احد والله يجمعني فيه بالجنه انشالله...
انا عرضت قصتي على الناس عشان تاخذ منها عبره, وفاته شي مقدر ومكتوب لكني ابتعدت عنه في اخر شهر له في حياته, بسبب تافه جدا,متخيلين قمة القهر والألم؟!! هو غلط رحمة الله عليه وانا عاندت لكن اللي صار بيننا ما كان يستاهل اللي سوينا, وهذا اللي دايم يسونه الناس يخسرون احبابهم وربعهم باسباب تافهه, يتركون الشيطان يلعب في عقولهم لين تكبر السالفه ويفترقون , ولو سألهم احد عن السبب يلقون ان ما عندهم اجابه واضحه وهم ما يدرون ان الاشخاص اللي يحبونهم يمكن يروحون فجأة، ياناس انا استنيت لين صار صديقي ذكرى تبون تستنون مثلي؟؟!!...
فالنهايه اطلب من كل واحد يقرى قصتي يدعي لخالد بالرحمه ويدعي لي ان الله يمسح الحزن اللي عايش فيني كل هالسنين ونصيحه من قلب ذاق مراره الفراق"الانسان اللي تحبه وتغليه رح اليوم وقله هالكلام خله يدري لا تستنى يمكن ما تلتقيه بعدين الا مثل مالاقيت خالد, وشي ثاني مهم لا تنتظر انك تفقد انسان غالي عشان تعرف قيمته وقدره عندك"
ختاما...
الى الفقيد الغالي , الانسان اللي علمني كيف احب الناس والحياه, الانسان اللي نسى سعادته عشان يسعد غيره,صاحب القلب الكبير المليان بحب الخير لكل الناس,اللي تعلمت منه الكثير وافادني في حياتي ولازلت استفيد,الانسان اللي كان غير الناس اللي قابلتهم في حياتي واعرف انه زي ما كان اول صديق بيكون اخرصديق لان ما في مثله في هالدنيا احد...
"صديقي الوحيد" خالد العبدالعزيز الله العالم بحالتي بعدك يالغالي ياليتك هنا عندي، ما راح انساك يا رفيقي هو في احد يقدر ينسى مثلك؟! ليتك قبل ما رحت علمتني وين القى انسان زيك!! متأكد انك تدري اني دايم شاري ما ابيع وتقبل اسفي البالغ على كل اللي صار مني ...الوداع...
قبل لا انهي القصه اذا كنت تقرى قصتي وكان بينك وبين من تحبه مشكله وكنتوا بعاد عن بعض ارسله قصتي وارفقها بأعتذار بسيط دام عندك فرصه الحين..


**واخالداه**3
واخــالداه وضج الجــرح في كبدي
فسرت بالـجرح.. لا انوي على احد
يبكون مــنك_وقد ناحوا_على ولــد
اما انا فبــكائي حرقة ((الرمــــت))
******
يطوف وجــهك في روحي فأســأله
"بالــله!قل لي اهذي فرقة الابــــد؟"
واخــــالده! يغص الشـــعر من الــم
كما تذوب عيون الشوق من ســـــهد
******
ويخطر الموت فوق البيد عاصــفة"
من الدموع...فنادوا الصبر ايا اهلي
غبت في الامس..عل الامس يسعفني
اذا افقت ولم ابـصرك صبح غـد
******
فلحت لي وجدار الــموت منتـــصب
حتى لأوشــك شوقا ان امــد يــدي!!
اين بســـمتك الحسناء؟هل ســــقطت
شمس النهار على ليل من الكمــــــد؟
******
واخــالداه!وعاد الناس..وانصـــرفوا
وانت في القبر..لم تبرح..ولم تـــــعد
تبـــارك اللـه ! نجري كلنا زمـــرا
نحو المنون ولا يبقى سوى الصـــمد
******
تــــــــمــــــت
*1بدر بن عبدالمحسن
*2احمد المطيري
*3غازي القصيبي

 

[كوووكه]

لكل من قرأ القصة:-
س1:شنو رايج بالقصة؟؟
س2:هل أثرت فيج وإلا لأ؟؟
س3:وشنو علمتج القصة؟؟
س4:وشنو اللي تغير بشعورج اتجاه رفيجتج؟؟
واتمنى من الكل يرد على الأسئلة....وناطرة ردودكم..​

.:bbbiu:

 

[كوووكه]

شدعوه عليكم؟؟؟
وينكم؟؟؟؟
ووين ردودكم؟؟؟​

 

[حياتي معاناة]

مشكورة عالقصة واااي تينن
س1:شنو رايج بالقصة؟؟
قصة روعة بكل معنى الكلمة و من احلى القصص اللي قريتها بحياتي.
س2:هل أثرت فيج وإلا لأ؟؟
اثرن فيني وايد حتى اني اذا تذكرتها تخنقني العبرة .
س3:وشنو علمتج القصة؟؟
غلمتني ان ولاشي يستاهل انك تزعل من شخص اقرب لك من روحك لان بيجي يوم و بنتفارق اذا كان قبلك فماتحس بالذنب اذا مات و اذا كنت قبله فينذكرك بكل خير
س4:وشنو اللي تغير بشعورج اتجاه رفيجتج؟؟
الصراحة انا كنت زعلانة من اقرب رفيجاتي و انشاءالله بعتذر لها من عقب هذي القصة و الفضل لله ثم لج و انشاءالله تقيله قولي اامين
و احييج من كل قلبي غلى ذوقج باختيار القصص

 

[كوووكه]

حياتي معاناة,,,
انا اللي اشكرج على تواجدج بكل قصة احطها في هالقسم ... وانا اقووووووووووووولج من كل قلبي آآآآآمييييييييييييييييييييييييييييييييين تقبله وانا من رايي تطبعين القصة وتحطين معاها ورقة صغيرة فيها اعتذار بسيط <<وعلى قولتهم خير الكلام ماقل ودل....وتعطينها وشوفيها هي بنفسها راح تدق عليج...والله يخليكم لبعض ولا يحرمكم من بعض ....
وفرحتني مشاركتج حبيبتي ... ولا تحرمينا من تواجدج...​

 

[كوووكه]

وينكم بنات ؟؟؟ كلش ماكو ردود؟؟؟

 

[zqertya]

مشكوره حبيبتي وماتقصرين القصه واااااااااااااااااايد حلوه وبجتني : الرد على اسالتج ؟؟
1- القصه حدهاااااااااا حلوه وكلمة روعه شويه عليها .
2- اثرت فيني وبجتني بعد
3-الي تعلمتته من القصه ان اذا سامحت شخص غلطان بحقي اقوله اني سامحتك عشان من داخله يرتاح وما يقعد يفكر واذا صار شي له لاسمح الله عالاقل يكون مرتاح واصلن انا ما اعرف ازعل على احد و اذا جرحني انسان عزيز اسامحه بس عيبي اني ما ارجع مثل قبل وانسحب من حياته .
4- الصراحه انا زعلانه على اقرب رفيجه لي قصدي الي كانت قريبه لي انا سامحتها بس ما اقدر ارجع مثل قبل معاها لانه هي للحين مصره تغلط بحقي مع انها عارف من قبل شنو غلطتها ما اعتذرت كلش مني وانا الحين ماعندي صديقات قراب مني حيل صديقتي هي خالتي واختي بس صج خالتي كبيره بس هي صديقتي لان مالقيت ولا وحده من صديقاتي وفيه لي لاني وايد طيبه وما ارد احد منهم ما امدح نفسي بس هذا الصج لاني وايد طيبه للاسف يستغلون هالشي فيني والله يسامحهم .

وياريت رفيجتي هي ادش تقرا القصه بس انا ادري عمرها ماراح تعترف بغلطتها لان صارلها 3 سنين وطوفت الموضوع كنه عادي مع اني واجتها وقتلها غلطها وهذا طبعي اواجه الشخص بغلطته عشان انا ما ازعل عليه بس للاسف صج للاسف ما اعتذرت ولا اهتمت مع انها لاحظت ان علاقتنا اختربت من هذيج الحركه بس ماسوت شي

اسفه تكلمت واااااااااااايد بس قصتج خلتني اطلع الي بقلبي الي من زمان كنت خاشته لانه يضايقني مشكوره عالقصه ووايد حلوه وانا اول مره ادش القسم هذا او 2 مره بس انشالله ماراح اقطع دام القصص باهالروعه

 

[حياتي معاناة]

بـــــاركولــــي اقبلت اعتذاري - امووووووووووااح - هذي لج ياكوووكة

 

[qadsawia]

ثانكيوو اختي كوكه ع القصة ولا اروع منها
بس واايد مؤثرة بصراحه بجيتينا ووايد يكسر الخاطر
يا ليتني ما قريتها .. حراام والله ليش يموت .. استغفر الله العظيم
تسلم ايديج حبيبتي ع القصه بصراحه عمري ما قريت قصه احلى منها

 

[qadsawia]

1- القصة تينن والله عمري ما قريت احلى منها
2- اثرت فيني ومنو الي مااثرت فيه وبجتني
3-علمتني اني ماازعل على احد واذا زعلت الدنيا ماتسوى ولازم اعتذر لان الواحد مو ضامن عمره
ومثل ما قلت الدنيا ماتسوى عشان تخليني ما اعتذر
4- انا الحمد الله ولا مرة زعلت من رفيجاتي والي تغير ان شعوري زاد اتجاهها ب اني ما افكر حتى بس تفكير اني ازعل اي وحده من رفيجاتي ..
وشكوورة ع القصة الي ولا اروع ولا احلى منها بصراحه هذي القصة ولا بلاش صج قصه بمعنى الكلمة ..

 

[عــربــاويــة]

امبي والله بجيت من قلب

 

[كوووكه]

مشكوره حبيبتي وماتقصرين القصه واااااااااااااااااايد حلوه وبجتني : الرد على اسالتج ؟؟
1- القصه حدهاااااااااا حلوه وكلمة روعه شويه عليها .
2- اثرت فيني وبجتني بعد
3-الي تعلمتته من القصه ان اذا سامحت شخص غلطان بحقي اقوله اني سامحتك عشان من داخله يرتاح وما يقعد يفكر واذا صار شي له لاسمح الله عالاقل يكون مرتاح واصلن انا ما اعرف ازعل على احد و اذا جرحني انسان عزيز اسامحه بس عيبي اني ما ارجع مثل قبل وانسحب من حياته .
4- الصراحه انا زعلانه على اقرب رفيجه لي قصدي الي كانت قريبه لي انا سامحتها بس ما اقدر ارجع مثل قبل معاها لانه هي للحين مصره تغلط بحقي مع انها عارف من قبل شنو غلطتها ما اعتذرت كلش مني وانا الحين ماعندي صديقات قراب مني حيل صديقتي هي خالتي واختي بس صج خالتي كبيره بس هي صديقتي لان مالقيت ولا وحده من صديقاتي وفيه لي لاني وايد طيبه وما ارد احد منهم ما امدح نفسي بس هذا الصج لاني وايد طيبه للاسف يستغلون هالشي فيني والله يسامحهم .

وياريت رفيجتي هي ادش تقرا القصه بس انا ادري عمرها ماراح تعترف بغلطتها لان صارلها 3 سنين وطوفت الموضوع كنه عادي مع اني واجتها وقتلها غلطها وهذا طبعي اواجه الشخص بغلطته عشان انا ما ازعل عليه بس للاسف صج للاسف ما اعتذرت ولا اهتمت مع انها لاحظت ان علاقتنا اختربت من هذيج الحركه بس ماسوت شي

اسفه تكلمت واااااااااااايد بس قصتج خلتني اطلع الي بقلبي الي من زمان كنت خاشته لانه يضايقني مشكوره عالقصه ووايد حلوه وانا اول مره ادش القسم هذا او 2 مره بس انشالله ماراح اقطع دام القصص باهالروعه

ياحياتي والله ... ولو احنا خواتج وحياج الله في بيتج ومكانج ... والله يسامح الجميع انتي وكلي امرج لله وربج يحلها ... وصدقيني مايصح الا الصحيح يعني مردها بتعترف,,,,!!!

والله ونسني ردج وكلامج عن القصة ...واتمنى ماتحرمينا من مرورج ...

 

[كوووكه]

بـــــاركولــــي اقبلت اعتذاري - امووووووووووااح - هذي لج ياكوووكة

عالبركه ياعمري والله استانست :ggdw::ggdw::ggdw:,,, الله يديم المحبة بينكم يارب :eh_s(6):

 

[كوووكه]

ثانكيوو اختي كوكه ع القصة ولا اروع منها
بس واايد مؤثرة بصراحه بجيتينا ووايد يكسر الخاطر
يا ليتني ما قريتها .. حراام والله ليش يموت .. استغفر الله العظيم
تسلم ايديج حبيبتي ع القصه بصراحه عمري ما قريت قصه احلى منها

ياقلبي والله ,,, العفو حبيبتي ... وانا اشكرج على كلامج الحلو عن القصة ,,,
ولاتحرمينا من مرورج على قصصي الملطوشة ,,<<ههههههههههه

 

[كوووكه]

امبي والله بجيت من قلب

ياعمري والله ... حياج الله ...